Lucas

6 Jun sabadoʼil, ja Jesús ti ekʼum bʼa yalajilik trigo. Jaxa snebʼumaniki wane stuljel jujuntik xchiwanal trigo, wane skʼutjel soka skʼabʼeʼi sok wane slojel ja sati. 2 Ja yuj, jujuntik fariseoʼik yalawe yabʼi: «¿Jas yuj wanex skʼulajel ja jas mi xbʼobʼ kʼulaxuk ja bʼa sábado?». 3 Pe ja Jesús sjakʼayile: «¿Yuj maʼ mi bʼa akʼumunejex ja jas skʼulan ja David yajni ja yeʼn soka swiniki ochyujile waʼin? 4 ¿Yuj maʼ mi och ja bʼa snaj ja Dyosi, ajiyi ja panik wa x-axi bʼa stiʼ sat ja Dyosi, sweʼa sok yayi ja swinikeʼi? Iday, ja jawi juni jasunuk mi maʼ xbʼobʼ skʼuluk. Kechan wa xbʼobʼ yabʼye ja sacerdoteʼiki». 5 Anto ja Jesús tixa yala yabʼye: «Ja Yunin ja Winiki* yeʼnani Yajwalil ja sábado».

6 Bʼa pilan sabadoʼil cha och ja bʼa naʼits wa stsomo sbʼaje sok och sjeʼe. Jaxa tiw tey jun winik tsatsbʼel* ay ja stojol skʼabʼi. 7 Jaxa jeʼumanik bʼa ley soka fariseoʼiki tojxta wa xkan skʼel-e ja Jesús bʼa oj yil-e ta ay maʼ oj ya tojbʼuk yuja sábado sok jachuk oj staʼe jun rason bʼa oj sleʼeyi smul. 8 Yuja wani snaʼa ja jas wane spensarajeli, ja yeʼn yala yabʼ ja winik maʼ tsatsbʼel* ay ja skʼabʼi: «Kʼeʼan sok laʼ tekʼan il bʼa snalan». Ja yeʼni stulu sbʼaj sok ti och tekʼan tiwi. 9 Anto ja Jesús tixa yala yabʼye: «Ay jas oj jobʼawilex. ¿Jasa wa xbʼobʼ kʼulaxuk ja bʼa sábado? ¿Skʼulajel bʼa lek, ma bʼa mi lekuk? ¿Skoltajel jun sakʼanil, ma smiljel?». 10 Yajni chʼak skʼel yibʼanal ja matik tey bʼa sjoyanali, tixa yala yabʼ ja winiki: «Xija jawa kʼabʼi». Yajni jach skʼulani, tojbʼi ja skʼabʼi. 11 Pe ja yeʼnleʼi jel kʼe juntiro ja skorajaʼe sok och yal sbʼaje ja jas oj bʼobʼ skʼulukeyi ja Jesusi.

12 June ja bʼa kʼakʼujik jaw, ja yeʼn waj bʼa wits bʼa yajelyi orasyon sok snajtil akwal yayi orasyon ja Dyosi. 13 Yajni el ja kʼakʼuji, spaya ja snebʼumaniki sok stsaʼa 12 ja bʼa yeʼnleʼi, sok ya sbʼiʼiluk jekabʼanumik: 14 ja Simón (ja maʼ cha ya sbʼiʼiluk Pedro), ja yermano Andrés, ja Santiago, ja Juan, ja Felipe, ja Bartolomé, 15 ja Mateo, ja Tomás, ja Santiago ja yunin ja Alfeo, ja Simón (ja maʼ wa x-aji sbʼiʼiluk jel skʼujolan), 16 ja Judas* ja yunin ja Santiago, sok ja Judas Iscariote (ja maʼ pax chʼaykʼujolanumi).

17 Tixa koʼko soka yeʼnleʼi sok ti kʼot tekʼan bʼa jun lajan kʼinal. Jaxa tiw tey jun niwan nole snebʼumanik sok jun niwan nole kristyano bʼa yibʼanal ja Judea, bʼa Jerusalén sok ja bʼa stiʼtik ja mar bʼa slujmalil ja Tiro sok Sidón. Jakele bʼa oj smaklaye sok bʼa oj ajuk tojbʼuke soka xchameleʼi. 18 Asta ja matik wane ixtalajel yuja pukujiki* wani xtojbʼiyekani. 19 Sok spetsanil ja nole kristyano wane slejel modo oj syam-e yujni wa x-el jun ipal bʼa yeʼna sok wa x-aji tojbʼuke yibʼanale.

