Ko Hai ʻa Sīsū Kalaisi?

1, 2. (a) ʻOkú ke ʻiloʻi moʻoni ha tokotaha ʻiloa kapau ʻokú ke ʻiloʻi pē ʻa hono hingoá? Fakamatalaʻi. (e) Ko e hā ʻoku tui ki ai ʻa e kakaí ʻo fekauʻaki mo Sīsuú?

ʻOKU tokolahi ʻa e kakai ʻiloa ʻi he māmaní. ʻOkú ke ʻiloʻi nai ʻa e hingoa ʻo ha tokotaha ʻiloa. Ka ʻoku ʻikai ʻuhinga iá ʻokú ke ʻiloʻi lelei ia koeʻuhí pē ko hoʻo ʻiloʻi ʻa hono hingoá. ʻOku ʻikai ʻuhinga ia ʻokú ke ʻiloʻi ʻa e fakaikiiki kotoa pē fekauʻaki mo ʻene moʻuí pea ko e tokotaha fēfē moʻoni ia.

² Kuó ke fanongo nai fekauʻaki mo Sīsū Kalaisi, neongo naʻá ne moʻui ʻi he māmaní ʻi he taʻu nai ʻe 2,000 kuo maliu atú. Ka ko e tokolahi taha ʻo e kakaí ʻoku ʻikai te nau ʻilo pe naʻe hoko ʻa Sīsū ko e tokotaha fēfē. ʻOku pehē ʻe he niʻihi naʻá ne hoko ko ha tangata lelei, pehē ʻe he niʻihi ko ha palōfita, pea ʻoku tui ʻa e niʻihi ko e ʻOtuá ia. Ko e hā hoʻo fakakaukaú?​—Sio ki he Fakamatala ʻi he Ngataʻangá 12.

 3. Ko e hā ʻoku mahuʻinga ai ke ke ʻiloʻi ʻa Sihova ko e ʻOtuá pea mo Sīsū Kalaisí?

³ ʻOku mahuʻinga kiate koe ke ke ʻiloʻi ʻa e moʻoni ʻo fekauʻaki mo Sīsuú. Ko e hā hono ʻuhingá? ʻOku tala mai ʻe he Tohi Tapú: “Ko ʻeni ia ʻe maʻu ai ʻa e moʻui taʻengatá, ko ʻenau hoko ʻo ʻiloʻi koe, ko e ʻOtua moʻoni pē taha, pea mo e tokotaha ko ia naʻá ke fekau maí, ʻa Sīsū Kalaisi.” (Sione 17:3) ʻIo, kapau ʻokú ke ʻiloʻi ʻa e moʻoni fekauʻaki mo Sihova mo Sīsuú, ʻe lava ke ke moʻui taʻengata ʻi ha māmani palataisi. (Sione 14:6) Pehē foki, ko e ʻilo fekauʻaki mo Sīsuú ʻe tokoni kiate koe koeʻuhí ko ia ʻa e faʻifaʻitakiʻanga lelei taha ʻo e founga ke moʻui aí mo e tōʻonga ke fai ki he niʻihi kehé. (Sione 13:34, 35) ʻI he Vahe 1, naʻa tau ako ai ʻa e moʻoni fekauʻaki mo e ʻOtuá. ʻI he taimi ní te tau ako ai ʻa e meʻa ʻoku akoʻi mai ʻe he Tohi Tapú ʻo fekauʻaki mo Sīsuú.

