Apocalipsis

22 Anto ja yeʼn ti sjeʼaki jun yok jaʼ bʼa wa xyaʼa sakʼanil, klaroxta jastal ja kristali, sok ti wan elelkon bʼa strono ja Dyos sok ja Cheji, 2 sok ti wan ekʼel bʼa mero snalan ja niwan sbʼejlal ja chonabʼi. Jaxa bʼa kada slado ja yok jaʼi ay teʼaltik bʼa wa xyaʼa sakʼanil sok wa satini 12 ekʼele ja jabʼili sok kada ixaw wa xyaʼa sat. Ja spowil ja teʼaltiki wani xmakuni bʼa yajel tojbʼuk ja chonabʼiki.

3 Ja Dyosi mixa oj staʼ tiʼal malo* ja chonabʼi, pes ja strono ja Dyos sok ja Cheji tini oj ajyuk tiwi. Sok jaxa smoso jumasaʼ oj yaʼteltaye, 4 oj yil-e ja sati sok ti oj ajyuk bʼa spatane ja sbʼiʼili. 5 Cha mixa oj ajyuk akwal, sok mixa oj makunukyujile ja yijlabʼ jun kandil sok mini ja yijlabʼ ja kʼaʼuji, yujni jaʼ xa oj ijlabʼajuke yuja Jyoba* Dyos, sok jaxa yeʼnleʼi oj yaʼe mandar bʼa tolabida.

6 Ti yalakabʼ ja anjeli: «Ja yaljelik it kʼotel toj* sok smeranil. Jachukniʼa, ja Jyoba,* ja Dyos maʼ ya makunuk ja alumanik bʼa oj kʼumanuk,* sjekunej ja yanjel bʼa sjejelyi ja smosoʼik ja jas tʼilan ojxta ekʼuki. 7 Kʼela, ojxta jakon. Lekxtayuj ja maʼ wa skʼuʼan ja jas wa xyala oj ekʼuk ja royo it».

8 Jaxa keʼn, ja Juani, keʼnani kabʼ sok kila ja jastik it. Yajni chʼak kil sok chʼak kabʼi, koʼyon mekʼan bʼa stoyjel ja anjel maʼ sjeʼaki ja jastik it. 9 Pe ja yeʼn yalakabʼi: «¡Aʼa kuidado! ¡Mok jachʼ akʼuluk! Ja keʼn kechanta jun mosoʼon jastal weʼna sok jastal jawa wermanoʼik alumaniki, sok jastal matik wa skʼuʼane ja jastik wa xyala ja royo it. Jaʼ xa toyo ja Dyosi».

10 Sok cha yala: «Moka bʼukan ja jas wa xyala oj ekʼuk ja royo it, yujni jelxa mojan ja tyempo tsaʼubʼali. 11 Pe ja maʼ mi tojuki a-snoch skʼulajel ja bʼa jas mi tojuki sok jaxa maʼ kuxi mok yakan ja skuxili. Pe ja maʼ toji a-snoch skʼulajel ja bʼa jas toji sok jaxa maʼ saki mok yakan ajyel sak.

12 ‹¡Maklay! Ojxta jakon, sok oj kayile kada jujune ja stsʼakole yuja jas skʼulaneʼi. 13 Keʼnon ja Alfa sok ja Omega,* ja maʼ bʼajtani sok ja último, ja skʼeʼulabʼili sok ja xchʼakulabʼili. 14 Lekxtayujile ja matik wa xchukʼuwe ja snajtil skʼuʼe bʼa oj ajyukyujile ja derecho bʼa oj sloʼe ja sat ja teʼaltik bʼa wa xyaʼa sakʼanili sok bʼa oj ochuke bʼa spuertaʼil ja chonabʼi. 15 Tini aye bʼa juera ja tsʼi jumasaʼ,* ja matik wa x-aʼtijiye sok pukuj,* ja matik wa xkoʼye mulal sok ixuk winik,* ja matik wa xmilwani, ja matik wa stoyowe kʼulubʼal dyosik* sok yibʼanal ja matik kʼajyel sok jel swaʼel ja slejel abʼali›.

16 ‹Ja keʼni, ja Jesús, jeka ja kanjeli bʼa xcholjela wabʼyex ja jastik it bʼa slekilal ja kongregasyoniki. Keʼnani ja maʼ jakel bʼa spamilya* sok bʼa yintil ja David sok ja kʼanal xlijpixta ja bʼa saʼan sakbʼeli›».

17 Jaxa yip ja Dyos* sok ja nobiaʼali wanexta yaljel «¡Laʼ!». Sok yibʼanal ja maʼ wa xyabʼi ayal «¡Laʼ!». Sok yibʼanal ja maʼ takin stiʼi ajakuk. Yibʼanal ja maʼ wa skʼanaʼi ayuʼ kʼebʼubʼal ja jaʼ wa xyaʼa sakʼanili.

18 «Ja keʼn wa xkalayabʼ yibʼanal ja maʼ wa xyabʼ ja jas wa xyala oj ekʼuk ja royo it: ta ay maʼ wa xchʼikayi mas ja jastik it, ja Dyosi oj yayi mas plagaʼik ke yuja janekʼ tsʼijbʼunubʼal ja bʼa royo iti; 19 sok ta ay maʼ jas ya eluk ja bʼa jas wa xyala oj ekʼuk ja royo it, ja Dyosi oj sjapyi ja sparte yiʼoj ja bʼa teʼaltik wa xyaʼa sakʼanili sok ja bʼa chonabʼ jel saki, pes ja jastik it tini tsʼijbʼunubʼal bʼa royo it.

20 Ja maʼ wa xcholo sbʼaja jastik it wa xyala: ‹Jachukniʼa, ojxta jakon›».

«¡Amén! Laʼ Kajwal Jesús».

21 Aʼajyuksoke ja matik tsaʼubʼalexa sbʼaja Dyos ja lekil skʼujol mi xbʼajintik ja Kajwaltik Jesús.