ʻOku Halaʻatā ha Meʻa Ke Ne “Fakamavaheʻi Kitautolu mei he ʻOfa ʻa e ʻOtuá”

 1. Ko e hā ʻa e ongoʻi fakalotosiʻi ʻokú ne fakafaingataʻaʻiaʻi ʻa e kakai tokolahi, ʻo kau ai ʻa e niʻihi ʻo e kau Kalisitiane moʻoní?

ʻOKU ʻofa ʻa Sihova ko e ʻOtuá ʻiate koe fakafoʻituitui? ʻOku loto-tatau ʻa e niʻihi ʻo pehē ʻoku ʻofa ʻa e ʻOtuá ki he faʻahinga ʻo e tangatá fakalūkufua, hangē ko ia ʻoku leaʻaki ʻe he Sione 3:16. Ka ko hono moʻoní, ʻoku nau ongoʻi: ‘Heʻikai ʻaupito ke ʻofa mai ʻa e ʻOtuá ia kiate au ʻi he tuʻunga tāutahá.’ Naʻa mo e kau Kalisitiane moʻoní ʻoku nau veiveiua ʻi he taimi ki he taimi ʻi he tafaʻaki ko iá. Naʻe pehē ʻe ha tangata loto-siʻi ʻe taha: “ʻOku fuʻu faingataʻa kiate au ke tui ʻoku tokanga mai ʻa e ʻOtuá ʻi ha meʻa ʻe taha ʻo fekauʻaki mo au.” ʻOku fakafaingataʻaʻiaʻi koe ʻe ha ngaahi veiveiua meimei tatau ʻi ha ngaahi taimi?

2, 3. Ko hai ʻokú ne fiemaʻu ke tau tui ʻoku tau taʻeʻaonga pe ʻikai ʻofaʻi ʻi he vakai mai ʻa Sihová, pea ʻe malava fēfē ke tauʻi ʻa e foʻi fakakaukau ko iá?

² ʻOku vēkeveke ʻa Sētane ke ʻai kitautolu ke tau tui ʻoku ʻikai ke ʻofa mai ʻa Sihova ia ko e ʻOtuá kiate kitautolu pe te ne fakamahuʻingaʻi kitautolu. Ko e moʻoni, ʻoku faʻa fakataueleʻi ʻe Sētane ʻa e kakaí ʻaki hono ngāueʻaki ʻenau pōlepolé mo e loto-mahikihikí. (2 Kolinitō 11:3) Ka ʻokú ne toe fiefia ʻi hono lōmekina ʻa e tokaʻi-kita ʻa e faʻahinga ʻoku laveangofuá. (Sione 7:47-49; 8:13, 44) ʻOku tautefito hono fai iá ʻi he ‘ngaahi ʻaho fakaʻosi’ faingataʻá ni. Ko e tokolahi ʻi he ʻahó ni ʻoku nau tupu hake ʻi he ngaahi fāmili ʻa ia ʻoku ʻikai maʻu ai ha “ʻofa fakanatula.” ʻOku faʻa fetaulaki ʻa e faʻahinga kehe ia mo e faʻahinga ʻoku nau anga-kakaha, siokita, mo taʻefieauna. (2 Tīmote 3:1-5, NW) Ko ha vahaʻa taimi lōloa ʻo e moʻulaloa ki he ngaohikoviʻí, lau matakalí, pe tāufehiʻá kuo ʻai nai ai ʻa e faʻahinga peheé ke nau tui ʻoku nau taʻeʻaonga pe ʻikai ke ʻofaʻi.

³ Kapau ʻokú ke ʻiloʻi ha ngaahi ongoʻi taʻepau pehē ʻiate koe, ʻoua ʻe siva e ʻamanakí. Ko e tokolahi ʻo kitautolu ʻoku tau fakahalaiaʻi taʻeʻuhinga kitautolu ʻi he taimi ki he taimi. Kae manatuʻi, ʻoku faʻufaʻu ʻa e Folofola ʻa e ʻOtuá ki he “fakatonutonu” pea ki he “holoki ʻo e ngaahi kolotau.” (2 Tīmote 3:16; 2 Kolinitō 10:4) ʻOku pehē ʻe he Tohitapú: “Te tau fakanonga ʻaki hotau loto ʻi he ʻao ʻo ʻEne ʻAfio. He kapau ʻoku fakahalaia kitautolu ʻe hotau loto, ko hono ʻuhinga he ʻoku lahi ʻa e ʻOtua ʻi hotau loto, pea ʻoku ne meaʻi ʻa e meʻa kotoa pe.” (1 Sione 3:19, 20) Tau lāulea angé ki he ngaahi founga ʻe fā ʻa ia ʻoku tokoniʻi ai kitautolu ʻe he ngaahi Konga Tohitapú ke “fakanonga ʻaki hotau loto” fekauʻaki mo e ʻofa ʻa Sihová.

