Gálatas

2 Anto, yajni ekʼta 14 jabʼil, cha wajyonkʼe bʼa Jerusalén soka Bernabé, sok cha kiʼajnikʼe ja Tito. 2 Ja keʼn wajyonkʼe yuja ay jas aji ekiʼi sok jcholo yabʼye ja hermanoʼik ja lekil rasonik wanon xcholjel yabʼye ja matik mi judíoʼukeʼi. Pe nakʼulni kala yabʼye ja winike matik jel kisubʼaleʼi, bʼa yiljel lek mi lomuk wanukon aʼtel sok mi lomuk aʼtelukon. 3 Pe mini tʼenji ja Tito, ja it maʼ tey jmoki, bʼa oj yayi senya ja swinkil, ama griego ja yeʼni. 4 Kʼe ja kʼumali yuja matik mi meran hermanoʼuke bʼa ochele nakʼuli, bʼa chʼabʼanxta ochye bʼa yiljel ja libreʼil kiʼunejtikon soka Kristo Jesús sok jachuk yajel ochkotikon mosoʼil. 5 Pe ja keʼntikoni mini tʼun* kʼokxitikonsoke sok mini tʼun kaʼa jbʼajtikonsoke, bʼa jachuk ja smeranil sbʼaja lekil rasoniki ti oj ajyuka mokex.

6 Pe sbʼaja winike wa x-iljiye jel tʼilaneʼi, ja winike jaw jel kisubʼaleʼi mini jas yajkʼachil yalawekabʼi, sok mini kocheluk ja jastal kʼotele’i yujni ja Dyosi mi jaʼ wa xwaj sat ja splanta jun kristyano. 7 Jaʼuktoma, ja yeʼnleʼi yilawe akʼubʼalki ja cholal bʼa yaljel yabʼye ja lekil rasonik ja matik mi akʼubʼalyi senya ja swinkili, jastalni ja Pedro akʼubʼalyi ja cholal bʼa yaljel yabʼye ja matik akʼubʼalyi senya ja swinkileʼi, 8 yujni ja maʼ yayi ja ipal ja Pedro bʼa oj kʼot jekabʼanumil sbʼaja matik akʼubʼalyi senya ja swinkili cha yaki ja ipal ja keʼn bʼa oj kʼotkon jekabʼanumil sbʼaja matik mi judíoʼukeʼi. 9 Jaxa yeʼnleʼi yaʼa sbʼaje kuenta ke akʼubʼalki ja lekil kʼujolal mi xbʼajintiki. Anto ja Santiago, ja Cefas* sok ja Juan, ja matik ilubʼale jastal oyik, ja keʼn soka Bernabé yawekiton ja stojol skʼabʼeʼi jastal senya bʼa jmoj jbʼajtikon aʼtel, bʼa jachuk ja keʼntikoni oj wajkotikon soka matik mi judíoʼuki sok jaxa yeʼnleʼi jani soka matik akʼubʼalyi senya ja swinkileʼi. 10 Kechan skʼanawekitikon bʼa oj kaʼ tʼabʼan jkʼujoltikon ja matik pobre, jaxa it jelni jkʼulunej puersa bʼa skʼulajel.

11 Pe yajni jak ja Cefas* ja bʼa Antioquía, kalani yabʼ bʼa stiʼ sat, yujni mini tʼun stojoluk ay. 12 Pes bʼajtanto oj jul jujuntik winike bʼa sparte ja Santiago, ja yeʼn kʼajyelni wa xwaʼ soka matik mi judíoʼuki, pe mixani jach skʼulan ja yajni julye ja yeʼnleʼi sok spila sbʼaj pes wani xiw yuja kʼole matik akʼubʼalyi senya ja swinkileʼi. 13 Cha snochowe ja tuk judíoʼik ja jastal chabʼ kara ayi, asta ja Bernabé cha snocho ja jastal chabʼ kara ayeʼi. 14 Ja yuj, yajni kila mi jaʼ wanuk yijel ja jastalni ja smeranil sbʼaja lekil rasoniki, kala yabʼ ja Cefas* bʼa stiʼ sat spetsanile: «Ta ja weʼn bʼa kʼotela judío awiʼonej jawa sakʼanil jastal ja matik mi judíoʼukeʼi sok mi jachuk jastal ja judíoʼiki, ¿jas yuj waxa tʼena ja matik mi judíoʼuk bʼa oj yiʼ ja sakʼanile jastal ja skostumbre ja judíoʼiki?».

15 Ja keʼntik bʼa judíoʼotik man pojkitik,* sok mi mulanumotik jastal ja matik mi judíoʼukeʼi, 16 wani xnaʼatik ke mini x-alji kʼotel toj jun winik yuja wa skʼulan ja jastik wa xyala ja leyi, kechantani yuja skʼuʼajel bʼa Jesukristo. Ja yuj jkʼuʼunejtik bʼa Kristo Jesús: bʼa jachuk oj aljuk kʼotelotik toj yuja wa xkʼuʼantik bʼa Kristo sok mi jaʼuk yuja wa xkʼulantik ja jastik wa xyala ja leyi. Pes mini maʼ* oj aljuk kʼotel toj yuja wa xkʼulaxi ja jastik wa xyala ja leyi. 17 Pe ta ja keʼntik wantik skʼujolajel bʼa oj aljuk kʼotelotik toj yuja Kristo sok ama jachuk taʼubʼal jmultik, ¿wan maʼ stojolan ja jaw ke ja Kristo wa snikawotik bʼa oj kokotik mulal? ¡Miniʼa! 18 Ta ja wego cha wa xtojbʼes ja jastik jemuneji, wani xjeʼa wala jelxiyon soka leyi. 19 Ja yujil, yuja jkʼuʼan ja leyi, elyonta libre* ja bʼa leyi bʼa jachuk ojxa bʼobʼ ajyukon sakʼan sbʼaja Dyosi. 20 Tsʼapubʼal jklaboʼil ja bʼa poste soka Kristo. Mixa keʼnukon ja maʼ sakʼani, jaxani ja Kristo ja maʼ sakʼan ay jmoki. Jachukniʼa, ja sakʼanil kiʼoj ja wego ja bʼa kuerpoʼal* it jani kiʼoj yuja skʼuʼajel ja Yunin ja Dyosi, ja maʼ syajtayoni sok yaʼa ja sakʼanil yuj keʼna. 21 Ja keʼn mi xkaʼakan jun lado ja lekil skʼujol mi xbʼajintik ja Dyosi, pes lekbʼi oj kʼot toj jun winik yuja leyi, anto lomni cham ja Kristo.