Juan

4 Yajni ja Kajwaltik yabʼ ke ja fariseoʼik yabʼyeta masni wan yajel och nebʼumanil ja yeʼn* sok masni wan yajel yiʼ jaʼ ke yuja Juani, 2 ama mini yeʼnuk ja Jesús ja maʼ wa xya yiʼ jaʼ ja kristyano, jani ja snebʼumaniki, 3 ja yeʼn tixa el ja bʼa Judea sok cha waj bʼa Galilea. 4 Pe tʼilani ti oj ekʼuk bʼa Samaria. 5 Jaxa yeʼn ti kʼot bʼa jun chonabʼ bʼa Samaria sbʼiʼil Sicar, mojan ja bʼa luʼum ajiyi ja José yuja Jacob. 6 Tini ay tiw ja sposo ja Jacob. Jaxa Jesús ti kulani bʼa stsʼeʼel ja poso,* yujni yajtikxa ay yuja bʼejyeli. Ja it mojan bʼa swakil ora.*

7 Jaxa tiw ti jak ya el jaʼ jun ixuk bʼa Samaria. Ja Jesusi yala yabʼi: «Aki tʼun jaʼ bʼa oj kuʼe». 8 (Yujni ja snebʼumaniki wajele smanjel waʼelal ja bʼa chonabʼi). 9 Pe ja samaritana sjobʼoyi: «¿Jastal lek ja weʼn, yuja judíoʼa, waxa kʼanaki jaʼ ama samaritanaʼon?». (Yujni ja judíoʼiki mi lek xyila sbʼaje soka samaritanoʼiki). 10 Ja Jesús sjakʼayi: «Wanxtabʼi xa naʼa sbʼaja majtanal* bʼa Dyos sok wanxtabʼi xa naʼa machunkiluk ja wan yaljel awabʼ ‹Aki tʼun jaʼ bʼa oj kuʼe›, weʼnani oja kʼanyi jaʼ ajyi, jaxa yeʼn oj yawi jaʼ bʼa wa xyaʼa sakʼanil». 11 Jaxa yeʼn sjakʼa: «Kajwal, pe mey awiʼoj jas oj wa elsok ja jaʼi, sok jelni chaʼan ja poso. ¿Bʼa oja taʼ ja jaʼ jaw wa xyaʼa sakʼanili? 12 ¿Yuj maʼ mas ekʼxela ja weʼn yuja Jacob, ja maʼ ekʼpaxtakujtikoni? Yeʼnani yaʼa ja poso it, bʼa ti yuʼaj jaʼ soka yuntikili sok ja xchanteʼiki». 13 Ja Jesús sjakʼayi: «Spetsanil ja maʼ wa xyuʼaj ja jaʼ it ojtoni cha takuk stiʼ. 14 Pe ja maʼ wa xyuʼaj ja jaʼ oj kayi ja keʼn mixani oj takuk stiʼ. Pes ja jaʼ oj kayi ja keʼni ojni paxuk ja bʼa yojol jastal jun sat jaʼ wan bʼojtel bʼa oj ya sakʼanil bʼa tolabida». 15 Ja ixuki yala yabʼi: «Kajwal, aki ja jaʼ jaw, bʼa jachuk mixa oj takuk jtiʼ sok mixa oj jak kaʼ el jaʼ ja bʼa lugar it».

16 Jaxa yeʼn yala yabʼi: «Kax payajan jawa tatami sok ti la kumxiʼa». 17 Ja ixuki sjakʼa: «Mey jtatam». Ja Jesús yala yabʼi: «Merani ja waxa wala meyuka tatami, 18 pes yujni ajyelawuj joʼe, jaxa winik awiʼoj ja wego mini atatamuk. Merani lek ja jas awala». 19 Ja ixuki yala yabʼi: «Kajwal, ja keʼn wa xkila juni alumana. 20 Ja maʼ ekʼpaxtakujtikoni ti stoyowe bʼa wits it ja Dyosi, pe ja weʼnlexi waxa walawex tʼilanbʼi ti oj toyxuk bʼa Jerusalén». 21 Jaxa Jesús yala yabʼi: «Ixuk, kʼuʼan ja jas wa xkala: jakum ja styempoʼil mi oja toyex ja Tatal ja bʼa wits it sok mini ja bʼa Jerusalén. 22 Ja weʼnlexi waxa toyowex ja jas mixa naʼawex sbʼaji, pe ja keʼntikoni wa xtoyotikon ja jas wa xnaʼatikon sbʼaji, yujni ja koltaneli jani wa xkʼe stulyi soka judíoʼik. 23 Pe jakum ja styempoʼili, iday, jultani ja tyempo jaw, ja matik meran wa stoyowe ja Tatali ojni stoy-e ja jastalni oj tojuke yuja yipi* sok ja jastalni ja smeranili. Yujni ja Tatali jani wan slejel ja kristyanoʼik jaw bʼa oj toyjuk ja yeʼn. 24 Ja Dyosi mini xbʼobʼ ilxuk, sok jaxa matik wa stoyoweʼi tʼilani oj stoy-e ja jastalni oj tojuke yuja yipi* sok ja jastalni ja smeranili». 25 Ja ixuki yala yabʼi: «Ja keʼn wani xnaʼa ojni jakuk ja Mesías,* ja maʼ wa sbʼiʼilan Kristo. Yajni xjak ja yeʼn, ojni xcholkabʼtikon yibʼanal». 26 Ja Jesús sjakʼayi: «Keʼnon ja winik jaw, ja maʼ wan loʼila moki».