4, 5. ʻOku anga-fēfē hono fakahaaʻi ʻe he talanoa fakatātā ʻa Sīsū fekauʻaki mo e fanga misí ʻoku tau mahuʻinga ʻi he vakai mai ʻa Sihová?

⁴ ʻUluakí, ʻoku akoʻi fakahangatonu mai ʻe he Tohitapú ʻoku vakai mai ʻa e ʻOtuá ki he mahuʻinga ʻo ʻene sevāniti taki taha. Ko e fakatātaá, naʻe pehē ʻe Sīsū: “ʻIkai ʻoku fakatau ha ongo kiʻi misi ʻe toko ua ki ha konga seniti [“foʻi koini ʻoku siʻi hono mahuʻingá,” NW] pe? ka ʻe ʻikai patū ki he kelekele hana taha taʻe meʻa ki ai ʻe hoʻomou Tamai. Ka ko e meʻa kiate kimoutolu, ko homou ngāhi tuʻoni louʻulu kuo ʻosi lau fakalautelau. Ko ia ʻoua te mou manavahe: ʻoku mou mahuʻinga kimoutolu ʻi ha fanga misi tokolahi.” (Mātiu 10:29-31) Fakakaukau angé pe naʻe ʻuhinga ki he hā ʻa e ngaahi lea ko iá ki he kau fanongo ʻa Sīsū ʻi he ʻuluaki senitulí.

⁵ Te tau fifili nai pe ko e hā ʻe fakatau mai ai ʻe ha taha ha foʻi misi. Sai, ʻi he taimi ʻo Sīsuú ko e misí ʻa e maʻamaʻa taha ʻi he fanga manupuna naʻe fakatau atu ko e kikí. Fakatokangaʻi ko ha foʻi koini ʻe taha naʻe siʻisiʻi hono mahuʻingá, naʻe maʻu ai ʻe ha tokotaha fakatau mai ha foʻi misi ʻe ua. Ka ki muí naʻe fakahā ai ʻe Sīsū kapau naʻe teuteu ha taha ke fakamoleki atu ha foʻi koini ʻe ua, naʻá ne maʻu, ʻo ʻikai ko e foʻi misi ʻe fā, ka ko e nima. Naʻe toe tānaki mai ʻa e foʻi manupuna ʻe tahá ʻo hangē naʻe ʻikai ʻaupito hano mahuʻinga ʻoʻoná. Mahalo pē naʻe taʻeʻaonga ʻa e ngaahi meʻamoʻui peheé ʻi he vakai ki ai ʻa e tangatá, ka naʻe anga-fēfē ʻa e vakai ʻa e Tokotaha-Fakatupú ia kiate kinautolú? Naʻe pehē ʻe Sīsū: “ʻOku ʻikai tuku taʻe manatu hanau toko taha [ʻikai naʻa mo e taha naʻe toe tānaki fakalahi maí] ʻi he ʻafio ʻa e ʻOtua.” (Luke 12:6, 7) ʻOku kamata nai ke tau mahinoʻi he taimí ni ʻa e poini ʻa Sīsuú. Kapau ʻoku fokotuʻu ʻe Sihova ha mahuʻinga pehē ki ha kiʻi foʻi misi ʻe taha, huanoa ai ʻa e mahuʻinga lahi ange ʻa e tangatá! Hangē ko ia naʻe fakamatalaʻi ʻe Sīsuú, ʻoku ʻafioʻi ʻe Sihova ʻa e fakaikiiki kotoa pē fekauʻaki mo kitautolú. He ko ē, naʻa mo e ngaahi tuʻoni louʻulu ʻo hotau ʻulú ʻoku lau fakalautelau!

 6. Ko e hā ʻoku tau ʻilo pau ai naʻe moʻoni ʻa Sīsū ʻi heʻene lea fekauʻaki mo hono lau fakalautelau ʻa e louʻulu ʻo hotau foʻi ʻulú?

⁶ ʻOku lau fakalautelau hotau louʻulú? ʻOku mahalo nai ʻa e niʻihi naʻe ʻikai ke moʻoni ʻa Sīsū ia fekauʻaki mo e meʻá ni. Neongo ia, fakakaukau ange pē fekauʻaki mo e ʻamanaki ʻo e toetuʻú. He ʻilo mātuʻaki lelei ē ʻo kitautolu kuo pau ke maʻu ʻe Sihova koeʻuhi ke toe fakatupu kitautolú! ʻOkú ne fakamahuʻingaʻi lahi ʻaupito kitautolu ʻo ne manatuʻi ai ʻa e fakaikiiki kotoa pē, kau ai ʻa hotau kouti faka-kēnisí mo e kotoa ʻo hotau ngaahi taʻu ʻo e manatú mo e ngaahi meʻa naʻe hokosiá.a Ko hono lau fakalautelau hotau louʻulú​—ʻa ia ko e ʻavalisi ʻoku tupu ʻi he foʻi ʻulú ko e 100,000 nai​—ko ha foʻi ngāue faingofua ia ʻi hono fakahoa atú.

