ʻIo, ʻE Lava Ke Ke Maʻu ʻa e Fiefiá

KO E fiefiá, ʻa e fiefia moʻoni mo tuʻuloá, ʻoku faingataʻa ke maʻu ia he taimi ʻe niʻihi. ʻOku tautefito ʻene peheé koeʻuhí he ko e kakai tokolahi, ʻi heʻenau fekumi taʻetuku ki he fiefiá, ʻoku nau kumi kinautolu ki he ngaahi feituʻu hala. Taumaiā naʻe ʻi ai hanau kaumeʻa falalaʻanga mo taau ʻa ia ʻe lava ke ne tataki kinautolu ki he feituʻu totonú!

Ko e Tohi Tapú ko ha matavai ia ʻo e tataki ʻoku fiemaʻú. Fakakaukau angé ki he taha pē ʻo hono ngaahi tohí, ʻa e tohi Sāmé. ʻOku tānaki ʻi he tohí ni ʻa e ngaahi hiva toputapu ʻe 150 kia Sihova ko e ʻOtuá, ʻo fakafuofua ko e vaeua ʻo e ngaahi hivá ni naʻe faʻu ia ʻe Tuʻi Tēvita ʻo ʻIsileli he kuonga muʻá. Ka ʻoku mahuʻinga ange ʻi hono ʻiloʻi pē pe ko hai ʻa e kau hiki tohí, ʻa hono ʻiloʻi ko ia naʻe hiki ʻa e tohí ni ʻi hono fakamānavaʻi ʻe he Kaumeʻa lahi taha ʻo e faʻahinga ʻo e tangatá, ʻa Sihova. ʻE lava ke tau fakapapauʻi ai ʻoku ʻi he tohí ni ha tataki fakaʻotua ki he lelei pē maʻatautolu pea ʻoku fakahaaʻi ai e hala ki he fiefiá.

Naʻe fakapapauʻi ʻe he kau hiki tohi ʻo e Ngaahi Sāmé ko e fiefiá ko e tupu ia mei hono maʻu ʻe ha tokotaha ha vahaʻangatae lelei mo e ʻOtuá. “Oku monuia ae tagata oku ne manavahe kia Jihova,” ko e tohi ia ʻa e tokotaha-tohi-sāmé. (Sāme 112:​1, PM) ʻOku ʻikai ha vā fakaetangata, koloa fakamatelie mo ha lavameʻa fakafoʻituitui ʻe lava ke tau maʻu ai e fiefiá ka ko ʻetau kau ki he “kakai ʻoku ʻotua ʻaki ʻa Sihova!” (Sāme 144:15) ʻOku fakamoʻoni ki he meʻá ni ʻa e moʻui ʻa e tokolahi ʻo e kau sevāniti ʻa e ʻOtuá ʻi onopōní.

Ko e fakatātā ʻe taha, ko Sūsana ʻa ia ʻoku taʻu 40 tupu siʻi.a Naʻá ne pehē: “ʻI he ʻahó ni, ko e tokolahi ʻoku nau kau ki he ngaahi kulupu ʻe niʻihi, ke aʻusia ai ha ngaahi taumuʻa tatau pe kau ʻi he meʻa ʻoku nau mahuʻingaʻia tatau ai. Kae kehe, ʻoku tātātaha ke nau vakai ki he tokotaha kotoa ʻi he kulupú ko ha kaumeʻa. Ka ʻoku kehe ʻa e kakai ʻa Sihová ia. Ko ʻetau ʻofa kia Sihová ʻoku ueʻi ai kitautolu ke tau feʻofaʻaki. ʻI heʻetau kau ki he kakai ʻa e ʻOtuá, ʻoku tau ongoʻi nonga, tatau ai pē pe ko fē ʻoku tau ʻi ai he taimi ko iá. Ko e fāʻūtaha ko ení ʻoku fakakoloaʻi lahi ai ʻetau moʻuí. He ko hai ia ʻe lava ke ne tala ʻoku ʻi ai hano ngaahi kaumeʻa mei he ngaahi kulupu fakasōsiale mo e puipuituʻa kehekehe lahi, pea mei he ngaahi fonua kehekehé? ʻE lava ke u leaʻaki mei hoku lotó kotoa, ko e hoko ko ha taha ʻo e kakai ʻa Sihová ʻa e meʻa ʻoku iku atu ki he fiefiá.”

