ʻOku Tataki ʻe Sihova ʻa Hono Kakaí

1, 2. (a) ʻOku anga-fēfē ʻa e kehe ʻa e Kau Fakamoʻoni ʻa Sihová mei he ngaahi lotu kehé? (e) Ko e hā te tau ako ʻi he kupú ni pea mo e kupu hono hokó?

ʻOKU faʻa ʻeke ʻe he kakaí ki he Kau Fakamoʻoni ʻa Sihová, “Ko hai ʻa homou takí?” ʻOku nau fifili fekauʻaki mo ení koeʻuhí he ko e ngaahi lotu lahi ʻoku ʻi ai ha tangata pe fefine ko honau takí ia. Kae kehe, ʻoku tau laukauʻaki ke pehē ko hotau Takí ʻoku ʻikai ko ha tangata taʻehaohaoa. ʻI hono kehé, ko hotau Takí ko Sīsū Kalaisi! Pea ʻokú ne talangofua ki heʻene Tamaí mo hono Takí, ʻa Sihova.—Māt. 23:10.

² ʻOku toe ʻi ai ha kulupu ʻo e kau tangata, ʻoku ui ko e “tamaioʻeiki anga-tonu mo potó,” ʻoku nau takimuʻa ʻi he lotolotonga ʻo e kakai ʻa e ʻOtuá ʻi he māmaní he ʻahó ni. (Māt. 24:45) Ka ʻoku anga-fēfē ʻetau ʻiloʻi ko Sihova moʻoni ʻokú ne tataki kitautolu fakafou ʻi hono ʻAló? Te tau sio heni ki he ʻuhinga ʻe tolu ʻoku lava ke tau fakapapauʻi ai iá. Pea neongo kuo ngāueʻaki ʻe Sihova ʻa e faʻahinga pau ʻo e tangatá ke nau tataki ʻa hono kakaí, ʻoku hā mahino ko Sihova naʻe hoko pea ʻoku kei hoko ko e Taki moʻoni ia ʻo hono kakaí.—ʻAi. 58:11.

 3. Ko e hā naʻá ne fakaivia ʻa Mōsese ke ne tataki ʻa ʻIsilelí?

³ Naʻe fakaivia ʻe he laumālie māʻoniʻoní ʻa e kau fakafofonga ʻo e ʻOtuá. Naʻe fili ʻe he ʻOtuá ʻa Mōsese ke ne hoko ko e taki ʻo e kau ʻIsilelí. Ko e hā naʻá ne tokoniʻi ia ke ne tokangaʻi ʻa e vāhenga-ngāue mātuʻaki mahuʻinga ko ení? Naʻe foaki ʻe Sihova kia Mōsese ʻa “hono Laumalie Tapuha [pe māʻoniʻoní].” (Lau ʻa e ʻAisea 63:11-14.) Ko ia naʻe tataki moʻoni ʻe Sihova ʻa hono kakaí, koeʻuhí he ko hono laumālié naʻá ne tokoniʻi ʻa Mōsesé.

 4. Ko e hā naʻá ne fakamoʻoniʻi naʻe maʻu ʻe Mōsese ʻa e laumālie ʻo e ʻOtuá? (Sio ki he ʻuluaki fakatātā ʻi he kupú ni.)

⁴ Naʻe lava ke ʻiloʻi ʻe he kakaí ʻoku maʻu ʻe Mōsese ʻa e laumālie ʻo e ʻOtuá? ʻIo! Naʻe ʻoange ʻe he laumālie māʻoniʻoni ʻo Sihová kia Mōsese ʻa e malava ke ne fakahoko ʻa e ngaahi mana pea ke ne ʻai ke ʻiloʻi ʻa e huafa ʻo e ʻOtuá ʻe Felo, ko e pule mālohi lahi ʻo ʻIsipité. (ʻEki. 7:1-3) Naʻe toe tokoniʻi ʻe he laumālie māʻoniʻoní ʻa Mōsese ke ne hoko ko ha taki anga-ʻofa mo anga-kātaki. Naʻá ne kehe ʻaupito mei he kau taki anga-fefeka mo siokita ʻo e ngaahi fonua kehé! (ʻEki. 5:2, 6-9) ʻOku hā mahino, naʻe fili ʻe Sihova ʻa Mōsese ke ne hoko ko e taki ʻo Hono kakaí.