 4. Ko e hā ʻa e ʻuhinga ʻo e ongo foʻi lea ko e “Mīsaiá” mo e “Kalaisí”?

⁴ ʻI he ngaahi taʻu lahi ki muʻa ke ʻaloʻi ʻa Sīsuú, naʻe talaʻofa ʻe Sihova ʻi he Tohi Tapú te ne fekauʻi mai ʻa e Mīsaiá, pe Kalaisí. Ko e foʻi lea “Mīsaiá” ʻoku haʻu ia mei he lea faka-Hepeluú, pea ko e foʻi lea “Kalaisí” ʻoku haʻu ia mei he lea faka-Kalisí. Ko e ongo hingoa fakalakangá ni fakatouʻosi ʻoku ʻuhinga iá ʻe fili ʻe he ʻOtuá ʻa e Mīsaia naʻá ne talaʻofaʻakí pea ʻoange kiate ia ha tuʻunga makehe. ʻE fakahoko ʻe he Mīsaiá ʻa e kotoa ʻo e ngaahi talaʻofa ʻa e ʻOtuá. ʻE lava foki ke tokoniʻi koe ʻe Sīsū he taimí ni. Ka ki muʻa pea ʻaloʻi ʻa Sīsuú, naʻe fifili ʻa e kakai tokolahi, ‘Ko hai ʻe hoko ko e Mīsaiá?’

 5. Naʻe tui ʻa e kau ākonga ʻa Sīsuú ko ia ʻa e Mīsaiá?

⁵ Naʻe ʻikai ha veiveiua ʻa e kau ākonga ʻa Sīsuú ko ia ʻa e Mīsaia naʻe talaʻofaʻaki maí. (Sione 1:41) Ko e fakatātaá, naʻe pehē ʻe Saimone Pita kia Sīsū: “Ko koe ʻa e Kalaisí.” (Mātiu 16:16) ʻE lava fēfē ke tau fakapapauʻi ko Sīsū ʻa e Mīsaiá?

 6. Naʻe anga-fēfē hono tokoniʻi ʻe Sihova ʻa e kakai loto-totonú ke nau ʻiloʻi fakapapau ʻa e Mīsaiá?

⁶ Ki muʻa fuoloa pea ʻaloʻi ʻa Sīsuú, naʻe tohi ʻe he kau palōfita ʻa e ʻOtuá ʻa e ngaahi fakaikiiki lahi ʻa ia ʻe tokoni ki he kakaí ke nau ʻilo ai ʻa e Mīsaiá. ʻE tokoni fēfē ʻa e meʻá ni? Tau pehē pē naʻe kole atu ke ke ʻalu ki ha tauʻanga pasi moʻumoʻua ke ʻomi ha taha naʻe teʻeki ai ʻaupito ke ke feʻiloaki mo ia. Kapau naʻe ʻoatu ʻe ha taha ha fakamatala mahino fekauʻaki mo e tokotaha ko iá, te ke malava ke ʻiloʻi ia. ʻI he founga tatau pē, naʻe ngāueʻaki ʻe Sihova ʻene kau palōfitá ke nau tala mai kiate kitautolu ʻa e meʻa ʻe fai ʻe he Mīsaiá mo e meʻa ʻe hoko kiate iá. Ko e fakahoko ʻo e kikite kotoa ko iá ʻoku tokoniʻi ai ʻa e kakai loto-totonú ke nau ʻiloʻi ko Sīsū ʻa e Mīsaiá.

 7. Ko e hā ʻa e kikite ʻe ua ʻoku fakamoʻoniʻi ai ko Sīsū ʻa e Mīsaiá?

⁷ Ko ha kikite eni ʻe ua ʻi he ngaahi kikite ko iá. ʻUluakí, ʻi he taʻu ʻe 700 ki muʻa pea ʻaloʻi ʻa Sīsuú, naʻe kikiteʻi ai ʻe Maika ko e Mīsaiá ʻe ʻaloʻi ia ʻi he kiʻi kolo ko Pētelihema. (Maika 5:2) Pea ko e feituʻu tofu pē ia naʻe ʻaloʻi ai ʻa Sīsuú! (Mātiu 2:1, 3-9) Uá, naʻe kikiteʻi ʻe Taniela ʻe hā ʻa e Mīsaiá ʻi he taʻu 29 T.S. (Taniela 9:25) Ko ha kikite pē eni ʻe ua ʻi he ngaahi kikite lahi ʻoku fakamoʻoniʻi mahino ai ko Sīsū ʻa e Mīsaia naʻe talaʻofaʻaki maí.​—Sio ki he Fakamatala ʻi he Ngataʻangá 13.

