Naʻá Ku Ako ke Falala kia Sihova

FAKAMATALA FAI ʻE JÁN KORPA-ONDO

Ko e 1942 ia, pea naʻe leʻohi au ʻe he kau sōtia Hungali ofi ki Kursk, Lūsia. Ko e kau pōpula kimautolu ʻa e ngaahi mafai ʻAkisesé ʻa ia naʻa nau faitau mo e kau Lūsiá lolotonga ʻa e Tau II ʻa Māmaní. Naʻe keli ʻa hoku faʻitoká, pea naʻe tuku mai kiate au ʻa e miniti ʻe hongofulu ke fili ai pe te u fakamoʻoni ʻi ha tohi ʻa ia naʻe pehē ai naʻe ʻikai te u toe hoko ko ha taha ʻo e Kau Fakamoʻoni ʻa Sihová. Ki muʻa ke u lave ʻo hoko atu ki he meʻa naʻe hokó, tuku ke u fakamatala atu ʻa e ʻuhinga naʻe iku ai ʻou ʻi aí.

NAʻE fāʻeleʻi au ʻi he 1904 ʻi he kiʻi kolo ko Zahor, ʻa ia ʻoku tuʻu he taimí ni ʻi he fakahahake ʻo Solovākiá. Hili ʻa e Tau I ʻa Māmaní, naʻe hoko ʻa Zahor ko e konga ʻo e fonua faʻu foʻou ʻo Sekisolovākiá. Ko homau koló naʻe ʻi ai ʻa e ngaahi ʻapi nai ʻe 200 mo e ongo siasi ʻe ua, ko e taha ko e Katolika Kalisí pea ko e taha ko e Lotu-Kalaviní.

Neongo naʻá ku ʻalu ki he Siasi Kalaviní, naʻá ku tataki ʻe au ha moʻui faʻiteliha fakaeʻulungaanga. Naʻe nofo ʻo ʻikai mamaʻo meiate au ha tangata ʻa ia naʻe kehe ʻaupito. ʻI he ʻaho ʻe taha naʻá ne kamata ai ha fetalanoaʻaki mo au peá ne ʻomai ai kiate au ha Tohitapu. Ko e ʻuluaki taimi ia naʻá ku ala ai ki he tohi ko iá. ʻI he taimi nai ko ení, ʻi he 1926, naʻá ku mali ai mo Barbora, pea taimi nounou mei ai naʻe ʻi ai ʻema ongo tamaiki ʻe toko ua, ko Barbora mo Ján.

Naʻá ku kamata leva ke lau ʻa e Tohitapú, ka naʻe lahi ʻa e ngaahi meʻa naʻe ʻikai ke mahino kiate au. Ko ia naʻá ku ʻalu ai ki heʻeku faifekaú ʻo kole kiate ia ke ne tokoniʻi au. “Ko e Tohitapú ia ki he kakai potó pē,” ko ʻene leá ia, “ʻoua te ke toe feinga koe ke mahinoʻi ia.” Peá ne fakaafeʻi leva ʻe ia au ke ma pele.

Hili iá naʻá ku ʻalu leva ki he tangata naʻá ne ʻomai kiate au ʻa e Tohitapú. Ko ha Tokotaha Ako Tohitapu ia, ko hono ui ia ʻo e Kau Fakamoʻoni ʻa Sihová ʻi he taimi ko iá. Naʻá ne fiefia ke tokoniʻi au, pea hili mei ai ha taimi naʻe kamata ke mahino kiate au. Naʻá ku tuku ai ʻeku inu ʻo fuʻu tōtuʻá pea kamata ha moʻui ʻulungaanga taau; naʻe aʻu ʻo kamata ke u talanoa ki he kakai kehé fekauʻaki mo Sihova. Naʻe aʻu ʻa e moʻoni ʻo e Tohitapú ki Zahor ʻi he konga ki muʻa ʻo e 1920 tupú, pea taimi nounou pē mei ai naʻe fokotuʻu ai ha kulupu longomoʻui ʻo e kau Ako Tohitapú.