20 Anto ja yeʼni tixa sjacha ja sati, skʼela ja snebʼumaniki sok yala:

«Jel gusto la ajyiyex ja weʼnlex ja matik pobre yujni weʼna bʼajex ja sGobyerno ja Dyosi.

21 Jel gusto la ajyiyex ja weʼnlex ja matik wane stekʼjel waʼini yujni oj bʼutʼanik lek.

Jel gusto la ajyiyex ja weʼnlex ja matik wanex okʼel ja wego yujni oj tsenanik.

22 Jel gusto la ajyiyex ja weʼnlex yajni ja kristyano xyilkʼujolanex, mi smojtayex, wa xyutajex sok wa staʼawe tiʼal mi lekuk jawa bʼiʼilex yuja Yunin ja Winiki. 23 Ajyanik gusto yajni x-ekʼ ja jawi sok chananik yuja gustoʼili, yujni ¡kʼelawik!, jel niwan jawa tsʼakolex ja bʼa satkʼinali, yujni ja maʼ ekʼ paxtayujileʼi jach skʼulaneyi ja alumaniki.

24 Pe ¡pobre ja weʼnlex matik rikoʼex yujni ajitawilex yibʼanal ja jas wa xyaʼa kulana kʼujolexi!

25 ¡Pobre ja weʼnlex ja matik bʼutʼel ayex ja wego yujni oja tekʼex waʼin!

¡Pobre ja weʼnlex ja matik wala tseniyex ja wego yujni oj mebʼa okʼanik sok oj okʼanik!

26 ¡Pobre ja weʼnlex yajni yibʼanal ja kristyano jel lek staʼawex tiʼal yujni ja maʼ ekʼ paxtayujileʼi jach skʼulaneyi ja alumanik mi meranuki!

27 Pe ja weʼnlexi, ja matik waxa maklayonexi, wa xkalawabʼyex moka waʼexkan syajtajel jawa kontraʼexi, moka waʼexkan yiljel lek ja matik wa xyilkʼujolanexi, 28 moka waʼexkan skʼanjel jastik bʼa lek sbʼaja matik wa staʼawex tiʼal malo* sok moka waʼexkan yajelyi orasyon sbʼaja matik wa skʼakʼlayexi. 29 Ja maʼ wa spochoyi ja juna choji, cha sutuyi ja juni. Jaxa ma’ wa sjapawi jawa pal kʼuʼi, cha akanyi ja yojola kʼuʼi. 30 Spetsanil ja maʼ ay jas wa skʼanawi, ayi. Jaxa maʼ wa sjapawi ja jasa bʼaji, moka kʼanyi bʼa aya kumxukawi.

31 Chomajkil, kʼulanikyi ja tuk ja jastal waxa kʼanawex oj skʼulukawilex ja weʼnlexi.

32 Ta jaʼ waxa yajtayex ja matik wa syajtayexi, ¿jasa slekilal waxa wilawex? Pes asta ja mulanumik wa syajtaye ja matik wa xyajtajiyeyuji. 33 Ta waxa kʼulanexyi ja bʼa lek ja matik wa skʼulanawilex ja bʼa leki, ¿jasa slekilal waxa wilawex? Asta ja mulanumik wa skʼulane ja jawi. 34 Sok ta waxa wawexyi jel* ja maʼ waxa pensaranex oj ya kumxukawilex, ¿jasa slekilal waxa wilawex? Asta ja mulanumik wa xyaweyi jel ja tuk mulanumik bʼa junxta oj ajuk kumxukyile. 35 Pe ja weʼnlexi, moka waʼexkan syajtajel jawa kontraʼexi, moka waʼexkan skʼulajel ja bʼa leki sok mok jasa majlayex oj ajuk kumxukawilex ja yajni xa waʼawex jeli.* Anto jelni niwan oj ajukawilex jawa tsʼakolexi sok oj kʼotanik yuntikil ja Maʼ jel Niwani, yujni ja yeʼni, asta soka matik mi xyaʼawe tsʼakatal sok ja matik jel malo, jelni slekilal skʼujolsok. 36 Tolabida aʼajyuk syajulala kʼujolex, jastalni ay syajulal skʼujol jawa Tatexi.