7, 8. (a) Ko e hā ʻa e niʻihi ʻo e ngaahi ʻulungaanga ʻoku fiefia ʻa Sihova ke maʻu ʻi heʻene hakule ʻa e ngaahi loto fakaetangatá? (e) Ko e hā ʻa e niʻihi ʻo e ngaahi ngāue ʻoku tau fai ʻoku fakamahuʻingaʻi ʻe Sihová?

⁷ Ko hono uá, ʻoku akoʻi mai ʻe he Tohitapú kiate kitautolu ʻa e meʻa ʻoku fakamahuʻingaʻi ʻe Sihova ʻi heʻene kau sevānití. ʻI hono ʻai mahinó, ʻokú ne fiefia ʻi hotau ngaahi ʻulungaanga leleí pea ʻi he ngaahi feinga ʻoku tau faí. Naʻe tala ʻe Tuʻi Tēvita ki hono foha ko Solomoné: “ʻOku hakule ʻe Sihova ʻa e loto kotoa pe, pea ʻoku ne ʻafioʻi kotoa pe ʻa e ngaahi fakakaukau.” (1 Kalonikali 28:9) ʻI hono hakule ʻe he ʻOtuá ʻa e laui piliona ʻo e ngaahi loto fakaetangatá ʻi he māmani fonu ko ʻeni ʻi he fakamālohí mo e tāufehiʻá, he fiefia lahi ē kuo pau ke ne maʻu ʻi heʻene ʻafioʻi ha loto ʻoku ʻofa ʻi he melinó, moʻoní, mo e māʻoniʻoní! Ko e hā ʻe hoko ʻi hano maʻu ʻe he ʻOtuá ha loto ʻoku fonu ʻi he ʻofa kiate iá, ʻoku feinga ke ako fekauʻaki mo ia pea ke vahevahe atu ʻa e ʻilo peheé ki he niʻihi kehé? ʻOku tala mai ʻe Sihova kiate kitautolu ʻokú ne fakatokangaʻi ʻa e faʻahinga ko ia ʻoku nau lea ki he niʻihi kehé ʻo fekauʻaki mo iá. ʻOkú ne maʻu foki “ae tohi fakamanatu” maʻá e kotoa “onautolu nae manavahe kia Jihova, mo nau faa fakakaukauloto ki hono huafa.” (Malakai 3:16, PM) ʻOku mātuʻaki mahuʻinga kiate ia ʻa e ngaahi ʻulungaanga peheé.

⁸ Ko e hā ʻa e niʻihi ʻo e ngaahi ngāue lelei ʻoku fakamahuʻingaʻi ʻe Sihová? Ko hono moʻoní, ko ʻetau ngaahi feinga ke faʻifaʻitaki ki hono ʻAló, ʻa Sīsū Kalaisi. (1 Pita 2:21) Ko e ngāue mātuʻaki mahuʻinga ʻe taha ʻoku fakamahuʻingaʻi ʻe he ʻOtuá ko hono fakamafola atu ʻa e ongoongo lelei ʻo hono Puleʻangá. ʻI he Loma 10:15, ʻoku tau lau ai: “Hono ʻikai fakaʻofoʻofa siʻi vaʻe ʻo e kakai ʻoku ongoongo mai ha ngaahi meʻa lelei!” ʻOku ʻikai nai te tau faʻa fakakaukau ki hotau vaʻe māʻulaló ʻoku “fakaʻofoʻofa,” pe matamatalelei. Ka ʻokú na fakafofongaʻi heni ʻa e ngaahi feinga ʻoku fai ʻe he kau sevāniti ʻa Sihová ʻi hono malangaʻi ʻa e ongoongo leleí. Ko e kotoa ʻo e ngaahi feinga peheé ʻoku fakaʻofoʻofa mo mātuʻaki mahuʻinga ʻi heʻene vakai maí.​—Mātiu 24:14; 28:19, 20.

9, 10. (a) Ko e hā ʻoku malava ai ke tau fakapapauʻi ʻoku fakamahuʻingaʻi ʻe Sihova ʻetau kātaki ʻi he funga ʻo e ngaahi faingataʻa kehekehé? (e) Ko e hā ʻa e ngaahi vakai ʻikai sai ʻoku ʻikai ʻaupito ke maʻu ʻe Sihova fekauʻaki mo ʻene kau sevāniti faitōnungá?