Ka neongo ia, naʻe ʻi ai ha fakafepaki fakalotu mālohi. Naʻe fakatafoki ʻe he faifekau he feituʻú ʻa e tokolahi taha ʻo hoku fāmilí ʻo fakafepaki kiate au, ʻo taukaveʻi kuó u fakasesele. Ka naʻe kamata ke ʻi ai ha taumuʻa ia ʻo ʻeku moʻuí, pea naʻá ku fakapapauʻi maʻu ke tauhi ʻa e ʻOtua moʻoni ko Sihová. Ko ia, ʻi he 1930, naʻá ku fakahāhā ai ʻa ʻeku fakatapui kia Sihová pea papitaiso.

Kamata ʻo e Ngaahi ʻAhiʻahi Kakaha

ʻI he 1938, naʻe hoko ai homau feituʻú ʻo ʻi he malumalu ʻo e pule ʻa Hungalí, ʻa ia naʻe faʻahi mo Siamane he lolotonga ʻo e Tau II ʻa Māmaní. ʻI he aʻu mai ki he taimi ko iá naʻe toko 50 nai ʻa e Kau Fakamoʻoni ʻi homau koló ʻa ia naʻe siʻi hifo ʻi he kakai ʻe toko taha afé. Naʻe hokohoko atu pē ʻemau malangá neongo ko e fai peheé naʻe fakatuʻutāmaki ki heʻemau moʻuí mo e tauʻatāiná.

ʻI he 1940, naʻe ui ai au ke kau ki he kau tau Hungalí. Ko e hā nai te u faí? Sai, kuó u ʻosi lau ʻa e ngaahi kikite ʻa e Tohitapú ʻo fekauʻaki mo e kakai ʻoku nau tuki ʻenau ngaahi meʻa taú ki he ngaahi meʻangāue ʻo e melinó, pea naʻá ku ʻilo ʻe ʻi ai ʻa e taimi ʻe fakangata ai ʻe he ʻOtuá ʻa e tau kotoa pē ʻi he māmaní. (Sāme 46:9; Aisea 2:4) Ko ia, naʻá ku hoko ai ʻo fehiʻa ʻi he taú, pea naʻá ku fili ai ke ʻoua ʻe kau ʻi he sōtiá, tatau ai pē pe ko e hā ʻe iku ki aí.

Naʻe tautea au ke tuku pōpula ʻi he māhina ʻe 14 pea ngāueʻi ʻa hoku tauteá, ʻi Pécs, Hungali. Naʻe ʻi he pilīsone tatau ʻa e Kau Fakamoʻoni kehe ʻe toko nima, pea naʻa mau houngaʻia ʻi he hoko ʻo lava ke mau feohí. Kae kehe, ʻi ha taimi, naʻá ku ʻi he loki tauteá ai ʻo haʻi sēini ʻa hoku ongo vaʻé. ʻI he taimi naʻa mau fakafisi ai ke fai ʻa e ngāue naʻe felāveʻi mo e ngāue kotoa ki he taú, naʻe haha kimautolu. Pehē foki, naʻe fakamālohiʻi kimautolu ke tuʻu fakasōtia ʻi he ʻahó kotoa, tuku kehe pē ʻa e houa ʻe ua he hoʻataá. Ko e ʻahiʻahi kakahá ni naʻe hokohoko atu ia ʻi ha ngaahi māhina. Ka neongo ia naʻa mau fiefia pē koeʻuhi naʻa mau maʻu ha konisēnisi maʻa ʻi he ʻao ʻo hotau ʻOtuá.

Ko e Tuʻunga-Lea Fekauʻaki mo e Fakangaloku

ʻI he ʻaho ʻe taha naʻe haʻu ai ha kulupu ko e kau pātele Katolika ʻe toko 15 ʻo feinga ke ʻai kimautolu ke mau tui naʻe mahuʻinga ke mau poupouʻi ʻa e ngāue kotoa ki he taú ʻaki ʻemau hū ki he sōtiá. Lolotonga ʻa e fetalanoaʻakí naʻa mau tala ange: “Kapau ʻe lava ke mou fakamoʻoniʻi mai mei he Tohitapú ʻoku taʻefaʻamate ʻa e soulú pea te mau ō ki hēvani kapau te mau mate ʻi he taú, te mau hū ki he sōtiá.” Ko e moʻoni, naʻe ʻikai lava ke nau fakamoʻoniʻi ia, pea naʻe ʻikai te nau loto ke toe hoko atu ʻa e fetalanoaʻakí.

