Mateo

13 Ja bʼa kʼakʼu jaw, ja Jesús el ja bʼa naʼitsi sok ti kulani bʼa stiʼ mar. 2 Yuja jel jitsan kʼot ja kristyano, ja yeʼn kʼe bʼa jun chʼin barko sok kulani, jaxa kristyano jumasaʼ ti tekʼane bʼa stiʼ mar. 3 Anto tixa sjeʼayile jitsan jastik junuk sok ya makunuk sjejelik.* Ti yala yabʼyeʼa: «¡Maklayik! Jun winik el tsʼunbʼanel. 4 Sok yajni wan tsʼunbʼaneli, jujuntik inat ti koʼ bʼa stiʼ bʼej, tixa jakye ja yal chaniki sok ti stuluweʼa. 5 Jaxa tuki ti koʼ bʼa tonaltik, bʼa mey lek luʼum, sok wegoxta elyekʼen yuja mi pimuk ja luʼumi. 6 Pe yajni el ja kʼaʼuji, chʼakye kʼaʼuj, sok yuja mi chaʼanuk ja yechi, chʼak takuk. 7 Tuk ti koʼ bʼa yoj kʼiʼixaltik, jaxa kʼiʼixaltiki kʼiʼi sok yawe tupuk. 8 Jaxa tuki ti koʼ bʼa lekil luʼum sok kʼe satinuke: jujuntik, satiniye 100 ekʼele mas, tuk 60 ekʼele mas, jaxa tuki 30 ekʼele mas. 9 Ja maʼ ay xchikini, a-smaklay lek».

10 Anto ja snebʼumaniki tixa mojxiyeʼa sok sjobʼoweyi: «¿Jas yuj wa xwa makunuk sjejelik ja yajni waxa jeʼayile?». 11 Ja yeʼn sjakʼayile: «Ja weʼnlexi wa x-ajikan bʼa oja wabʼyex stojol ja jastik jel chaʼanyabʼal wa xjak bʼa Dyos* sbʼaja Gobyerno bʼa satkʼinali, pe miyuk ja yeʼnleʼi. 12 Yujni ja maʼ ayiʼoji ojni ajukyi mas, sok oj ajuk jitsanbʼukyi; pe ja maʼ mey yiʼoji, asta ojni japjukyi ja jas yiʼoji. 13 Ja yuj wa xkala yabʼye sok sjejelik, pes anima wa xyilawe, lom wane ilwanel, sok anima wa xyabʼye, lom wane yabʼjel sok mini jas xyabʼye stojol. 14 Sok wani kʼotel bʼa yeʼnle ja yaljelik it bʼa Isaías: ‹Ja weʼnlexi ojni awabʼyex, pe mini oja wabʼyex stojol. Oj ilwananik, pe mini oj kʼota wil-ex. 15 Yujni chʼuʼuybʼita ja skʼujol ja chonabʼ it. Smakaweta ja xchikineʼi* sok smutsʼuweta ja sateʼi, bʼa jachuk nunka oj yil-e soka sateʼi sok mini oj yabʼye soka xchikineʼi; cha mini oj yabʼye stojol soka skʼujoleʼi sok mini oj kumxuke soka Dyosi jaxa keʼn mi oj ka tojbʼuke›.

16 Pe aʼajyuk gusto jawa satex yuja wa xyilaweʼi sok jawa chikinex yuja wa xyabʼye. 17 Yujni wa xkalawabʼyex meran lek: jitsan alumanik sok tojil kristyanoʼik jel skʼanawe yiljel ajyi ja jastik wanex yiljeli, pe mini yilawe, sok yabʼjel ja jastik wanex yabʼjeli, pe mini yabʼye.

18 Ja yuj ja wego maklayik ja jas wa stojolan ja sjejel sbʼaja tsʼunumani. 19 Yajni ay maʼ wa xyabʼ ja rason sbʼaja sGobyerno ja Dyosi pe mi xyabʼ stojol, wa xjak ja Maʼ jel malo sok wa sjotso-el ja jas tsʼunxi ja bʼa skʼujoli. Jani ja inat it tsʼunxi bʼa stiʼ bʼeji. 20 Ja inat tsʼunxi bʼa yoj tonaltiki jani ja maʼ wa xyabʼ ja rasoni sok wegoxta wa skʼuʼan gusto lek. 21 Pe mini chaʼanuk ja yech ja bʼa skʼujoli sok kechan jun tyempo wa snochoyi. Yajni wa xjak sbʼaj wokolik ma wa x-iji spatik yuja skisa ja rasoni, wegoxta wa sloko yok.* 22 Ja inat tsʼunxi ja bʼa yoj kʼiʼixaltiki jani ja maʼ wa xyabʼ ja rasoni, pe wa xyaʼakan oj netʼjukan yuja chamkʼujolik ja bʼa jastal wa xtax ja tyempo* it sok yuja smonwanel* ja rikoʼili, sok ja yuj mi satini ja rasoni. 23 Jaxa inat tsʼunxi ja bʼa lekil luʼumi jani ja matik wa xyabʼye ja rasoni sok wa xyabʼye stojolil. Ja yeʼnleʼi wani satiniye. Jujuntik wa satini 100 ekʼele mas; tuk 60 ekʼele mas, jaxa tuki 30 ekʼele mas».

