Te Ke Tokanga ki he Ngaahi Fakatokanga Mahino ʻa Sihová?

“Ko eni ʻa e hala, fou ai.”—AI. 30:21.

1, 2. Ko e hā ʻoku fakapapauʻi ʻe Sētane ke faí, pea ʻoku fēfē hono tokoniʻi kitautolu ʻe he Folofola ʻa e ʻOtuá?

KO HA fakaʻilonga-hala ʻa ia ʻoku tuhu ki ha feituʻu hala ʻoku ʻikai ke takihalaʻi pē; ʻoku ala hoko ai ha fakatuʻutāmaki. Sioloto atu ʻoku fakatokanga atu ha kaumeʻa kia koe kuo hanga ʻe ha tangata kovi ʻo fulihi ʻosi fakakaukauʻi ha fakaʻilonga koeʻuhi ke fakatupunga ha fakatamaki ki he kau fononga taʻetokangá. ʻIkai te ke tokanga ki he fakatokangá?

² Ko e moʻoni, ko Sētané ko ha fili kovi ia ʻokú ne fakapapauʻi ke takihalaʻi kitautolu. (Fkh. 12:9) Ko e kotoa ʻo e ʻū tākiekina kovi naʻe lāulea ki ai he kupu ki muʻá ko e tupu meiate ia pea ʻoku fakataumuʻa ia ke fakatupunga kitautolu ke afe mei he hala ʻoku taki atu ki he moʻui taʻengatá. (Mt. 7:13, 14) Ko e meʻa mālié, ʻoku fakatokanga mai hotau ʻOtua anga-ʻofá kia kitautolu ke ʻoua ʻe muimui ki he ‘ngaahi fakaʻilonga-hala’ takihalaʻi ʻa Sētané. Tau lāulea ange he taimí ni ki ha toe tākiekina kovi ʻe tolu ʻa Sētane. ʻI heʻetau lāulea ki he anga hono hanga ʻe he Folofola ʻa e ʻOtuá ʻo tokoniʻi kitautolu ke fakaʻehiʻehi mei hano takihalaʻí, ʻe lava ke tau sioloto atu ko Sihova eni ʻoku hāʻele mai ʻi mui ʻiate kitautolu pea ʻokú ne fakahinohino mai e hala totonú, ʻo ne pehē: “Ko eni ʻa e hala, fou ai.” (Ai. 30:21) ʻI he fakalaulauloto ki he ʻū fakatokanga māʻalaʻala ʻa Sihová te ne fakamālohiʻi ai ʻetau fakapapau ke tokanga ki aí.

ʻOua ʻe Muimui ki he “Kau Akonaki Loi”

3, 4. (a) ʻOku fēfē e hangē ʻa e kau akonaki loí ha ngaahi vaitupu pakupakú? (e) ʻOku faʻa haʻu mei fē e kau akonaki loí, pea ko e hā ʻoku nau fiemaʻú?

³ Sioloto atu ʻokú ke fononga ʻi ha fonua pakukā. ʻOkú ke fakatokangaʻi atu ha vaitupu ʻi he mamaʻó pea ʻokú ke huʻu atu ki ai, ʻo ʻamanaki ke maʻu ha meʻi vai ke fakafiemālieʻi hoʻo fieinuá. Kae kehe, ʻi hoʻo aʻu atú, ʻokú ke sio ʻoku pakupaku e vaitupú ia. He siva moʻoni ē ko hoʻo ʻamanakí! Ko e kau akonaki loí ʻoku nau hangē ha ʻū vaitupu pakupakú. Ko ha taha pē ʻoku haʻu kiate kinautolu ki he vai ʻo e moʻoní ʻe mātuʻaki siva ʻene ʻamanakí. Ko Sihova ʻokú ne fakatokanga mai fakafou ʻi he ʻapositolo ko Paula mo Pitá fekauʻaki mo e kau akonaki loí. (Lau ʻa e Ngāue 20:29, 30; 2 Pita 2:1-3.) Ko hai e kau akonaki peheé? Ko e ngaahi lea fakamānavaʻi ʻa e ongo ʻapositolo ko ení ʻoku tokoniʻi ai kitautolu ke ʻiloʻi fakapapau ko e haʻu e kau akonaki loí mei fē pea ʻoku fēfē ʻenau ngāué.

