Santiago

1 Bʼa sparte ja Santiago, jun smoso ja Dyos sok bʼa Kajwaltik Jesukristo, sbʼaja 12 kʼole bʼa xaʼantikan aye bʼa tuktukil lado:

¡Wa xjeka akoltanelex!

2 Kala kermano jumasaʼ, ilawik kʼotel jun meran gustoʼil yajni xa tʼaspunex tuktukil tikʼe prueba, 3 pes wani xa naʼawex ta jaʼ wa skʼulan ganar ja skʼuʼajela wiʼojex ja yajni waxa tʼaspunex ja pruebaʼik jaw, anto wani xa nebʼawex bʼa oj kuchukawujilex.* 4 Pe awikan ja kuchelawujilexi oj stsʼiktes ja yaʼteli, bʼa jachuk tsʼikan oj ajyanik sok lek oj ajyanik bʼa yibʼanal ja jastik junuki, sok mixa jas oj skʼulukawujilex palta.

5 Ja yujil, ta jujuntik ja bʼa weʼnlexi ayto skʼanayuj biboʼil, a-skʼanyi tikʼanxta ja Dyosi, sok ojni ajukyi, yujni ja yeʼn wa xyayi yibʼanale sok spetsanil skʼujol sok mi sjata.* 6 Pe mok yakan skʼanjel sok skʼuʼajel, mokni skʼul dudar, yujni ja maʼ wa skʼulan dudari jachni jastal ja spukʼtsinel ja mari bʼa wa xjuji yuja ikʼi sok wa x-ijitalan ekʼ bʼa tuktukil lado. 7 Pe ja kristyano jaw mokni spensaraʼuk bʼa ay jas oj ajukyi yuja Jyoba.* 8 Ja kristyano jaw jelni xwokolani stsajel, wawantoxta wa stukbʼes ja jas wa skʼulani.

9 Pe ja hermano maʼ chʼin wa xyaʼa sbʼaji agustoʼaxuk yuja akʼubʼal niwanbʼuki, 10 jaxa riko agustoʼaxuk yuja akʼubʼal kʼixwuki, pes yujni ja riko oj chʼayuk jastal jun yal nichim bʼa yoj jobʼ. 11 Yujni wa x-el ja kʼaʼuji sok wa stakes ja kʼul yuja skʼixnali; anto ja snichmali wa xmokʼi sok wa xchʼay ja stsamalili. Jachni junxta oj chʼayuk ja riko malan wan yijel och ja sakʼanili.

12 Jel gusto wa x-ajyi ja winik bʼa wani xkuchyuj ja yajni wan ekʼel sbʼaj prueba, pes yajni lek iljita, ojni ajukyi ja korona bʼa sakʼanil ja it skʼapayi ja Jyoba* ja matik mi xyaʼawekan syajtajeli. 13 Yajni june wan ekʼel sbʼaj jun prueba, mokni yale: «Wan yajel ochkon probar ja Dyosi». Pes mini maʼ xbʼobʼ ya och probar ja Dyosi sok jaxa yeʼn mini maʼ xya och probar sok jastik mi lekuk. 14 Pes kada jujune wa x-aji och probar yajni wa xpayjiyuj sok wa xmonjiyuj ja jas wa xkʼankʼuniyuji. 15 Sok yajni skʼulanta sbʼaj ja kʼankʼuneli, wa sjeʼa sbʼaj ja mulali, sok yajni kʼulaxita ja mulali, wa sjeʼa sbʼaj ja chamelali.

16 Kala kermano jumasaʼ, moka loʼlabʼajex. 17 Spetsanil ja lekil majtanaliki sok yibʼanal ja lekil doniki ti wa xjak bʼa satkʼinal, tini wa xjak b’a Tatal ja bʼa ijlabʼik bʼa satkʼinal. Ja yeʼn junxta wa x-ajyi sok mi xtukbʼi, jastalni wa xtukbʼi ja axubʼi. 18 Yujni yeʼn skʼana oj ya ajyukotik yuja yabʼal bʼa smeranili, bʼa jachuk oj kʼotkotik ja matik bʼajtan tsaʼubʼal ja bʼa matik skʼulani.

19 Kala kermano jumasaʼ, wani xkʼana oja naʼex: awibʼanalex jel tʼilan puestoxta oj ajyanik bʼa oja maklayex, pe mi wegoʼukxta oj kʼumananik sok mi wegoʼukxta oj tajkanik, 20 yujni ja stajkelal ja winiki mini xyiʼajan ja stojolil ja Dyosi. 21 Ja yujil, awik el yibʼanal ja b’a kuxi sok yibʼanal ja stsʼubʼil bʼa jas malo,* sok mansoxta kʼulanik aseptar ke ja yabʼal ja Dyos ja it wa xbʼobʼ skoltayexi a-syam yech bʼa weʼnlex.

22 Pe awik makunuk ja yabʼal ja Dyosi sok mi kechanuk oja maklayex, pes ta mikʼa, weʼnta waxa loʼlabʼajex sok pensarik mi meranuk. 23 Pes ta ay maʼ wa xyabʼ ja yabʼal ja Dyosi pe mi xya makunuk, ojni slaj ja winik it wa skʼela ja sat bʼa jun espejo: 24 wani skʼela sbʼaj, sok yajni wa xwaji, wegoxtani wa xchʼay skʼujol jas tikʼe kristyanoʼil kʼotel. 25 Pe ja maʼ wa skʼela jaʼankʼujol lek ja ley bʼa tsʼikan lek bʼa wa xyiʼajan libreʼil sok mi xyaʼakani, ja yeʼn mini kechan wa xyabʼi sok wa xchʼay-el skʼujol, wani skʼulan ja aʼteli; jaxa yeʼn gustoni oj ajyuk ja bʼa jas oj skʼuluki.

26 Ta ay maʼ wa spensaraʼan wan stoyjel ja Dyosi pe mi skomo ja yakʼi, jani wan sloʼlajel ja skʼujoli, sok mini tʼun xmakuni ja jastal wan stoyjel ja Dyosi. 27 Ja bʼa stiʼ sat ja jDyostik sok ja jTatiki, ja modoʼal bʼa stoyjel sak sok bʼa mi yajel staʼ kux jani it: stalnajel ja mebʼaʼik sok ja biudaʼik ja bʼa swokoleʼi sok mok ajyukujtik ja skuxil ja luʼumkʼinal it.