 5. Ko hai naʻe toe ʻoange ki ai ʻe Sihova ʻa e laumālie māʻoniʻoní ke tataki ʻaki ʻa hono kakaí?

⁵ Ko hai naʻe toe ʻoange ki ai ʻe Sihova ʻa e laumālie māʻoniʻoní ke ne tataki ʻa hono kakaí? ʻOku pehē ʻe he Tohi Tapú: “Ko Siosiua ko e foha ʻo Nuni naʻa ne fonu ʻi he laumalie ʻo e poto.” (Teu. 34:9) “Ko e Laumalie ʻo Sihova naʻe kofuʻaki ʻa Kitione.” (Fkm. 6:34) Pea “naʻe ʻohofia ʻa Tevita ʻe he Laumalie ʻo e ʻEiki.” (1 Sām. 16:13) Ko e kau tangata kotoa ko iá naʻa nau fakafalala ki he laumālie ʻo e ʻOtuá ke ne tokoniʻi kinautolu ke nau fai ʻa e ngaahi meʻa naʻe ʻikai mei lava ke nau fai ʻi honau mālohi pē ʻonautolú. (Sios. 11:16, 17; Fkm. 7:7, 22; 1 Sām. 17:37, 50) ʻOku hā mahino, ko Sihova ʻa e tokotaha naʻá ne ʻoange kiate kinautolu ʻa e mālohi ke nau fai ʻa e ngaahi meʻa lalahí, ko ia ʻokú ne tuha toko taha pē mo e fakahīkihikí.

 6. Ko e hā naʻe fiemaʻu ai ʻe he ʻOtuá ʻa hono kakaí ke nau tokaʻi ʻa e kau taki ʻi ʻIsilelí?

⁶ Ko e hā naʻe totonu ke fai ʻe he kau ʻIsilelí ʻi heʻenau ʻiloʻi naʻe fakaivia ʻe he laumālie māʻoniʻoni ʻo e ʻOtuá ʻa Mōsese, Siosiua, Kitione, pea mo Tēvitá? Naʻe totonu ke nau tokaʻi kinautolu. ʻI he taimi naʻe lāunga ai ʻa e kakaí fekauʻaki mo Mōsesé, fakatokangaʻi ʻa e meʻa naʻe ʻeke ʻe Sihová: “ʻE tuku ʻafe ʻa e taʻetokaʻi au ʻe he kakai ni?” (Nōm. 14:2, 11) ʻOku hā mahino, naʻe fili ʻe Sihova ʻa e kau tangata ko iá ke nau tataki ʻa Hono kakaí. ʻI he taimi naʻe talangofua ai kiate kinautolu ʻa e kakaí, ko hono moʻoní ko ʻenau muimui ia kia Sihova ko honau Takí.

 7. Naʻe anga-fēfē hono tokoniʻi ʻe he kau ʻāngeló ʻa Mōsesé?

⁷ Naʻe tokoniʻi ʻe he kau ʻāngeló ʻa e kau fakafofonga ʻo e ʻOtuá. (Lau ʻa e Hepelū 1:7, 14.) Naʻe ngāueʻaki ʻe he ʻOtuá ʻa e kau ʻāngeló ke nau tataki ʻa Mōsese. ʻUluakí, ko ha ʻāngelo “naʻe hā kiate ia ʻi he fuʻu ʻakau talatalá” ʻo ʻoange kiate ia ʻa e vāhenga-ngāue ko hono fakatauʻatāinaʻi ʻa e kau ʻIsilelí pea tataki kinautolu. (Ngā. 7:35) Uá, naʻe ngāueʻaki ʻe he ʻOtuá ʻa e kau ʻāngeló ke nau ʻoange kia Mōsese ʻa e Laó koeʻuhí ke fakahinohinoʻi ʻaki ʻa e kau ʻIsilelí. (Kal. 3:19) Tolú, naʻe tala ange ʻe Sihova kiate ia: “Taki ʻa e kakai ki he meʻa naʻa ku lea ai kiate koe; vakai, ko ʻeku Angelo te ne takimuʻa kiate koe.” (ʻEki. 32:34) ʻOku ʻikai ke pehē ʻe he Tohi Tapú ia naʻe sio ʻa e kau ʻIsilelí ki ha ʻāngelo ʻokú ne fai ʻa e ngaahi meʻa ko iá. Kae kehe, mei he founga ʻo hono fakahinohinoʻi mo tataki ʻe Mōsese ʻa e kakaí, naʻe hā mahino ai naʻe tokoniʻi ia ʻe he kau ʻāngeló.

