Romanos

10 Kermano jumasaʼ, ja jas meran wa xkʼana sok spetsanil jkʼujol sok wa xpatayi skʼujol ja Dyosi jani a-staʼ skoltajele ja yeʼnleʼi. 2 Pes ja keʼn wani xkala ja yeʼnleʼi kongana wa xyaʼteltaye ja Dyosi, pe mini jaʼuk yuja meran snajeli. 3 Yajni mi snaʼawe sbʼaj ja jas toj bʼa Dyosi sok sleʼawe modo yajel kujlajuk ja sbʼajeʼi, mini ajyiye ibʼ kʼabʼal soka jas toj bʼa Dyosi. 4 Pes yuja Kristo ti chʼak ja Leyi, bʼa jachuk yibʼanal ja maʼ wa sjeʼa skʼuʼajeli ojni staʼ ja bʼa jas toji.

5 Ja Moisés stsʼijbʼan sbʼaja jas toji jastalni wa xyala ja Leyi: «Ja maʼ wa skʼulan ja jastik it ojni ajyuk sakʼan stsʼakatal yuja jastik jaw». 6 Pe ja bʼa jas toj wa xtax yuja skʼuʼajeli wa xyala: «Moka wal ja bʼa wa kʼujoli ‹¿Machunkiluk oj kʼeʼuk ja bʼa satkʼinali?›, wa xkʼan alxuk, bʼa oj axuk koʼkon ja Kristo. 7 Cha mokni awal ‹¿Machunkiluk oj koʼuk ja bʼa yoj chaʼanil kʼeʼeni?›,* wa xkʼan alxuk, bʼa oj axuk kʼeʼuk ja Kristo ja bʼa chamwiniki». 8 Pe ¿jasa wa xyala? «Ja rasoni mojan aya mok, tey bʼa wa tiʼ sok bʼa wa kʼujol», wa xkʼan alxuk, «ja rason» bʼa skʼuʼajeli, ja it wa xcholotiki. 9 Pes ta soka wa tiʼi waxa wala jaman lek yeʼnani Ajwalal ja Jesusi sok ja bʼa wa kʼujoli waxa kʼuʼan* ke ja Dyos ya kʼeʼuk ja bʼa chamwiniki, ojni ataʼ akoltajel. 10 Yujni soka wa kʼujoli waxa jeʼa ja skʼuʼajel bʼa wa x-ikʼwani och ja bʼa jas toji, pe soka wa tiʼi waxa wala jaman lek ja skʼuʼajel jaw bʼa wa x-ikʼwani bʼa stajela koltajel.

11 Pes jun parte ja bʼa Yabʼal ja Dyosi wa xyala: «Chikan maʼ ayiʼoj skʼuʼajel bʼa yeʼna mini oj ajuk kʼixwuk».* 12 Yujni mey stukil ja judío soka griego. Junxta Ajwalal yiʼoje yibʼanale, ja yeʼn jelni jaman skʼujol sok yibʼanal ja matik wa spataweyi skʼujoli. 13 Yujni «spetsanil ja maʼ wa spatayi skʼujol ja Jyoba* bʼa sbʼiʼil ojni staʼ skoltajel». 14 Pe ¿jastal oj spateyi skʼujol ta mito ayiʼoje skʼuʼajel bʼa yeʼna? ¿Sok jastal oj ajyukyujile skʼuʼajel bʼa yeʼn ta mito xyabʼye bʼa yeʼna? ¿Sok jastal oj yabʼye ta mi maʼ xcholo? 15 ¿Sok jastal oj xchol-e ta mito jekubʼalukeʼi? Jastalni tsʼijbʼunubʼal: «¡Jelni tsamal ja yoke ja matik wa xcholowe lekil rasonik!».

16 Pe mini yibʼanaluke skisawe ja lekil rasonik, pes ja Isaías wa xyala: «Jyoba,* ¿machun skʼuʼunej sbʼaja rason kalunejtikoni?».* 17 Ja yuj ja skʼuʼajeli wa x-ajyi ja yajni abʼxita ja rasoni, sok jaxa rason wa x-abʼxi wani xjul yuja jas wa x-alxi sbʼaja Kristo. 18 Pe ja keʼn wa xjobʼo: ¿yuj maʼ mi yabʼye? Yabʼyeniʼa, yujni «bʼa yibʼanal ja luʼumi abʼxi ja rasonik jaw, sok cha yabʼyeni ja matik teye man xchikin ja luʼumi». 19 Pe ja keʼn wa xjobʼo: ¿yuj maʼ mi snaʼa ajyi ja Israel? Pes ja Moisés wa xyala: «Ojni ka makunuk ja kristyanoʼik bʼa tuk chonabʼik bʼa oj ka kʼeʼuk xchʼinajile. Oj ka makunuk jun chonabʼ mi biboʼuk bʼa oj nikyi stajkele». 20 Pe ja Isaías mini tʼun xiw yala: «Ja matik mi sleʼawoneʼi staʼawone. Ja matik mi sjobʼowe kabʼalili kʼotni snaʼe jbʼaj». 21 Pe ja yeʼn wa xyala sbʼaja Israel: «Snajtil ja kʼakʼu kayi lichʼan* ja jkʼabʼ jun chonabʼ mi kʼuʼabʼaluk sok jel kaprechudo».