Apocalipsis

15 Ti cha kila pilan senya ja bʼa satkʼinali, jel chaʼanyabʼal sok jel cham yiljel: ay juke anjel sok ayiʼoje juke plaga. Ja it jaxtani ja tsaʼaniki, pes yuja jastik jaw ti oj kʼot tikʼan ja stajkelal ja Dyosi.

2 Ti cha kila jastal jun paman jaʼ bʼa oj slaj jastal ja bidrio sokan sok kʼakʼ sok ja matik skʼuluneje ganar ja kʼakʼal chani, ja splanta* sok ja snumeroʼil ja sbʼiʼili. Ja yeʼnleʼi ti tekʼane ekʼ bʼa stsʼeʼel ja paman jaʼ bʼa oj slaj jastal ja bidrio; syamuneje ja yarpaʼik ja Dyosi. 3 Wane stsʼebʼantajel ja stsʼebʼoj ja Moisés, ja smoso ja Dyosi, sok ja stsʼebʼoj ja Cheji. Wa xyalawe:

«Jel niwan sok jel tsamal jawa kʼulbʼenik, Jyoba* Dyos, ja Maʼ kechan jela wipi. Rey bʼa tolabida, jel toj sok smeranilni jawa bʼejiki. 4 Jyoba,* ¿machun mi oj xiwuka mok? ¿Machun mi oj stoy jawa bʼiʼili? Pes yujni kechan weʼn jel toja. Yibʼanal ja chonabʼiki oj jakuke bʼa stiʼ asat sok oj stoya yujni ilubʼal jel toj wala kʼulwani jusgar».

5 Tsaʼan ja bʼa it ti kila jamxi ja bʼa satkʼinal ja lugar sak* ja bʼa tabernáculo bʼa kʼotel jastal testigo,* 6 sok jaxa bʼa lugar saki ti elyejan ja juke anjeli sok yiʼojejan ja juke plaga. Sok slapunej skʼuʼe bʼa lino bʼa sak ay sok xlijpixta, sok lapanyujile paja bʼa oro ja bʼa yibʼ yaltsileʼi. 7 June ja bʼa chanwane querubini yayi ja juke anjelik juke tasa bʼa oro bʼa naka bʼutʼel ay soka stajkelal ja Dyosi, ja maʼ sakʼan ay bʼa tolabida. 8 Sok jaxa lugar saki bʼutʼ-el tabʼ yuja sniwanil ja Dyosi sok yuja yipi. Mini maʼ xbʼobʼ ochuk ja bʼa lugar saki man xchʼak spekʼe ja juke anjelik ja juke plaga.