 8. Naʻe anga-fēfē hono tokoniʻi ʻe he kau ʻāngeló ʻa Siosiua mo Hesekaiá?

⁸ Ko hai naʻe toe tokoniʻi ʻe he kau ʻāngeló? ʻOku pehē ʻe he Tohi Tapú “ko e kapiteni ʻo e tau ʻa Sihova,” ko ha ʻāngelo, naʻá ne tokoniʻi ʻa Siosiua ke ne ikuna ʻi ha tau mo e kau Kēnaní. (Sios. 5:13-15; 6:2, 21) Ki mui ai, ʻi hono tataki ʻe Tuʻi Hesekaia ʻa e kakai ʻa e ʻOtuá, naʻe fakamanamanaʻi ʻe he fuʻu kau tau ʻAsīliá ke fakaʻauha ʻa Selusalema. ʻI he pō pē ʻe taha, ‘naʻe ʻalu atu ʻa e angelo ʻa Sihová, ʻo ne taaʻi ha toko taha kilu ma valu mano ma nima afe.’—2 Tuʻi 19:35.

 9. Neongo naʻe taʻehaohaoa ʻa e kau fakafofonga ʻa e ʻOtuá, ko e hā naʻe ʻamanekina mei he kau ʻIsilelí?

⁹ Ko e kau ʻāngeló ʻoku nau haohaoa. Kae kehe, naʻe ʻikai ke pehē ʻa e kau tangata naʻa nau tokoniʻí. Ko e fakatātaá, naʻe ʻikai ke fakalāngilangiʻi ʻe Mōsese ʻi he taimi ʻe taha ʻa Sihova. (Nōm. 20:12) Naʻe ʻikai ke ʻeke ʻe Siosiua ki he ʻOtuá ʻa e meʻa ke faí ʻi he taimi naʻe fiemaʻu ai ʻe he kau Kipioné ke fai ha aleapau mo iá. (Sios. 9:14, 15) ʻI he taimi ʻe taha, naʻe hoko ai ʻa Hesekaia ʻo hīkisia. (2 Kal. 32:25, 26) Neongo ko e kau tangatá ni naʻa nau taʻehaohaoa, naʻe ʻamanekina ke muimui ʻa e kau ʻIsilelí ki heʻenau tatakí. Naʻe lava ke ʻiloʻi ʻe he kau ʻIsilelí naʻe ngāueʻaki ʻe Sihova ʻa e kau ʻāngeló ke nau poupouʻi ʻa e kau tangatá ni. ʻOku hā mahino, naʻe tataki ʻe Sihova ʻa hono kakaí.

10. Naʻe anga-fēfē hono tataki ʻa Mōsese ʻe he Lao ʻa e ʻOtuá?

¹⁰ Naʻe tataki ʻe he Folofola ʻa e ʻOtuá ʻa hono kau fakafofongá. ʻOku lave ʻa e Tohi Tapú ki he Lao naʻe ʻoange ki ʻIsilelí ko e “lao ʻa Mosese.” (1 Tuʻi 2:3) Ka ʻoku ʻai ʻe he Tohi Tapú ke mahino ko Sihova ʻa e tokotaha naʻá ne ʻoange ki he kau ʻIsilelí ʻa e Laó. Pea naʻe toe pau ke talangofua ki ai ʻa Mōsese. (2 Kal. 34:14) Ko e fakatātaá, ʻi he hili hono tala ange ʻe Sihova kiate ia ʻa e founga ki hono faʻu ʻa e tāpanekalé, naʻe “fai ʻe Mosese: ʻO hange tofu pē ko e tuʻutuʻuni ʻa e ʻEiki kiate ia, naʻe pehē ʻene fai.”—ʻEki. 40:1-16.