ʻI he 1941 naʻe ngata ai ʻa hoku tautea tuku pilīsoné, pea naʻá ku fakatuʻamelie atu ke fakataha mo hoku fāmilí. Ka naʻe ʻikai, naʻe ʻave haʻi sēiniʻi au ki ha nofoʻanga fakakautau ʻi Sárospatak, Hungali. ʻI heʻemau aʻu atú, naʻe ʻomai ai ha faingamālie kiate au ke tukuange ai. “Ko e meʻa pē ʻoku fiemaʻu ke ke faí,” ko e tala mai ia kiate aú, “ko e fakamoʻoni ʻi he palōmesi ko eni te ke totongi mai ʻa e pengö ʻe 200 ʻi hoʻo foki ki ʻapí.”

“ʻE malava fēfē iá?” ko ʻeku ʻeke angé ia. “Ko hoʻomou fiemaʻu ʻa e paʻangá ki he hā?”

“ʻI he totongi mai ʻa e paʻangá,” ko hono tala mai ia kiate au, “te ke maʻu ai ha tohi fakamoʻoni naʻe ʻikai te ke paasi ʻi he sivi fakafaitoʻo ki he sōtiá.”

Naʻe ʻomai ʻe he meʻá ni ha fili faingataʻa kiate au. Laka hake ʻi he taʻu ʻe taha, naʻá ku faingataʻaʻia ai ʻi hano ngaohi taʻeʻofaʻi; naʻe fakaʻau ke u foʻi. ʻI he taimi ko ení, kau ka loto-lelei ke totongi ha paʻanga, ʻe lava ke u tauʻatāina. “Te u toki fakakaukau ki ai,” ko ʻeku lea leʻo-siʻi angé ia.

Ko e hā ʻa e fili te u faí? Naʻá ku maʻu ʻa e uaifi mo e fānau ke fakakaukau ki ai. Ko ia, ʻi he taimi nai ko ení naʻá ku maʻu ha tohi mei ha kaungā-Kalisitiane ʻa ia naʻá ne ʻomai ai ha fakalototoʻa. Naʻá ne lave ai ki he Hepelu 10:​38, ʻa ia naʻe lave ai ʻa Paula ki he folofola ʻa Sihová: “Ko e tangata maʻoniʻoni aʻaku, te ne moʻui ʻi he tui: ka ʻo kapau te ne holomui, ʻe ʻikai hōifua hoku laumalie ʻiate ia.” Taimi nounou pē hili iá, naʻe talanoa mai ha ongo ʻōfisa Hungali mei he nofoʻanga sōtiá kiate au, ʻo pehē ʻe he tokotaha: “ʻOku ʻikai te ke ʻiloʻi ʻe koe ʻa e lahi ʻo ʻemau tokaʻi koe ʻi hoʻo poupouʻi mātuʻaki mālohi ʻa e ngaahi tefitoʻi moʻoni ʻi he Tohitapú! ʻOua ʻe foʻi!”

