Ko e Hā ke Tauhi Ai Hoʻo ʻŪ Palōmesí?

“FILI ʻi he tangata ʻoku siʻi taha ʻene palōmesí; he ko ia ia ʻe siʻi taha ʻene fakamasiva ʻamanakí,” ko e lea ia ʻa e faleʻi fakapalesiteni kuo mālōlō ko Bernard Baruch. ʻI he māmani ʻo e ʻaho ní, ʻoku hā ko e ngaahi palōmesí naʻe fai pē ia ke maumauʻi. Mahalo ko e ngaahi tukupā ke mali, ngaahi aleapau fakapisinisi, pe ko e ngaahi talaʻofa ke fakamoleki ha taimi lahi ange mo e fānaú. Kuo tukunoaʻi lahi ʻa e meʻa ʻoku fakahuʻuhuʻu ʻe he foʻi moʻoni tefito anga-maheni ko ia, “ʻOku fakafuofuaʻi ha tangata mei he anga ʻo ʻene tauhi ʻa ʻene leá.”

Ko e moʻoni, ko e kakai tokolahi ʻoku ʻikai ʻaupito te nau taumuʻa kinautolu ke tauhi ʻenau ngaahi palōmesí. Ko e niʻihi ia kuo nau fai ʻa e ngaahi talaʻofa fakavavevave ʻa ia ʻoku ʻikai te nau lava ʻo tauhi, pe maumauʻi ʻenau leá koeʻuhí pē ko e founga faingofua taha ia ke faí.

Ko ia ai, ko hono tauhi ha palōmesi ʻe faingataʻa nai kapau ʻe hoko noa ha ngaahi tuʻunga taʻeʻamanekina. Ka ʻoku fai moʻoni ʻe ha palōmesi kuo maumauʻi ha maumau lahi? ʻOku totonu ke ke tokanga fakamātoato ki hoʻo ngaahi palōmesí? Ko ha sio fakanounou ki he faʻifaʻitakiʻanga ʻa Sihova ko e ʻOtuá ʻe tokoni ia kiate kitautolu ke tau sio ki he ʻuhinga ʻoku totonu ai ke tau fakakaukau fakamātoato ki he meʻá ni.

ʻOku Fakahoko ʻe Sihova ʻEne Ngaahi Palōmesí

ʻOku tau lotu ki ha ʻOtua ʻa ia ko hono huafá tonu ʻoku fekauʻaki vāofi ia mo hono fakahoko ʻene ngaahi palōmesí. ʻI he ngaahi kuonga ʻo e Tohitapú ʻoku faʻa hanga ʻe ha hingoa ʻo fai ha fakamatala fekauʻaki mo e tokotaha ko iá. ʻOku toe moʻoni foki eni fekauʻaki mo e huafa Sihová, ʻa ia ko hono ʻuhingá “ʻOkú Ne Fakatupunga ke Hoko.” Ko ia ko e hingoa fakaʻotuá ʻokú ne fakakau atu ʻa e foʻi fakakaukau ko e ʻOtuá te ne fakahoko ʻene ngaahi palōmesí mo fakaaʻu ʻene ngaahi taumuʻá.

ʻI heʻene moʻoni fakatatau ki hono huafá, kuo tauhi ʻe Sihova ʻene palōmesi kotoa pē kuó ne fai ki he puleʻanga ʻi onoʻaho ʻo ʻIsilelí. Fekauʻaki mo e ngaahi palōmesi ko ení, naʻe fakamahino mai ʻe Tuʻi Solomone: “Fakafetai kia Jihova, aia kuo ne foaki ae mālōlō ki he ene kakai Isileli, o fakatatau moia kotabe naa ne talaofa ki ai: kuo ikai ke to noa ha momoi lea e taha o ene talaofa lelei kotoabe, aia naa ne talaofa aki i he nima o ene tamaioeiki ko Mosese.”​—1 Tuʻi 8:​56, PM.