⁴ Ki he kau mātuʻa ʻo e fakatahaʻanga ʻi ʻEfesoó, naʻe pehē ʻe Paula: “Naʻa mo kimoutolu ʻe tupu mei ai ha kau tangata ʻoku leaʻaki ʻa e ngaahi meʻa ʻoku ʻalu kehe.” ʻI heʻene lea ki he ngaahi kaungā Kalisitiané, naʻe tohi ʻe Pita: “ʻE ai ha kau akonaki loi ʻiate kimoutolu.” Ko ia ko e haʻu mei fē e kau akonaki loí? Te nau tupu hake nai mei loto he fakatahaʻangá. Ko e faʻahinga peheé ko e kau tafoki ʻo angatuʻu ki he moʻoní. Ko e hā ʻoku nau fiemaʻú? ʻOku ʻikai te nau fiemālie he mavahe pē mei he kautaha ne nau ʻofa nai ai ki muʻá. Ko ʻenau taumuʻá, ko e fakamatala ia ʻa Paulá, “ke tohoaki ʻaki ʻa e kau ako ke muimui kiate kinautolu.” Fakatokangaʻi e muʻanauna pau ʻi he kupuʻi lea “ʻa e kau ako.” ʻI he ʻikai ō ʻo ngaohi haʻanau kau ako pē ʻanautolu, ʻoku kumi e kau tafoki ʻo angatuʻu ki he moʻoní ke ō mo e kau ako ʻa Kalaisí. ʻI he hangē ha “fanga ulofi fekai,” ʻoku ʻalu atu e kau akonaki loí ke keina e kau mēmipa falalaʻanga ʻo e fakatahaʻangá, ʻo fakaʻauha ʻenau tuí pea taki atu kinautolu mei he moʻoní.—Mt. 7:15; 2 Tim. 2:18.

 5. Ko e hā e ngaahi founga ʻoku ngāueʻaki ʻe he kau akonaki loí?

⁵ ʻOku fēfē ngāue ʻa e kau akonaki loí? ʻOku fakaeʻa ʻe heʻenau ngaahi foungá ha laumālie kākā. Ko e kau tafoki ʻo angatuʻu ki he moʻoní “te nau fakahu fufū mai” e ʻū fakakaukau fakatupu maumau. Hangē ko e kau fakahū koloa fakafufū ki ha feituʻu, ʻoku nau ngāue ʻi ha founga fakafufū, ʻo fakahū olopoto mai e ʻū fakakaukau ʻa e kau tafoki ʻo angatuʻu ki he moʻoní. Pea hangē pē ko e feinga ha tokotaha tohinima kākā poto ke paasi ha ʻū pepa loi, ʻoku pehē pe hono ngāueʻaki ʻe he kau tafoki ʻo angatuʻu ki he moʻoní e ngaahi “lea kākā,” pe ngaahi fakaʻuhinga loi, ʻo feinga ke paasi ʻenau ʻū fakakaukau loí ke hangē ʻoku moʻoní. ʻOku nau fakamafola e ʻū “akonaki kākaá,” ʻo “mioʻi . . . e Folofolá” ke feʻunga mo ʻenau ʻū fakakaukaú tonu. (2 Pita 2:1, 3, 13, NW; 3:16, NW) ʻOku hā mahino, ko e kau tafoki ʻo angatuʻu ki he moʻoní ʻoku ʻikai haʻanau tokanga ʻanautolu ki ha lelei maʻatautolu. Ko e muimui kia kinautolú te ne afeʻi kitautolu mei he hala ʻoku taki atu ki he moʻui taʻengatá.

 6. ʻOku ʻomai ʻe he Tohi Tapú kiate kitautolu e akonaki māʻalaʻala fē fekauʻaki mo e kau akonaki loí?