ʻI he ʻaho hono hokó naʻá ku ʻalu ai ki he faʻahinga ko ia naʻa nau tuʻuaki mai kiate au ʻa ʻeku tauʻatāiná ki he pengö ʻe 200 ʻo pehē ange: “Koeʻuhi ko e ʻOtua ko Sihová naʻá ne fakaʻatā ke tuku pōpula aú, te ne toe tokangaʻi foki ʻa hoku tukuangé. ʻE ʻikai te u totongi ʻe au hoku tukuangé.” Ko ia, naʻe tauteaʻi au ki he taʻu ʻe hongofulu ʻi pilīsone. Ka naʻe ʻikai ko e ngataʻanga pē ia ʻo e ngaahi feinga ke ʻai au ke fakangalokú. Naʻe tuʻuaki mai ʻe he fakamaauʻangá ke tukuange au kapau te u loto-lelei ke ngāue ʻi he sōtiá ʻi he māhina pē ʻe ua, pea ʻe ʻikai fiemaʻu ia ke u toʻo ha meʻatau! Naʻá ku fakafisingaʻi mo e tuʻuaki ko iá foki, pea naʻe kamata ai ʻa hoku tautea tuku pōpulá.

Fakautuutu ʻa e Fakatangá

Naʻe toe ʻave au ki he pilīsone ʻi Pécs. ʻI he taimi ko ení naʻe aʻu ʻo toe kakaha ange ʻa e fakamamahí. Naʻe haʻi ki mui hoku ongo nimá, pea naʻe tautau ʻaki ia au ʻi he houa nai ʻe ua. Ko hono ikuʻangá, naʻe homo fakatouʻosi hoku ongo umá. Naʻe toutou fai ʻa e fakamamahi peheé ʻo laka hake he vahaʻa taimi ko e māhina nai ʻe ono. Te u fakamālō pē kia Sihova ʻi he ʻikai te u foʻí.

ʻI he 1942 ko ha kulupu ʻo kimautolu​—ʻa e kau pōpula fakapolitikalé, kau Siú, mo e toko 26 ʻo e Kau Fakamoʻoni ʻa Sihová​—naʻe ʻave ki he kolo ko Kursk ki ha feituʻu naʻe nofoʻi ʻe he kau tau Siamané. Naʻe tuku atu kimautolu ki he kau Siamané, pea naʻa nau tuku ʻa e kau pōpulá ke ngāue ʻo fetuku meʻakai, mahafu, mo e vala ki he kau sōtia ʻi he laine taú. Ko kimautolu Kau Fakamoʻoní naʻa mau fakafisingaʻi ʻa e ngāué koeʻuhi he naʻá ne maumauʻi ʻemau tuʻu-ʻatā faka-Kalisitiané. Ko hono olá, naʻe fakafoki kimautolu ki he kau Hungalí.

Faifai atu pē, naʻe tuku kimautolu ki he pilīsone fakalotofonuá ʻi Kursk. ʻI ha ngaahi ʻaho ʻe niʻihi naʻe haha kimautolu tuʻo tolu he ʻaho ʻaki ʻa e ngaahi pōvai leta. Naʻe tukiʻi au ʻi hoku manifí peá u tō ki lalo. ʻI hono tā aú, naʻá ku fakakaukau, ‘ʻOku ʻikai ke fuʻu faingataʻa ʻa e maté.’ Naʻe ongonoa kotoa hoku sinó, ko ia naʻe ʻikai lava ke u ongoʻi ha meʻa. Naʻe hala fakaʻaufuli ke ʻomai ha meʻa ke mau kai ʻo feʻunga mo e ʻaho ʻe tolu. Naʻe ʻave leva kimautolu ki he fakamaauʻangá, pea tautea mate ʻa e toko ono. ʻI he taimi naʻe fakahoko ai ʻa e tauteá, naʻe toe homau toko 20.

Ko e ngaahi ʻahiʻahiʻi ʻo e tuí ne hokosia lolotonga ʻa e ngaahi ʻaho ko ia ʻi Kursk ʻi ʻOkatopa 1942 ko e ʻahiʻahi lahi taha ia kuó u fehangahangai mo iá. Naʻe fakamatalaʻi lelei ʻemau ongoʻí ʻe Tuʻi Sihosafate ʻo e kuonga muʻá ʻi he taimi ne fehangahangai ai hono kakaí mo e ngaahi tō kehekehe lahi fakaʻulia: “ʻOku ʻikai ha ivi ʻiate kimautolu ke tali ʻa e fuʻu hosite lahi ni ʻoku haʻu ke tauʻi kimautolu; pea ʻoku ʻikai te mau ʻilo pe ko e ha te mau fai: ka ʻoku hanga homau mata ki he ʻAfiona.”​—2 Kalonikali 20:12.

