Juan

6 Yajni ekʼ ja jastik it, ja Jesús ekʼ bʼa stiʼ jun lado ja mar bʼa Galilea, ma Tiberíades. 2 Sok wan nochjelyuj jun niwan nole kristyano yuja wa xyilawe ja milagroʼik* wa skʼulan ja yajni wa xya tojbʼuk ja matik maloʼayi. 3 Jaxa Jesús ti kʼe bʼa jun wits sok ti och kulan tiw soka snebʼumaniki. 4 Mojanxani ja Pascua, ja skʼine ja judíoʼiki. 5 Yajni sjacha ja sat ja Jesús sok yila ti jakume jun niwan nole kristyano ja bʼayi, ti sjobʼoyi ja Felipe: «¿Bʼa oj jmantikik pan bʼa oj yabʼye ja kristyanoʼik it?». 6 Ja it yala bʼa yajel och probar, pes ja yeʼn wanxani snaʼa ja jas oj skʼuluki. 7 Ja Felipe sjakʼayi: «Mini sok 200 denario* pan oj yaʼe bʼa oj waʼuke tʼunuk kada jujune». 8 June ja bʼa snebʼumaniki, ja Andrés, ja yermano ja Simón Pedro, yala yabʼi: 9 «Ja ili ay jun yal kerem ayiʼoj joʼe pan* sok chabʼ yal chay. Pe ¿janekʼ oj ya’ ja it bʼa jitsan kristyano?».

10 Ja Jesús yala: «Alawikyabʼ ja kristyano akulanuke». Sok yuja jel ja ak ja bʼa lugar jaw, ti kulaniye tiw. Ayni junuk 5,000 winike. 11 Jaxa Jesús syama ja pani, sok yajni chʼak yayi tsʼakatal ja Dyosi, ti spilayi ja matik kulane ekʼ tiwi; jachni cha skʼulan soka yal chayiki, sok waʼye ja janekʼ skʼanaweʼi. 12 Yajni bʼutʼyekani, ti yala yabʼ ja snebʼumaniki: «Tsomowik ja pedasoʼik kan sobra, bʼa mi jas oj chʼayxuk». 13 Ja yuj stsomowe sok sbʼutʼuwe 12 moʼoch ja pedasoʼik pan yaʼawekan ja matik yabʼye ja bʼa joʼe pani.

14 Yajni ja kristyano yila ja milagro skʼulani, ti och yaleʼa: «Meran lek, ja it yeʼnani ja Aluman maʼ tʼilan oj jakuk ja bʼa luʼumkʼinali». 15 Anto ja Jesús, yuja wa snaʼa ojxta jakuke sok tarega oj yiʼe och bʼa yajel och rey, tixa cha waj stuchʼil pilan ekʼele ja bʼa witsi.

16 Yajni och ja akwali, ja snebʼumaniki tixa koʼye koʼ bʼa mar, 17 tixa kʼeye bʼa jun chʼin barko sok kʼe skʼuts-e ja mar sok wajye ja bʼa lado wa xkan ja Capernaúm. Kʼikʼxa lek jaxa Jesusi mito xkʼot ja bʼayeʼi. 18 Jaxa mari kʼe spukʼtsuk sbʼaj yujni jel tsats wan juwanel ja ikʼi. 19 Yajni slokbʼaneta junuk joʼe ma wake kilometro* ja jaʼi, ti yilawe wan bʼejyel bʼa sat jaʼ ja Jesús sok wan mojxel ja bʼa chʼin barko, jaxa yeʼnleʼi och xiwele. 20 Pe ja yeʼn yala yabʼye: «¡Keʼna! ¡Mok xiwanik!». 21 Anto ja yeʼnleʼi gustoxta yawe kʼeʼuk ja bʼa chʼin barko, sok tʼusan tsaʼan ja chʼin barko kʼot ja bʼa lugar wajumeʼi.

22 Jaxa bʼa pilan kʼakʼu, ja nole kristyano kanel ja bʼa stiʼ jun lado ja mari yaʼa sbʼaje kuenta ke mixa teyuk ja barkoʼi. Yujni kechan tey jun yal chʼin barko ajyi ja tiw, pe ja Jesús mini kʼe ja bʼa chʼin barko soka snebʼumaniki, yujni stuchʼil wajye. 23 Anto jujuntik chʼin barko bʼa Tiberíades ti kʼotye mojan bʼa lugar yabʼye ja pan ja kristyanoʼik yajni ja Kajwaltik chʼak yayi tsʼakatal ja Dyosi. 24 Sok yajni ja nole kristyano yilawe mi teyuk tiw ja Jesús sok mini ja snebʼumaniki, kʼeye ja bʼa chʼin barkoʼiki sok waj sleʼe ja Jesús bʼa Capernaúm.

