Ko e Hā ʻOku Fakaʻatā Ai ʻe he ʻOtuá ʻa e Faingataʻá?

1, 2. Ko e hā ʻa e faʻahinga faingataʻa ʻoku fehangahangai mo e kakaí he ʻaho ní, ʻo tataki atu ai ʻa e tokolahi ke nau ʻeke ʻa e ongo fehuʻi ko e hā?

HILI ha tau fakamanavahē ʻi ha fonua ʻe taha ʻa ia naʻe haveki ʻe he taú, naʻe tanu ai ʻa e laui afe ʻo e kakai fefine mo e fānau siviliane ʻa ia naʻa nau maté ʻi ha fuʻu luo lahi ʻa ia naʻe fokotuʻu takai holo ai ha ngaahi fakaʻilonga. Ko e fakaʻilonga taki taha naʻe tongi ai eni: “Ko e hā hono ʻuhingá?” ʻI he taimi ʻe niʻihi ko e fehuʻi fakamamahi tahá ia. ʻOku ʻeke ia ʻe he kakaí ʻi he loto-mamahi ʻi he taimi ʻoku toʻo ai ʻi he taú, fakatamakí, mahakí, pe faihiá ʻa e faʻahinga tonuhia ʻoku nau ʻofa aí, fakaʻauha honau ʻapí, pe ʻomai kiate kinautolu ʻa e faingataʻa taʻealafakamatalaʻi ʻi he ngaahi founga kehe. ʻOku nau loto ke ʻiloʻi ʻa e ʻuhinga ʻoku hoko ai kiate kinautolu ʻa e ngaahi meʻa fakamamahi peheé.

² Ko e hā ʻoku fakaʻatā ai ʻe he ʻOtuá ʻa e faingataʻá? Kapau ʻoku mālohi fakaʻaufuli ʻa Sihova ko e ʻOtuá, ʻofa, poto mo faitotonu, ko e hā ʻoku fonu pehē ai ʻa e māmaní ʻi he tāufehiʻá mo e fakamaau taʻetotonú? Kuó ke fifili ʻi ha taimi ʻiate koe pē ʻo fekauʻaki mo e ngaahi meʻá ni?

3, 4. (a) Ko e hā ʻokú ne fakahaaʻi ʻoku ʻikai hala ke ʻeke pe ko e hā ʻa e ʻuhinga ʻoku fakaʻatā ai ʻe he ʻOtuá ʻa e faingataʻá? (e) ʻOku anga-fēfē ʻa e ongoʻi ʻa Sihova fekauʻaki mo e fulikivanú pea mo e faingataʻá?

³ ʻOku hala ke ʻeke pe ko e hā ʻoku fakaʻatā ai ʻe he ʻOtuá ʻa e faingataʻá? ʻOku hohaʻa ʻa e niʻihi naʻa ko hono ʻeke ha fehuʻi peheé ʻoku ʻuhinga ai iá ʻoku ʻikai te nau maʻu ʻa e tui feʻunga, pe ʻoku nau fakahāhā ai ʻa e taʻeʻapasia ki he ʻOtuá. Kae kehe, ʻi hono lau ʻo e Tohi Tapú, te ke ʻiloʻi ai ko e kakai faitōnunga mo manavahē-ʻOtuá naʻe ʻi ai ʻenau ngaahi fehuʻi meimei tatau. Ko e fakatātaá, naʻe ʻeke ʻe he palōfita ko Hapakuké kia Sihova: “Ko e ha ʻoku ke tuku ai ke u sio ki he kovi? pea ke moʻu vakaia ʻe koe ʻa e fakamamahi? Seuke, ʻoku feʻao mo au ʻa e fakamalohi mo e fakaehaua: pea ʻoku hoko ʻa e fepaki, pea ʻoku tupu ʻa e vakovi”?—Hapakuke 1:3.

