2 Corintios

4 Ja yujil, yuja ay kiʼojtikon ja aʼtel it yuja yajulal kʼujol jejikitikoni, mini x-el jganatikon. 2 Jaʼuktoma, jipunejtikonkan ja jastik kʼixwela sbʼaj wa xkʼulaxi nakʼuli, mini la loʼlanitikon sok mini xjomotikon ja yabʼal ja Dyosi. Jaʼuktoma, wani xcholotikon ja smeranili sok jachuk wala kʼotikon jun lekil sjejel sbʼaja sconcienciaʼe ja kristyano ja bʼa stiʼ sat ja Dyosi. 3 Ta musan aysok jun kʼuʼuts ja lekil rasonik wa xcholotikoni, nakʼani ay sbʼaja matik tojxta wajume bʼa chʼakelali,* 4 ja matik mi kʼuʼumanukeʼi,* ja matik makubʼal ja spensare yuja sdyosil ja bʼa jastal wa xtax ja tyempo it,* bʼa jachuk mi oj lijpuk sbʼaje ja yijlabʼil ja lekil rasonik jel chaʼanyabʼal sbʼaja Kristo, bʼa jani splanta ja Dyosi. 5 Yujni mi wa xcholotikon bʼa keʼntikon, jani wa xcholotikon ke Ajwalalni ja Jesukristo sok ja keʼntikoni kʼotelotikona mosoʼex yuja Jesusi. 6 Yujni yeʼn yala ja Dyosi: «Alijpuk ja ijlabʼ ja bʼa yoj kʼikʼinali». Jaxa yeʼni lijpel ja bʼa jkʼujoltikon bʼa oj yijlabʼukex yuja sat ja Kristo soka snajel jel chaʼanyabʼalil bʼa Dyosi.

7 Pe tey kiʼojtikon ja jastik junuk jel chaʼanyabʼal it bʼa luʼum oxomik,* bʼa jachuk ja ipal bʼa masto ekʼxeli tini oj jak bʼa Dyos sok mi bʼa keʼnuktikon. 8 Wani la tʼenjitikon tsats lek bʼa tuktukil modo, pe mi wala pitjitikon bʼa jachuk mi oj bʼobʼ jnik jbʼajtikon; mi xnaʼa jas oj jkʼuluktikon, pe wani xtaʼa jastal oj elkotikon; 9 wa x-iji jpatiktikon, pe mi jipubʼalukotikonkani; wala jipjitikon luʼum, pe mini xchʼayji jnajeltikon. 10 Tikʼanxta wa xkuchkujtikon ja bʼa jkuerpotikon ja jastal jel ixta ilji ja Jesusi, bʼa jachuk oj kitikon jun jsakʼaniltikon jastal yeʼna. 11 Yujni ja keʼntikoni, yajni sakʼanotikon, tikʼanxta wa xtʼaspuntikon ja chamelal yuja Jesusi, bʼa jachuk oj kitikon jun jsakʼaniltikon jastal yeʼna. 12 Ama wani xtʼaspuntikon ja chamelali, ja iti wani xyakitikon sakʼanil.

13 Jaxa keʼntikoni ayni kiʼojtikon ja junxta* skʼuʼajel sbʼaja it tsʼijbʼajikani: «Ajyikuj skʼuʼajel sok ja yuj kʼumaniyon». Ja yujil, cha ayni kiʼojtikon skʼuʼajel sok ja yuj wala kʼumanitikon, 14 pes wani xnaʼatikon ja Maʼ ya sakʼwuk* ja Jesús ojni cha ya sakʼwukotikon* bʼa ti oj ajyukotikon soka Jesús sok lajani oj skʼulukotik presentar. 15 Yujni yibʼanal ja it sbʼajni wa lekilalex, bʼa jachuk ja lekil kʼujolal mi xbʼajintik bʼa Dyosi ojto jitsanbʼuk mas pes jelni jitsan ja kristyano wane yajel tsʼakatal sbʼaja stoyjelal ja Dyosi.

16 Ja yujil, mini x-el jganatikon. Ama ja jkuerpotikon wan jomel, pe ja jastalotikon ja bʼa jkʼujoltikoni wani tojbʼel* kada kʼakʼu. 17 Pes ama ja wokolik* ekʼumbʼej ita sok mi jel tsatsuk, ojni ajuk jun niwan jtsʼakoltikon bʼa masto ekʼxel, jun jtsʼakoltikon bʼa mi xchʼaki, 18 malan ja’ wan wajel jsatikon ja bʼa jastik mi x-ilxi, sok mi jaʼuk ja bʼa jastik wa x-ilxi. Pes yujni ja jastik wa x-ilxi ekʼumbʼej ita, pe ja jastik mi x-ilxi sbʼajni tolabida.