⁶ ʻE lava fēfē ke tau maluʻi kitautolu mei he kau akonaki loí? Ko e akonaki ʻa e Tohi Tapú fekauʻaki mo e anga e feangainga mo kinautolú ʻoku māʻalaʻala. (Lau ʻa e Loma 16:17; 2 Sione 9-11.) “Fakaʻehiʻehi meiate kinautolu,” ko e lau ia e Folofola ʻa e ʻOtuá. ʻOku liliu ʻe he ngaahi liliu kehé ʻa e kupuʻi lea ko iá ko e “tafoki meiate kinautolu,” “fakamamaʻo meiate kinautolu,” pea “nofo mamaʻo meiate kinautolu!” ʻOku ʻikai ha meʻa ʻe fakaʻuliʻulilātai fekauʻaki mo e akonaki fakamānavaʻi ko iá. Tau pehē naʻe tala atu ʻe ha toketā kia koe ke fakaʻehiʻehi mei he fetuʻutaki mo ha taha ʻoku puke ha mahaki pipihi fakatupu mate. Te ke ʻilo e meʻa ʻoku ʻuhinga ki ai e toketaá, pea te ke mātuʻaki tokanga ki heʻene fakatokangá. Ko ia, ko e kau tafoki ʻo angatuʻu ki he moʻoní ʻoku nau “mahaki,” pea ʻoku nau feinga ke pihia e niʻihi kehé heʻenau ʻū akonaki taʻemateakí. (1 Tim. 6:3, 4, PM) Ko Sihova, e Toketā Lahí, ʻokú ne tala mai kia kitautolu ke fakaʻehiʻehi mei he fetuʻutaki mo kinautolú. ʻOku tau ʻilo e meʻa ʻokú ne ʻuhinga ki aí, ka ʻoku tau fakapapauʻi ke tokanga ki heʻene fakatokangá ʻi he tafaʻaki kotoa pē?

7, 8. (a) Ko e hā ʻoku kau ʻi he fakaʻehiʻehi mei he kau akonaki loí? (e) Ko e hā ʻokú ke fakapapauʻi ai ke tuʻu mālohi ʻi he fakafepaki ki he kau akonaki loí?

⁷ Ko e hā ʻoku kau ʻi he fakaʻehiʻehi mei he kau akonaki loí? ʻOku ʻikai te tau tali kinautolu ki hotau ʻū ʻapí pe fakafeʻiloaki kia kinautolu. ʻOku tau toe fakafisi foki ke lau ʻenau ʻū tohí, sio he ʻū polokalama televīsone ʻoku nau kau mai aí, sivisiviʻi ʻenau ʻū Uepisaití, pe tānaki atu haʻatau ʻū lau ki heʻenau ʻū tohinoa ʻi he ʻInitanetí. Ko e hā ʻoku tau fai ai ha tuʻu mālohi peheé? Koeʻuhí ko e ʻofá. ʻOku tau ʻofa ki he “ʻOtua moʻoniā,” ko ia ʻoku ʻikai ke tau mahuʻingaʻia he ʻū akonaki mioʻi ʻoku fepaki mo ʻene Folofola ʻo e moʻoní. (Sāme 31:5; Sione 17:17) ʻOku tau toe ʻofa foki ki he kautaha ʻa Sihová, ʻa ia kuo fakafou mai ai hono akoʻi kitautolu ʻi he ngaahi moʻoni fakaueʻiloto—kau ai e huafa ʻo Sihová mo hono ʻuhingá, taumuʻa e ʻOtuá ki he māmaní, ko e tuʻunga e kau maté, mo e ʻamanaki e toetuʻú. ʻE lava ke ke manatuʻi e anga hoʻo ongoʻí he taimi naʻá ke fuofua ako ai e ngaahi meʻá ni mo e ngaahi moʻoni mahuʻinga kehé? Ko e hā leva, te ke fakaʻatā ai koe ke fakakonahi ʻe ha taha te ne lauʻikoviʻi e kautaha ko ia naʻá ke ako mei ai e ngaahi moʻoni ko ení?—Sione 6:66-69.