8, 9. Ko e hā naʻe hoko ʻi he papitaiso ʻo Sīsuú ʻo fakamoʻoniʻi ai ko ia ʻa e Mīsaiá?

⁸ Kuo ʻai ʻe Sihova ke hā mahino ʻaupito ko Sīsū ʻa e Mīsaiá. Naʻe talaʻofa ʻa e ʻOtuá te ne ʻoange kia Sione Papitaiso ha fakaʻilonga koeʻuhi ke ne ʻiloʻi ko hai ʻa e Mīsaiá. ʻI he taimi naʻe ʻalu ai ʻa Sīsū kia Sione ke ne papitaiso ia ʻi he Vaitafe Sioataní ʻi he taʻu 29 T.S., naʻe sio ʻa Sione ki he fakaʻilonga ko iá. ʻOku tala mai ʻe he Tohi Tapú ʻa e meʻa naʻe hokó: “ʻI he hili hono papitaisó, naʻe mālanga hake leva ʻa Sīsū mei he vaí; pea vakai, naʻe fakaava hifo ʻa e langí, peá ne mamata ki he laumālie ʻo e ʻOtuá ʻoku ʻalu hifo kiate ia ʻo hangē ha lupé. Vakai! Naʻe ʻi ai mo ha leʻo mei he langí naʻe pehē mai: ‘Ko hoku ʻAló eni, ʻa e ʻofeiná, ʻa ia kuó u hōifua aí.’” (Mātiu 3:16, 17) ʻI he sio mo fanongo ʻa Sione ki he fakaʻilongá ni, naʻá ne ʻiloʻi ai ko Sīsū ʻa e Mīsaiá. (Sione 1:32-34) ʻI he ʻaho ko iá, ʻi hono huaʻi hifo ʻe Sihova hono laumālié kia Sīsuú, naʻá ne hoko ai ko e Mīsaiá. Ko ia ʻa e tokotaha naʻe fili ʻe he ʻOtuá ke hoko ko e Taki mo e Tuʻi.​—ʻAisea 55:4.

⁹ Ko e ngaahi kikite ʻi he Tohi Tapú, ko e folofola tonu ʻa Sihová, pea mo e fakaʻilonga naʻá Ne ʻomai ʻi he papitaiso ʻo Sīsuú ʻoku fakamoʻoniʻi ai ko Sīsū ʻa e Mīsaiá. Ka naʻe haʻu ʻa Sīsuú mei fē, pea naʻá ne hoko ko e tokotaha fēfē? Tau sio angé ki he meʻa ʻoku leaʻaki ʻe he Tohi Tapú.

10. Ko e hā ʻoku akoʻi mai ʻe he Tohi Tapú ʻo fekauʻaki mo e moʻui ʻa Sīsū ki muʻa ke ne haʻu ki māmaní?

¹⁰ ʻOku akoʻi mai ʻe he Tohi Tapú naʻe moʻui ʻa Sīsū ʻi hēvani ʻi ha taimi fuoloa ia ki muʻa ke ne haʻu ki māmaní. Naʻe pehē ʻe Maika ko e Mīsaiá naʻe “talu mei muʻa.” (Maika 5:2) Naʻe tuʻo lahi ʻa e pehē ʻe Sīsū tonu naʻá ne moʻui ʻi hēvani ki muʻa ke fanauʻi mai ko ha tangatá. (Lau ʻa e Sione 3:13; 6:38, 62; 17:4, 5.) Naʻa mo e ki muʻa ke ne haʻu ki māmaní, naʻe maʻu ʻe Sīsū ha vahaʻangatae makehe mo Sihova.