11, 12. (a) Ko e hā naʻe fiemaʻu ke fai ʻe Siosiua mo e ngaahi tuʻi naʻa nau puleʻi ʻa e kakai ʻa e ʻOtuá? (e) Naʻe anga-fēfē hono tataki ʻe he Folofola ʻa e ʻOtuá ʻa e kau tangata naʻe takimuʻá?

¹¹ Naʻe maʻu ʻe Siosiua ha konga ʻo e Folofola ʻa e ʻOtuá ʻi he taimi naʻá ne hoko ai ko e takí, pea naʻe tala ange ʻe Sihova kiate ia: “Te ke fakalaulauloto ki ai ʻi he ʻaho mo e po, koeʻuhi ke ke tokanga ke fai ʻo hange ko e meʻa kotoa kuo tohi ai.” (Sios. 1:8) Ko e ngaahi tuʻi naʻa nau puleʻi ʻa e kakai ʻa e ʻOtuá ki mui aí naʻe pau ke nau lau ʻa e Laó ʻi he ʻaho kotoa pē, hiki hano tatau, pea talangofua ki he “ngaahi lea kotoa ʻo e lao ni mo konisitutone ke fai ki ai.”—Lau ʻa e Teutalōnome 17:18-20.

¹² Naʻe anga-fēfē hono tataki ʻe he Folofola ʻa e ʻOtuá ʻa e kau tangata naʻa nau takimuʻá? Fakakaukau angé ki he faʻifaʻitakiʻanga ʻa Tuʻi Siosaiá. Hili hono maʻu ʻa e Lao ʻa Mōsesé, naʻe lau ia ʻe he sekelitali ʻa Siosaiá kiate ia.a (Sio ki he fakamatala ʻi laló.) “ʻI he fanongo leva ʻe he tuʻi ki he ngaahi lea ʻo e Tohi Lao naʻa ne hae hifo hono kofu.” Naʻe ueʻi leva ʻe he Folofola ʻa e ʻOtuá ʻa Siosaia ke ne fakaʻauha ʻa e ngaahi ʻaitoli kotoa pē ʻi he fonuá pea fokotuʻutuʻu ke fai ʻa e kātoanga Pāsova lahi taha kuo faifai ange pea fakahokó. (2 Tuʻi 22:11; 23:1-23) Koeʻuhi ko e muimui ʻa Siosaia mo e kau taki faitōnunga kehé ʻi he Folofola ʻa e ʻOtuá, naʻa nau loto-lelei ke feʻunuʻaki ʻa e fakahinohino naʻa nau fai ki he kakai ʻa e ʻOtuá. Ko e ngaahi liliu ko ení naʻe tokoniʻi ai ʻa e kakai ʻa e ʻOtuá ke nau talangofua kiate Ia.

13. Naʻe anga-fēfē ʻa e kehe ʻa e kau taki ʻo e kakai ʻa e ʻOtuá mei he kau taki ʻo e ngaahi puleʻanga kehé?

¹³ Ko e kau taki ʻo e ngaahi puleʻanga kehé naʻe tataki kinautolu ʻe he poto fakangatangata fakaetangatá. Ko e fakatātaá, naʻe fai ʻe he kau taki Kēnaní mo honau kakaí ʻa e ngaahi meʻa fakalilifu, ʻa ia naʻe kau ai ʻa e hia fakamalaʻia, faka-Sōtoma, mohe mo e manú, feilaulauʻi ʻo e fānaú, pea mo e tauhi ʻaitolí. (Liv. 18:6, 21-25) Pehē foki, naʻe ʻikai ke maʻu ʻe he kau taki Pāpilone mo ʻIsipité ʻa e ngaahi tuʻutuʻuni tatau ki he maʻá ʻo hangē ko ia naʻe maʻu ʻe he kakai ʻa e ʻOtuá. (Nōm. 19:13) Kae kehe, naʻe lava ke sio ʻa e kakai ʻa e ʻOtuá ki he anga hono fakaʻaiʻai kinautolu ʻe honau kau taki faitōnungá ke nau tauhi ke maʻa ʻenau lotú, ke nau maʻa fakaesino, pea ke nau fakaʻehiʻehi mei he fehokotaki fakasino taʻemaʻá. ʻOku hā mahino, naʻe tataki kinautolu ʻe Sihova.