24 Anto ti yaʼa ja pilan sjejel it: «Ja Gobyerno bʼa satkʼinali wa xbʼobʼ slaj jun winik bʼa stsʼunu lekil inat ja bʼa yalaji. 25 Yajni wane wayel ja winikeʼi, jak ja skontra, stsʼunukan mal kʼul ja bʼa yoj trigo sok tixa waja. 26 Yajni bʼojti ja xchiwanali sok satini, anto cha sjeʼa sbʼaj ja mal kʼuli. 27 Ja yuj ja smosoʼik ja yajwalil ja naʼitsi jakye sok yalawe yabʼi: ‹Kajwal, ¿mi maʼ atsʼunu lekil inat ja bʼa wa walaji? Anto, ¿jas yuj ay mal kʼuli?›. 28 Ja yeʼn yala yabʼye: ‹Ja it skʼulan jun winik, jun kontraʼanum›. Jaxa mosoʼiki tixa sjobʼoweyiʼa: ‹¿Wan maʼ xa kʼana oj wajkotikon sok oj jotstikon?›. 29 Ja yeʼn sjakʼayile: ‹Miyuk, bʼaxama lek ja yajni xa jotsowex ja mal kʼuli xa taʼawex jotsjel ja trigo. 30 Aʼawikan bʼa akʼiʼuke lajan masan xtulxi. Jaxa bʼa styempoʼil ja stuljeli oj kalyabʼ ja tulumaniki a-sjotse bʼajtan ja mal kʼuli sok a-smoche por manojoʼik bʼa oj tsikxuk. Tsaʼan tixa stsomowe ja trigo sok a-snole bʼa jtsʼulubʼ›».

31 Cha yayile ja pilan sjejel it: «Ja Gobyerno bʼa satkʼinali jach jastal jun sbʼakʼ mostasa bʼa yiʼaj jun winik sok stsʼunu bʼa yalaj. 32 Ja inat it jani ja mas nux bʼa yibʼanal ja inati, pe yajni wa xkʼiʼi yeʼnani ja mas niwan bʼa yibʼanal ja itajiki sok wa xpax jastal jun teʼ, jaxa yal chaniki wa xbʼobʼ skʼuluk soje ja bʼa yal skʼabʼiki».

33 Sok cha yayile pilan sjejel: «Ja Gobyerno bʼa satkʼinali jach jastal ja levadura bʼa yiʼaj jun ixuk sok tixa sokosok oxe niwak medida* arina masan pojxi* ja arina».

34 Ja Jesús ya makunuk sjejelik yajni yala yabʼ ja jastik it ja kristyano jumasaʼ. Ja smeranili, ta mi xya makunuk sjejelik, mini jas xyala yabʼ ja kristyano. 35 Sok jach kʼot ja jas aji ekʼyi ja aluman Isaías yajni yala: «Ojni jam ja jtiʼ yajel makunuk sjejelik; oj kal jastik junuk bʼa nakʼan ay masan kujlajijani».*