Ko e toko 20 ʻo kimautolú naʻe ʻave ke mau keli homau faʻitoka anga-mahení, ʻo leʻohi ʻe he kau sōtia Hungali ʻe toko 18. ʻI he ʻosi ʻemau kelí, naʻe tala mai ʻoku tuku mai ʻa e miniti ʻe hongofulu ke fakamoʻoni ai ʻi ha tohi, ʻa ia ʻoku lau peheni ʻa hono konga: “Ko e akonaki ʻa e Kau Fakamoʻoni ʻa Sihová ʻoku hala. ʻE ʻikai te u toe tui ki ai pe poupouʻi ia. Te u faitau maʻá e fonua ʻo Hungalí . . .  ʻOku ou fakapapauʻiʻaki ʻeku fakamoʻoní ʻoku ou kau ki he Siasi Katolika Lomá.”

Hili ʻa e miniti ʻe hongofulú naʻe haʻu ʻa e tuʻutuʻuni: “Afe toʻomataʻu! Laka ki he faʻitoká!” Pea hoko mai leva ʻa e fekau: “Ongo pōpula fika ʻuluakí mo e tolú tuʻu ki he loto luó!” Naʻe toe tuku ange ki he toko uá ni ha toe miniti ʻe hongofulu ke fakamoʻoni ai he tohí. Naʻe kōlenga mai ʻa e tokotaha ʻo e kau sōtiá: “Tukuange hoʻomo tuí ka mo haʻu mei he faʻitoká!” Naʻe ʻikai foaki ʻe ha taha ha lea. Ko ia naʻe fanaʻi fakatouʻosi leva kinaua ʻe he ʻōfisa pulé.

“Fēfē ʻa e toenga ʻo kinautolú?” ko e ʻeke ange ia ʻe ha sōtia ki he ʻōfisa pulé.

“Haʻi kinautolu,” ko ʻene talí ia. “Te tau fakamamahiʻi lahi ange kinautolu pea fanaʻi kinautolu ʻi he ono pongipongí.”

Fakafokifā pē naʻá ku ilifia, ʻo ʻikai koeʻuhi te u mate, ka ʻe ʻikai malava ke u kātekina ʻa e fakamamahí pea hoko ai haʻaku fakangaloku. Ko ia naʻá ku manga atu ki muʻa ʻo pehē ange: “Tangataʻeiki, kuo mau faihala tatau pē mo homau ongo tokoua kuo mou toki fanaʻí. Ko e hā ʻoku ʻikai te mou fanaʻi ai foki mo kimautolú?”

Ka naʻe ʻikai te nau fai ia. Naʻe haʻi homau ongo nimá ki homau tuʻá. Pea tautau kimautolu ʻaki homau ongo nimá. ʻI heʻemau pongiá, naʻa nau pī vaiʻi kimautolu. Naʻe fakalilifu ʻa e langá koeʻuhi he naʻe fakahomoki homau umá ʻe he mamafa ʻo homau sinó. Naʻe hokohoko atu ʻa e fakamamahí ni ʻi he houa nai ʻe tolu. Pea fakafokifā pē naʻe hoko mai leva ha tuʻutuʻuni ke ʻoua naʻa toe fana ha taha ʻo e Kau Fakamoʻoni ʻa Sihová.

Ko ha Hiki ki he Hahaké​—Pea Hola

ʻI he uike ʻe tolu ki mui ai naʻa mau laka fakakulupu ai ʻi ha ngaahi ʻaho siʻi kae ʻoua kuo mau aʻu ki he ongo kauvai ʻo e Vaitafe Don. Naʻe tala mai ʻe he faʻahinga naʻa nau pulé ʻe ʻikai ke fakafoki moʻui mai kimautolu. Lolotonga ʻa e ʻahó, naʻe tuku mai ʻa e ngāue noaʻia kiate kimautolu, ko hono keli ha ngaahi luo pea toe tanu kinautolu. ʻI he efiafí, naʻe ʻi ai homau taimi tauʻatāina pau ke luelue holo ai.