⁹ ʻOku toe fakamahuʻingaʻi ʻe Sihova ʻetau kātakí. (Mātiu 24:13) Manatuʻi, ʻoku fiemaʻu koe ʻe Sētane ke ke sītuʻa meia Sihova. ʻI he ʻaho taki taha ʻokú ke nofoʻaki mateaki ai kia Sihová ko e toe ʻaho ia ʻe taha kuó ke tokoni ai ki hono tokonaki ha tali ki he ngaahi manuki ʻa Sētané. (Palōveepi 27:11, PM) ʻI he taimi ʻe niʻihi ʻoku ʻikai faingofua ai ke tauhi maʻu ʻa e kātakí. Ko e ngaahi palopalema ʻo e moʻuí, ngaahi faingataʻa fakapaʻangá, mafasia fakaeongó, mo e ngaahi faingataʻaʻiaʻanga kehé ʻoku malava ke nau ʻai ʻa e ʻaho kotoa pē ko ha ʻahiʻahi. ʻOku lava ke fakamoʻoniʻi ko e ngaahi ʻamanaki ʻoku tautoloí ʻoku fakalotosiʻi mo ia foki. (Palōveepi 13:12) Ko e kātaki ʻi he funga ʻo e ngaahi pole peheé ʻoku toe mahuʻinga ange ia kia Sihova. Ko e ʻuhinga ia naʻe kole ai ʻa Tuʻi Tēvita kia Sihova ke tauhi hono loʻimatá ʻi ha “hina,” pea tānaki atu ʻi he loto-pau: “ʻIkai ʻoku tuʻu ʻi hoʻo tohi na?” (Sāme 56:8) ʻIo, ʻoku fakamahuʻingaʻi ʻe Sihova mo manatuʻi ʻa e kotoa ʻo e ngaahi loʻimata mo e faingataʻa ʻoku tau kātakiʻi lolotonga ʻa e tauhi maʻu ʻetau mateaki kiate iá. ʻOku nau mātuʻaki mahuʻinga foki ʻi heʻene vakai maí.

¹⁰ ʻI he taimi ní, ʻoku hanga nai ʻe he loto fakahalaiaʻi-kitá ʻo talitekeʻi ʻa e fakamoʻoni ko ia ʻo ʻetau mahuʻinga ʻi he vakai mai ʻa e ʻOtuá. ʻOku toutou fanafana mai nai ia: ‘Ka ʻoku ʻi ai ʻa e faʻahinga tokolahi kehe ia ʻoku nau faʻifaʻitakiʻanga lelei ange kinautolu ʻiate au. He loto-mamahi lahi ē ko Sihova ʻi heʻene fakahoa au mo kinautolú!’ ʻOku ʻikai ke fai ʻe Sihova ha fakahoa; pea ʻoku ʻikai te ne taʻengaofengofua mo anga-fefeka ʻi heʻene fakakaukaú. (Kalētia 6:4) Ko e vavanga lahí ʻokú ne ʻafioʻi ai hotau lotó, pea ʻokú ne fakamahuʻingaʻi ʻa e leleí​—naʻa mo ha kiʻi konga siʻisiʻi ʻo ia.

11. Ko e hā ʻoku lava ke tau ako fekauʻaki mo Sihova mei he founga ʻo ʻene ngāue ʻi he tuʻunga ʻo ʻĀpaiá?

¹¹ Ko hono tolú, ʻi hono hakule ʻe Sihova kitautolú, ʻokú ne sivi fakalelei, ʻo kumi pē ki he leleí. Ko e fakatātaá, ʻi he taimi naʻe tuʻutuʻuni ai ʻe Sihova ke tāmateʻi kotoa ʻa e laine tuʻi tafoki mei he moʻoní ʻo Tuʻi Selopoamé, naʻá Ne tuʻutuʻuni ko e taha ʻo e ngaahi foha ʻo e tuʻí, ko ʻĀpaia, ʻe fai hano tanu fakalelei. Ko e hā hono ʻuhingá? “Kuo ʻilo ai haʻane lelei kia Sihova ko e ʻOtua ʻo Isileli.” (1 Tuʻi 14:1, 10-13) Ko hono moʻoní, naʻe sivi ʻe Sihova ʻa e loto ʻo e talavou ko iá pea naʻe maʻu ai ha “lelei.” Tatau ai pē pe naʻe fēfē hono siʻisiʻi pe taʻemahuʻinga ʻo e kiʻi lelei ko iá, naʻe ʻilo ʻe Sihova ʻoku mahuʻinga ke hiki ia ʻi heʻene Folofolá. Naʻe aʻu ʻo ne fakapaleʻi ia, ʻo fakahāhā ha tuʻunga feʻungamālie ʻo e mēsí ki he mēmipa ʻe taha ko ia ʻo ha fāmili tafoki mei he moʻoní.

