Efesios

1 Bʼa sparte ja Pablo, ja jekabʼanum bʼa Kristo Jesús yuja jach wa skʼana ja Dyosi, sbʼaja matik tsaʼubʼalexa sbʼaja Dyos teye bʼa Éfeso sok toj aye ja bʼa jastal lajan aye soka Kristo Jesús:

2 Ja jTatik Dyos sok ja Kajwaltik Jesukristo ayawilex ja lekil skʼujole mi xbʼajintik sok ja slamanile.

3 Aʼaxukyi stoyjel ja sDyos sok sTat ja Kajwaltik Jesukristo yujni yaʼunej koʼ jlekilaltik sok spetsanil ja lekilal wa xyaʼa ja Dyos* ja bʼa lugarik bʼa satkʼinal jastal snochumanotik ja Kristo, 4 yujni stsaʼawotikxa bʼajtantoyuj oj kujlajuk ja luʼumkʼinali bʼa lajan oj ajyukotik soka Kristo, bʼa jachuk oj jetik yajalkʼujolal sok oj kʼotkotik sak sok mi oj ajyuk jmultik ja bʼa stiʼ sat ja Dyosi. 5 Ja yeʼn stsaʼawotikxa bʼajtan bʼa jachuk oj kʼotkotik jastal mero yuntikil yuja Jesukristo, pe jani jastal lek wa xyila sok wa skʼana, 6 bʼa oj jtoytik yuja niwan lekil skʼujol mi xbʼajintiki bʼa sjeʼakitik sok spetsanil skʼujol yuja Yunin maʼ jel skʼana. 7 Stsʼakatal ja yeʼn wa xbʼobʼ elkotik libre yuja stsʼakol stupu* soka xchikʼeli, jaʼi, ja wa x-aji perdon ja jmultiki, jastalni ja srikesaʼil ja lekil skʼujol mi xbʼajintik ja Dyosi.

8 Ja Dyosi sjeʼakitik jitsan lek ja lekil skʼujol jaw sok yibʼanal biboʼil sok yabʼjel stojolil 9 yajel jnatik ja jas jel chaʼanyabʼal wa xjak bʼa yeʼn* ja bʼa jas wa skʼana oj skʼuluki. Sok jastalni lek wa xyila, yeʼn mismo xchapa 10 yajel kujlajuk jun modo jastal yiljel ja jastik junuki yajni xkʼot ja tyempo tsaʼubʼalxa, bʼa stsomjel yibʼanal ja jastik junuk ja bʼa Kristo, ja jastik bʼa satkʼinali sok ja jastik bʼa luʼumi. Jaʼi, bʼa yeʼna, 11 ja maʼ lajan ayotiksoki sok ja maʼ lajan tsajitiksok bʼa oj ajukitik ja jas skʼapunej ja Dyosi, ja yajni tsaʼjitik bʼajtan jastalni wa skʼana ja maʼ wa xya kʼotuk yibʼanal ja jastik junuk jastalni wa skʼana oj skʼuluk sbʼaja spensar yiʼoji, 12 bʼa jachuk oj toyjuk ja sniwanil ja Dyos yuj keʼntik, yujni keʼn bʼajtan ajyelkujtik ja smajlajel bʼa Kristo. 13 Pe ja weʼnlexi ajyiwujilex smajlajel bʼa yeʼna yajni awabʼyexta ja smeranili, ja lekil rasonik sbʼaja wa koltajelexi. Yajni akʼuʼanexta, kʼulajiyex seyar yuj yeʼna soka yip ja Dyos* kʼapubʼali, 14 ja it kʼotelni jun meran preba* sbʼaja dote oj ajukitiki, bʼa jachuk ja jas yeʼn sbʼaj ja Dyosi oj kan libre yuja stsʼakol tupxi* bʼa jachuk oj axukyi stoyjel ja sniwanili.

15 Ja yuj cha jachuk ja ke’n, masan kabʼ sbʼaja skʼuʼajela wiʼojex ja bʼa Kajwaltik Jesús sok ja syajala kʼujolex waxa jeʼawexyi ja matik tsaʼubʼalexa sbʼaja Dyosi, 16 mini xkaʼakan yajel tsʼakatal yuj weʼnlex. Mini xkaʼawexkan stajelex tiʼal ja bʼa korasyoni 17 bʼa jachuk ja sDyos ja Kajwaltik Jesukristo, ja Tatal jel niwani, oj yawilex ipal* bʼa oj ajyuka biboʼilex sok oja wabʼyex stojol ja jastik wa xchiktes sbʼaja meran snajelil bʼa yeʼn. 18 Ja yeʼn sjamunej jawa kʼujolex bʼa jachuk oja wilex kʼinal sok bʼa oja naʼex ja smajlajel yaʼunejawilexi, sok jachuk ja weʼnlexi oja naʼex sbʼaja tsamalik rikesaʼil* oj yayile jastal stsʼakole ja matik tsaʼubʼalexa sbʼaja Dyosi 19 sok ja janekʼto chaʼanyabʼalil wa sjeʼakitik ja sniwanil ja yip sbʼaja matik kʼuʼumanikxa.* Ja sniwanil jaw tini wa x-ilxi ja bʼa jastal ya makunuk ja yip 20 soka Kristo ja yajni ya kʼeʼuk ja bʼa chamwinikeʼi sok yajni ya kulanuk ja bʼa stojol skʼabʼ ja bʼa lugarik bʼa satkʼinali, 21 mastoni ekʼxel yuj yibʼanal ja gobyernoʼiki, matik ay xchole, ipalik sok mandarik sok bʼa chikan jas bʼiʼilal oj taxuk tiʼal mi kechanuk ja bʼa jastal wa xtax ja tyempo it,* cha jachni ja bʼa jakumto. 22 Ja yeʼn yayi yibʼanal ja jastik junuk b’a yibʼ yok sok ya och olomal sbʼa yibʼanal ja jastik ti chʼikan soka kongregasyoni. 23 Ja kongregasyon, bʼa jani kʼotel ja skuerpo sok yeʼn wa sbʼutʼu, sok yeʼnani wa stsʼiktes yibʼanal ja jastik junuk bʼa tuktukil modo.