ʻI heʻeku sio atu ki aí, naʻe ʻi ai ha faingamālie ʻe ua. ʻE lava ke mau mate tonu ai, pe ko ʻemau hola nai mei he kau Siamané ʻo tukulolo ki he kau Lūsiá. Ko e toko tolu pē ʻo kimautolu naʻe fili ke feinga hola ʻo kolosi he Vaitafe Don ʻa ia kuo maka he ʻaisí. ʻI Tīsema 12, 1942, naʻa mau lotu ai kia Sihova pea mau mavahe. Naʻa mau aʻu ki he laine tau ʻa e kau Lūsiá pea tuku leva kimautolu ki ha kemi pōpula fakataha mo e kau pōpula nai ʻe toko 35,000. ʻI he aʻu ki he faʻahitaʻu failaú ko e toko 2,300 pē nai ʻo e kau pōpulá naʻe kei moʻuí. Naʻe mate ʻa e toengá ko e fiekaiá.

Tauʻatāina kae Toe Fakamamahi Lahi Ange

Naʻá ku hao ʻi he toenga ʻo e taú, ʻo kau ai ʻa e ngaahi māhina ʻe niʻihi hili ʻene ʻosí, ʻi he tuʻunga ko ha pōpula Lūsia. Naʻe faai pē ʻou toki aʻu ki ʻapi, ki Zahor, ʻi Nōvema 1945. Naʻe ʻi ha tuʻunga fakaʻofa ʻa ʻemau fāmá, ko ia ai, naʻe pau ke u toe kamata foʻou. Naʻe ngāueʻi ʻe hoku uaifí mo e fānaú ʻa e fāmá lolotonga ʻa e taú, ka ʻi ʻOkatopa 1944, ʻi he fakaofiofi mai ʻa e kau Lūsiá, naʻa nau fetukutuku ki he hahaké. Ko e meʻa kotoa pē naʻa mau maʻú naʻe kaihaʻasia ʻi he taú.

Ko e kovi tahá, ʻi heʻeku foki atu ki ʻapí, naʻe puke lahi ʻaupito ʻa hoku uaifí. ʻI Fepueli 1946, naʻá ne mālōlō ai. Naʻá ne taʻu 38 pē. Naʻá ma maʻu pē ha taimi mātuʻaki siʻisiʻi ke fiefia ai ʻi heʻema toe feʻiloakí hili ia ʻa e taimi lōloa mo faingataʻa laka hake he taʻu ʻe nimá ʻo ʻema māvae.

Naʻá ku maʻu ʻa e fakafiemālie ʻi he haʻohaʻonga ʻo hoku fanga tokoua fakalaumālié, ʻi he maʻu ʻa e ngaahi fakatahá mo e kau ʻi he ngāue fakafaifekau fale ki he falé. ʻI he 1947, naʻá ku malava ai ʻo nō ha paʻanga ke folau ai ki Brno, ko ha fononga ʻi he kilomita nai ʻe 400, ke maʻu ha fakataha-lahi. ʻI ai he lotolotonga ʻo hoku fanga tokoua Kalisitiané, ʻo kau ai a Nathan H. Knorr, ko e palesiteni ia ʻo e Sōsaieti Taua Leʻo Tohitapu mo e Tuleki ʻo e taimi ko iá, naʻá ku maʻu ai ʻa e fakanonga mo e fakalototoʻa.