Ko e tuʻunga alafalalaʻanga ko ia ʻo Sihová naʻe malava ai ʻa e ʻapositolo ko Paulá ke fakaʻuhinga: “Ko Epalahame naʻe fai ha talaʻofa ki ai ʻe he ʻOtua; pe ʻi he ʻikai ha toko taha maʻolunga hake ke ne lea tuki ai, ko ia naʻa ne lea tuki ʻi he ʻEne ʻAfio.” (Hepelu 6:13) ʻIo, ko e huafa mo e tokotaha tonu ko Sihová ko e fakapapauʻiʻanga ia he ʻikai te ne holomui mei heʻene ngaahi palōmesí, neongo ai ko ha fuʻu mole lahi nai kiate ia. (Loma 8:32) Ko e foʻi moʻoni ko ia ʻoku hanga ʻe Sihova ʻo fakahoko ʻene ngaahi palōmesí ʻoku ʻomi ai kiate kitautolu ha ʻamanaki ko ha taula ki hotau soulú, pe moʻuí.​—Hepelu 6:19.

Ko e Ngaahi Talaʻofa ʻa Sihová pea mo Hotau Kahaʻú

Ko ʻetau ʻamanakí, ko ʻetau tuí, pea mo ʻetau moʻuí tonu ʻoku fakatefito kotoa ia ʻi hono fakahoko ko ia ʻo e ngaahi talaʻofa ʻa Sihová. Ko e hā ʻa e ʻamanaki ʻoku tau koloaʻakí? “ʻI he funga ʻo e talaʻofa ʻa ʻEne ʻAfio [ʻa e ʻOtuá] ʻoku tau ʻamanaki ki ha ngaahi langi foʻou mo ha fonua foʻou, ʻa ia ʻoku nofoʻanga ai ʻa maʻoniʻoni.” (2 Pita 3:13) ʻOku toe ʻomai ʻe he ngaahi Konga Tohitapú kiate kitautolu ha makatuʻunga ki he tui ko ia “ʻe faifai pea ʻe hoko ha toetuʻu ʻa e angatonu mo e angahala fakatouʻosi.” (Ngāue 24:15) Pea ʻoku lava ke tau falala ʻoku ʻi ai ʻa e meʻa lahi ange ia ʻi he moʻui lolotonga ko ʻení. Ko e moʻoni, ko e meʻa ia ʻoku ui ʻe he ʻapositolo ko Sioné ko e “meʻa naʻa ne talaʻofaʻaki” ko e “moʻui taʻengata.” (1 Sione 2:25) Ka ko e ngaahi palōmesi ʻa Sihova ʻi heʻene Folofolá ʻoku ʻikai fakangatangata pē ia ki he kahaʻú. ʻOku nau ʻomi ʻa e ʻuhinga ki heʻetau moʻui fakaʻaho he taimi ní.

Naʻe hiva ʻa e tangata-tohi-sāmé: “ʻOku ofi leva ʻa Sihova ki he kakai kotoa ʻoku tautapa kiate ia; . . . Pea ʻoku ongo kiate ia ʻenau kaila.” (Sāme 145:​18, 19) ʻOku toe fakapapauʻi mai ʻe he ʻOtuá kiate kitautolu “ʻoku ne ʻatu ngu ki he vaivai; pea ko ia ʻoku ʻikai hano ivi ʻoku ne fakalahi hono malohi.” (Aisea 40:29) Pea hono ʻikai ko ha fakafiemālie ia ke ʻilo ‘ʻe ʻikai tuku ʻe he ʻOtuá ke ʻahiʻahiʻi kitautolu ʻo makehe atu ʻi heʻetau mafaí; kae kehe, te ne ngaohi fakataha mo e ʻahiʻahí hono haoʻanga foki mei ai’! (1 Kolinito 10:13) Kapau kuo tau hokosia tonu hano fakahoko ʻo ha taha ʻo e ngaahi palōmesí ni, ʻoku tau ʻilo ʻoku malava ke fai ʻa e falala fakaʻaufuli kia Sihova. ʻI he vakai ki he ngaahi ʻaonga kuo tau maʻu mei he ngaahi palōmesi lahi kuo fai mo tauhi ʻe he ʻOtuá, ʻoku totonu ke fēfē ʻetau vakai ki heʻetau ngaahi palōmesi kiate iá?