25 Yajni staʼawe ja bʼa stiʼ jun lado ja mari, ti sjobʼoweyi: «Maestro,* ¿jas ora julya ja il?». 26 Jaxa Jesús sjakʼayile: «Wa xkalawabʼyex meran lek: ja weʼnlexi mi jaʼ waxa leʼawonex yuja milagroʼik awilawexi, jani yuja awabʼyex ja panik man bʼutʼyexkani. 27 Mok aʼtijananik yuja waʼelal bʼa wa xjomi, aʼtijananik yuja waʼelal bʼa wa x-albʼi sok wa x-ikʼwani och bʼa sakʼanil bʼa tolabida, bʼa yeʼnani oj yawilex ja it ja Yunin ja Winiki.* Pes yujni yeʼn mismo ja Tatal Dyos skʼulanta seyar bʼa sjejel lek yilunej ja yeʼn».

28 Ja yujil, sjobʼoweyi: «¿Jasa tʼilan oj jkʼuluktikon bʼa skʼulajel ja aʼtel bʼa lek wa xyila ja Dyosi?». 29 Jaxa Jesús sjakʼayile: «Jaʼ it ja aʼtel bʼa Dyosi: jeʼawik skʼuʼajel sbʼaja maʼ sjeka». 30 Anto yalawe yabʼi: «¿Jas milagro oja kʼuluk bʼa oj kiltikon sok oj kʼuʼukatikon? ¿Jas aʼtel waxa kʼulan ja weʼni? 31 Ja matik ekʼpaxtakujtiki yabʼye ja maná ja bʼa desierto, jastalni tsʼijbʼunubʼal: ‹Ja yeʼn yayile pan bʼa satkʼinal bʼa oj yabʼye›». 32 Anto ja Jesús ti yala yabʼyeʼa: «Wa xkalawabʼyex meran lek: mini yeʼn yawilex ja Moisés ja pan bʼa satkʼinali, pes yeʼnani ja jTat ja maʼ wa xyawilex ja meran pan bʼa satkʼinali. 33 Yujni ja pan bʼa Dyosi jani ja maʼ koʼelkon bʼa satkʼinali sok wa xyayi sakʼanil ja kristyano».* 34 Ja yuj yalawe yabʼi: «Kajwal, akitikon tolabida ja pan jaw».

35 Jaxa Jesús yala yabʼye: «Keʼnon ja pan bʼa sakʼanili. Ja maʼ wa xjak jmoki mixa nunka oj yabʼ waʼin, jaxa maʼ wa sjeʼa skʼuʼajel bʼa keʼn mixa nunka oj takuk stiʼ. 36 Pe jastalni kalatawabʼyex, ja weʼnlexi awilunejonex pe ama jachuk mixa kʼuʼanex. 37 Spetsanil ja matik wa xyaki ja Tatali oj jakuke jmok, jaxa keʼn tolabida oj jkʼul resibir ja matik wa xjak jmoki. 38 Yujni mi koʼyonkon ja bʼa satkʼinal bʼa skʼulajel ja jas wa xkʼana, jani bʼa skʼulajel ja jas wa skʼana ja maʼ sjekawoni. 39 Ja jTat bʼa satkʼinali mi skʼana oj chʼay mini june ja matik yaʼunejkiʼi, pes ja jas wa skʼana jani oj ka sakʼwuke ja bʼa tsaʼanxta kʼakʼu. 40 Yujni jaʼ it ja jas wa skʼana ja jTati: spetsanil ja maʼ wa skisa ja Uninali sok wa sjeʼa skʼuʼajel bʼa yeʼna oj ajyuk sakʼanil bʼa tolabida, jaxa keʼn oj ka sakʼwuk ja bʼa tsaʼanxta kʼakʼu».

41 Anto ja judíoʼiki och bʼulbʼunuke sbʼaja yeʼn yuja yala «Keʼnon ja pan koʼelkon bʼa satkʼinali». 42 Sok kʼe yal-e: «¿Mi maʼ yeʼnuk ja it ja Jesús ja yunin ja José? ¿Mi maʼ wa xnaʼatik sbʼaj ja snan sok ja stati? ¿Jastal lek wa xyala ja wego ‹Ja keʼn koʼelonkon bʼa satkʼinal›?». 43 Jaxa Jesús sjakʼayile: «Mokxa bʼulbʼunanik. 44 Mini maʼ wa xbʼobʼ jak jmok ta mi yeʼn wa xyiʼajan ja Tatali, ja maʼ sjekawoni; jaxa keʼn ojni ka sakʼwuk ja bʼa tsaʼanxta kʼakʼu. 45 Ja alumaniki stsʼijbʼuneje: ‹Spetsanil ja yeʼnleʼi oj jejukyile yuja Jyoba›.* Spetsanil ja maʼ wa smaklay ja Tatali sok wa snebʼa bʼa yeʼna wani xjak jmok. 46 Mi yuj ay maʼ yilunej ja Tatali, kechani ja maʼ jakel bʼa Dyosi; ja yeʼni yilunejni ja Tatali. 47 Wani xkalawabʼyex meran lek: ja maʼ wa skʼuʼani ojni staʼ sakʼanil bʼa tolabida.