⁴ Naʻe ngāhiʻi ʻe Sihova ʻa e palōfita faitōnunga ko Hapakuké ʻi heʻene ʻeke ʻa e ngaahi fehuʻi peheé? ʻIkai. ʻI hono kehé, naʻe fakakau ʻe he ʻOtuá ʻa e ngaahi lea loto-moʻoni ʻa Hapakuké ʻi he lēkooti fakamānavaʻi ʻo e Tohi Tapú. Naʻe toe tokoniʻi ia ʻe he ʻOtuá ke ne maʻu ha mahino māʻalaʻala ange ʻo e ngaahi meʻá pea ke ne maʻu ai ʻa e tui lahi ange. ʻOku finangalo ʻa Sihova ke ne fai ʻa e meʻa tatau maʻau. Manatuʻi, ʻoku akoʻi ʻe he Tohi Tapú ʻo pehē “ʻoku ne mamahiʻi kimoutolu.” (1 Pita 5:7) ʻOku fehiʻa ʻa e ʻOtuá ʻi he fulikivanú mo e faingataʻa ʻoku tupu mei aí ʻo laka mamaʻo ange ia ʻi he fehiʻa ʻa e tangatá. (Aisea 55:​8, 9) Ko e hā leva ʻoku lahi fau ai ʻa e faingataʻá ʻi he māmaní?

 5. Ko e hā ʻa e ngaahi ʻuhinga ʻoku ʻomai ʻi he taimi ʻe niʻihi ke fakamatalaʻi ʻaki ʻa e faingataʻaʻia ʻa e tangatá, ka ko e hā ʻoku akoʻi ia ʻe he Tohi Tapú?

⁵ Kuo ʻalu ʻa e kakai ʻo e ngaahi lotu kehekehe ki heʻenau kau takí mo e kau faiako fakalotú ke ʻeke ʻa e ʻuhinga ʻoku lahi fau ai ʻa e faingataʻá. ʻOku faʻa hoko ko e talí ʻa e pehē ko ia ko e faingataʻá ko e finangalo ia ʻo e ʻOtuá pea naʻá ne fakapapauʻi fuoloa ʻi he kuohilí ʻa e meʻa kotoa pē ʻe hokó, ʻo kau ai ʻa e ngaahi meʻa fakamamahí. ʻOku tala ki he tokolahi ko e ngaahi founga ʻa e ʻOtuá ʻoku misiteli pe ʻokú ne ʻomai ʻa e maté ki he kakaí—naʻa mo e fānaú⁠—koeʻuhí ke lava ai ʻo ne maʻu kinautolu ʻi hēvani fakataha mo ia. Neongo ia, hangē ko ia kuó ke akó, ko Sihova ko e ʻOtuá ʻoku ʻikai ʻaupito te ne fakatupunga ʻa e meʻa ʻoku koví. ʻOku pehē ʻe he Tohi Tapú: “Mole ke mamaʻo ʻa e fai angahala ʻa Ela; mo e faikovi ʻa Satai”!—Siope 34:10.

 6. Ko e hā ʻoku fai ai ʻe he kakai tokolahi ʻa e fehālaaki ʻo hono tukuakiʻi ʻa e ʻOtuá ki he faingataʻa ʻi he māmaní?

⁶ ʻOkú ke ʻiloʻi ʻa e ʻuhinga ʻoku fai ai ʻe he kakaí ʻa e fehālaaki ʻo hono tukuakiʻi ʻa e ʻOtuá ki he faingataʻa kotoa ʻi he māmaní? ʻI he ngaahi tuʻunga lahi, ʻoku nau tukuakiʻi ʻa e ʻOtua Māfimafi-Aoniú koeʻuhí ʻoku nau fakakaukau ko ia ʻa e pule moʻoni ʻo e māmani ko ení. ʻOku ʻikai te nau ʻiloʻi ʻa e foʻi moʻoni faingofua kae mahuʻinga ʻa ē ʻoku akoʻi ʻe he Tohi Tapú. Naʻá ke ako ʻa e moʻoni ko iá ʻi he Vahe 3 ʻo e tohí ni. Ko e pule moʻoni ʻo e māmani ko ení ko Sētane ko e Tēvoló.

7, 8. (a) ʻOku anga-fēfē ʻa e tapua mei he māmaní ʻa e ʻulungāanga ʻo hono pulé? (e) Kuo anga-fēfē ʻa e tānaki atu ʻa e taʻehaohaoa fakaetangatá mo e “hokonoa . . . ʻa e faingamalie mo e tuʻutamaki” ki he faingataʻá?

