Gálatas

3 Kesa weʼnlex galataʼik bʼa mi biboʼukex, ¿maʼ sloʼlunejex ja weʼnlexi, ja matik choljiwabʼyex jaman lek ja xchamelal ja Jesukristo ja bʼa poste? 2 Kechan wa xkʼana oj jobʼawilex ja it: ¿aji maʼ wilex ja yip ja Dyos* yuja akʼulanex ja jastik wa xyala ja leyi, ma jaʼ yuja skʼuʼajel sbʼaja jasa wabʼyexi? 3 ¿Meran maʼ mixa wabʼyex stojoli? Tsaʼan yajni kʼeta tojanik yuja yip ja Dyosi,* ¿waxa kʼanawex ja wego oja taʼex jawa kʼelsatex yuja spensare ja kristyano? 4 ¿Yuj maʼ loma wiʼonejex jitsan wokol? Wani xkʼuʼan lek ke mini lomuk. 5 Anto, ja maʼ wa xyawilex ipali* sok wa skʼulanawilex milagroʼik,* ¿ja maʼ wa skʼulan yuja waxa kʼulanex ja jas wa xyala ja leyi, ma jaʼ yuja skʼuʼajel sbʼaja jasa wabʼyexi? 6 Jani jaw ja jas ekʼ soka Abrahán: «skʼuʼan bʼa Jyoba* sok ja yuj ilji kʼotel jun winik toj».

7 Ja weʼnlexi wani xa naʼawex lek ja matik ayiʼoje skʼuʼajeli kʼotele yuntikil Abrahán. 8 Pes jun parte ja bʼa Yabʼal ja Dyosi, yalaxa yabʼ bʼajtan ja lekil rasonik ja Abrahán. Ja it yala ke ja Dyosi oj yal kʼotele toj ja matik mi judíoʼuki yuja skʼuʼajel yiʼojeʼi, ja yajni yala: «Yuj weʼna oj ajuk koʼ slekilal yibʼanal ja chonabʼiki». 9 Ja yujil, ja matik ayiʼoje skʼuʼajeli wa x-aji koʼ slekilale lajan soka Abrahán, ja maʼ ajyiyuj skʼuʼajeli.

10 Spetsanil ja matik wa sjipa skʼujole ja bʼa jas wa xkʼulaxi sbʼaja leyi waneni tajel tiʼal malo,* yujni tsʼijbʼunubʼal: «Atajuk tiʼal malo yibʼanal ja maʼ mi skʼulan tsʼikan spetsanil ja jastik tsʼijbʼunubʼal ja bʼa sroyoʼil ja Leyi». 11 Chomajkil, chikani lek mi maʼ wa x-alji kʼotel toj ja bʼa stiʼ sat ja Dyos yuj skʼuʼajel ja leyi, yujni tsʼijbʼunubʼal «ja maʼ toji oj ajyuk sakʼan yuja skʼuʼajel yiʼoji». 12 Ja Leyi mini jaʼuk skujlayubʼil ja skʼuʼajeli, pes wani xyala ke «ja matik wa skʼulan ja jastik it ojni ajyuk sakʼan stsʼakatal yuja jastik jaw». 13 Yeʼnani smanawotik ja Kristo sok ya elkotik libre ja bʼa staʼunejotik tiʼal malo* ja Leyi sok yeʼnani taji tiʼal malo sok mi keʼnuktik, yujni tsʼijbʼunubʼal: «Atajuk tiʼal malo yibʼanal ja maʼ wa x-aji lokan ja bʼa poste». 14 Ja it ekʼi bʼa jachuk ja slekilal aji koʼyi ja Abrahán akʼot sbʼaj ja chonabʼik yuj spabor ja Kristo Jesús, bʼa jachuk yuja skʼuʼajel kiʼojtiki oj ajukitik ja ipal* kʼapubʼali.

15 Kermano jumasaʼ, wa xkawilex jun sjejel: yajni kanta kulan jun trato, ama yeʼn xyaʼa kulan jun winik, mini maʼ xbʼobʼ sjom sok mi maʼ xbʼobʼ xchʼik mas. 16 Pes jani kʼapjiyile ja Abrahán sok ja yintili. Mi wa xyala «sok jawa wintil jumasaʼ», bʼa lajansok jel jitsan wan stajel tiʼal, pes wani xyala «sok jawa wintili», bʼa kechanta june wan stajel tiʼal: ja Kristo. 17 Cha wani xkalawabʼyex ja it: ja Ley, bʼa aji 430 jabʼil tsaʼan, mini wa sjomo ja trato yaʼunejxa ja Dyosi, ja yuj mini wa sjomo ja jas kʼapubʼali. 18 Pes lekbʼi ja dote jaʼ skujlayubʼil ja leyi, ja skʼapjelali mixani jaʼuk ja skujlayubʼili. Pe ja Dyosi yayi sok spetsanil skʼujol ja Abrahán sok jun skʼapjelal.

19 Anto, ¿jas yuj aji ja Leyi? Ajini bʼa xchiktesel ja mulalik man x-eljul ja intilali ja maʼ ajiyi ja skʼapjelali, ja Dyosi ya ekʼyi ja Ley ja anjeliki sok jaxa yeʼnleʼi yalawe yabʼ jun koltanum bʼa jun trato.* 20 Pe mini ay jun koltanum bʼa jun trato* yajni kechan june ja maʼ chʼikani, sok kechani yeʼn ja Dyos yaʼa ja skʼapjelali. 21 Anto, ¿kontra maʼ ay ja Ley soka skʼapjelik bʼa Dyosi? ¡Miniʼa! Pes lekbʼi axi jun ley bʼa wa xbʼobʼ yaʼ sakʼanil, ojni aljuk kʼotelotik toj yuja wa xkʼuʼantik ja leyi. 22 Pe ja Yabʼal ja Dyosi yayi yibʼanal ja jastik junuk bʼa yibʼ skʼabʼ ja mulali, bʼa jachuk ja skʼapjelal wa xlajxi yuja skʼuʼajel bʼa Jesukristo oj ajukyile ja matik wa sjeʼawe skʼuʼajeli.

23 Pe bʼajtanto oj eljul ja skʼuʼajeli, jani wa xyaʼawotik sat ja leyi, tini ayotik bʼa yibʼ skʼabʼ ajyi, sok wantik smajlajel ja skʼuʼajel bʼa ojxta chijkajuki. 24 Ja yuj ja Leyi kʼot jtalnanumtik* bʼa stojowotik och man Kristo, bʼa jachuk oj bʼobʼ aljuk kʼotelotik toj yuja skʼuʼajeli. 25 Pe yuja julta ja skʼuʼajel ja wego, mixani ay jun jtalnanumtik.*

26 Pes awibʼanalex kʼotelex yuntikil Dyos yuja skʼuʼajela wiʼojex bʼa Kristo Jesusi. 27 Yujni awibʼanalex, ja matika wiʼajex jaʼ bʼa Kristo, kʼotyexta jastal Kristo. 28 Mey judío sok mini griego, mey mosoʼal sok mini winik libre ay, mey winik sok mini ixuk, yujni awibʼanalex junta lajan ayex soka Kristo Jesusi. 29 Chomajkil, ta yeʼn sbʼajex ja Kristo, anto yintilexni ja Abrahán, weʼni oja bʼajukex ja dote jastalni kʼapubʼal.