37 Chomajkil, awikxakan skʼulajel jusgar ja tuk sok jachuk mini oj cha kʼulajananik jusgar. Awikxakan yaljel bʼa tʼilan oj yiʼe kastigo ja tuki bʼa jachuk ja Dyosi mi oj yal tʼilan oja wiʼex kastigo. Tolabida aʼawik perdon* ja tuki sok oj ajanik perdon.* 38 Kʼajyanik yajel, jaxa tuki oj yawilex. Jelni lek oj bʼisjukawilex ja bʼa wa bolsaʼexi,* tʼenubʼal lek, yojtsʼinubʼal lek sok wosan lek. Yujni ja jastal oja bʼisexyi ja tuki jach oj cha sbʼisawilex ja weʼnlexi».

39 Anto ja yeʼn yayile ja slajelal it: «¿Anke june maʼ mi xyila kʼinal mini xbʼobʼ stoj june maʼ mi xcha yila kʼinal? Mikʼa, xchawanile oj mokʼuke bʼa jun kʼeʼen. 40 Jun nebʼuman mi mas ekʼxel yuja smaestro, pe yibʼanal ja maʼ chapubʼal tsʼikan leki ojni kʼot jastal ja smaestro. 41 ¿Jas yuj waxa kʼela ja xchʼijbʼenil teʼ ja bʼa sat jawa wermano pe mi xwaja sat ja sbigasil yiʼoj jawa bʼaji? 42 ¿Sok jastal modo oja walyabʼ jawa wermano ‹Hermano, oj ka elukawi ja xchʼijbʼenil teʼ ja bʼa wa sati›, yajni ja weʼn mixa wila ja bigas tey bʼa wa sati? ¡Ja weʼn bʼa chabʼ kara aya! Aʼel bʼajtan ja sbigasil jawa sati sok jachuk oja wil lek jastal oj wa elyi ja xchʼijbʼenil teʼ ja bʼa sat jawa wermano.

43 Mini jun lekil teʼ wa xyaʼa kʼaʼel ja sati, sok mini jun kʼaʼel teʼ wa xyaʼa lekil sat. 44 Yujni kada teʼ wa xnaxi sbʼaj yuja sati. Jun sjejel, mini xtulxi higoʼik ja bʼa kʼiʼixaltiki sok mini xtulxi uvaʼik ja bʼa ibʼeʼik putsan kʼiʼixi. 45 Jun lekil kristyano wa xya eluk jastik lek ja bʼa jastik lek snolunej ja bʼa skʼujoli; pe jun kristyano bʼa mi lekuk wa xya eluk jastik mi lekuk ja bʼa jastik mi lekuk snoluneji. Yujni ja jas wa x-el ja bʼa stiʼi jani ja jas ay ja bʼa skʼujoli.

46 Anto, ¿jas yuj waxa walawex kabʼ ‹¡Kajwal! ¡Kajwal!› pe mixa kʼulanex ja jastik wa xkala? 47 Yibʼanal ja maʼ wa xjak jmok, wa smaklay ja jastik wa xkala sok wa skʼulan, oj jeʼawilex maʼ oj slaje: 48 Jach jastal jun winik, bʼa yajel kʼeʼuk ja snaji, sjokʼo chaʼan lek sok yajni staʼa ja toni ti ya kujlajuk ja simientoʼili. Ja yuj, yajni jak ja bʼutʼ jaʼi, ja yok jaʼi smakʼa tsats ja naʼitsi, pe mini tʼun ya nijkuk yujni yij lek kʼeʼel. 49 Jaxa maʼ wa smaklay ja jastik wa xkala pe mi jas wa skʼulan jachni jastal ja winik maʼ ya kʼeʼuk jun snaj bʼa sat luʼum, mey simientoʼil. Jaxa yok jaʼi smakʼa tsats ja naʼitsi, jaxa naʼitsi wegoxta mokʼi sok jomel lek kani».