11. Ko e hā ʻoku mātuʻaki mahuʻinga ai ʻa Sīsū kia Sihová?

¹¹ ʻOku mātuʻaki mahuʻinga ʻa Sīsū kia Sihova. Ko e hā hono ʻuhingá? Koeʻuhí naʻe fakatupu ia ʻe he ʻOtuá ki muʻa ʻi he meʻa kehe kotoa pē mo e tokotaha kotoa pē. Ko ia ʻoku ui ai ʻa Sīsū “ko e ʻuluaki fakatupu ia ʻi he meʻa fakatupu kotoa pē.”a (Kolose 1:15) ʻOku toe mahuʻinga foki ʻa Sīsū kia Sihova koeʻuhí ko ia pē toko taha naʻe fakatupu fakahangatonu ʻe Sihová. Ko e ʻuhinga ia ʻoku ui ai ia ko e “ʻAlo tofu-pē-taha-ne-fakatupú.” (Sione 3:16) Ko Sīsū pē foki ʻa e toko taha naʻe ngāueʻaki ʻe Sihova ke ne fakatupu ʻa e ngaahi meʻa kehe kotoa pē. (Kolose 1:16) Pea ko Sīsū pē ʻoku ui ko “Folofola,” koeʻuhí naʻe ngāueʻaki ia ʻe Sihova ke ne ʻoatu ʻa e ngaahi pōpoaki mo e ngaahi fakahinohino ki he kau ʻāngeló mo e faʻahinga ʻo e tangatá.—Sione 1:14.

12. ʻOku tau ʻilo fēfē ko Sīsū mo e ʻOtuá ʻoku ʻikai ko e tokotaha tatau pē?

¹² ʻOku tui ʻa e kakai ʻe niʻihi ko Sīsū mo e ʻOtuá ko e tokotaha tatau pē. Ka ʻoku ʻikai ko e meʻa ia ʻoku akoʻi mai ʻe he Tohi Tapú. ʻOku pehē ʻe he Tohi Tapú ko Sīsuú naʻe fakatupu, ʻa ia ʻoku ʻuhinga iá naʻe ʻi ai ʻa e kamataʻanga ʻo Sīsū. Ka ko Sihova, ʻa ia naʻá ne fakatupu ʻa e ngaahi meʻa kotoa peé, naʻe ʻikai hano kamataʻanga. (Saame 90:2) ʻI hono tuʻunga ko e ʻAlo ʻo e ʻOtuá, naʻe ʻikai ʻaupito fakakaukau ʻa Sīsū ke ne feinga ke hoko ko e ʻOtuá. ʻOku akoʻi mahino mai ʻe he Tohi Tapú ʻoku lahi ʻa e Tamaí ʻi he ʻAló. (Lau ʻa e Sione 14:28; 1 Kolinitō 11:3.) Ko Sihova pē ʻa e “ʻOtua Māfimafi-Aoniú.” (Sēnesi 17:1) Ko ia ʻa e tokotaha lahi taha mo mālohi taha ʻi he ʻunivēsí.​—Sio ki he Fakamatala ʻi he Ngataʻangá 14.

13. Ko e hā ʻoku pehē ai ʻe he Tohi Tapú ko Sīsuú ko e “ʻīmisi ʻo e ʻOtua taʻehāmaí”?

¹³ Ko Sihova mo hono ʻAló, ʻa Sīsū, naʻá na ngāue vāofi fakataha ʻi he taʻu ʻe laui piliona ki muʻa ke fakatupu ʻa e langí mo e māmaní. Kuo pau pē naʻá na mātuʻaki feʻofaʻaki ʻaupito! (Sione 3:35; 14:31) Naʻe faʻifaʻitaki lelei ʻaupito ʻa Sīsū ki he ngaahi ʻulungaanga ʻo ʻene tamaí ʻo ui ai ia ʻe he Tohi Tapú ko e “ʻīmisi ʻo e ʻOtua taʻehāmaí.”​—Kolose 1:15.