Tauhi ʻEtau Ngaahi Palōmesi ki he ʻOtuá

Ko ʻetau fakatapui ki he ʻOtuá ʻoku ʻikai ha veiveiua ko e palōmesi mahuʻinga taha ia ʻoku lava ke tau faí. ʻI hono fakahoko ʻa e foʻi sitepu ko ení, ʻoku tau fakahāhā ai ʻoku tau loto ke tauhi kia Sihova ʻo taʻengata. Lolotonga ko e ngaahi fekau ʻa e ʻOtuá ʻoku ʻikai fakamafasia, ʻe ʻikai nai faʻa faingofua ke fai hono finangaló, koeʻuhí he ʻoku tau lolotonga moʻui ʻi he fokotuʻutuʻu fulikivanu ʻo e ngaahi meʻa ko ení. (2 Timote 3:12; 1 Sione 5:3) Ka ʻi he taimi pē kuo tau ‘ala ai ke fakaʻuli ʻa e palaú’ pea hoko ko e kau sevāniti ʻosi fakatapui ʻa Sihova mo e kau ākonga ʻa hono ʻAló, ʻa Sīsū Kalaisi, ʻoku totonu leva ke ʻoua ʻaupito te tau toe sio ki mui ki he ngaahi meʻa ʻo e māmaní ʻa ia kuo tau ʻosi tuku ki muí.​—Luke 9:62.

ʻI he taimi ʻoku tau lotu ai kia Sihová, te tau ongoʻi nai kuo ueʻi kitautolu ke fai ha palōmesi kiate ia te tau faitau ke ikuʻi ha vaivaiʻanga, fakatupulekina ha ʻulungaanga faka-Kalisitiane, pe fakalahi ʻi ha tafaʻaki ʻo ʻetau ngāue fakateokalatí. Ko e hā te ne tokoniʻi kitautolu ke muiaki atu ʻi he ngaahi palōmesi ko ení?​—Fakafehoanaki mo Koheleti 5:​2-5.

Ko e ngaahi palōmesi loto-moʻoní ʻoku haʻu ia mei he lotó pea pehē ki he ʻatamaí. Ko ia ai, tau fakamoʻoniʻi ʻetau ngaahi palōmesi kia Sihová ʻaki ʻetau fakaava hotau lotó kiate ia ʻi he lotu, ʻo fakamatala moʻoni ʻetau ngaahi manavaheé, ngaahi holí, mo hotau ngaahi vaivaiʻangá. Ko e lotu fekauʻaki mo ha palōmesi te ne hanga ʻo fakaivimālohiʻi ʻetau fakapapau ke tauhi iá. Te tau vakai nai ki heʻetau ngaahi palōmesi ki he ʻOtuá ʻo hangē ha ngaahi moʻuá. ʻI he taimi ʻoku lahi ai ʻa e ngaahi moʻuá, kuo pau leva ke totongi fakakongokonga ia. ʻOku pehē pē, ko e ngaahi palōmesi lahi ʻoku tau fai kia Sihová ʻe tuku ha taimi ia ke fakahoko ai. Ka ʻi hono foaki maʻu pē kiate ia ʻa e meʻa ʻoku tau malavá, ʻoku tau fakahā ai ʻoku tau fai ki he meʻa ʻoku tau leaʻakí, pea te ne hanga leva ʻo tāpuekina kitautolu ʻo fakatatau ki ai.

ʻE lava ke tau fakahāhā ʻoku tau fai fakamātoato ki heʻetau palōmesí ʻaki ʻetau faʻa lotu fekauʻaki mo ia, ʻo fai nai ʻi he ʻaho taki taha. ʻE fakahaaʻi ʻe he meʻá ni ki heʻetau Tamai fakahēvaní ko kitautolú ʻoku tau loto-moʻoni. ʻE toe hoko foki ia ko e fakamanatu tuʻumaʻu. Naʻe tuku mai ʻe Tēvita kiate kitautolu ha faʻifaʻitakiʻanga lelei ʻi he tuʻunga ko ení. ʻI ha hiva, naʻá ne tautapa ai kia Sihova: “Elohimi e, ongoʻi ʻeku tangi atu; tokangaʻi muʻa ʻeku lotu. . . . Te u hiva ʻaki ho huafa maʻu pe, ʻou fakaai ʻeku ngaahi tukumoʻui hokohoko ʻaho pe.”​—Sāme 61:1, 8.