⁸ Neongo ai pē pe ko e hā e meʻa ʻe leaʻaki nai ʻe he kau akonaki loí, ʻe ʻikai ke tau muimui kia kinautolu! Ko e hā ke ʻalu ai ki ha ngaahi vaitupu pakupaku peheé ke hoko pē ʻo kākaaʻi ai mo siva e ʻamanakí? Ko hono kehé, tau fakapapauʻi ke nofo mateaki ai pē kia Sihova pea ki he kautaha kuo ʻi ai hono lēkooti fuoloa hono fakafiemālieʻi ʻetau fieinuá ʻaki e vai maʻa mo fakaivifoʻou ʻo e moʻoni mei he Folofola fakamānavaʻi ʻa e ʻOtuá.—Ai. 55:1-3; Mt. 24:45-47.

ʻOua ʻe Muimui ki he “Ngaahi Talatupuʻa”

9, 10. Ko e hā e fakatokanga naʻe ʻoange ʻe Paula kia Tīmote felāveʻi mo e “ngaahi talatupuʻa,” pea ko e hā nai e meʻa naʻe ʻi he ʻatamai ʻo Paulá? (Toe sio ki he fakamatala ʻi laló.)

⁹ ʻI he taimi ʻe niʻihi, ʻe faingofua nai ke ʻiloʻi kuo alasi e fakaʻilonga-halá pea ʻoku tuhu ia ki ha feituʻu hala. ʻI he ngaahi taimi kehé, ʻe faingataʻa nai ke ʻiloʻi e kākaá. ʻOku pehē pē mo e ngaahi tākiekina kovi ʻa Sētané; ʻoku hā mahino ange e niʻihi ʻi he niʻihi. ʻOku fakatokanga mai e ʻapositolo ko Paulá kia kitautolu fekauʻaki mo e taha e ʻū faʻufaʻu olopoto ʻa Sētané—ko e “ngaahi talatupuʻa.” (Lau ʻa e 1 Timote 1:3, 4.) Telia naʻa tau hoko ʻo afeʻi mei he hala ʻoku taki atu ki he moʻui taʻengatá, ʻoku fiemaʻu ke tau ʻilo, Ko e hā e ngaahi talatupuʻa, pea ʻe lava fēfē ke tau fakaʻehiʻehi mei he tokanga ki aí?

¹⁰ Ko e fakatokanga ʻa Paula fekauʻaki mo e ngaahi talatupuʻá ko e konga ia ʻene ʻuluaki tohi kia Tīmoté, ko ha ʻovasia Kalisitiane naʻe fekauʻi ke tauhi e tuʻunga maʻa ʻo e fakatahaʻangá pea tokoniʻi e ngaahi kaungātuí ke nofo faitōnunga ai pē. (1 Tim. 1:18, 19) ʻOku ngāueʻaki ʻe Paula ha foʻi lea faka-Kalisi ʻe lava ke fakahuʻunga ki he talanoa faʻu, talatupuʻa, pe loi. Fakatatau ki he The International Standard Bible Encyclopaedia, ko e foʻi lea ko ení ʻoku fakahuʻunga ia ki “ha talanoa (fakalotu) ʻoku ʻikai haʻane kākunga mo e moʻoní.” Mahalo naʻe ʻi he ʻatamai ʻo Paulá e ʻū loi fakalotu naʻe pouaki ʻe he ʻū talanoa fakatoʻoaloto pe ngaahi fananga talatupuʻa.a Ko e ʻū talanoa peheé ʻoku “tupu mei ai ha meʻa ke fakakikihi ki ai” pe ʻū fehuʻi ke fai ha fekumi ki ai—ʻa ia, ko hono langaʻi e ʻū fehuʻi launoa ʻoku taki atu ki he ʻū fekumi taʻeʻuhinga. Ko e ngaahi talatupuʻá pe talanoa loí ko e foʻi faʻufaʻu ia e tokotaha pule-kākaá, ʻa Sētane, ʻa ia ʻokú ne ngāueʻaki e ngaahi loi fakalotú mo e ngaahi talatupuʻa taʻefakaʻotuá ke afeʻi e faʻahinga taʻehuʻuhuʻú. Ko e akonaki ʻa Paulá ʻoku māʻalaʻala: ʻOua naʻa tokanga ki he ngaahi talatupuʻá!