⁷ ʻOku fakahaaʻi mahino ʻe he Tohi Tapú: “Ko hono kotoa ʻo mamani ʻoku ʻi he nima ʻo e Fili.” (1 Sione 5:19) ʻI hoʻo fakakaukau atu fekauʻaki mo iá, ʻikai ʻoku ʻuhinga lelei ia? ʻOku tapua atu ʻi he māmani ko ení ʻa e ʻulungāanga ʻo e meʻamoʻui laumālie taʻehāmai ʻa ia ʻokú ne “kākāʻi ʻa mamani kātoa.” (Fakahā 12:9) ʻOku fonu tāufehiʻa, kākā mo anga-fakamamahi ʻa Sētane. Ko ia ai ko e māmaní, ʻi he malumalu ʻo ʻene tākiekiná, ʻoku fonu ia ʻi he tāufehiʻá, kākaá mo e anga-fakamamahí. Ko e ʻuhinga ia ʻe taha ʻoku lahi fau ai ʻa e faingataʻá.

⁸ Ko ha ʻuhinga hono ua ʻoku lahi fau ai ʻa e faingataʻá koeʻuhí hangē ko ia naʻe lāulea ki ai ʻi he Vahe 3, ko e faʻahinga ʻo e tangatá kuo nau taʻehaohaoa mo angahalaʻia talu pē mei he angatuʻu ʻi he ngoue ko ʻĪtení. ʻOku hehema ʻa e tangata angahalaʻiá ke feinga mālohi ki he tuʻunga pulé pea ʻoku iku eni ki he ngaahi tau, fakafeʻātungia mo e faingataʻa. (Koheleti 4:1; 8:9) Ko ha ʻuhinga hono tolu ki he faingataʻá ko e “hokonoa . . . ʻa e faingamalie mo e tuʻutamaki.” (Koheleti 9:11) ʻI ha māmani ʻoku ʻikai ʻi ai ʻa Sihova ko hono Pule fakaemaluʻí, ʻoku faingataʻaʻia nai ai ʻa e kakaí koeʻuhi ko e hoko ʻo nau ʻi he feituʻu hala ʻi he taimi hala.

 9. Ko e hā ʻoku lava ai ke tau fakapapauʻi ʻoku maʻu ʻe Sihova ha ʻuhinga lelei ki hono fakaʻatā ʻa e faingataʻá ke hokohoko atú?

⁹ ʻOku fakafiemālie kiate kitautolu ke ʻiloʻi ʻoku ʻikai fakatupunga ʻe he ʻOtuá ʻa e faingataʻá. ʻOku ʻikai ke tupu meiate ia ʻa e ngaahi taú, ko e ngaahi faihiá, ko e fakafeʻātungiá, pe naʻa mo e ngaahi fakatamaki fakanatula ʻa ia ʻoku nau fakatupunga ʻa e kakaí ke nau faingataʻaʻiá. Neongo ia, ʻoku fiemaʻu ke tau ʻiloʻi, Ko e hā ʻoku fakaʻatā ai ʻe Sihova ʻa e faingataʻa kotoa ko ení? Kapau ko e Māfimafi-Aoniú ia, ʻokú ne maʻu ʻa e mālohi ke taʻofi ia. Ko e hā leva ʻokú ne fakatoupīkoi aí? Ko e ʻOtua ʻofa kuo tau hoko ʻo ʻiloʻí kuo pau pē ʻoku ʻi ai ʻene ʻuhinga lelei.—1 Sione 4:8.

10. Ko e hā naʻe fehuʻia ʻe Sētané, pea naʻe anga-fēfē?

¹⁰ Ke ʻiloʻi ʻa e ʻuhinga ʻoku fakaʻatā ai ʻe he ʻOtuá ʻa e faingataʻá, ʻoku fiemaʻu ke foki ʻetau fakakaukaú ki he taimi naʻe kamata ai ʻa e faingataʻá. ʻI he taimi naʻe tataki ai ʻe Sētane ʻa ʻĀtama mo ʻIvi ke na talangataʻa kia Sihová, naʻe langaʻi hake ai ha fehuʻi mahuʻinga. Naʻe ʻikai ke fehuʻia ʻe Sētane ʻa e mālohi ʻo Sihová. Naʻa mo Sētane ʻokú ne ʻiloʻi ʻoku ʻikai ha fakangatangata ki he mālohi ʻo Sihová. ʻI hono kehé, naʻe fehuʻia ʻe Sētane ʻa e totonu ke pule ʻa Sihová. ʻI hono ui ʻa e ʻOtuá ko ha tokotaha loi ʻokú ne taʻofi ha lelei mei he faʻahinga ʻokú ne pule ki aí, naʻe tukuakiʻi ai ʻe Sētane ko Sihová ko ha pule kovi. (Senesi 3:​2-5) Naʻe fakahuʻunga ʻe Sētane ʻe lelei ange ʻa e faʻahinga ʻo e tangatá ʻi he ʻikai kau ki ai ʻa e pule ʻa e ʻOtuá. Ko hano ʻohofi eni ʻo e tuʻunga-hau ʻo Sihová, ʻa ʻene totonu ke pulé.