Ko Hono Tauhi ʻEtau Ngaahi Palōmesí ʻOkú Ne Langa Hake ʻa e Falalá

Kapau ko e ngaahi palōmesi ki he ʻOtuá ʻoku totonu ke ʻoua ʻe fakamaʻamaʻaʻi, ko e meʻa tatau pē ʻe lava ke leaʻaki fekauʻaki mo e ngaahi palōmesi ko ia ʻoku tau fai ki hotau ngaahi kaungā Kalisitiané. ʻOku totonu ke ʻoua te tau feangainga kia Sihova ʻi he founga ʻe taha pea founga kehe ki hotau fanga tokouá. (Fakafehoanaki mo 1 Sione 4:20.) ʻI heʻene Malanga ʻi he Moʻungá, naʻe pehē ai ʻe Sīsū: “Io be hoo mou io; mo Ikai be hoo mou ikai.” (Mātiu 5:​37, PM, fakaʻītali ʻamautolu.) Ko hono fakapapauʻi ko ia ko ʻetau leá ʻoku falalaʻanga maʻu peé, ko e taha ia ʻo e founga ‘ʻoku tau ngāue ʻaonga ai kiate kinautolu ʻoku ʻi he fāmili ʻo e lotú.’ (Kaletia 6:10) Ko e palōmesi kotoa pē ʻoku tau tauhí ʻokú ne langa hake ʻa e falalá.

Ko e maumau ʻoku hoko ʻi hano maumauʻi ha palōmesi ʻoku faʻa matalahi ia ʻi he taimi ʻoku fekauʻaki ai mo ha paʻanga. Pe ko hano totongi fakafoki ha nō, fai ʻo ha ngāue, pe fakahoko ha aleapau fakakomēsiale, ʻoku totonu ki ha Kalisitiane ke ne tauhi ʻene leá. ʻOku fakahōifua eni ki he ʻOtuá pea ʻoku fakamaʻu ai ʻa e fefalalaʻaki ko ia ʻoku mātuʻaki fiemaʻú kapau ko e fanga tokouá ke nau “nofo fakataha . . . i he feofoofani.”​—Sāme 133:​1, PM.

Kae kehe, ko e taʻemalava ko ia ke tauhi ʻa e ngaahi aleapaú, ʻe lava ke maumau ai ʻa e fakatahaʻangá pea pehē ki he niʻihi tāutaha ko ia ʻoku kaungatonu ki aí. ʻOku pehē ʻe ha ʻovasia fefonongaʻaki: “Ko e ngaahi fekīhiaki fakapisinisí​—ʻa ia ʻoku fakatupunga maʻu pē ʻe he ngaahi aleapaú ʻoku pehē ʻe he faʻahi ko ē ʻoku ʻikai fai ki ai ʻa e faʻahi ʻe tahá—ʻoku faʻa hoko ia ʻo ʻilo ki ai ʻa e kakaí. Ko hono olá leva, ʻoku fakafaʻafaʻahi ai ʻa e fanga tokouá, pea hoko ai ʻa e ʻātakai ʻi he Fale Fakatahaʻangá ʻo fefūsiaki.” He meʻa mahuʻinga moʻoni ia ke fakakaukauʻi fakalelei ʻa e aleapau kotoa pē ʻoku tau faí pea fai fakapepa ia!a