48 Keʼnon ja pan bʼa sakʼanili. 49 Ja matik ekʼpaxta awujilexi yabʼye ja maná ja bʼa desierto, sok ama jachuk chamye. 50 Jani it ja pan wa xkoʼkon ja bʼa satkʼinali, bʼa jachuk ja maʼ wa sweʼa mi oj chamuk. 51 Keʼnon ja pan bʼa sakʼanil koʼelkon ja bʼa satkʼinali. Ta ay maʼ sweʼa ja pan it, oj ajyuk sakʼan bʼa tolabida. Pes ja pan oj kaʼi jani ja jbʼakʼteli bʼa oj ajyuk sakʼan ja luʼumkʼinali».

52 Anto ja judíoʼik kʼeye kʼumal sok yalawe: «¿Jastal modo oj ya jkʼuxtik ja sbʼakʼtel ja winik it?». 53 Jaxa Jesús yala yabʼye: «Wani xkalawabʼyex meran lek: ta mixa wabʼyex ja sbʼakʼtel ja Yunin ja Winiki sok mixa wuʼajex ja xchikʼeli, mini oja taʼ asakʼanilex.* 54 Ja maʼ wa xyabʼ ja jbʼakʼteli sok wa xyuʼaj ja jchikʼeli ojni staʼ ja sakʼanil bʼa tolabida, jaxa keʼn oj ka sakʼwuk ja bʼa tsaʼanxta kʼakʼu; 55 yujni ja jbʼakʼteli merani waʼelal jaxa jchikʼeli wani x-uxi meran. 56 Ja maʼ wa xyabʼ ja jbʼakʼteli sok wa xyuʼaj ja jchikʼeli lajani wa x-ajyi jmok, jaxa keʼn lajan wala ajyiyonsok. 57 Ja Tatal maʼ sakʼan ayi, yeʼn sjekawon jaxa keʼn sakʼan ayon yuja Tatali. Cha jachni ja maʼ wa smakʼlay sbʼaj bʼa keʼn ojni ajyuk sakʼan yuj keʼna. 58 Jaʼ it ja pan koʼkon ja bʼa satkʼinali. Mini oj slaj ja jastal sweʼane ja maʼ ekʼpaxta awujilexi, pes chamyeni ja yeʼnleʼi. Ja maʼ wa sweʼa ja pan it oj ajyuk sakʼan bʼa tolabida». 59 Ja yeʼn yala ja jastik it yajni ti wan sjejel bʼa jun naʼits wa stsomo sbʼaje* ja bʼa Capernaúm.

60 Yajni yabʼye ja it, jitsan ja bʼa snebʼumaniki yalawe: «¡Ja loʼil it wa xyajbʼesni! ¡Mini xkʼana oj jmaklaytikon!». 61 Pe ja Jesús, yuja wa snaʼa ja snebʼumaniki wane bʼulbʼunel sbʼaja jawi, ti yala yabʼyeʼa: «¿Wa xya loka wokex ja iti? 62 ¿Anto jasa oj ekʼukʼ ta awilawex ja Yunin ja Winik xkʼekʼe ja bʼay ajyi? 63 Ja jas wa xyaʼa sakʼanili jani ja yip ja Dyosi;* ja bʼakʼtelali mini jas xmakuni. Ja yaljelik kaluneja wabʼyexi ti elel bʼa yip Dyos sok wa xyaʼa sakʼanil. 64 Pe ay jujuntik ja bʼa weʼnlex mixa kʼuʼanex». Yujni ja Jesús wa snaʼa man skʼeʼulabʼil machunkiluke ja matik mi skʼuʼaneʼi sok machunkiluk ja maʼ oj chʼaykʼujolajukyuji. 65 Sok cha yala: «Ja yuj kalawabʼyex mini maʼ wa xbʼobʼ jak jmok ta mi yeʼn wa x-ajiyi permiso yuja Tatali».

66 Yuja jaw, jitsan ja bʼa snebʼumaniki kumxiye ja bʼa jastik yaʼunejexakani sok mixa smojtaye ekʼe. 67 Ja yuj ja Jesús sjobʼoyi ja 12 jekabʼanumiki: «¿Mixa kʼana oj cha wajanik ja weʼnlexi?». 68 Ja Simón Pedro sjakʼayi: «Kajwal, ¿maʼ oj wajkotikonsok? Ja weʼni aya wiʼoj yaljelik bʼa wa xyaʼa sakʼanil bʼa tolabida. 69 Ja keʼntikoni jkʼuʼunejtikonxa sok wa xnaʼatikon weʼnani ja maʼ jekubʼal yuja Dyosi». 70 Jaxa Jesús sjakʼayile: «Keʼnani jtsaʼawex wa doceʼilex, ¿anke meran? Pe june ja bʼa weʼnlexi juni abʼaltanum».* 71 Jani wan stajel tiʼal sbʼaja Judas ja skerem ja Simón Iscariote, pes ama yeʼn june ja bʼa 12 jekabʼanumiki, ojni xchʼaykʼujoluk.