14. Ko e hā naʻe akonakiʻi ai ʻe Sihova ʻa e kau taki ʻe niʻihi ʻo hono kakaí?

¹⁴ Naʻe ʻikai ke muimui ʻa e ngaahi tuʻi kotoa naʻa nau pule ki he kakai ʻa e ʻOtuá ki he ngaahi fakahinohino ʻa e ʻOtuá. Ko e ngaahi tuʻi taʻefaitōnunga ko iá naʻa nau fakafisi ke muimui ʻi he tataki ʻa e laumālie māʻoniʻoni ʻo e ʻOtuá, ko ʻene kau ʻāngeló, pea mo ʻene Folofolá. ʻI he ngaahi tuʻunga ʻe niʻihi, naʻe akonakiʻi ai ʻe Sihova pe fetongi ʻa e kau taki ko iá. (1 Sām. 13:13, 14) Ki mui ai, naʻe fakanofo ʻe Sihova ʻa e tokotaha ʻa ia te ne hoko ko ha taki haohaoa.

15. (a) Naʻe anga-fēfē hono fakahaaʻi ʻe he kau palōfitá ʻa e haʻu ʻa e taki haohaoá? (e) Ko hai ʻa e taki haohaoá?

¹⁵ Naʻe talaʻofa ʻe Sihova ʻi he taʻu ʻe lauingeau, te ne fakanofo ha taki haohaoa maʻa hono kakaí. Ko e fakatātaá, naʻe tala ʻe Mōsese ki he kau ʻIsilelí: “ʻE fokotuʻu ʻe Sihova ko ho ʻOtua mei ho lotolotonga, mei ho kainga, hao palofita hange ko au; ko ia pe te mou fanongo ki ai.” (Teu. 18:15) Naʻe pehē ʻe ʻAisea ko e Tokotaha ko ení te ne hoko ko ha “takimua moe bule.” (ʻAi. 55:4, PM) Pea naʻe tohi ʻa Taniela ʻo fekauʻaki mo e Mīsaiá te ne hoko “ko e ʻEiki” pe taki. (Tan. 9:25) Fakaʻosí, naʻe fakahaaʻi tonu ʻe Sīsū Kalaisi ko ia ʻa e “Taki” ʻo e kakai ʻa e ʻOtuá. (Lau ʻa e Mātiu 23:10.) Ko e kau ākonga ʻa Sīsuú naʻa nau muimui loto-lelei kiate ia, pea naʻa nau tui ko ia naʻe fili ʻe Sihová. (Sione 6:68, 69) Ko e hā naʻá ne fakatuipauʻi kiate kinautolu ko Sīsū Kalaisi ʻa e tokotaha naʻe ngāueʻaki ʻe Sihova ke ne tataki ʻa hono kakaí?

16. Ko e hā naʻá ne fakamoʻoniʻi naʻe fakaivia ʻa Sīsū ʻe he laumālie māʻoniʻoní?

¹⁶ Naʻe fakaivia ʻe he laumālie māʻoniʻoní ʻa Sīsū. ʻI hono papitaiso ʻo Sīsuú, naʻe sio ʻa Sione “ki he langí ʻoku mavaeua pea ʻoku ʻalu hifo kiate ia ʻa e laumālié ʻo hangē ha lupé.” Taimi nounou pē mei ai, “naʻe ueʻi leva ia ʻe he laumālié ke ne ʻalu atu ki he toafá.” (Mk. 1:10-12) Lolotonga ʻa e ngāue fakafaifekau ʻa Sīsū ʻi he māmaní, naʻe fakaivia ia ʻe he laumālie māʻoniʻoni ʻo e ʻOtuá ke faiako pea ke ne fakahoko ʻa e ngaahi mana. (Ngā. 10:38) ʻIkai ko ia pē, naʻe tokoniʻi ʻe he laumālie māʻoniʻoní ʻa Sīsū ke ne fakahāhā ʻa e ngaahi ʻulungaanga hangē ko e ʻofá, fiefiá, mo e tui mālohí. (Sione 15:9; Hep. 12:2) ʻOku ʻikai ha toe taki kehe naʻe fakamoʻoniʻi ʻokú ne maʻu ʻa e laumālie māʻoniʻoni ʻo e ʻOtuá. ʻOku hā mahino, naʻe fili ʻe Sihova ʻa Sīsū ke ne hoko ko e Taki.