ʻOku totonu foki ke fai ha tokanga ʻi he taimi ʻoku fakatau atu ai ha ngaahi koloa mamafa pe fokotuʻu atu ha ngaahi ʻinivesi, tautefito kapau ʻoku tau maʻu ai ha tupu fakafoʻituitui mei hono fakahokó. ʻOku pehē pē, ʻoku ʻi ai ʻa e fiemaʻu ke mātuʻaki tokanga ke ʻoua ʻe fakalahiʻi ʻa e ngaahi ʻaonga ʻo ha ngaahi nāunau makehe pe ngaahi koloa ki he moʻuí pe ko e palōmesi ki ha ngaahi toe fakafoki taʻeʻuhinga ʻo ha ngaahi ʻinivesi. Ko e ʻofá ʻoku totonu ke ne ueʻi ʻa e kau Kalisitiané ke nau fakamatalaʻi kakato ha ngaahi faingatāmaki pē ʻe kaunga ki ai. (Loma 12:10) Koeʻuhi ko e tokolahi taha ʻo e fanga tokouá ʻoku fakangatangata pē ʻenau taukei fakapisinisí, te nau falala nai ki heʻetau faleʻí koeʻuhi pē ʻoku tau felāveʻi mo kinautolu ʻi he tuí. He toki meʻa pango moʻoni ia ʻe hoko kapau ko e falala ko ení ʻe maumauʻi!

ʻI he tuʻunga ko e kau Kalisitiané, ʻe ʻikai te tau ohi mai ha ngaahi ngāue fakapisinisi ʻa ia ʻoku taʻefaitotonu pe taʻetokangaʻi ai ʻa e ngaahi tupu fakalao ʻa e niʻihi kehé. (Efeso 2:​2, 3; Hepelu 13:18) Ke maʻu ʻa e hoifua ʻa Sihová ʻi he hoko ko ha ‘ʻāunofo ʻi he teniti ʻoʻoná,’ kuo pau ke tau hoko ʻo falalaʻanga. ‘ʻO aʻu pē kapau kuo tau fai ha fuakava ʻoku iku kovi kiate kitautolu, ʻoku ʻikai te tau mioʻi.’​—Sāme 15:​1, 4.

Ko Fakamaau Sēfita ʻo ʻIsilelí naʻá ne tukupā kapau ʻe tuku ʻe he ʻOtuá ke ne ikunaʻi ʻa e kau ʻĀmolí, te ne foaki kia Sihova ko ha feilaulau tutu ʻa e ʻuluaki tokotaha ko ia ʻe fakafetaulaki kiate ia ʻi he hili ʻene foki mei he taú. Naʻe iku ko e tokotaha ko iá ko e tama pē ia ʻe taha ʻa Sēfitá, ka naʻe ʻikai te ne toe holomui mei heʻene leá. Fakataha mo e loto-lelei moʻoni ʻa hono ʻofefiné, naʻá ne foaki atu ai ia ke ne ngāue tuʻuloa ʻi he fale tapu ʻo Sihová​—ko ha feilaulau ia naʻe taʻetoeveiveiua ʻene fakamamahi pea mātuʻaki mole lahi ʻi he ngaahi founga kehekehe.​—Fakamaau 11:​30-40.

Tautefito ki he kau ʻovasia ʻo e fakatahaʻangá ʻa ʻenau maʻu ha fatongia ko hono tauhi ʻenau ngaahi aleapaú. Fakatatau ki he 1 Timote 3:​2 (PM), ʻoku totonu ki ha ʻovasia ke “taehalaia.” Ko hono fakalea eni ʻo ha kupuʻi lea faka-Kalisi ʻa ia ʻoku ʻuhingá ko e “ʻikai malava ke ala ki ai, taʻealatukuakiʻi, ʻikai ʻaupito alatukuakiʻi.” ʻOkú ne “fakahā ko e tangata ko iá ʻoku ʻikai ngata pē hono lauʻi leleí, ka ʻokú ne mātuʻaki taau moʻoni ia.” (A Linguistic Key to the Greek New Testament) Koeʻuhi ko ha ʻovasia kuo pau ke taʻehalaia, ko ʻene ngaahi palōmesí ʻoku totonu ke alafalalaʻanga maʻu pē.