Ko Malei, ʻa ia naʻe fāʻeleʻi ʻi Sikotilani, naʻá ne toe ʻilo ko ha meʻa mātuʻaki mahuʻinga ia ke maʻu ha vahaʻangatae lelei mo Sihova kapau ʻokú te fie kumi ki he fiefiá. “Ki muʻa ke ako ʻa e moʻoni ʻo e Tohi Tapú,” ko ʻene fakamatalá ia, “naʻá ku manako he sio he ngaahi faiva fakailifiá. Ka naʻe ʻikai te u lava ʻo mohe he poʻulí ʻo taʻepuke ha kolosi ke tuliʻaki ʻa e fanga tēvoló mo e kau vemipaeá, ʻa ia naʻe fai ki ai ʻa e ngaahi faiva lahi. Kae kehe, ko e tuai pē ʻeku ako e moʻoní, pea taʻofi ʻeku sio he ngaahi faiva peheé, naʻe ʻai ai ʻe hoku vahaʻangatae mo Sihová ke u malava ʻo mohe taʻeilifia, ʻo fiefia ke tauhi ki ha ʻOtua ʻoku mālohi ange ia ʻi he fanga tēmenioó pe kau vemipaea naʻá ku sioloto atu ki aí.”

Falala kia Sihová ʻOku Iku ki he Fiefia

ʻOku ʻikai ha ʻuhinga ia ke tau fakaʻalongaua ai ʻi he tuʻunga māfimafiʻia mo e poto taʻefakangatangata ʻo e Tokotaha-Fakatupú. ʻI hono ʻiloʻi ko ia ʻe lava ke ne falala kakato kia Sihova pea hūfanga ʻiate Iá, naʻe tohi ʻa Tēvita: “Monuʻiaā ka ko e tangata, kuo tuʻu ʻia Sihova ʻene falala.”—Sāme 40:4.

Naʻe pehē ʻe Malia: “Ko e meʻa naʻe hoko kiate au ʻi Sipeini mo e ngaahi feituʻu kehé naʻe hā ai ko ʻetau fai ko ia ha meʻa ʻi he founga ʻa Sihová, neongo ʻe ofeʻi nai kitautolu ʻe heʻetau ngaahi ongó ke fai ha meʻa kehe, ʻoku tau maʻu ai ʻa e ngaahi ola lelei taha ʻe ala maʻú. ʻOku iku ai ki he fiefia koeʻuhí ʻoku lelei taha maʻu pē ʻa e founga ʻa Sihová.”

Ko ʻAniteliasi, ʻa ia naʻá ne hoko ko ha mātuʻa Kalisitiane ʻi he ngaahi fonua ʻIulope lahi, ʻokú ne toe ʻiloʻi mei heʻene hokosia fakafoʻituituí ʻe lava ke tau falala kia Sihova. Naʻá ne pehē: “Ko hoku taʻoketé, ʻa ia ʻoku ʻikai te ma tui tataú, naʻá ne tākiekina lahi au lolotonga ʻeku kei talavoú, ʻo ne fakaʻaiʻai au ke u tuli ki ha ngāue fakapaʻanga fakafiemālie. Naʻá ne loto-mamahi ʻaupito ʻi he taimi naʻá ku kamata ngāue fakafaifekau taimi-kakato aí, pea naʻe ʻikai te u fakafalala ki he maluʻanga lau pē naʻe ʻomai ʻe he ngaahi palani vāhenga mālōlō ʻa e māmaní. Lolotonga ʻeku ngāue taimi-kakató, kuo ʻikai ʻaupito ke u teitei masiva ʻi ha meʻa, pea kuó u tofanga he ngaahi tāpuaki ʻa ia ʻoku fakaʻamua mai ʻe he niʻihi kehé.”