11. Kuo fēfē hono ngāueʻaki pōtoʻi ʻe Sētane e lotu loí ki hono takihalaʻi e kakaí, pea ʻi he tokanga ki he fakatokanga fē ʻe tokoniʻi ai kitautolu ke fakaʻehiʻehi mei hano takihalaʻi?

¹¹ Ko e hā e niʻihi ʻo e ʻū talatupuʻa te ne lava ʻo taki hē ʻa e kau taʻetokangá? Ko hono moʻoní, ko e kupuʻi lea “ngaahi talatupuʻa” ʻe lava ke ngāueʻaki ia ki ha faʻahinga loi fakalotu pē pe talatupuʻa ʻe lava ke ne fakatafokiʻi kitautolu ʻo “leʻei . . . mei he moʻoni.” (2 Tim. 4:3, 4) Ko Sētane, ʻokú ne fakangalingali ko e “angelo mei he maama,” kuó ne ngāueʻaki pōtoʻi e lotu loí ki hono kākaaʻi pe takihalaʻi e kakaí. (2 Kol. 11:14) ʻI he malumalu e fakapuli ʻo e lotu faka-Kalisitiané, ʻoku akoʻi ʻe he Puleʻanga-Haʻa-Kalisitiané ʻa e ʻū tokāteline—kau ai e Tolu-tahaʻi-ʻotuá, afi ʻo helí, mo e taʻefaʻamate ʻa e laumālié—ʻa ia ʻoku fonu he ʻū talatupuʻa mo e ʻū loi. Ko e Puleʻanga-Haʻa-Kalisitiané ʻokú ne toe pouaki e ʻū ʻaho mālōloó, hangē ko e Kilisimasí mo e Toetuʻú, ʻa ia ʻoku hā ngali ko e ʻū tōʻonga ʻoku lelei ka ko hono moʻoní ʻoku fakatefito ia he talatupuʻa mo e tui fakapangani. ʻI he tokanga ki he fakatokanga ʻa e ʻOtuá ke fakamavaheʻi kitautolu pea ‘ʻoua te tau ala ki he meʻa taʻemaʻá,’ ʻe ʻikai ke takihalaʻi ai kitautolu ʻe he ngaahi talatupuʻá.—2 Kol. 6:14-17.

12, 13. (a) Ko e hā e ngaahi loi kuo pouaki ʻe Sētané, pea ko e hā e moʻoni fekauʻaki mo e ngaahi loi taki taha ko iá? (e) ʻE lava fēfē ke tau fakaʻehiʻehi mei he hoko ʻo takihalaʻi ʻe he ngaahi talatupuʻa ʻa Sētané?

¹² Kuo pouaki ʻe Sētane ha ʻū loi kehe ʻe lava ke ne takihalaʻi kitautolu kapau heʻikai ke tau tokanga. Fakakaukau ki ha fakatātā ʻe niʻihi. ʻOku tali e meʻa kotoa pē—tonu pe hala. ʻOku fakapapauʻi ia ʻi he anga hoʻo ongoʻí. Ko e fakakaukau ko ení ʻoku pouaki ia he mītiá pea ʻi he fakafiefiá. Ko ha fakakaukau mioʻi pehē ʻo e ngaahi tuʻunga ʻa e ʻOtuá ʻokú ne ʻomi e tenge kia kitautolu ke siʻaki e ʻū fakangatangata fakaeʻulungaanga kotoa pē. Ka ko e foʻi moʻoní ʻoku ʻi ai ha fiemaʻu vivili ʻia kitautolu ki ha tataki fakaeʻulungaanga ko e ʻOtuá pē te ne lava ke feaú. (Sel. 10:23) ʻE ʻikai kaunoa mai e ʻOtuá ʻi he ngaahi meʻa e māmaní. ʻI he hoko ʻo tākiekina ʻe ha laumālie pehē ʻo e moʻui pē maʻá e ʻaho ní ʻe lava ke ne fakatupunga kitautolu ke hoko ʻo “fakapikopiko pe taʻefua.” (2 Pita 1:8) Ko e foʻi moʻoní ia ko e ʻaho ʻo Sihová ʻoku tuʻunuku vave mai, pea kuo pau ke tau hanganaki ʻamanekina ia. (Mt. 24:44) ʻOku ʻikai tokanga mai e ʻOtuá ia fekauʻaki mo koe ʻi he tuʻunga ko ha taha. Ko e tui ki he foʻi loi fakasētane ko ení ʻe lava ke fakatupunga ai ke tau foʻi, ʻo ongoʻi heʻikai ʻaupito lava ke tau taau mo e ʻofa ʻa e ʻOtuá. Ko e foʻi moʻoní ia ʻoku ʻofaʻi pea fakamahuʻingaʻi ʻe Sihova ʻene kau lotú ʻi he tuʻunga ko ha niʻihi tāutaha.—Mt. 10:29-31.