Ngaahi Founga Kehe ke Tauhi Ai ʻEtau Ngaahi Palōmesí

ʻOku totonu ke fēfē ʻetau vakai ki he ngaahi palōmesi ʻoku tau fai ki he faʻahinga ko ia ʻoku ʻikai ko e kaungā Kalisitiané? “Ke ulo atu hoʻomou māma ke hā ki he kakai,” ko e lea ia ʻa Sīsuú, “ke nau mamata ki hoʻomou ngāhi ngaue lelei, pea fakamālōʻia ʻa hoʻomou Tamai ʻoku ʻi Hevani.” (Mātiu 5:16) ʻI hono fakamoʻoniʻi ʻoku tau tauhi ʻetau leá, te tau tohoaki mai nai ai ʻa e niʻihi kehé ki heʻetau pōpoaki faka-Kalisitiané. Neongo ʻa e hōloa ʻi māmani kotoa ʻa e ngaahi tuʻunga ʻo e faitotonú, ko e tokolahi taha ʻo e kakaí ʻoku nau kei fakamahuʻingaʻi ʻa e anga-tonú. Ko hono tauhi ko ia ʻetau ngaahi palōmesí ko e taha ia e founga ʻo hono fakahāhā ʻetau ʻofa ki he ʻOtuá mo e kaungāʻapí pea fakamānako ia ki he kau ʻofa ki he māʻoniʻoní.​—Mātiu 22:​36-39; Loma 15:2.

Lolotonga ʻenau taʻu fakangāue ʻo e 1998, naʻe fakamoleki ai ʻe he Kau Fakamoʻoni ʻa Sihová ʻa e ngaahi houa laka hake he pilioná ʻi heʻenau talaki ki he kakaí ʻa e ongoongo lelei ʻo e Puleʻanga ʻo e ʻOtuá. (Mātiu 24:14) Ko e niʻihi ʻo e malanga ko ení kuo ʻikai nai fai ha fiefanongo ki ai kapau ne ʻikai ke tau tauhi ʻetau leá ʻi ha ngaahi alea fakapisinisi, pe ʻi ha ngaahi meʻa kehe. Koeʻuhi ʻoku tau fakafofongaʻi ʻa e ʻOtua ʻo e moʻoní, ʻoku totonu leva ʻa hono ʻamanekina mai ʻe he kakaí kitautolu ke tau ngāue faitotonú. ʻI heʻetau hoko ʻo falalaʻangá mo faitotonú, ʻoku tau “teungaʻia ʻiate kinautolu ʻi he meʻa kotoa pe ʻa e tokateline ʻa hotau ʻOtua Fakamoʻui.”​—Taitusi 2:​10.

ʻI heʻetau ngāue fakafaifekaú, ʻoku tau maʻu ai ʻa e ngaahi faingamālie ke tauhi ʻetau leá ʻi he taimi te tau toe foki ai ʻo ʻaʻahi ki he faʻahinga naʻa nau fakahā ha mahuʻingaʻia ʻi he pōpoaki ʻo e Puleʻangá. Kapau naʻa tau lea te tau toe foki, ʻoku totonu ke tau fai pehē. Ko e toe foki ʻo hangē ko ia kuo tau palōmesi ki aí ko ha founga ia ke ‘ʻoua taʻofi ai ha lelei meiate kinautolu ʻoku ʻonautolu iá.’ (Palovepi 3:27) Naʻe fakamatalaʻi ʻe ha tuofefine ʻe taha ʻa e meʻá ni ʻi he founga ko ení: “ʻI ha ngaahi taimi, ne u fetaulaki ai mo ha faʻahinga naʻe mahuʻingaʻia ʻa ia naʻa nau pehē naʻe ʻi ai ha tokotaha Fakamoʻoni naʻá ne palōmesi ange te ne toe foki ange, ka kuo teʻeki ai ke ne fai ia. Ko e moʻoni, ʻoku ou ʻilo ʻe au ko e kakai ʻo e ngaahi ʻapí naʻe ʻikai nai te nau ʻi ʻapi, pe ko e ngaahi tuʻunga nai naʻe hoko kuó ne ʻai ke taʻemalava ai ha toe foki ki ai. Ka ʻoku ʻikai te u teitei saiʻia ke tala mai ʻe ha taha ʻoku ou pehē, ko ia ʻoku ou fai hoku lelei tahá ke toe maʻu ʻa e tokotaha ko iá ki ʻapi. ʻOku ou tui kapau he ʻikai te u tauhi ʻeku leá, ʻe ongoongo kovi ai ʻa Sihova mo hoku fanga tokouá kotoa.”