11. Ko e hā naʻe ʻikai ke fakaʻauha ai pē ʻe Sihova ʻa e kau angatuʻú ʻi he ngoue ko ʻĪtení?

¹¹ Naʻe angatuʻu ʻa ʻĀtama mo ʻIvi kia Sihova. Naʻe hangē naʻá na pehē: ‘ʻOku ʻikai te ma fiemaʻu ʻa Sihova ke ne hoko ko homa Pule. ʻE lava pē ke ma fili maʻamaua ʻa e meʻa ʻoku tonú mo e meʻa ʻoku halá.’ ʻE lava fēfē ke fakaleleiʻi ʻe Sihova ʻa e ʻīsiu ko iá? ʻE lava fēfē ke ne akoʻi ki he meʻamoʻui maʻu ʻatamai kotoa pē naʻe hala ʻa e kau angatuʻú pea ko ʻEne foungá ʻoku lelei taha moʻoní? ʻE pehē nai ʻe ha taha naʻe totonu ke hanga ai pē ʻe he ʻOtuá ʻo fakaʻauha ʻa e kau angatuʻú pea fai ha kamata foʻou. Ka naʻe fakahaaʻi ʻe Sihova ʻa ʻene taumuʻa ke fakafonu ʻa e māmaní ʻaki ʻa e fānau ʻa ʻĀtama mo ʻIví pea naʻá ne loto ke nau moʻui ʻi ha palataisi fakaemāmani. (Senesi 1:28) ʻOku fakahoko maʻu pē ʻe Sihova ʻa ʻene ngaahi taumuʻá. (Aisea 55:​10, 11) Tuku kehe ia, ko hono toʻo ʻosi ʻa e kau angatuʻu ʻi ʻĪtení ne ʻikai mei tali ai ʻa e fehuʻi ko ia ne langaʻi hake fekauʻaki mo e totonu ʻa Sihova ke pulé.

12, 13. Fakatātaaʻi ʻa e ʻuhinga kuo fakaʻatā ai ʻe Sihova ʻa Sētane ke ne hoko ko e pule ʻo e māmani ko ení mo e ʻuhinga kuo fakangofua ai ʻe he ʻOtuá ʻa e tangatá ke nau pule pē kiate kinautolú.

¹² Tau vakai angé ki ha fakatātā. Fakaʻuta atu ʻoku tala ʻe ha faiako ki heʻene kau akó ʻa e founga ke solova ai ha palopalema faingataʻa. ʻOku taukaveʻi ʻe ha tokotaha ako poto kae angatuʻu ko e founga ʻa e faiakó ki hono solova ʻo e palopalemá ʻoku hala. ʻI he fakahuʻuhuʻu ʻoku ʻikai ke lavameʻa ʻa e faiakó, ʻoku vilitaki ʻa e angatuʻú ni ʻo pehē ʻokú ne ʻiloʻi ha founga lelei ange ke solova ʻaki ʻa e palopalemá. ʻOku fakakaukau ʻa e kau ako ʻe niʻihi ʻokú ne moʻoni pea nau toe hoko mo kinautolu ʻo angatuʻu. Ko e hā ʻoku totonu ke fai ʻe he faiakó? Kapau te ne tuli ʻa e kau angatuʻú mei he kalasí, ko e hā ʻa e ola ʻe hoko ki he kau ako kehé? ʻIkai te nau tui ko honau kaungāakó mo e faʻahinga naʻe kau mo iá ʻoku nau moʻoni? Ko e kau ako kehe kotoa ʻi he kalasí ʻe mole nai ai ʻenau fakaʻapaʻapa ki he faiakó, ʻi he fakakaukau ʻokú ne ilifia ʻi hano fakamoʻoniʻi ʻokú ne halá. Kae fakakaukau atu ʻoku fakaʻatā ʻe he faiakó ʻa e tokotaha angatuʻú ke ne fakahaaʻi ki he kalasí ʻa e founga te ne solova ai ʻa e palopalemá.