¹³ Kuo pau ke tau tokanga maʻu pē, ki he anga e fakakaukau mo e ngaahi tōʻonga e māmani ʻo Sētané ʻe hā ngali lelei nai ki tuʻa. Kae kehe, manatuʻi, ko Sētané ko e mataotao ia he kākaá. Ko e tokanga pē ki he akonaki mo e ʻū fakamanatu e Folofola e ʻOtuá ʻe lava ke tau fakaʻehiʻehi ai mei he hoko ʻo takihalaʻi ʻe he “ngaahi fananga ne faʻu [“ngaahi talatupuʻa kuo faʻufaʻu pōtoʻi,” The New American Bible]” ʻe Sētané.—2 Pita 1:16.

ʻOua ʻe “Muimui kia Setane”

14. Ko e hā e fakatokanga naʻe ʻoange ʻe Paula ki ha kau uitou kei siʻi ʻe niʻihi, pea ko e hā ʻoku fiemaʻu ai kiate kitautolu kotoa ke tokanga fakamātoato ki heʻene ngaahi leá?

¹⁴ Fakakaukau atu ʻoku pehē ʻe ha fakaʻilonga-hala “Ko e Hala Eni ki he Muimui kia Sētané.” Ko hai ʻia kitautolu ʻe tokanga ki ha fakaʻilonga pehē? Neongo ia, ʻoku fakatokanga mai ʻa Paula kiate kitautolu fekauʻaki mo e founga ʻe niʻihi ʻa ia ko e kau Kalisitiane ʻosi fakatapui ʻa e ʻOtuá ʻe lava ke ‘afe ʻo muimui kia Setane.’ (Lau ʻa e 1 Timote 5:11-15.) Ko e ngaahi lea ʻa Paulá ʻoku fakahanga ia ki ha “kau uitou” kei siʻi ʻe niʻihi, ka ko e ʻū tefitoʻi moʻoni ʻokú ne lave ki aí ʻoku kaungatonu ia kiate kitautolu kotoa. Ko e kau fefine Kalisitiane he ʻuluaki senitulí naʻe ʻikai nai haʻanau fakakaukau naʻa nau muimui kia Sētane, ka ko ʻenau ngaahi ngāué naʻe iku ia ki he meʻa pē ko iá. ʻE lava fēfē ke tau maluʻi kitautolu naʻa mo e muimui taʻeʻilo kia Sētané? Tau sivisiviʻi angé e fakatokanga ʻa Paula fekauʻaki mo e lau fakatupu maumaú.