ʻI he 1993, naʻe fakaafeʻi ai ʻa Filisi ke ne tokoni ki hono fakalahi ʻa e ngaahi fale ʻo e ʻōfisi vaʻa ʻo e Kau Fakamoʻoni ʻa Sihova ʻi Selters, Siamané. ʻI he ʻosi pē ʻa e ngāué, naʻe fakaafeʻi ia ke ne hoko ko ha mēmipa tuʻumaʻu ʻo e fāmili Pēteli ʻi aí. Naʻe anga-fēfē ʻene talí? “Naʻá ku tali ʻa e fakaafé fakataha mo e kiʻi veiveiua. Ka kuó u ʻi heni he taimí ni he meimei taʻu ʻe hongofulu, pea ʻoku ou tuipau naʻe tali ʻe Sihova ʻeku ngaahi lotú. ʻOkú ne ʻafioʻi ʻa e meʻa ʻoku lelei taha maʻakú. ʻI heʻeku falala kakato kiate ia pea tuku ke ne tataki aú, ʻoku ou ʻoange ai kiate ia ha faingamālie ke ne fakahaaʻi mai kiate au ʻa e meʻa ʻokú ne finangalo ke u faí.”

Ko Sūsana, ʻa ia naʻe lave ki ai ki muʻá, naʻá ne fie hoko ko ha faifekau taimi-kakato, ko ha tāimuʻa, ka naʻá ne faingataʻaʻia ʻi hono kumi ha ngāue konga taimí. Hili ʻa e tatali ʻi ha taʻu ʻe taha ke maʻu ha ngāué, naʻá ne fai leva e meʻa fakataha mo ʻene falala kia Sihova. Naʻá ne fakamatala: “Naʻá ku ʻoatu ʻeku tohi kole ke u tāimuʻa tuʻumaʻu. Naʻá ku tātānaki ha paʻanga feʻunga ke totongiʻaki ʻeku ngaahi fakamole anga-mahení ʻi ha māhina nai ʻe taha. Pea he māhina fakafiefia moʻoni ia naʻá ku maʻú! Naʻe hoko ʻeku ngāue fakafaifekaú ko ha matavai ia ʻo e fiefia lahi, ka naʻe ʻikai ola lelei ʻa e ngaahi fakaʻekeʻeke ngāue lahi. Kae kehe, hangē ko ia kuo talaʻofaʻaki ʻe Sihová, naʻe ʻikai te ne liʻaki au. ʻI he ʻaho fakaʻosi ʻo e māhiná, naʻá ku malava ai ʻo fakamoʻoni ʻi ha aleapau ngāue. Kuó u ʻiloʻi he taimí ni ʻe lava ke u falala moʻoni kia Sihova! Ko ʻeku fuofua hokosia ko eni ʻi he ngāue taimi-kakató naʻe ʻai ai au ke u maʻu ha moʻui fiemālie mo fiefia.”

Ko Hono Tali ʻa e Akonaki Fakaʻotuá ʻOku Fakalahi Ai e Fiefiá

Naʻe fai ʻe Tuʻi Tēvita ha ngaahi fehālaaki mafatukituki. ʻI he taimi ʻe niʻihi naʻe fiemaʻu ai kiate ia ha akonaki fakapotopoto. ʻOku tau loto-lelei nai ke tali ʻa e akonakí mo e fakahinohinó ʻo hangē ko Tēvitá?

Ko ʻAita, mei Falanisē, naʻá ne ʻiloʻi ʻi he taimi ʻe taha naʻá ne fai ha fehālaaki mafatukituki. Naʻá ne fakamatala: “Ko ʻeku tokanga tefitó ke toe fakaleleiʻi hoku vahaʻangatae mo Sihová. Naʻe ʻikai ha toe meʻa naʻá ku tokanga ki ai.” Naʻá ne kumi tokoni ki he kau mātuʻa Kalisitiané. ʻI heʻene ngāue fakafaifekau taimi-kakato ʻo laka hake he taʻu ʻe 14, ʻokú ne pehē he taimí ni: “He meʻa fakafiemālie ia ke ʻiloʻi naʻe fakamolemoleʻi ʻe Sihova ʻeku fehālaakí!”