12, 13. (a) ʻOku anga-fēfē hono fakahāhaaʻi ʻe he tuʻunga ʻo Tuʻi Sihosafaté ʻoku vakai mai ʻa Sihova ki he lelei ʻiate kitautolú naʻa mo e taimi ʻoku tau faiangahala aí? (e) ʻI he fekauʻaki mo ʻetau ngaahi ngāue mo e ngaahi ʻulungaanga leleí, ʻoku anga-fēfē ʻa e ngāue mai ʻa Sihova ʻi he tuʻunga ko ha Tokotaha-Tauhi anga-ʻofá?

¹² Ko ha toe fakatātā tuʻu-ki-muʻa angé ʻe maʻu nai ia ʻi he tuʻi lelei ko Sihosafaté. ʻI he taimi naʻe fai ai ʻe he tuʻí ha ngāue fakavalevalé, naʻe tala ange ʻe he palōfita ʻa Sihová kiate ia: “ʻOku tuʻu mai ha houhau meia Sihova kiate koe.” Ko ha fakakaukau mafatukituki ē! Ka naʻe ʻikai ke ngata ai ʻa e pōpoaki ʻa Sihová. Naʻe hoko atu: “Ka neongo ia ka ʻoku ai ha ngaahi meʻa lelei kuo ʻilo ʻiate koe.” (2 Kalonikali 19:1-3) Ko ia, naʻe ʻikai ke hanga ʻe he houhau totonu ia ʻa Sihová ʻo fakakuihi ia mei he lelei ʻia Sihosafaté. He kehekehe lahi ē mei he faʻahinga taʻehaohaoa ʻo e tangatá! ʻI he loto-mamahi ʻi he niʻihi kehé, ʻoku tau hehema nai ke hoko ʻo fakakuikui ki he lelei ʻiate kinautolú. Pea ʻi he taimi ʻoku tau faiangahala aí, ko e loto-mamahi, mā, mo e halaia ʻoku tau ongoʻí ʻokú ne fakakuihi nai kitautolu mei he lelei ʻiate kitautolú. Neongo ia, manatuʻi, kapau te tau fakatomalaʻi ʻetau ngaahi angahalá pea feinga mālohi ke ʻoua ʻe toe fai kinautolu, ʻe fakamolemoleʻi kitautolu ʻe Sihova.

¹³ ʻI hono siviʻi koe ʻe Sihová, ʻokú ne liʻaki ʻa e ngaahi angahala ko iá, ʻo meimei hangē pē ko hono liʻaki ʻe ha tokotaha kumi koula ʻa e fanga kiʻi patapata taʻeʻaongá. Fēfē ho ngaahi ʻulungaanga mo e ngaahi ngāue leleí? ʻIo, ko e “ngaahi konga mahuʻinga” ia ʻokú ne tauhí! Kuó ke fakatokangaʻi ʻa e founga ʻo e koloaʻaki ʻe ha ongo mātuʻa anga-ʻofa ʻa e ngaahi tā fakatātā pe ngaahi ngāue fakaako ʻa ʻena fānaú, ʻi he taimi fuoloa ʻaupito hili ia hono ʻikai toe manatuʻi kinautolu ʻe he fānaú? Ko Sihova ʻa e Tokotaha-Tauhi anga-ʻofa lahi tahá. ʻI he lolotonga ʻo ʻetau kei faitōnunga kiate iá, heʻikai ʻaupito ngalo ʻiate ia ʻetau ngaahi ngāue mo e ngaahi ʻulungaanga leleí. Ko hono moʻoní, te ne vakai ki ai ko ha meʻa taʻetotonu ke fakangaloʻi ʻa e ngaahi meʻá ni, pea ʻoku ʻikai ʻaupito te ne ngāue taʻetotonu. (Hepelū 6:10) ʻOkú ne toe sivi kitautolu ʻi ha toe founga ʻe taha.

14, 15. (a) Ko e hā ʻoku ʻikai ʻaupito hanga ai ʻe heʻetau ngaahi taʻehaohaoá ʻo fakakuihi ʻa Sihova mei he lelei ʻiate kitautolú? Fakatātaaʻi. (e) Ko e hā ʻe fai ʻe Sihova ki he ngaahi lelei ʻokú ne maʻu ʻiate kitautolú, pea ʻoku anga-fēfē ʻene vakai ki heʻene kakai faitōnungá?