¹³ Kuo fai ʻe Sihova ʻa e meʻa meimei tatau mo e meʻa ko ia ʻoku fai ʻe he faiakó. Manatuʻi ko e kau angatuʻu ʻi ʻĪtení naʻe ʻikai ko kinautolu pē naʻe kau ki aí. Naʻe siofi ia ʻe he kau ʻāngelo ʻe laui miliona. (Siope 38:7; Taniela 7:10) Ko e founga hono fakaleleiʻi ʻe Sihova ʻa e angatuʻú ʻe uesia lahi ai ʻa e kau ʻāngelo kotoa ko iá pea ki mui ai ko e meʻamoʻui ʻatamai poto kotoa pē. Ko ia, ko e hā kuo fai ʻe Sihová? Kuó ne fakaʻatā ʻa Sētane ke ne fakahaaʻi ʻa e founga te ne pule ai ki he faʻahinga ʻo e tangatá. Kuo toe fakaʻatā ʻe he ʻOtuá ʻa e tangatá ke nau pule kiate kinautolu pē ʻi he malumalu ʻo e tataki ʻa Sētané.

14. Ko e hā ʻa e ʻaonga ʻe hoko mei he fili ʻe Sihova ke fakaʻatā ʻa e faʻahinga ʻo e tangatá ke nau pule pē kiate kinautolú?

¹⁴ Ko e faiako ʻi heʻetau fakatātaá ʻokú ne ʻiloʻi ko e tokotaha angatuʻú mo e kau ako ʻoku ʻi heʻene faʻahí ʻoku nau hala. Ka ʻokú ne toe ʻiloʻi ko hono fakaʻatā ange kiate kinautolu ʻa e faingamālie ke nau feinga ke fakamoʻoniʻi ʻenau poiní ʻe ʻaonga ia ki he kalasí kotoa. ʻI he taʻelavameʻa ʻa e kau angatuʻú, ʻe sio ai ʻa e kau ako faitotonu kotoa pē ko e faiakó pē ʻa e tokotaha ʻoku taau ke ne tataki ʻa e kalasí. Te nau mahinoʻi ʻa e ʻuhinga ʻoku toʻo ai mei he kalasí ʻe he faiakó ki mui, ha kau angatuʻu pē. ʻI he founga meimei tatau, ʻoku ʻafioʻi ʻe Sihova ʻe maʻu ʻaonga ʻa e faʻahinga loto-totonu kotoa pē ʻo e tangatá mo e kau ʻāngeló mei he sio kuo taʻelavameʻa ʻa Sētane mo hono kaungā angatuʻú pea ʻoku ʻikai lava ʻa e faʻahinga ʻo e tangatá ke nau pule pē kiate kinautolu. ʻI he hangē ko Selemaia ʻi he kuonga muʻá, te nau ʻiloʻi ʻa e moʻoni mātuʻaki mahuʻinga ko ení: “ʻOku ou ʻilo, ʻe Sihova, ʻoku ʻikai ʻi he tangata hono hala: ʻoku ʻikai ʻi he tangata ʻoku haʻele ke fakaʻuli ʻene ʻalu.”—Selemaia 10:23.

15, 16. (a) Ko e hā kuo fakaʻatā ai ʻe Sihova ʻa e faingataʻá ke hokohoko atu ʻo fuʻu fuoloá? (e) Ko e hā kuo ʻikai taʻofi ai ʻe Sihova ʻa e ngaahi meʻa hangē ko e ngaahi faihia fakalilifú?