Ko e ongongofua ki he akonaki fakaʻotuá ʻe lava ke taʻofi ai kitautolu mei hano fai ha fehālaaki. Naʻe fakamatala ʻa Siutiti: “ʻI heʻeku taʻu 20, naʻá ku ʻāvangā ai ʻi haku kaungā pisinisi Siamane ʻa ia naʻá ne feingaʻaki e mālohi tahá ke u manako ʻiate ia. Naʻe tokaʻi ia, ʻi ai ʻene ngāue lavameʻa ʻaupito, pea naʻe ʻosi mali! Naʻá ku ʻilo naʻe pau ke u fili pe te u talangofua ki he ngaahi lao ʻa Sihová pea mātuʻaki tafoki fakaʻaufuli meiate Ia. Naʻá ku kumi faleʻi ki heʻeku ongo mātuʻá. Naʻe ʻikai toe afe ʻeku tamaí ʻi heʻene fakamanatu mai ʻa e meʻa naʻe ʻamanekina ʻe Sihova meiate aú. Naʻá ne ʻai hangatonu mai pē ʻa e meʻa tofu pē ko ia naʻe fiemaʻu kiate aú! Naʻe mo e tokoni ko iá, naʻá ku feinga kumi kalofanga. Naʻe fakamoleki ʻe heʻeku faʻeé ʻa e laulaui uike he taimi efiafí ke fakatalanoa mai ai ʻo kau ki he mahuʻinga mo e fakahaofi moʻui ʻa e ngaahi lao ʻa e ʻOtuá. ʻOku ou houngaʻia ʻaupito ʻi he faai mai pē ʻou ongoʻi ofi kia Sihová. Ko ʻene akonakiʻi mo akoʻi aú, kuó u maʻu ai e fiefia lahi ʻa ia ko ha ngaahi taʻu fakafiemālie lahi ʻi he ngāue fakafaifekau taimi-kakató pea mo ha hoa Kalisitiane lelei ʻoku ʻofa ʻaki e kotoa hono lotó ʻiate au pea mo Sihova.”

ʻOku hā mahino, ko e ngaahi hokosia peheé ʻoku fakamamafaʻi ai e moʻoni ʻo e ngaahi lea ʻa Tēvitá: “Monuʻiaa ka ko e toko taha kuo fakamolemole ʻene talangataʻa, kuo ʻufiʻufi ʻene faihala. Monuʻiaā ka ko e faihala. ʻOku ʻikai lau hia ki ai ʻe Sihova.”—Sāme 32:​1, 2.

Fiefia ʻi Hono Fakahaaʻi ʻa e Fakaʻatuʻi ki he Niʻihi Kehé

“Monuʻiaa ka ko ia ʻoku ne tokaʻi [pe fakaʻatuʻi] ʻa e tuʻutamaki,” ko e tohi ia ʻa Tēvitá. Naʻá ne hoko atu: “Ka hoko ʻa e ʻaho kovi ʻe fakahaofi ia ʻe he ʻEiki. ʻE tauhi ʻe Sihova mo fakamoʻui, te ne monuʻia.” (Sāme 41:​1, 2) Ko e fakaʻatuʻi anga-ʻofa naʻe fakahaaʻi ʻe Tēvita kia Mefipōsetí, ʻa e foha heke ʻo e kaumeʻa ʻofeina ʻo Tēvita ko Sionatané, ko ha fakatātā ia ʻo e fakakaukau totonu ki he tuʻutāmakí.—2 Samiuela 9:​1-13.

Ko Mālisi, ʻa ia ko ha misinale ia he taʻu ʻe 47, ʻokú ne maʻu e monū ke malanga ki he kakai naʻe pau ke nau hola mei he ngaahi feituʻu fakatuʻutāmaki ʻo ʻAfilika, ʻĒsia mo ʻIulope Hahaké. Naʻá ne pehē: “ʻOku ʻi ai ʻenau ngaahi palopalema kehekehe pea ʻoku nau faʻa ongoʻi ʻoku ngaahi pē kinautolu ia hangē ha kehé, ʻa ia ko hono moʻoní, ʻoku fehiʻanekinaʻi kinautolu. ʻOku ou maʻu maʻu pē ʻa e fiefia ʻi hono tokoniʻi ʻa e kakai peheé.”

