Apocalipsis

21 Anto ti kila jun yajkʼachil satkʼinal sok jun yajkʼachil luʼum; yujni chʼayta ja bʼajtan satkʼinali sok ja bʼajtan luʼumi, sok mixa teyuk ja mari. 2 Cha ti kila ja chonabʼ jel saki, ja Yajkʼachil Jerusalén, ti koʼumkon bʼa satkʼinal, masan bʼay ja Dyosi. Sok chapan ay jastal jun nobiaʼal sok tojbʼel lek bʼa oj skʼul recibir ja statami. 3 Tixa kabʼ eljan jun tsatsal kʼumal ja bʼa trono sok yala: «¡Kʼela! Ja snaj bʼa karpa ja Dyosi teysok ja kristyano. Ja yeʼn ti oj ajyuksokeʼa sok jaxa yeʼnleʼi oj kʼotuke xchonabʼ. Sok ja Dyosi ti oj ajyuksokeʼa. 4 Sok oj skusyi ja yalel sateʼi, sok mixani oj ajyuk chamelal, mixani tristeʼil, mini mebʼa okʼel sok mini syajal. Ja jastik mi lekuk wa x-ekʼ ajyi chʼayta snajel».

5 Ti yala ja Maʼ kulan ekʼ ja bʼa trono: «¡Kʼela! Wanon skʼulajel yajkʼachil yibʼanal ja jastik junuki». Cha yala: «Tsʼijbʼan ja yaljelik it, yujni kʼotel toj* sok smeranil». 6 Sok yalakabʼi: «¡Chʼakta kʼot smeranil! Keʼnon ja Alfa sok ja Omega,* ja skʼeʼulabʼili sok ja xchʼakulabʼili. Spetsanil ja maʼ takin stiʼi oj ka yuʼ kʼebʼubʼal ja jaʼ bʼa sakʼanil ja bʼa olom jaʼi. 7 Spetsanil ja ma’ oj skʼul ganari oj sbʼajuk ja jastik it, ja ke’n oj kʼotkon sDyos sok jaxa yeʼn oj kʼot kunin. 8 Pe ja matik wa xiwyeʼi, ja matik mey yiʼoje skʼuʼajel, ja matik kuxeʼi sok wa skʼulane jastik kistal, ja matik wa xmilwaniye, ja matik wa xkoʼ mulal sok ixuk winik,* ja matik wa x-aʼtijiye sok pukuj,* ja matik wa stoyowe kʼulubʼal dyosik* sok spetsanil ja matik wa sleʼawe abʼal jani wane smajlajel ja poso bʼa wan ajlel kʼakʼ sok azufre,* bʼa jani wa senyaʼan ja xchabʼil chamelali».

9 Ti jak june ja bʼa juke anjelik bʼa ayiʼoje ja juke tasa ja it bʼutʼel ja juke tsaʼanikxta plaga sok yalakabʼi: «Laʼ, oj jeʼawi ja nobiaʼali, ja xcheʼum ja Cheji». 10 Ja yuj, soka yip ja Dyosi,* ti yiʼajon bʼa jun niwan chaʼan wits, sok sjeʼaki ja sakal chonabʼ Jerusalén, bʼa ti koʼumkon bʼa satkʼinal, masan bʼay ja Dyosi, 11 sok ayiʼoj ja slijpelal ja Dyosi. Ja slijpelali jach jastal bʼa jun ton jel tsamal juntiro, jastal ja ton jaspe bʼa xlijpixta sok klaroxta. 12 Ayi’oj jun niwan chaʼan sbardaʼil, ay 12 spuertaʼil sok teye 12 anjelik, sok ti tsʼijbʼunubʼal ja bʼa puertaʼik ja sbʼiʼile ja 12 kʼole bʼa yuntikil ja Israel. 13 Ja bʼa este* ay oxe puerta, ja bʼa norte* ay oxe puerta, ja bʼa sur* ay oxe puerta sok ja bʼa oeste* ay oxe puerta. 14 Chomajkil, ja sbardaʼil ja chonabʼi ayiʼoj 12 ton ja skujlayubʼili, sok jaxa tiw tey ja 12 sbʼiʼile ja 12 sjekabʼanumik ja Cheji.

15 Ja maʼ wan kʼumal jmoki ayiʼoj jun yamkʼabʼal bʼa sbʼisjel, jun kʼaʼem bʼa oro, bʼa sbʼisjel ja chonabʼi, ja spuertaʼil jumasaʼ sok ja sbardaʼili. 16 Ja chonabʼi juni cuadrado, junxta medida ja skʼatanili sok ja snajtili. Ja yeʼn sbʼisa soka kʼaʼem ja chonabʼi: sok elkʼot 12,000 estadio,* yujni junxta ja snajtili, ja skʼatanili sok ja xchaʼanili. 17 Cha sbʼisa ja sbardaʼili: ayiʼoj 144 xujkubʼ,* jastalni ja smedida ja kristyano, bʼa cha jachni ja smedida ja anjeli. 18 Ja sbardaʼili bʼa jaspe sok puro oro ja chonabʼi, klaroxta jastal ja bidrio. 19 Ja skujlayubʼil ja sbardaʼil ja chonabʼi tojbʼelsok tuktukil tikʼe tsamalik ton: ja sbʼajtanil skujlayubʼi bʼa jaspe, ja xchabʼili bʼa zafiro, ja yoxili bʼa calcedonia, ja xchanili bʼa esmeralda, 20 ja sjoʼili bʼa sardónica, ja swakili bʼa sardio, ja sjukili bʼa crisólito, ja swaxakili bʼa berilo, ja sbʼalunili bʼa topacio, ja slajunili bʼa crisoprasa, ja sjuluchili bʼa jacinto sok jaxa slajchawili bʼa amatista. 21 Chomajkil, ja 12 spuertaʼili tojbʼesnubʼal sok 12 perlaʼik;* kada puerta kʼulubʼalsok jun perla. Sok jaxa niwan bʼej bʼa chonabʼi puro oro, klaroxta jastal ja bidrio.

22 Mini jun templo kila ja bʼa chonabʼi, yujni ja stemploʼili jani kʼotel ja Jyoba* Dyos, ja Maʼ kechan jel ja yipi, sok cha jachuk ja Cheji. 23 Ja chonabʼi mini tʼilan oj ijlabʼajuk yuja kʼaʼuji sok ja luna, yujni jaʼ wa xyijlabʼan ja slijpelal ja Dyosi sok jaxa skandili jani kʼotel ja Cheji. 24 Ja yijlabʼi oj yijlabʼuk ja sbʼej ja chonabʼik bʼa oj bʼejyuke, jaxa reyik bʼa luʼumi oj yiʼe ochyi ja chonabʼ ja slipelaleʼi. 25 Mini oj lutxuk snajtil kʼakʼu ja spuertaʼili, yujni ja tiw mixa oj ajyuk akwal. 26 Sok oj yiʼe ochyi ja slijpelal sok ja stoyjelal ja chonabʼiki. 27 Pe mini nunka oj ochuk ja tiw jun jasunuk bʼa kux sok june maʼ wa skʼulan bʼa jas kistal sok bʼa loʼlanel. Kechani oj ochuk ja matik tsʼijbʼunubʼal ja sbʼiʼile ja bʼa royo bʼa sakʼanili. Ja royo it yeʼnani sbʼaj ja Cheji.