17. Ko e hā naʻe fai ʻe he kau ʻāngeló ke tokoniʻi ʻa Sīsuú?

¹⁷ Naʻe tokoniʻi ʻe he kau ʻāngeló ʻa Sīsū. Taimi nounou mei he papitaiso ʻo Sīsuú, “naʻe haʻu ha kau ʻāngelo pea kamata ke nau tokoni kiate ia.” (Māt. 4:11) ʻI ha ngaahi houa ki muʻa ʻi heʻene pekiá, “naʻe hā ha ʻāngelo mei he langí kiate ia ʻo ne fakaivimālohiʻi ia.” (Luke 22:43) Naʻe ʻiloʻi ʻe Sīsū ʻe fekauʻi mai ʻe Sihova ha kau ʻāngelo ke tokoniʻi ia ʻi ha taimi pē te ne fiemaʻu aí.—Māt. 26:53.

18, 19. Naʻe anga-fēfē hono tataki ʻe he Folofola ʻa e ʻOtuá ʻa e moʻui mo e faiako ʻa Sīsuú?

¹⁸ Naʻe tataki ʻe he Folofola ʻa e ʻOtuá ʻa Sīsū. Naʻe fakaʻatā ʻe Sīsū ke tataki ia ʻe he Folofolá, mei he kamataʻanga ʻo ʻene ngāue fakafaifekaú ʻo aʻu ki heʻene pekia ʻi he ʻakau fakamamahí. Naʻa mo e taimi naʻá ne ofi ai ke pekiá, naʻá ne lave ki he ngaahi kikite ʻo fekauʻaki mo e Mīsaiá. (Māt. 4:4; 27:46; Luke 23:46) Kae kehe, ko e kau taki lotu ʻo e taimi ko iá naʻa nau kehe ʻaupito meia Sīsū. Naʻa nau fili ke tukunoaʻi ʻa e Folofola ʻa e ʻOtuá ʻi ha taimi pē naʻe ʻikai ke tatau ai mo ʻenau ngaahi akonakí. Naʻe toʻo lea ʻa Sīsū mei he Folofola ʻa e ʻOtuá ʻi heʻene lea ʻo fekauʻaki mo kinautolu: “Ko e kakaí ni ʻoku nau fakaʻapaʻapaʻiaʻi au ʻaki honau loungutú, ka kuo hiki mamaʻo honau lotó meiate au. Ko e koto kulanoa ʻenau hanganaki lotu mai kiate aú, he ʻoku nau akoʻaki ʻa e ngaahi tuʻutuʻuni ʻa e tangatá ko e ngaahi tokāteline.” (Māt. 15:7-9) Heʻikai ʻaupito ke fili ʻe Sihova ha kau tangata naʻe ʻikai te nau muimui ki heʻene Folofola ke nau tataki ʻa hono kakaí.

¹⁹ Naʻe toe ngāueʻaki foki ʻe Sīsū ʻa e Folofola ʻa e ʻOtuá ʻi heʻene akoʻi ʻa e niʻihi kehé. ʻI he taimi naʻe poleʻi ai ia ʻe he kau taki lotú, naʻe ʻikai te ne ngāueʻaki ʻa hono poto ʻoʻoná pe ko ʻene taukei ʻi he moʻuí ke tali ʻaki kiate kinautolu. ʻI hono kehé, naʻá ne akoʻi ʻa e kakaí mei he Folofolá. (Māt. 22:33-40) Pehē foki, naʻe mei ʻai ʻe Sīsū ke toʻoa ʻa e niʻihi kehé ʻi heʻene fai ha ngaahi talanoa fekauʻaki mo ʻene moʻui ʻi hēvaní pe ko e fakatupu ʻo e ʻunivēsí. ʻI hono kehé, koeʻuhi naʻá ne ʻofa ʻi he Folofola ʻa e ʻOtuá, naʻá ne vēkeveke ke vahevahe atu ia ki he niʻihi kehé, pea “naʻá ne fakatalatala kakato honau ʻatamaí ke nau maʻu ʻa e ʻuhinga ʻo e Folofolá.”—Luke 24:32, 45.