Naʻe ʻikai ke fuoloa ʻemau fiefia ʻi he tauʻatāina he ʻosi ʻa e taú. ʻI he 1948 naʻe kamata ai ke lōmekina kimautolu ʻe he kau Kominiusí. Ko e tokolahi ʻo e fanga tokoua naʻa nau takimuʻa ʻi he ngāue ʻa e Kau Fakamoʻoni ʻa Sihová ʻi Sekisolovākiá naʻe puke ʻo fakahū ʻi he 1952, pea naʻe tuku mai kiate au ʻa e fatongia ko hono tokangaʻi ʻa e ngaahi fakatahaʻangá. ʻI he 1954, naʻe toe puke ai mo au ʻo tautea, pea naʻe tuku pōpula au ʻi he taʻu ʻe fā. Ko hoku fohá ʻa Ján, mo hono foha ko Juraj naʻe toe tuku pōpula foki ʻi heʻena tauhi maʻu ʻena tuʻu-ʻatā faka-Kalisitiané. Naʻá ku nofo ʻi he taʻu ʻe ua ʻi he pilīsone Pankrác ʻa e puleʻangá ʻi Prague. Naʻe fai ha talaʻofa fakapuleʻanga ʻi he 1956, pea naʻe tukuange ai au.

Faifai Pē ʻo Tauʻatāina!

Faifai atu pē, ʻi he 1989, naʻe ʻikai toe maʻunimā ai ʻe he Kominiusí ʻa Sekisolovākia, pea naʻe lēsisita fakalao leva ai ʻa e ngāue ʻa e Kau Fakamoʻoni ʻa Sihová. Ko ia, naʻa mau tauʻatāina leva ke fakatahataha fakataha pea ke malanga fakahāhā. ʻI he aʻu mai ki he taimi ko iá naʻe meimei aʻu ki he toko teaú ʻa e Kau Fakamoʻoni ʻi Zahor, ʻa ia naʻe ʻuhingá ko e toko 1 nai ʻi he toko 10 kotoa pē ʻi he koló ko ha Fakamoʻoni. ʻI he ngaahi taʻu siʻi kuohilí, naʻa mau langa ai ha Fale Fakatahaʻanga ʻatā mo fakaʻofoʻofa ʻi Zahor, fakataha mo ha nofoʻanga feʻunga ki he toko 200 nai.

ʻOku ʻikai te u kei loko moʻui lelei, ko ia ʻoku ʻave au ʻe he fanga tokouá ki he Fale Fakatahaʻangá. ʻOku ou maʻu ʻa e fiefiá ʻi heʻeku ʻi aí mo fiefia ʻi hono fai ʻa e ngaahi poupou ʻi he Ako Taua Leʻo. ʻOku tautefito ʻeku fiefiá ke sio ki he kau fakafofonga ʻo e toʻutangata ʻe tolu ʻo hoku fāmilí ʻoku nau tauhi kia Sihova, ʻo kau ai ʻa e fanga makapuna ʻe niʻihi. Ko e taha ʻo kinautolu naʻe ngāue ko ha ʻovasia fefonongaʻaki ʻa e Kau Fakamoʻoni ʻa Sihová ʻi Sekisolovākia ʻo aʻu ki he taimi naʻe toki taʻofi ai ia ʻe hono ngaahi fatongia fakafāmilí mei hono aʻusia ʻa e taimi-tēpile ko iá.

ʻOku ou fakamālō kia Sihova ʻi hono fakaivimālohiʻi au lolotonga ʻa e ngaahi taimi lahi ʻo e ʻahiʻahí. ʻI he hanganaki fakahanga ʻeku tokangá kiate iá​—“ʻo . . . sio ki he Tuʻi Taʻehamai”​—ko e meʻa ia ʻokú ne fakatolonga aú. (Hepelu 11:27) ʻIo, kuó u ongoʻi ʻa hono toʻukupu faifakahaofi māfimafí. Ko hono ʻuhinga ia, naʻa mo e taimí ni, ʻoku ou hokohoko atu ʻa e feinga ke ʻi ai ʻi he ngaahi fakataha ʻa e fakatahaʻangá pea ke kau ʻi hono talaki ʻa hono huafá ʻi he ngāue fakafaifekau maʻá e kakaí ki he lahi taha ʻo ʻeku malavá.

[Fakatātā ʻi he peesi 25]

Ko e Fale Fakatahaʻanga ʻi Zahor

[Fakatātā ʻi he peesi 26]

ʻOku ou houngaʻia ʻi he monū ko e poupou ʻi he Ako Taua Leʻo