Santiago

2 Kala kermano jumasaʼ, ¿anke ja weʼnlexi mini wanukex sjejel skʼuʼajel sbʼaja niwan Kajwaltik Jesukristo sok chomajkil tsaʼubʼal ita ja maʼ lek waxa wilawexi? 2 Ta jun winik wa xwaj ja bʼa wa tsomjelex sok ayiʼoj anilloʼik bʼa oro ja bʼa skʼabʼi sok skʼu bʼa xlijpixta sok wa xcha waj june maʼ pobre sok kux ay ja skʼuʼi, 3 ¿mas maʼ lek waxa wilawex ja maʼ xlijpixta ja skʼuʼi sok waxa walawex yabʼi «Ti la kulani il bʼa jun lekil lugar», pe jaxa maʼ pobre waxa walawex yabʼi «Kanan tekʼan» ma «Ti la kulani tiw bʼa stsʼeʼel ja sbankoʼil koki»? 4 Ta jach waxa kʼulanex, ¿mi maʼ mas chaʼanyabʼaluk wanex yiljel jun kʼole ke yuja juni sok kʼotyexta jastal juesik bʼa mi lek ja jastal wanex skʼulajel jusgari?

5 Maklayik, kala kermano jumasaʼ. ¿Mi maʼ jaʼ stsaʼa ja Dyos ja matik pobre ja bʼa stiʼ sat ja kristyano bʼa oj kʼotuke riko ja bʼa skʼuʼajeli sok oj sbʼajuke ja Gobyerno it skʼapayi ja matik wa xyajtajiyuji? 6 Pe ja weʼnlexi awijnunejex ja matik pobre. ¿Mi maʼ yeʼnuke ja riko ja matik wa stʼenawexi sok wa skichawex och bʼa stiʼ sat ja juesiki? 7 ¿Mi maʼ wa staʼawe tiʼal kistal ja lekil bʼiʼilala wiʼojexi? 8 Ja yujil, ta waxa kʼuʼanex ja niwan sley ja Rey jastalni wa xyala ja Yabʼal ja Dyosi «Yajtay jawa moji jastalni waxa yajtabʼaj ja weʼni», jelni lek wanex skʼulajel. 9 Pe ta tolabida tsaʼubʼalta ja maʼ lek waxa wilawexi, wanexni slejela mulex sok jaxa leyi wani xchiktes ayni amulex.

10 Pes ta ay maʼ wa skʼuʼan yibʼanal ja Leyi pe wa skʼulan payar bʼa junta jasunuk, wani staʼa smul bʼa skʼokjel yibʼanal ja Leyi. 11 Yujni ja maʼ yala «Moka chʼaykʼujoluk ja nupanel»* cha yala «Mok milwanan». Pe ta mixa chʼaykʼujolan ja nupanel pe wala milwani, wani xa taʼa amul bʼa skʼokjel ja leyi. 12 Moka wawexkan kʼumal sok sjejel jawa modoʼex jastal wa skʼulane ja matik oj kʼulajuke jusgar jastalni wa xyala ja sley jun chonabʼ libre ay.* 13 Yujni ja maʼ mi sjeʼa yajulal kʼujoli mini oj najuk syajulal ja yajni xkʼulaji jusgari. Ja yajulal kʼujoli wani skʼulan ganar ja bʼa kʼulwanel jusgari.

14 Kala kermano jumasaʼ, ¿jas yaʼtel ta june wa xyala ay yiʼoj skʼuʼajel pe mi jas skʼulan? ¿Anke mini oj koltajuk yuja skʼuʼajel jaw? 15 Ta jun hermano ma jun hermana wa skʼana skʼu* sok mey lek swaʼel bʼa kada kʼakʼu, 16 sok ama jachuk, june ja bʼa weʼnlexi waxa walawex yabʼi «Aʼekʼukawuj lek, moka tekʼ cheʼej sok waʼan lek», pe mi xyayi ja jas wa xmakuniyuj ja bʼa sakʼanili, ¿jas yaʼtel ja jaw? 17 Junxtani soka it, ta mi jas xkʼulaxi soka skʼuʼajeli, chamelni ay.

18 Pe ayni maʼ oj yal: «Ja weʼni aya wiʼoj skʼuʼajel sok jaxa keʼni ayni jas wa xkʼulan. Jeʼaki ja skʼuʼajel awiʼoj jach mi jas oja kʼuluk, jaxa keʼn oj jeʼawi ja skʼuʼajel kiʼoj yuja jastik wa xkʼulani». 19 ¿Anke wani xa kʼuʼan kechan ay jun Dyos? Jelni lek waxa kʼulan. Pe asta ja pukujiki wani skʼuʼane sok wa xkʼitkʼuniye yuja wa xiwyeyuji. 20 Winik bʼa mi jas xa naʼa, ¿mi maʼ xa waʼabʼaj kuenta ta mi jas xkʼulaxi soka skʼuʼajeli mini tʼun xmakuni? 21 ¿Mi maʼ ti alji kʼotel toj yuja jastik skʼulan ja jtatik Abrahán tsaʼan yajni skʼapa ja skerem Isaac ja bʼa altari? 22 Pes wani xa wila ja skʼuʼajel ajyiyuji tini ilxi ja bʼa jastik skʼulani sok kʼot tsʼikwuk ja skʼuʼajel yuja jastik skʼulani. 23 Jach kʼot smeranil ja jas kanel ja bʼa Yabʼal ja Dyosi bʼa wa xyala: «Ja Abrahán skʼuʼan bʼa Jyoba* sok ja yuj ilji kʼotel jun winik toj». Sok jaxa Jyoba* yala kʼotni yamigoʼuk.

24 Wani xa wilawex ke ja winiki wani xkʼot aljuk kʼotel toj yuja jastik wa skʼulani sok mi kechan yuja skʼuʼajel yiʼoji. 25 Junxtani soka it, ¿mi maʼ ti alji kʼotel toj yuja jas skʼulan ja Rahab ja maʼ wa xchono sbʼaji tsaʼan yajni ya ochuk bʼa snaj ja tsʼelsatinumiki sok sjekjel bʼa pilan bʼej? 26 Jachukniʼa, jastalni chamelxa ay ja kuerpoʼal ta mi xyiʼaj ikʼi,* cha jachni chamel ay ja skʼuʼajel ta mi jas xkʼulaxisoki.