¹⁴ ʻOku vakai mai ʻa Sihova ʻo fakalaka ia ʻi heʻetau ngaahi taʻehaohaoá pea ʻafioʻi ʻetau malavá. Ke fakatātaaʻi: Ko e kakai ko ia ʻoku nau manako ʻi he ngaahi ngāue fakaeʻātí te nau fai ha feinga lahi ke toe fakaleleiʻi ʻa e ngaahi tā-valivali pe ngaahi ngāue kehe ne mātuʻaki maumauʻí. Ko e fakatātaá, ʻi he taimi naʻe hanga ai ʻe ha taha ʻo maumauʻi ʻaki ha meʻafana ʻa e fakatātā ʻa Leonardo da Vinci ko hono mahuʻingá ko e US$30 miliona nai, ʻi he National Gallery ʻi Lonitoni, ʻIngilaní, naʻe ʻikai ha taha ia te ne fokotuʻu mai ʻoku totonu ke liʻaki ʻa e fakatātaá koeʻuhi kuo maumau he taimi ko ʻení. Naʻe kamata leva ʻa e ngāue ki hono toe fakaleleiʻi ʻa e ngāue pōtoʻi naʻe meimei taʻu ʻe 500 hono motuʻá. Ko e hā hono ʻuhingá? Koeʻuhí naʻe mātuʻaki mahuʻinga ia ʻi he vakai ʻa e kau manako ʻi he tā-valivalí. ʻIkai ʻokú ke mahuʻinga ange ʻi ha fakatātā ʻoku tā ʻaki ha foʻi sioka mo e peni vahevahé? ʻI he vakai ʻa e ʻOtuá ko e moʻoni ʻokú ke mahuʻinga​—neongo pe kuo fēfē hono maumauʻi koe ʻe he taʻehaohaoa tukufakaholó. (Sāme 72:12-14) Ko Sihova ko e ʻOtuá, ʻa e Tokotaha-Fakatupu pōtoʻi ʻo e fāmili fakaetangatá, te ne fai ʻa e meʻa ʻoku fiemaʻu ki hono toe fakafoki ki he haohaoá ʻa e faʻahinga kotoa ko ia ʻoku nau fai ha tali ki heʻene tokanga ʻofá.​—Ngāue 3:21; Loma 8:20-22.

¹⁵ ʻIo, ʻoku vakai mai ʻa Sihova ki he lelei ʻiate kitautolu ʻa ia ʻoku ʻikai nai te tau fakatokangaʻi ʻiate kitautolú. Pea ʻi heʻetau tauhi kiate iá, te ne ʻai ʻa e leleí ke tupu kae ʻoua kuo tau iku atu ʻo haohaoa. Tatau ai pē pe kuo fēfē ʻa e fakafeangai kiate kitautolu ʻa e māmani ʻo Sētané, ʻoku fakamahuʻingaʻi ʻe Sihova ʻene kau sevāniti faitōnungá ʻoku nau mahuʻinga.​—Hakeai 2:7, NW.

16. Ko e hā ʻa e fakamoʻoni lahi taha ʻo e ʻofa ʻa Sihova ʻiate kitautolú, pea ʻoku tau ʻilo fēfē ko e meʻaʻofa ko ʻení ʻoku fakataumuʻá kiate kitautolu fakafoʻituitui?

¹⁶ Ko hono faá, ʻoku fai ʻe Sihova ʻa e meʻa lahi ke fakamoʻoniʻi ʻaki ʻene ʻofa ʻiate kitautolú. Ko hono moʻoní, ko e feilaulau huhuʻi ʻa Kalaisí ko e tali ola lelei taha ia ki he loi ʻa Sētane ʻo pehē ʻoku tau taʻeʻaonga pe ʻikai ʻofaʻí. ʻOku totonu ke ʻoua ʻaupito ʻe ngalo ʻiate kitautolu ko e pekia fakamamahi naʻe faingataʻaʻia ai ʻa Sīsū ʻi he ʻakau fakamamahí pea naʻa mo e mamahi lahi ange naʻe kātakiʻi ʻe Sihova ʻi heʻene vakai hifo ki hono ʻAlo ʻofaʻangá ʻoku pekia ko e fakamoʻoni ʻo ʻena ʻofa ʻiate kitautolú. Ko e meʻa fakamamahí, ʻoku faingataʻa ki he kakai tokolahi ke nau tui ko e meʻaʻofa ko ʻení ʻoku lava ke fakataumuʻa ia kiate kinautolu fakafoʻituitui. ʻOku nau ongoʻi taʻetaau. Neongo ia, manatuʻi, ko e ʻapositolo ko Paulá naʻe hoko ko ha tokotaha fakatangaʻi ʻo e kau muimui ʻo Kalaisí. Ka, naʻá ne tohi: ‘Ko e ʻAlo ʻo e ʻOtuá . . . naʻá ne ʻofeina au, mo ne foaki ia ʻe ia ke pekia koeʻuhi ko au.’​—Fakaʻītali ʻamautolu; Kalētia 1:13; 2:20.