15. Ko e hā e taumuʻa ʻa Sētané, pea ʻoku fēfē hono ʻiloʻi fakapapau ʻe Paula e ngaahi founga ʻa Sētané?

¹⁵ Ko e taumuʻa ʻa Sētané ke fakasīlongoʻi e leʻo ʻo ʻetau tuí—ke ʻai kitautolu ke tuku hono malangaʻaki e ongoongo leleí. (Fkh. 12:17) Ke lavaʻi iá, ʻokú ne feinga ke ʻai kitautolu ke tuli ki he ngaahi ngāue fakamole taimi pe fakatupunga ha māvahevahe ʻiate kitautolu. Fakatokangaʻi e anga hono ʻiloʻi fakapapau ʻe Paula e ngaahi founga ʻa Sētané. “Fakapikopiko ʻi heʻenau ʻalu fano.” ʻI he kuonga ko eni e tekinolosiá, ʻoku faingofua ke fakamoleki hotau taimí pea pehē ki he niʻihi kehé, ko e fakatātaá, ʻaki hono ʻoatu ha ʻū ʻīmeili taʻemahuʻinga pe taʻemoʻoni. Kau “faʻa lau.” Ko e lau fakatupu maumaú ʻe taki atu nai ki ha lauʻikovi loi, ʻa ia ʻokú ne faʻa fakatupunga e fakakikihi. (Pal. 26:20) Pe ʻoku nau fakatokangaʻi ia pe ʻikai, ko e kau lauʻikovi loi loto-koví ʻoku nau faʻifaʻitaki kia Sētane ko e Tēvoló.b Kau “kaunoa.” ʻOku ʻikai haʻatau totonu ke tala ki he niʻihi kehé e anga hono fakalele ʻenau ʻū meʻa fakafoʻituituí. Ko e kotoa e tōʻonga fakapikopiko mo fakamamahi peheé ʻe lava ke ne fakaleluʻi kitautolu mei he ngāue kuo vaheʻi mai ʻe he ʻOtuá ko hono malangaʻi e Puleʻangá. Kapau te tau taʻofi ʻetau poupou longomoʻui ki he ngāue ʻa Sihová, te tau kamata leva ke muimui kia Sētane. ʻOku ʻikai ha tuʻu ʻi vahaʻa.—Mt. 12:30.

16. Ko e tokanga ki he faleʻi fē ʻe lava ke tokoni kiate kitautolu ke fakaʻehiʻehi ai mei he ‘afe ʻo muimui kia Setané’?

¹⁶ Ko e tokanga ki he faleʻi e Tohi Tapú ʻe lava ke tokoni ia kiate kitautolu ke fakaʻehiʻehi ai mei ha ‘afe ʻo muimui kia Setané.’ Fakakaukau angé ki ha niʻihi ʻo e akonaki fakapotopoto ʻa Paulá. “Mou tupulekina maʻu ai pe ʻi he ngaue ʻa e ʻEiki.” (1 Kol. 15:58) Ko e hanganaki femoʻuekina he ngaahi ngāue ʻo e Puleʻangá te ne maluʻi kitautolu mei he ʻū fakatuʻutāmaki ʻo e fakapikopiko mo e ngaahi ngāue fakamole taimí. (Mt. 6:33) Leaʻaki e meʻa ʻoku “lelei o aoga ke laga aki hake.” (Ef. 4:29, PM) Fakapapauʻi ke ʻoua ʻe fanongo ki he lau fakatupu maumaú pea ʻoua ʻe fakamafola ia.c Fakatupulekina e falala mo e tokaʻi e ngaahi kaungātuí. Te tau hehema ai ke leaʻaki e ngaahi lea ʻoku langa hake kae ʻikai tuku hifó. “ʻAi ko hoʻomou taumuʻá ia ke . . . taki taha fai pē ʻene meʻa.” (1 Tes. 4:11, NW) Fakahaaʻi e mahuʻingaʻia fakafoʻituitui he niʻihi kehé, kae fai pehē ʻi he ngaahi founga ʻoku tokaʻi ai honau tuʻunga fakafoʻituituí pea ʻoua ʻaupito naʻa faʻaoa honau ngeiá. Manatuʻi foki, ʻoku ʻikai totonu ke tau fakamālohiʻi atu ʻetau ngaahi fakakaukaú tonu ki he niʻihi kehé fekauʻaki mo e ngaahi meʻa ʻoku fiemaʻu ke fai pē ʻe kinautolu ʻenau filí.—Kal. 6:5.

17. (a) Ko e hā ʻoku fakatokanga mai ai ʻa Sihova kiate kitautolu fekauʻaki mo e meʻa ke ʻoua naʻa tau muimui ai? (e) Ko e hā hoʻo fakapapau fekauʻaki mo e hala ʻoku fiemaʻu ʻe Sihova ke tau ʻalu ai?