36 Tsaʼan, yajni chʼak skʼumkan ja kristyano jumasaʼ, tixa och ja bʼa naʼitsi. Jaxa snebʼumaniki mojxiye sok yalawe yabʼi: «Cholokabʼtikon ja sjejel sbʼaja mal kʼul ja bʼa alaji». 37 Ja yeʼn xcholo: «Ja tsʼunuman bʼa lekil inati jani ja Yunin ja Winiki.* 38 Ja alaji jani ja luʼumkʼinali. Ja lekil inati jani ja yuntikil ja Gobyerno bʼa satkʼinali. Ja mal kʼuli jani ja yuntikil ja Maʼ jel malo, 39 jaxa kontraʼanum maʼ stsʼunuʼi jani ja Dyablo. Ja stuljeli jani ja xchʼakulabʼil ja bʼa jastal wa xtax ja tyempo* sok jaxa tulumaniki jani ja anjeliki. 40 Ja yujil, jastalni wa xjotsji ja mal kʼuli sok wa stsikji bʼa kʼakʼ, jach oj ekʼuk ja bʼa xchʼakulabʼil ja jastal wa xtax ja tyempo.* 41 Ja Yunin ja Winiki oj sjek ja yanjeliki, jaxa yeʼnleʼi oj yawe eluk ja bʼa sGobyerno yibʼanal ja jastik wa xyaʼa lok okili* sok ja matik wa skʼulane bʼa mi lekuk, 42 sok ti oj sjip-e bʼa yoj chakal kʼakʼ. Ja yeʼnle ti oj okʼuke tiw sok ti oj yawe jetsʼetsʼuk ja yejeʼi. 43 Jaxa bʼa tyempo jaw, ja matik toji ojni lijpuke jastal ja kʼaʼuj ja bʼa sGobyerno ja sTateʼi. Ja maʼ ay xchikini, a-smaklay lek.

44 Ja Gobyerno bʼa satkʼinali jach jastal jun portuna bʼa ti nakʼan ay bʼa jun luʼum sok staʼa jun winik. Ja winiki cha snakʼakani, sok yuja sgustoʼili, waji sok xchono yibʼanal ja jas yiʼoji sok smanakan ja luʼum jawi.

45 Ja Gobyerno bʼa satkʼinali cha jach jastal jun negosyoʼanum bʼa wa sleʼa ekʼ perlaʼik* bʼa jel pinoʼik. 46 Yajni staʼa jun perla* bʼa jel pino juntiro, ja yeʼn waji sok wegoxta xchono yibʼanal ja jastik yiʼoji sok smana.

47 Ja Gobyerno bʼa satkʼinali cha jach jastal jun yenubʼil chay bʼa yawe koʼuk bʼa mar sok stsomo tuktukil tikʼe chay. 48 Yajni bʼutʼi, sjokowe man stiʼ mar, tixa kulaniye sok yawe ochuk bʼa yetal ja lekil chayi, pe sjipawe-el ja bʼa mi xmakuni. 49 Jani jaw ja jas oj ekʼuk ja bʼa xchʼakulabʼil ja jastal wa xtax ja tyempo.* Ja anjeliki oj eluke sok oj spil-e ja matik malo ja bʼa matik toji 50 sok ti oj sjip-e bʼa yoj chakal kʼakʼ. Ja yeʼnle ti oj okʼuke tiw sok ti oj yawe jetsʼetsʼuk ja yejeʼi.

51 ¿Awabʼyex maʼ stojolil yibʼanal ja it?». Ja yeʼnleʼi sjakʼaweyi: «Kabʼtikon». 52 Anto tixa yala yabʼyeʼa: «Ta jachkʼa, naʼawik ja it: chikan maʼ jeʼuman bʼa chapubʼal sbʼaja Gobyerno bʼa satkʼinali jach jastal jun winik, ja yajwalil ja naʼitsi, bʼa wa xya eluk jastik ajkʼach sok jastik poko ja bʼa jas snoluneji».

53 Yajni chʼak yal ja sjejelik it, ja Jesús tixa el ja tiwi. 54 Yajni kʼot ja bʼa slujmali, kʼe sjeyi ja kristyanoʼik ja bʼa naʼits wa stsomo sbʼajeʼi, sok jel ya ochkan spensar ja kristyano. Wa xyalawe: «¿Bʼa staʼa ja winik it ja biboʼili sok ja ipal bʼa skʼulajel ja milagroʼik it?* 55 ¿Mi maʼ jaʼuk ja yunin ja karpintero? ¿Mi maʼ jaʼuk snan ja it wa sbʼiʼilan María, sok mi maʼ jaʼ yermano ja Santiago, ja José, ja Simón sok ja Judasi? 56 ¿Sok mi maʼ teyuke jmoktik il ja yermana jumasaʼ? Anto, ¿bʼaxa staʼa yibʼanal ja jastik it?». 57 Ja it timjiyeyuj skʼuʼajel bʼa yeʼna.* Pe ja Jesús tixa yala yabʼyeʼa: «Ja alumani wa xtoyji bʼa spetsanil lugar pe miyuk ja bʼa slugari sok ja bʼa snaji». 58 Sok yuja mi jel skʼuʼane ja yeʼnleʼi, ja yeʼn mini skʼulan jitsan milagro* ja tiwi.