14. Naʻe lava fēfē ke fanauʻi mai ʻa e ʻAlo mātuʻaki mahuʻinga ʻo Sihová ko ha tangata?

¹⁴ Naʻe loto-lelei ʻa e ʻAlo mātuʻaki mahuʻinga ʻo Sihová ke ne liʻaki ʻa hēvani pea ke fanauʻi mai ki he māmaní ko ha tangata. Naʻe malava fēfē ia? Naʻe hiki fakaemana hifo ʻe Sihova ʻa e moʻui ʻa hono ʻAló mei hēvani ki he manava ʻo ha tāupoʻou ko hono hingoá ko Mele. ʻI he foungá ni, naʻe ʻikai fiemaʻu ke maʻu ʻe Sīsū ha tamai fakaetangata. Ko ia naʻe fanauʻi ai ʻe Mele ha tama haohaoa, peá ne ui ia ko Sīsū.​—Luke 1:30-35.

15. ʻE lava fēfē ke ke hoko ʻo ʻiloʻi lelei ange ʻa Sihova?

¹⁵ ʻE lava ke ke ako lahi fekauʻaki mo Sīsū, ko ʻene moʻuí, mo hono ngaahi ʻulungāngá ʻaki hono lau ʻa e ngaahi tohi ʻi he Tohi Tapú ʻa Mātiu, Maʻake, Luke mo Sioné. ʻOku ui ʻa e ngaahi tohi ko iá ko e Ngaahi Kōsipelí. Koeʻuhí ʻoku hangē pē ʻa Sīsū ko ʻene Tamaí, ko e meʻa ʻokú ke laú te ne toe tokoniʻi koe ke ke hoko ai ʻo ʻiloʻi lelei ange ʻa Sihova. Ko e ʻuhinga ia naʻe malava ai ke pehē ʻe Sīsū: “ʻIlonga ʻa ia kuó ne mātā aú kuó ne mātā foki ʻa e Tamaí.”​—Sione 14:9.

16. Ko e hā naʻe akoʻi ʻe Sīsuú? Naʻe haʻu mei fē ʻa e ngaahi akonaki ʻa Sīsuú?

¹⁶ Naʻe ui ʻe he kakai tokolahi ʻa Sīsū ko e “Faiako.” (Sione 1:38; 13:13) Ko e taha ʻo e ngaahi meʻa mahuʻinga taha naʻá ne akoʻí ko e “ongoongo lelei ʻo e Puleʻangá.” Ko e hā ʻa e Puleʻanga ko ení? Ko e founga-pule ia ʻa e ʻOtuá ʻe pule mai mei hēvani ki he māmaní kotoa pea ʻomai ʻa e ngaahi tāpuaki ki he kakai ʻoku nau talangofua ki he ʻOtuá. (Mātiu 4:23) Ko e meʻa kotoa pē naʻe akoʻi ʻe Sīsuú naʻe haʻu ia meia Sihova. Naʻe pehē ʻe Sīsū: “Ko e meʻa ʻoku ou akoʻí ʻoku ʻikai ʻaʻaku, ka ʻoku ʻaʻana ia naʻá ne fekau mai aú.” (Sione 7:16) Naʻe ʻiloʻi ʻe Sīsū ʻoku fiemaʻu ʻe Sihova ke fanongo ʻa e kakaí ki he ongoongo lelei ʻa ia ko e Puleʻanga ʻo e ʻOtuá ʻe pule mai ki he māmaní.