20. (a) Naʻe anga-fēfē hono fakalāngilangiʻi ʻe Sīsū ʻa Sihová? (e) Ko e hā ʻa e kehekehe ʻi he fakakaukau ʻa Sīsuú mo e fakakaukau ʻa Hēlota ʻAkilipa I?

²⁰ Neongo naʻe ofoofo ʻa e kau fanongo kia Sīsuú ʻi he anga ʻo ʻene leá, naʻá ne ʻoange maʻu pē ʻa e lāngilangí ki heʻene Faiakó, ʻa Sihova. (Luke 4:22) ʻI he taimi naʻe feinga ai ha tangata koloaʻia ke fakalāngilangiʻi ʻa Sīsū ʻaki ʻa e hingoa fakalakanga ko e “Faiako lelei,” naʻe anga-fakatōkilalo ʻa Sīsū pea naʻá ne pehē: “Ko e hā ʻokú ke ui ai au ko e leleí? ʻOku ʻikai ha taha ʻe lelei tuku kehe pē ʻa e toko taha, ko e ʻOtuá.” (Mk. 10:17, 18) Kae kehe, ko Hēlota ʻAkilipa I, ʻa e taki ʻo Siutea ʻi he taʻu ʻe valu ki mui aí, naʻe kehe ʻaupito ʻene fakakaukaú meia Sīsū. ʻI he ʻaho ʻe taha, naʻe tui ai ʻe Hēlota ʻa e teunga fakatuʻi masani mo totongi mamafa ʻi ha fakataha makehe. ʻI he sio mo fanongo ʻa e kakaí kiate iá, naʻa nau kaila: “Ko e leʻo ʻo ha ʻotua, ʻo ʻikai ʻo ha tangata!” Naʻe leleiʻia ʻa Hēlota ʻi hono fakahīkihikiʻi iá. Ka ko e hā leva ʻa e meʻa naʻe hokó? “ʻI he taimi pē ko iá naʻe taaʻi ia ʻe he ʻāngelo ʻa Sihová, koeʻuhi naʻe ʻikai te ne ʻoatu ʻa e lāngilangí ki he ʻOtuá; pea naʻe keina ia ʻe he ponú ʻo ne ʻauha.” (Ngā. 12:21-23) ʻOku hā mahino, naʻe ʻikai ke fili ʻe Sihova ʻa Hēlota ke ne hoko ko ha taki. Kae kehe, naʻe fakamoʻoniʻi ʻe Sīsū naʻe fili ia ʻe he ʻOtuá, pea naʻá ne fakalāngilangiʻi maʻu pē ʻa Sihova ko e Taki Aoniu ia ʻo Hono kakaí.

21. Ko e hā te tau lāulea ki ai ʻi he kupu hono hokó?

²¹ Naʻe fiemaʻu ʻe Sihova ke hoko ʻa Sīsū ko e Taki ʻo ʻikai ʻi ha ngaahi taʻu siʻi pē. Hili ʻene toetuʻú, naʻe tala ange ʻe Sīsū ki heʻene kau ākongá: “Kuo tuku kiate au ʻa e mafai kotoa pē ʻi hēvani mo māmani.” Naʻá ne hoko atu: “Pea vakai, ʻoku ou ʻiate kimoutolu ʻi he ʻaho kotoa pē ʻo aʻu ki he fakaʻosiʻosi ʻo e fokotuʻutuʻu lolotongá.” (Māt. 28:18-20) Ka ʻe lava fēfē ke tataki ʻe Sīsū ʻa e kakai ʻa e ʻOtuá ʻi he māmaní lolotonga iá ko ha tokotaha taʻehāmai ia ʻi hēvani? Ko hai ʻe ngāueʻaki ʻe Sihova ke ne fakafofongaʻi ʻa Sīsū ʻi he māmaní? Pea ʻe malava fēfē ke ʻiloʻi ʻe he kau Kalisitiané ʻa e kau fakafofonga ʻo e ʻOtuá? Ko e kupu hono hokó ʻe lāulea ai ki he tali ki he ngaahi fehuʻi ko iá.