Ko e ʻAlu ʻa Mōsese mo ʻĒlone kia Feló

ʻI HE foki ʻa Mōsese ki ʻIsipité, naʻá ne fakahā ki hono tokoua ko ʻĒloné ʻo fekauʻaki mo e ngaahi maná. Pea ʻi hono fakahāhā ʻe Mōsese mo ʻĒlone ki he kau ʻIsilelí ʻa e ngaahi mana ko ʻení, naʻe tui ʻa e kakaí kotoa naʻe ʻiate kinaua ʻa Sihova.

Pea naʻe toki ʻalu leva ʻa Mōsese mo ʻĒlone kia Felo. Naʻá na tala kiate ia: ‘ʻOku pehē ʻe Sihova ko e ʻOtua ʻo ʻIsileli, “Tuku ange ʻeku kakaí ke nau ʻalu ʻi he ʻaho ʻe tolu, koeʻuhi ke nau ʻalu ʻo lotu mai kiate au ʻi he toafá.”’ Ka ne tali ʻe Felo: ‘ʻOku ʻikai te u tui au kia Sihova. Pea heʻikai te u tuku ange ʻa e kau ʻIsilelí ke nau ʻalu.’

Naʻe ʻita lahi ʻa Felo, koeʻuhi ko e fiemaʻu ʻe he kakaí ha taimi mālōlō mei he ngāué ke lotu ai kia Sihova. Ko ia naʻá ne toe fakamālohiʻi ʻa e kakaí ke nau ngāue lahi ange. Naʻe tukuakiʻi ʻe he kau ʻIsilelí ʻa Mōsese ʻi hono ngaohikoviʻi kinautolú, pea naʻe loto-mamahi ai ʻa Mōsese. Ka naʻe tala ange ʻe Sihova kiate ia ke ʻoua ʻe hohaʻa. Naʻe pehē ʻe Sihova: ‘Te u ʻai ʻa Felo ke ne tuku ange ʻeku kakaí ke nau ʻalu.’

Naʻe toe ʻalu ʻa Mōsese mo ʻĒlone kia Felo. Naʻá na fai ʻi he taimi ko ʻení ha mana. Naʻe lī ki lalo ʻe ʻĒlone hono tokotokó, pea naʻe hoko ia ko e fuʻu ngata lahi. Ka naʻe toe lī ki lalo ʻe he kau tangata poto ʻa Feló ha ngaahi tokotoko, pea hoko ia ko ha fanga ngata. Kae vakai ange! Ko e ngata ko ia ʻa ʻĒloné ʻokú ne folo ʻa e fanga ngata ʻa e kau tangata potó. Ka naʻe ʻikai pē ke tuku ange ʻe Felo ia ʻa e kau ʻIsilelí ke nau ʻalu.

Ko ia naʻe aʻu ki ha taimi ke akoʻi ai ʻe Sihova ha meʻa kia Felo. ʻOkú ke ʻilo pe naʻe anga-fēfē ʻene fai ʻa e meʻa ko ʻení? Naʻe fakahoko ʻeni ʻi hano ʻomai ʻa e mala, pe ko e ngaahi fakatuʻutāmaki lahi ʻe 10 ki ʻIsipite.

ʻI he hili ʻa e niʻihi ʻo e ngaahi malá, naʻe fekau ʻe Felo ke ʻomai ʻa Mōsese peá ne pehē ki ai: ‘Taʻofi ʻa e malá pea te u tuku ange leva ʻa e kau ʻIsilelí ke nau ʻalu.’ Ka ʻi he taʻofi ʻa e ngaahi malá, kuo liliu ʻa e fakakaukau ia ʻa Feló. Pea naʻe ʻikai te ne tuku ange ʻa e kakaí ke nau ʻalu. Ka ne faifai atu pē, ʻi he ʻosi ʻa e mala hono 10, naʻe tuku ange leva ʻe Felo ʻa e kau ʻIsilelí ke nau ʻalu.

ʻOkú ke ʻilo ʻa e ngaahi mala kotoa ko ia ʻe 10? Hukeʻi ʻa e peesí pea te tau ako ʻo fekauʻaki mo ia.