¹⁵ Ko ia ai, ko e hā kuo fakaʻatā ai ʻe Sihova ʻa e faingataʻá ke hokohoko atu ʻo fuʻu fuoloá? Pea ko e hā ʻoku ʻikai ai te ne taʻofi ʻa e ngaahi meʻa koví mei heʻene hokó? Sai, vakai angé ki he meʻa ʻe ua naʻe ʻikai ke fai ʻe he faiako ʻi heʻetau fakatātaá. ʻUluakí, naʻe ʻikai te ne taʻofi ʻa e tokotaha ako angatuʻú mei heʻene fakahaaʻi ʻa ʻene foungá. Uá, naʻe ʻikai tokoniʻi ʻe he faiakó ʻa e tokotaha ako angatuʻú ke ne fakahoko ʻa ʻene foungá. ʻI he tuʻunga meimei tatau, fakakaukau angé ki he meʻa ʻe ua kuo fakapapauʻi ʻe Sihova ke ʻoua te ne faí. ʻUluakí, kuo ʻikai te ne taʻofi ʻa Sētane mo e faʻahinga ʻoku ʻi heʻene faʻahí mei heʻenau feinga ke fakamoʻoniʻi ʻoku nau moʻoní. Kuo hoko ai ʻo fiemaʻu ke fakaʻatā ha taimi ke mahili atu mei ai. ʻI he ngaahi taʻu ʻe laui afe ʻo e hisitōlia ʻo e tangatá, kuo malava ai ʻa e faʻahinga ʻo e tangatá ke ʻahiʻahiʻi ʻa e faʻahinga founga kotoa pē ʻo e pule fakaekitá, pe founga-pule fakaetangatá. Kuo fai ʻe he faʻahinga ʻo e tangatá ha ngaahi fakalakalaka ʻi he saienisí mo e ngaahi malaʻe kehé, ka ko e fakamaau taʻetotonú, masivá, faihiá mo e taú, kuo fakautuutu ia ki he kovi ange. Ko e pule fakaetangatá kuo fakahaaʻi he taimí ni ʻoku taʻelavameʻa.

¹⁶ Ko hono uá, kuo ʻikai tokoniʻi ʻe Sihova ʻa Sētane ke ne puleʻi ʻa e māmani ko ení. Hangē ko ení, kapau naʻe taʻofi ʻe he ʻOtuá ʻa e ngaahi faihia fakalilifú, ʻikai ko hono moʻoní, te ne poupouʻi ai ʻa e tuʻunga ʻa e kau angatuʻú? ʻIkai ʻe ʻai ai ʻe he ʻOtuá ʻa e kakaí ke nau fakakaukau ʻo pehē mahalo ʻe lava ke puleʻi pē ʻe he tangatá kinautolu ʻo ʻikai ha ngaahi ola fakatupu ʻauha? Kapau ne fai pehē ʻa Sihova, te ne hoko ai ʻo kau ki ha loi. Kae kehe, ʻoku ‘ʻikai ʻaupito lava ke loi ʻa e ʻOtuá.’—Hepelu 6:18.

17, 18. Ko e hā ʻe fai ʻe Sihova fekauʻaki mo e maumau kotoa kuo tupu mei he pule ʻa e tangatá pea mo e tākiekina ʻa Sētané?

¹⁷ Fēfē leva ʻa e maumau kotoa kuo fai lolotonga ʻa e angatuʻu fuoloa ki he ʻOtuá? ʻOku lelei ke tau manatuʻi ko Sihová ʻoku māfimafi-aoniu. Ko ia ai, te ne lava pea te ne fakaleleiʻi ʻa e ngaahi nunuʻa ʻo e faingataʻaʻia ʻa e faʻahinga ʻo e tangatá. Hangē ko ia kuo tau ʻosi akó, ko hono maumauʻi ʻo hotau palanité ʻe fakaleleiʻi ia ʻaki hono liliu ʻa e māmaní ki ha Palataisi. Ko e ngaahi nunuʻa ʻo e angahalá ʻe toʻo atu ia fakafou ʻi he tui ki he feilaulau huhuʻi ʻa Sīsuú, pea ko e ngaahi nunuʻa ʻo e maté ʻe fakangata ia fakafou ʻi he toetuʻú. ʻE ngāueʻaki ai ʻe he ʻOtuá ʻa Sīsū “ke ne holoki ʻa e ngaahi ngaue ʻa e Tevolo.” (1 Sione 3:8) ʻE fakahoko ʻe Sihova ʻa e meʻa kotoa ko ení ʻi he taimi tonu matematē. ʻOku lava ke tau fiefia ʻi he ʻikai te ne ngāue vave ange ki aí, he ko ʻene kātakí kuo ʻomai ai kiate kitautolu ʻa e faingamālie ke ako ʻa e moʻoní pea ke tauhi kiate ia. (2 Pita 3:​9, 10) Lolotonga iá, kuo kumi longomoʻui ʻa e ʻOtuá ki he kau lotu loto-moʻoní pea tokoniʻi kinautolu ke nau kātekina ha faingataʻa pē ʻe hoko mai nai kiate kinautolu ʻi he māmani faingataʻa ko ení.—Sione 4:23; 1 Kolinito 10:13.