17. ʻI he ongo founga fē ʻoku tohoaki ʻaki kitautolu ʻe Sihova kiate ia tonu pea ki hono ʻAló?

¹⁷ ʻOku fakamoʻoniʻi ʻe Sihova ʻene ʻofa kiate kitautolú ʻaki hono tokoniʻi kitautolu tāutaha ke tau ngāueleleiʻaki ʻa e ngaahi ʻaonga ʻo e feilaulau ʻa Kalaisí. Naʻe pehē ʻe Sīsū: “ʻOku ʻikai lava ʻe ha taha ke haʻu kiate au, ka ʻi he tohoaki ia ʻe he Tamai naʻa ne fekau mai au.” (Sione 6:44) ʻIo, ʻoku tohoaki fakafoʻituitui kitautolu ʻe Sihova ki hono ʻAló pea mo e ʻamanaki ʻo e moʻui taʻengatá. Anga-fēfē? Fakafou ʻi he ngāue fakamalangá, ʻa ia ʻoku aʻu mai kiate kitautolu tāutaha, pea fakafou ʻi hono laumālie māʻoniʻoní, ʻa ia ʻoku ngāueʻaki ʻe Sihova ke tokoniʻi kitautolu ke tau mahinoʻi mo ngāueʻaki ʻa e ngaahi moʻoni fakalaumālié neongo hotau ngaahi ngataʻangá mo e ngaahi taʻehaohaoá. ʻOku malava ai ʻe Sihova ke ne pehē fekauʻaki mo kitautolu ʻo hangē ko ia naʻá ne folofolaʻaki ki ʻIsilelí: “Kuou ofa aki kiate koe ae ofa taegata: koia kuou toho aki koe ae ofa ogogofua.”​—Selemaia 31:3, PM.

18, 19. (a) Ko e hā ʻa e founga ofi taha ʻa ia ʻoku fakahāhaaʻi ai ʻe Sihova ʻene ʻofa ʻiate kitautolú, pea ko e hā ʻokú ne fakahaaʻi ʻokú ne tokanga fakafoʻituitui ki he meʻá ni? (e) ʻOku anga-fēfē hono fakapapauʻi mai ʻe he Folofola ʻa e ʻOtuá kiate kitautolu ko Sihová ko ha tokotaha-fanongo kaungāongoʻi?

¹⁸ ʻOku fakafou nai ʻi he monū ko e lotú ʻa ʻetau aʻusia ʻa e ʻofa ʻa Sihová ʻi he founga ofi tahá. ʻOku fakaafeʻi mai ʻe he Tohitapú ʻa e tokotaha taki taha ʻo kitautolu ke tau “lotu taʻetuku” ki he ʻOtuá. (1 Tesalonaika 5:17) ʻOkú ne fanongo mai. ʻOku aʻu ʻo ui ia ko e “Tokotaha-Fanongo ki he lotú.” (Sāme 65:2, NW) Kuo ʻikai te ne tuku atu ʻa e tuʻunga mafai ko ʻení ki ha taha kehe, naʻa mo hono ʻAló tonu ʻoku ʻikai. Fakakaukau angé: ʻOku enginaki mai ʻa e Tokotaha-Fakatupu ʻo e ʻunivēsí kiate kitautolu ke tau fakaofiofi ange kiate ia ʻi he lotu, ʻaki ʻa e tauʻatāina ʻo e leá. Pea ko e faʻahinga tokotaha-fanongo fēfē ia? Anga-momoko, ʻikai kaungāongoʻi, taʻetokanga? ʻIkai ʻaupito.

¹⁹ ʻOku kaungāongoʻi ʻa Sihova. Ko e hā ʻa e kaungāongoʻí? Naʻe pehē ʻe ha Kalisitiane taʻumotuʻa loto-tōnunga ʻe taha: “Ko e kaungāongoʻí ko e hoko hoʻo mamahí ʻo ʻi hoku lotó.” ʻOku ueʻi moʻoni ʻa Sihova ʻe heʻetau mamahí? ʻOku tau lau ʻo fekauʻaki mo e ngaahi faingataʻaʻia ʻa hono kakai ʻIsilelí: “ʻI he mamahi kotoa naʻe hoko kiate kinautolu naʻe hoko ha mamahi ki Heʻene ʻAfio.” (Aisea 63:9) Naʻe ʻikai ngata pē ʻi he vakai atu ʻa Sihova ki heʻenau ngaahi faingataʻaʻiá; naʻá ne kaungāongoʻi ki he kakaí. Ko hono lahi tofu pē ko ia ʻo ʻene ongoʻí ʻoku fakahāhaaʻi ia ʻe he ngaahi lea tonu pē ʻa Sihova ki heʻene kau sevānití: “Koia oku ala kiate kimoutolu oku ne ala ki he kanoʻi mata uli o hoku mata.”b (Sākalaia 2:8, PM) He mamahi lahi ē ʻe hoko ʻi he meʻa ko iá! ʻIo, ʻoku ongoʻi kitautolu ʻe Sihova. ʻI heʻetau loto-mamahí, ʻokú ne loto-mamahi.