¹⁷ He houngaʻia ē ko kitautolu ʻi hono tala mahino mai ʻe Sihova e meʻa ke ʻoua naʻa tau muimui ai! Kae kehe, ʻoua naʻa ngalo ko e ʻū fakatokanga ʻa Sihova ʻoku lāulea ki ai hení pea mo e kupu ki muʻá ko e ueʻi ia heʻene ʻofa lahi mai kiate kitautolu. ʻOkú ne loto ke tau hao mei he mamahi mo e langa ko e ola ʻo e muimui ki he ‘ngaahi fakaʻilonga-hala’ takihalaʻi ʻa Sētané. Ko e hala ʻoku fiemaʻu kitautolu ʻe Sihova ke ʻalu aí ʻoku ʻefiʻefi nai, ka ʻoku taki atu ia ki he feituʻu lelei taha ʻoku ala lava ke tau fononga ki aí—ʻa e moʻui taʻengatá. (Mt. 7:14) Fakatauange ke ʻoua ʻaupito naʻa tau toumoua heʻetau fakapapau ko ia ke tokanga ki he ekinaki ʻa Sihová: “Ko eni ʻa e hala, fou ai.”—Ai. 30:21.

[Fakamatala ʻi lalo]

Ko e Hā Hoʻo Talí?

ʻE lava fēfē ke ke ngāueʻaki fakafoʻituitui e ʻū fakatokanga ʻoku ʻi he ʻū konga Tohi Tapu ko ení?

• 2 Pita 2:1-3

• 1 Timote 1:3, 4

• 1 Timote 5:11-15

[Puha/Fakatātā ʻi he peesi 19]

Veteki e Fulufuluʻi Manú ʻi he Matangí

ʻOku fakatātaaʻi lelei ʻe ha fananga motuʻa faka-Siu e ngaahi nunuʻa hono fakamafola ha lau fakatupu loto-mamahi. ʻI hono talanoaʻi he ʻū founga kehekehe, ko e ʻuhinga tefito ʻo e talanoá ʻoku hangē ko ení.

Naʻe ʻalu takai holo ha tangata he koló ʻo lauʻikoviʻi loi e tangata poto ʻo e koló. Ki mui aí, naʻe fakatokangaʻi ʻe he tokotaha-lau fakalotokoví ʻene fehālaakí pea ʻalu ki he tangata potó ʻo kole fakamolemole, ʻo ne tala ange te ne fai ha faʻahinga meʻa pē naʻe fiemaʻú ke fai ha fakalelei. Ko e tangata potó naʻe ʻi ai ʻene kole pē ʻe taha: Naʻe tala ki he tokotaha-laú ke ʻalu ʻo ʻave ha pilo fulufuluʻi manu pea fakaava, ʻo veteki e fulufuluʻi manú ʻi he matangí. Neongo ʻene puputuʻu he kole naʻe faí, naʻe fai ʻe he tokotaha-laú hangē ko ia naʻe fakahinohinoʻí peá ne foki leva ki he tangata potó.

“Kuo fakamolemoleʻi au he taimí ni?” ko ʻene ʻeké ia.

“ʻUluakí, ʻalu ʻo tānaki kotoa mai e fulufuluʻi manú,” ko e tali ia e tangata potó.

“Ka te u lava fēfē ia? Kuo hanga ʻe he matangí ia ʻo veteki kinautolu.”

“ʻOku hangē pē faingataʻa ke fakaleleiʻi e maumau kuo fai ʻe hoʻo ngaahi leá ko e faingataʻa ke tānaki e fulufuluʻi manú.”

Ko e lēsoní ʻoku mahino. Ko hono leaʻakí pē, ko e ʻū foʻi leá heʻikai toe lava ke tānaki mai, pea ʻe ʻikai malava nai ke toʻo e fakatupu loto-mamahi ʻoku nau fakatupungá. Ki muʻa ke fakamafola ha kiʻi foʻi lau, ʻoku fakapotopoto ke manatuʻi ko kitautolú, ko hono moʻoni, ʻoku ʻamanaki ke tau veteki e fulufuluʻi manu ʻi he matangí.

[Fakatātā ʻi he peesi 16]

ʻE anga-fēfē nai hano fakaafeʻi ʻe ha niʻihi e kau tafoki ʻo angatuʻu ki he moʻoní ki honau ʻū ʻapí?