¹⁸ ʻE fifili nai ha niʻihi, Naʻe mei lava ke taʻofi ʻa e faingataʻa kotoa ko ení kapau naʻe fakatupu ʻe he ʻOtuá ʻa ʻĀtama mo ʻIvi ʻi ha founga naʻe ʻikai lava ai ke na angatuʻu? Ke tali ʻa e fehuʻi ko iá, ʻoku fiemaʻu ke ke manatuʻi ha meʻaʻofa mahuʻinga kuo ʻoatu ʻe Sihova kiate koe.

19. Ko e hā ʻa e meʻaʻofa mahuʻinga kuo ʻomai ʻe Sihova kiate kitautolú, pea ko e hā ʻoku totonu ai ke tau fakamahuʻingaʻi iá?

¹⁹ Hangē ko ia naʻe fakahaaʻi ʻi he Vahe 5, naʻe fakatupu ʻa e tangatá fakataha mo e tauʻatāina ke fili. ʻOkú ke ʻiloʻi pe ʻoku mahuʻinga fēfē ʻa e meʻaʻofa ko iá? Kuo ngaohi ʻe he ʻOtuá ʻa e fanga manu taʻefaʻalaua, pea ko e fanga manú ni ʻoku nau ngāue lahi ʻaki ʻa e poto fakanatulá. (Palovepi 30:24) Kuo ngaohi ʻe he tangatá ʻa e fanga lōpoti ʻa ia ʻe lava ke fakapolokalamaʻi ke nau muimui ki he fekau kotoa pē. Naʻa tau mei fiefia kapau naʻe ngaohi kitautolu ʻe he ʻOtuá ʻo hangē ko iá? ʻIkai, ʻoku tau fiefia ke maʻu ʻa e tauʻatāina ke fai ʻa e ngaahi fili fekauʻaki mo e faʻahinga tokotaha ke hoko ki aí, ko e ʻalunga ʻo e moʻui ke tuli ki aí, ko e ngaahi kaumeʻa ke fokotuʻú, mo e hā fua. ʻOku tau saiʻia ke maʻu ha tuʻunga ʻo e tauʻatāiná pea ko e meʻa ia ʻoku loto ʻa e ʻOtuá ke tau maʻú.

20, 21. ʻE lava fēfē ke tau ngāueʻaki ʻa e meʻaʻofa ko e tauʻatāina ke filí ʻi he founga lelei taha ʻoku ala lavá, pea ko e hā ʻoku totonu ai ke tau loto ke fai iá?

²⁰ ʻOku ʻikai mahuʻingaʻia ʻa Sihova ʻi he ngāue ʻoku fakahoko ʻi hono fakapuʻiá. (2 Kolinito 9:7) Ke fakatātaaʻi: Ko e hā te ne fakafiefiaʻi lahi ange ha mātuʻa—ko ha pehē ʻe ha kiʻi tama “ʻOku ou ʻofa ʻiate koe” koeʻuhí ko hono tala ange ke ne leaʻaki iá pe ko ʻene lea tauʻatāina ʻaki ia mei hono lotó? Ko ia ai, ko e fehuʻí eni, ʻE anga-fēfē haʻo ngāueʻaki ʻa e tauʻatāina ke filí ʻa ia kuo ʻoatu ʻe Sihova kiate koé? Ko Sētane, ʻĀtama pea mo ʻIvi, naʻa nau ngāueʻaki ʻa e tauʻatāina ke filí ʻi he tuʻunga kovi taha naʻe ala lavá. Naʻa nau siʻaki ʻa Sihova ko e ʻOtuá. Ko e hā te ke faí?

²¹ ʻOkú ke maʻu ʻa e faingamālie ke ngāueʻaki ʻa e meʻaʻofa fakaofo ʻo e tauʻatāina ke filí ʻi he founga lelei taha ʻe ala lavá. ʻE lava ke ke kau fakataha mo e laui miliona ʻa ia kuo nau fai ha tuʻu ʻi he tafaʻaki ʻa Sihová. ʻOku nau ʻai ʻa e ʻOtuá ke fiefia koeʻuhi ko ʻenau fakahoko ha tafaʻaki longomoʻui ʻi hono fakamoʻoniʻi ko Sētané ko ha tokotaha loi pea ʻokú ne taʻelavameʻa fakamamahi ʻi he tuʻunga ko ha pulé. (Palovepi 27:11) Ko koe foki ʻe lava ke ke fai ia ʻaki ʻa hono fili ʻa e ʻalunga totonu ʻi he moʻuí. ʻE fakamatalaʻi eni ʻi he vahe hokó.