17. Naʻe faiako ʻa Sīsuú ʻi fē? Ko e hā naʻá ne ngāue mātuʻaki mālohi ai ke akoʻi ʻa e niʻihi kehé?

¹⁷ Naʻe faiako ʻa Sīsuú ʻi fē? ʻI ha feituʻu pē naʻá ne maʻu ai ha kakai. Naʻá ne faiako ʻi he feituʻu ʻutá pea pehē ki he ngaahi kolo lalahí, fanga kiʻi koló, ngaahi feituʻu faiʻanga fakataú, ngaahi feituʻu faiʻanga lotú, pea mo e ngaahi ʻapi ʻo e kakaí. Naʻe ʻikai te ne ʻamanekina ke haʻu ʻa e kakaí kiate ia. Naʻá ne ʻalu maʻu pē kiate kinautolu. (Maʻake 6:56; Luke 19:5, 6) Naʻe ngāue mālohi ʻa Sīsū mo fakamoleki ʻa e taimi lahi mo e ivi ʻi hono akoʻi ʻa e kakaí. Ko e hā hono ʻuhingá? Koeʻuhí naʻá ne ʻilo naʻe fiemaʻu ʻe he ʻOtuá ke ne fai ʻa e meʻa ko iá pea koeʻuhí naʻá ne talangofua maʻu pē ki heʻene Tamaí. (Sione 8:28, 29) Naʻe toe malanga foki ʻa Sīsū koeʻuhí naʻá ne ongoʻi manavaʻofa ki he kakaí. (Lau ʻa e Mātiu 9:35, 36.) Naʻe malava ke ne ʻiloʻi naʻe ʻikai ke akoʻi ʻe he kau taki lotú ʻa e moʻoni fekauʻaki mo e ʻOtuá mo hono Puleʻangá. Ko ia naʻá ne loto ai ke tokoniʻi ʻa e tokolahi taha ʻe ala lavá ke nau fanongo ki he ongoongo leleí.

18. Ko e hā ʻa e ngaahi ʻulungaanga ʻo Sīsū ʻokú ke saiʻia taha aí?

¹⁸ Ko Sīsuú ko ha tangata naʻe ʻofa ʻi he kakaí mo tokanga kiate kinautolu. Naʻá ne anga-lelei pea naʻe faingofua ke talanoa kiate ia. Naʻa mo e fānaú naʻa nau saiʻia ke feohi mo ia. (Maʻake 10:13-16) Naʻe faitotonu maʻu pē ʻa Sīsū. Naʻá ne fehiʻa ʻi he kākaá mo e fakamaau taʻetotonú. (Mātiu 21:12, 13) Naʻá ne moʻui ʻi ha taimi ʻa ia naʻe ʻikai ke maʻu ai ʻe he kakai fefiné ha ngaahi totonu lahi pea naʻe ʻikai ke fakaʻapaʻapaʻi kinautolu. Ka naʻe fakaʻapaʻapaʻi maʻu pē ʻe Sīsū ʻa e kakai fefiné mo fakangeingeiaʻi. (Sione 4:9, 27) Naʻe toe anga-fakatōkilalo moʻoni ʻa Sīsū. Ko e fakatātaá, ʻi he efiafi ʻe taha, naʻá ne fufulu ai ʻa e vaʻe ʻo ʻene kau ʻapositoló, ko e meʻa naʻe angamaheniʻaki hono fai ʻe ha sevāniti.​—Sione 13:2-5, 12-17.

19. Ko e hā ʻa e fakatātā ʻoku fakahaaʻi ai naʻe ʻiloʻi ʻe Sīsū ʻa e meʻa naʻe fiemaʻu moʻoni ki he kakaí pea naʻá ne loto ke tokoniʻi kinautolu?

¹⁹ Naʻe ʻiloʻi ʻe Sīsū ʻa e meʻa naʻe fiemaʻu moʻoni ki he kakaí, pea naʻá ne loto ke tokoniʻi kinautolu. Naʻe mātuʻaki hā mahino eni ʻi heʻene ngāueʻaki ʻa e mālohi ʻo e ʻOtuá ke fakamoʻui fakaemana ʻaki ʻa e kakaí. (Mātiu 14:14) Ko e fakatātaá, naʻe haʻu ha tangata kilia kia Sīsū ʻo ne pehē: “Kapau te ke loto pē ki ai, ʻe lava ke ke ʻai au ke u maʻa.” Naʻe maongo kia Sīsū ʻa e mamahi mo e faingataʻaʻia ʻa e tangatá ni. Naʻá ne ongoʻi fakaʻofaʻia ʻiate ia ʻo ne loto ke tokoniʻi ia. Ko ia naʻe mafao atu ʻe Sīsū hono nimá ʻo ala ki he tangatá, peá ne pehē kiate ia: “ʻOku ou loto ki ai! Ke ke maʻa.” Pea naʻe moʻui ʻa e tangata naʻe puké! (Maʻake 1:40-42) ʻOku lava ke ke sioloto atu ki he ongoʻi kuo pau naʻe maʻu ʻe he tangata ko iá?