Ko Malina, ʻoku taʻu 40 tupu siʻi, naʻá ne tohi: “ʻI heʻeku taʻehoá, ko e meʻa fakafiemālie ia ke u ʻiloʻi ʻoku ʻi ai hoto ngaahi kaumeʻa ke nau tokoniʻi kita. ʻOku ueʻi au ʻe he meʻá ni ke u fakalototoʻaʻi ʻa e kakaí ʻaki ʻeku telefoni pe faitohi kia kinautolu. Kuo fakahaaʻi ʻe he tokolahi ʻenau houngaʻia. Ko hono tokoniʻi ʻa e niʻihi kehé ʻoku ou maʻu ai ʻa e fiefia.”

Ko Timitā, ʻa ia ʻoku taʻu 20 tupu, naʻá ne pehē: “Naʻe tauhi tokotaha hake au ʻe heʻeku faʻeé. ʻI heʻeku kei siʻí, naʻá ku fiefia ʻi hono ʻave au ʻe ha ʻovasia Ako Tohi ʻa e Fakatahaʻangá he uike kotoa ke akoʻi au he ngāue fakafaifekaú. ʻOku ou kei houngaʻia ʻi heʻene kītakí. ʻOku ou ʻiloʻi naʻe ʻikai faingofua maʻu pē hono fakaʻaiʻai aú.” ʻI heʻene houngaʻia he tokoni naʻe fai kiate ia ki muʻá, ʻoku tokoniʻi ai he taimí ni ʻe Timitā ʻa e niʻihi kehé: “ʻOku ou feinga ke ʻave ha taha kei siʻi pe taʻumotuʻa ʻi he ngāue fakafaifekaú ʻo laka hake he tuʻo tahá he māhina.”

ʻOku toe lave ʻa e tohi ʻa Sāmé ki he ngaahi meʻa kehe ʻoku maʻu ai ʻa e fiefiá. Ko e meʻa ai ʻe taha, ko e mahuʻinga ko ia ʻo e falala ki he mālohi ʻo Sihová kae ʻikai ko hoto mālohí: ‘Oku monuia ae tagata oku ia Sihova hono malohí.’—Sāme 84:​5, PM.

ʻOku fakamatala ʻa Kōlina ʻo kau ki he meʻá ni. Naʻá ne hiki ki ha fonua ʻa ia naʻe lahi ange ai e fiemaʻú ʻi he ngāue fakafaifekaú. “Naʻá ku fetaulaki ai mo ha lea foʻou, anga fakafonua foʻou, mo ha founga fakakaukau foʻou. Ne u ongoʻi ʻo hangē naʻá ku ʻi ha palanite kehé. Naʻá ku loto-siʻi ʻaupito ʻi heʻeku fakakaukau atu ke malanga ʻi ha ʻātakai kehé. Naʻá ku kole tokoni kia Sihova, pea ʻi hono mālohí naʻá ku malava ai ʻo malanga he ʻahó kotoa ʻi he ngaahi feituʻu mamaʻó. Naʻe faai mai pē ʻou anga ki hono fai iá. Naʻá ku kamataʻi ʻa e ngaahi ako Tohi Tapu lahi, pea ʻoku ou kei maʻu ʻaonga pē mei he hokosia ko iá. Naʻá ku ʻilo ai, ʻi he mālohi ʻo Sihová, ʻe lava ke tau ikuʻi naʻa mo ha fakafaingataʻaʻiaʻanga pē ʻoku hā ngali ikuʻingataʻa.”

ʻIo, ʻoku tokoni ʻa e ngaahi meʻa kehekehe ki he fiefiá, hangē ko hono fakatupulekina ʻa e vā fakakaumeʻa mo e ʻOtuá mo ʻene kakaí, falala kakato kia Sihova, tali ʻene akonakí pea fakaʻatuʻi ki he niʻihi kehé. ʻI heʻetau ʻaʻeva he hala ʻo Sihová pea talangofua ki heʻene ngaahi laó, ʻe lava ai ke tau fiefia ʻi hono maʻu ʻene hōifuá.—Sāme 89:15; 106:3; 112:1; 128:​1, 2.

[Fakamatala ʻi lalo]

[Fakatātā ʻi he peesi 12]

Malia

[Fakatātā ʻi he peesi 13]

Malei

[Fakatātā ʻi he peesi 13]

Sūsana mo ʻAniteliasi

[Fakatātā ʻi he peesi 15]

Kōlina

[Fakatātā ʻi he peesi 15]

Timitā