20. Ko e hā ʻa e fakakaukau taʻemafamafatatau kuo pau ke tau fakaʻehiʻehi mei ai kapau ko e fiemaʻú ke tau talangofua ki he akonaki ʻoku maʻu ʻi he Loma 12:3?

²⁰ Heʻikai ha Kalisitiane fakakaukau mafamafatatau ia te ne ngāueʻaki ʻa e fakamoʻoni pehē ʻo e ʻofa mo e mahuʻingaʻia ʻa e ʻOtuá ko ha kalofanga ia ki he loto-mahikihikí pe fiemeʻá. Naʻe tohi ʻe he ʻapositolo ko Paulá: “Koe mea i he ofa kuo foaki kiate au, oku ou tala atu ai ki he tagata taki taha kotoabe oku iate kimoutolu, ke oua naa lelei lahi ene mahalo kiate ia i he mahalo oku totonu; ka ke mahalo fakabotoboto, o fakatatau ki hono lahi oe tui kuo vaheʻi e he Otua ki he tagata taki taha.” (Loma 12:3, PM) ʻOku pehē heni ʻe ha toe liliu ia ʻe taha: “Te u lea ki he tokotaha kotoa pē ʻo kimoutolu ke ʻoua te ne fakafuofua ʻa ia tonu ʻo māʻolunga hake ia ʻi hono mahuʻinga moʻoní, ka ke fai ha fakafuofua fakapotopoto ʻo ia tonu.” (A Translation in the Language of the People, fai ʻe Charles B. Williams) Ko ia, lolotonga ʻoku tau fiefia kakato ʻi he māfana ʻo e ʻofa ʻa ʻetau Tamai fakahēvaní, tau fakakaukau fakapotopoto muʻa pea manatuʻi ʻoku ʻikai ko haʻatau ngāueʻi ʻo maʻu pea ʻoku ʻikai tuha mo kitautolu ʻa e ʻofa ʻa e ʻOtuá.​—Luke 17:10.

21. Ko e hā ʻa e ngaahi loi ʻa Sētane kuo pau ke tau talitekeʻi hokohokó, pea ko e hā ʻa e moʻoni fakaʻotua te tau hokohoko atu ke fakapapauʻi ki hotau lotó?

²¹ Ke fai ʻe he tokotaha taki taha ʻo kitautolu ʻa e meʻa kotoa pē ʻi hotau mālohí ke talitekeʻi ʻa e ngaahi loi kotoa ʻa Sētané, ʻo kau ai ʻa e loi ʻo pehē ʻoku tau taʻeʻaonga pe ʻikai ʻofaʻí. Kapau kuo akoʻi atu kiate koe ʻe hoʻo ngaahi hokosia ʻi he moʻuí ke ke sio kiate koe ko ha palopalema ʻoku fuʻu faingataʻa naʻa mo e ʻofa lahi fakaʻulia ʻa e ʻOtuá ke ne ikunaʻi, pe ko hoʻo ngaahi ngāue leleí ʻoku fuʻu taʻemahuʻinga ia naʻa mo hono ongo fofonga ʻilo fakaʻaufulí ke ne fakatokangaʻi, pe ko hoʻo ngaahi angahalá ʻoku fuʻu lahi naʻa mo e pekia ʻa hono ʻAlo mātuʻaki mahuʻingá ke ne ʻufiʻufi, kuo akoʻi atu kiate koe ha loi. Talitekeʻi ʻa e ngaahi loi peheé ʻaki ʻa e kotoa ʻo ho lotó! Tau hokohoko atu ke fakapapauʻi ki hotau lotó ʻa e moʻoni naʻe fakahaaʻi ʻi he ngaahi lea fakamānavaʻi ʻa Paulá: “ʻOku te tui, ʻe ʻikai lava ʻe he mate, pe ko e moʻui, pe ko ha kau angelo, pe ko ha kau pule, pe ko ha ngaahi meʻa ʻoku lolotonga ni, pe ko ha ngaahi meʻa ka hoko mai, pe ko ha ngaahi malohi, pe ko ha maʻolunga, pe ko ha loloto pe ko ha meʻa ʻe taha ʻi Natula, ʻe ʻikai te ne lava ke motuhi kitautolu mei he ʻofa ʻa e ʻOtua, ʻa ia ʻoku ʻia Kalaisi Sisu ko hotau ʻEiki.”​—Loma 8:38, 39.