ʻI he ngaahi tuʻunga ʻe niʻihi, ʻe ʻikai nai te tau ongoʻi fie foki koeʻuhí ʻoku tau fakaʻosiʻaki ʻo pehē ʻoku ʻikai mahuʻingaʻia moʻoni ʻa e tokotaha ia ko iá. ʻOku fakamatala ʻe he tuofefine tatau pē: “ʻOku ʻikai te u feinga au ke fakamāuʻi ʻa e lahi ʻo e mahuʻingaʻiá. Ko e meʻa naʻá ku hokosiá tonu kuó ne ako kiate au ko e ʻuluaki ongoʻí ʻoku faʻa hala maʻu pē ia. Ko ia, ʻoku ou feinga ke fakakaukau pau, ʻo vakai ki he tokotaha kotoa pē ko ha taha ia ʻe ala hoko ko ha tuongaʻane pe tokoua.”

ʻI he ngāue fakafaifekau faka-Kalisitiané pea ʻi he ngaahi tafaʻaki kehe lahi, ʻoku fiemaʻu ke tau fakahā ko ʻetau leá ʻe lava ke fai ha falala ki ai. Ko e moʻoni, ʻoku ʻi ai ʻa e ngaahi meʻa ia ʻe niʻihi ʻoku faingofua ange hono leaʻakí ʻi hono faí. Naʻe hiki ʻe he tangata potó: “Ko e toko lahi ʻoku lau taki taha, ʻoku ʻofa tokua: ka ko e fai moʻoni ʻe ʻilo ʻe hai?” (Palovepi 20:6) ʻI he loto-papau, ʻe lava ke tau faitotonu mo moʻoni ki heʻetau leá.

Ngaahi Tāpuaki Lahi mei he ʻOtuá

Ko hono fai fakakaukauʻi ha palōmesi loi ko e taʻefaitotonu ia pea ʻe fakatatau nai ia ki hano fakafonu ha sieke hili ko iá ʻoku ʻikai ha paʻanga ia ʻi he ʻakauni ko iá he pangikeé. Ka ko ha ngaahi pale mo ha ngaahi tāpuaki moʻoni ia ʻoku tau maʻu, ʻi hono tauhi ʻetau ngaahi palōmesí! Ko e tāpuaki ʻe taha ki he hoko ko ia ʻo falalaʻangá ko hono maʻu ha konisēnisi lelei. (Fakafehoanaki mo Ngāue 24:16.) ʻI he ʻikai ongoʻi hohaʻa koeʻuhi ko e halaiá, ʻoku tau ongoʻi ʻe kitautolu ʻa e fiemālie mo e nonga. ʻIkai ko ia pē, ʻi hono tauhi ʻetau leá, ʻoku tau tokoni ai ki he fāʻūtaha ʻa e fakatahaʻangá, ʻa ia ʻoku fakatuʻunga ʻi he fefalalaʻakí. Ko ʻetau “tala ʻa e moʻoni” ʻokú ne toe fakaongoongoleleiʻi kitautolu ko e kau faifekau ʻa e ʻOtua ʻo e moʻoní.​—2 Kolinito 6:​3, 4, 7.

Ko Sihová ʻokú ne fai ki heʻene leá, pea ʻokú ne fehiʻa ki he “ʻelelo loi.” (Palovepi 6:​16, 17) ʻI he faʻifaʻitaki ki heʻetau Tamai fakahēvaní, ʻoku tau ʻunu ofi ai kiate ia. ʻOku pau moʻoni leva, ʻoku tau maʻu ʻa e ʻuhinga lelei ki hono tauhi ʻetau ngaahi palōmesí.

[Fakamatala ʻi lalo]

[Fakatātā ʻi he peesi 10]

Naʻe tauhi ʻe Sēfita ʻene palōmesí, neongo ko hono fai iá naʻe fakamamahi

[Fakatātā ʻi he peesi 11]

Kapau naʻá ke palōmesi te ke toe foki, teuteu lelei ke fai pehē