27 Ja bʼa jutsʼin jaw julye ja snebʼumaniki sok jelni cham yilawe yuja wan loʼilsok jun ixuki. Pe mini maʼ sjobʼo «¿Jas yuj wana loʼilsok ja ixuki?» ma «¿Jasa wana slejeli?». 28 Anto ja ixuki ti yaʼakan tiw ja xchʼubʼi, waj bʼa chonabʼ sok yala yabʼ ja kristyano: 29 «Laʼik, laʼ ilawik jun winik bʼa yalakabʼ yibʼanal ja jas jkʼuluneji. ¿Mi maʼ yeʼnuk ja it ja Kristo?». 30 Jaxa kristyano elye ja bʼa chonabʼi sok waj yil-e.

31 Jaxa snebʼumaniki tarega wa xyalawe yabʼi: «Maestro,* waʼan tʼunuk». 32 Pe ja yeʼn yala yabʼye: «Ja keʼn ay kiʼoj jun waʼelal bʼa oj kabʼi sok mixa naʼawex sbʼaj». 33 Ja yuj ja nebʼumaniki wa xyala sbʼaje: «¿Anke mini maʼ yijanyi swaʼel?». 34 Ja Jesusi yala yabʼye: «Ja jwaʼeli jani skʼulajel ja jas wa skʼana ja maʼ sjekawoni sok xchʼakjel ja yaʼteli. 35 ¿Mi maʼ waxa walawex ayto skʼana chane ixaw bʼa stuljel ja sbʼaʼal ja alaji? Pes kʼelawik, ja keʼn wa xkalawabʼyex: jachawik jawa satex sok kʼelawik, yijxa ja sbʼaʼal ja alaji sok lekxa ay bʼa stuljel. 36 Ja tulumani wanxa syamjel ja stsʼakoli sok wan stsomjel ja sat bʼa sakʼanil bʼa tolabida. Jachuk, ja tsʼunuman sok ja tulumani lajan oj gustoʼaxuke. 37 Pes jach wa xkʼot smeranil ja yaljel it ‹Pilan ja maʼ wa stsʼunu sok pilan ja maʼ wa stulu›. 38 Ja keʼn jekawex stuljel ja jas mi awiʼajex yaʼteltajeli. Pilan ja matik jel tsats aʼtijiyeʼi, jaxa weʼnlexi awaʼunejex el slekilal ja yaʼteleʼi».

39 Jitsan samaritanoʼik ja bʼa chonabʼ jaw och skʼuʼuke bʼa yeʼna stsʼakatal ja jas xcholo ja ixuk jaw, bʼa yala: «Yalakabʼ yibʼanal ja jas jkʼuluneji». 40 Ja yujil, yajni ja samaritanoʼik waj yil-e, skʼanaweyi akanukesok, jaxa yeʼn ti kan chabʼ kʼakʼu ja tiwi. 41 Jeltoni jitsan maʼ skʼuʼan bʼa yeʼna yajni yabʼye ja jas wa sjeʼa, 42 sok ti yalawe yabʼ ja ixuki: «Mixa kechan wa xkʼuʼantikon ja jas acholokabʼtikoni. Keʼn mismo kabʼunejtikon sok wa xnaʼatikon meran lek ja winik it yeʼnani ja koltanum ja bʼa luʼumkʼinali».

43 Yajni ekʼ ja chabʼ kʼakʼu jawi, tixa el ja tiw sok waj bʼa Galilea. 44 (Ja Jesús yala ja alumani mini xtoyji ja bʼa slugari). 45 Yajni kʼot ja bʼa Galilea, ja galileoʼiki jelni lek yawe ochuk, pes yujni ja yeʼnleʼi cha wajyeni ja bʼa kʼini sok yilawe yibʼanal ja jas skʼulan ja bʼa Jerusalén ja bʼa kʼini.

46 Anto cha waj pilan ekʼele ja bʼa Caná bʼa Galilea, ja it bʼa ya paxuk vinoʼil ja jaʼi. Sok ay jun yaʼtijum rey bʼa ay jun skerem malo ay ja bʼa Capernaúm. 47 Yajni ja winik it yabʼ ja Jesús ti eljan bʼa Judea sok jak bʼa Galilea, waj yile sok skʼanayi akokoʼe bʼa oj stojbʼes ja skeremi, pes yujni ojxta chamuk. 48 Pe ja Jesús yala yabʼi: «Yujkʼa mixa wilawex milagroʼik* sok jastik jel cham yiljel, ja weʼnlexi mini nunka oja kʼuʼukex». 49 Ja yaʼtijum ja reyi skʼanayi: «Kajwal, laʼ jmok bʼa jachuk mi oj chamuk ja yal jkeremi». 50 Ja Jesús yala yabʼi: «Kumxan bʼa wa naj, jawa keremi sakʼan ay». Ja winiki skʼuʼan ja jas alji yabʼ yuja Jesusi sok waji. 51 Sok yajni wajumkoʼ ja bʼa snaji, waj tajuk yuja smosoʼiki bʼa waj aljukyabʼ sakʼan* ay ja skeremi. 52 Ja yuj ti sjobʼoyile jas maʼ ora kʼe yaʼ kulan. Ja yeʼnleʼi sjakʼaweyi: «Bʼa sjukil ora* ekʼ ja skʼajkʼal ja eke». 53 Ja tatali ti snaʼa kʼinal jani ja ora jaw aljiyabʼ yuja Jesús «Jawa keremi sakʼan ay». Jaxa yeʼn sok yibʼanal ja matik tey bʼa snaji skʼuʼane bʼa Jesús. 54 Ja iti jani waj ja xchabʼil milagro* skʼulan ja Jesús ja yajni eljan ja bʼa Judea sok kumxi bʼa Galilea.