20, 21. ʻOku anga-fēfē ʻa e hoko ʻa Sīsū ko e faʻifaʻitakiʻanga lelei taha ʻo e talangofua ki he ʻOtuá?

²⁰ Ko Sīsū ʻa e faʻifaʻitakiʻanga lelei taha ʻo e talangofua ki he ʻOtuá. Tatau ai pē pe ko e hā naʻe hokó pe ko e hā ʻa e meʻa naʻe fai kiate ia ʻe hono ngaahi filí, naʻá ne faitōnunga ki heʻene Tamaí. Ko e fakatātaá, naʻe ʻikai ke faiangahala ʻa Sīsū ʻi he taimi naʻe feinga ai ʻa Sētane ke ʻahiʻahiʻi iá. (Mātiu 4:1-11) Ko e niʻihi ʻo e fāmili tonu ʻo Sīsuú naʻe ʻikai te nau tui ko ia ʻa e Mīsaiá pea nau pehē naʻe “hē hono ʻatamaí,” ka naʻe hanganaki fai pē ʻe Sīsū ia ʻa e ngāue ʻa e ʻOtuá. (Maʻake 3:21) ʻI he taimi naʻe anga-fakamamahi ai kiate ia ʻa hono ngaahi filí, naʻe nofoʻaki faitōnunga ai pē ʻa Sīsū ki he ʻOtuá pea ʻikai ʻaupito te ne feinga ke fai ha kovi kiate kinautolu.​—1 Pita 2:21-23.

²¹ Naʻa mo e taimi naʻe faingataʻaʻia ai ʻa Sīsū ʻi ha pekia fakamamahi mo langa lahí, naʻá ne nofoʻaki faitōnunga ai pē kia Sihova. (Lau ʻa e Filipai 2:8.) Sioloto atu ki he lahi ʻo e meʻa naʻe pau ke ne kātekina ʻi he ʻaho naʻá ne pekia aí. Naʻe puke ia, tukuakiʻi ʻe he kau fakamoʻoni loi ki he lea fieʻotua, fakahalaiaʻi ʻe he kau fakamaau kākā, kataʻi ʻe he fuʻu kakaí, pea fakamamahiʻi ʻe he kau sōtiá mo tutuki ia ki ha ʻakau. ʻI he ofi ke ne pekiá naʻá ne kalanga: “Kuo lava!” (Sione 19:30) Hili ʻa e ʻaho ʻe tolu mei he pekia ʻa Sīsuú, naʻe fokotuʻu hake ia ʻe Sihova pea ʻoange kiate ia ha sino laumālie. (1 Pita 3:18) ʻI ha ngaahi uike siʻi ki mui ai, naʻe foki ʻa Sīsū ki hēvani, “peá ne nofo hifo ʻi he nima toʻomataʻu ʻo e ʻOtuá,” ʻo tatali ai ki hono ʻai ia ʻe he ʻOtuá ke ne hoko ko e Tuʻí.​—Hepelū 10:12, 13.

22. Ko e hā ʻa e faingamālie ʻoku tau maʻu he taimí ni koeʻuhi ko e faitōnunga ʻa Sīsū ki heʻene Tamaí?

²² Koeʻuhi naʻe faitōnunga ai pē ʻa Sīsū ki heʻene Tamaí, ʻoku tau maʻu ai he taimí ni ʻa e faingamālie ke moʻui taʻengata ʻi ha māmani palataisi, ʻo hangē tofu pē ko ia naʻe taumuʻa ki ai ʻa Sihová. ʻI he vahe hono hokó, te tau lāulea ai ki he anga hono ʻai ʻe he pekia ʻa Sīsuú ke tau malava ʻo moʻui taʻengatá.