Efesios

2 Chomajkil, ja Dyosi yawilexa sakʼanilex, ama chamelex ajyi yuja wa paltaʼex sok jawa mulex 2 aleʼawex bʼa jun tyempo snochjel ja jastal wa xtax ja tyempo* ja bʼa luʼumkʼinal it, snochjel ja mandaranum bʼa tey bʼa skʼabʼ ja ikʼi, sok jaxa ikʼ iti ma ja tikʼe pensar* it jani wane nikjelyuj ja wego ja yuntikil ja kʼoka abʼaliki. 3 Jachukniʼa, ajyi jun tyempo kibʼanaltik jach wa xjeʼa ja jmodotik jastal yeʼnle jastalni wa xkʼankʼuniyuj ja jbʼakʼteltiki, skʼulajel ja jas wa skʼana ja bʼakʼtelali sok ja jpensartiki, sok man pojkitik wani xbʼajintik ajyi ja stajkelal ja Dyos jastalni ja tuki. 4 Pe ja Dyos bʼa jel ja syajulal skʼujoli, sok syajtayotik yuja niwan syajal skʼujoli, 5 yaʼa jsakʼaniltik lajan soka Kristo, ama chamelotikxa ajyi yuja jpaltatiki (ja weʼnlexi koltajiyexta yuja lekil kʼujolal mi xbʼajixi). 6 Chomajkil, yaʼa jsakʼaniltik* lajan soka yeʼn sok yaʼawotik kulan lajan soka yeʼn ja bʼa lugarik bʼa satkʼinal jastal snochumanotik ja Kristo Jesús 7 bʼa jachuk, ja jastal oj taxuk ja tyempoʼik* jakumi, ja yeʼn oj sjeʼ masto ekʼxel ja srikesaʼil bʼa lekil skʼujol mi xbʼajintiki yuja jel jaman skʼujol jmoktik jastal snochumanotik ja Kristo Jesús.

8 Yuja lekil kʼujolal it mi xbʼajintiki, ja weʼnlexi koltajiyexta yuja skʼuʼajeli. Pe mi yuj weʼn lajxiwujilex, pes juni majtanal bʼa Dyos. 9 Jaʼi, mini jaʼuk yuja jastik waxa kʼulanexi, bʼa jachuk mi maʼ oj skʼan oj stoy sbʼaj. 10 Kʼotelotik yaʼtel ja skʼabʼ ja Dyos sok kʼulajitik bʼa ajyel lajan soka Kristo Jesús bʼa skʼulajel lekil aʼtelik, bʼa jachxani xchapunejkan oj jkʼuluktik ja Dyosi.

11 Ja yujil, ajuluka kʼujolex ke bʼa jun tyempo, yuja mi judíoʼukex pojkelexi,* wani x-aljiwabʼyex ajyi mi akʼubʼalyi senya jawa winkilex yuja matik wa x-aljiyabʼye akʼubʼalyi senya ja swinkileʼi, ja it wa skʼulane ja kristyano ja bʼa kuerpoʼali.* 12 Ja bʼa tyempo jaw mini teyuka mokex ja Kristo, pilan ayex ja bʼa chonabʼ Israel, mini sparteʼukex ja tratoʼik kʼapubʼali. Mini ayuka wiʼojex smajlajel sok mi teyuka mokex ja Dyos ja bʼa luʼumkʼinali. 13 Pe ja wego, bʼa lajanxa ayex soka Kristo Jesús, ja weʼnlexi bʼa ajyiyex najat jun tyempo, mojxiyextani yuja xchikʼel ja Kristo. 14 Yujni yeʼn ja jlamaniltiki, ja maʼ skʼulan bʼa june ita kʼotye ja chabʼ tsomeʼi sok sjema-el ja barda tey bʼa snalane sok wa xpiljiye ajyi. 15 Yuja skuerpoʼi* xchʼaya-el ja kontraʼali, wa xkʼan alxuk, ja leyik sok ja mandarik yiʼoj ja Ley bʼa Moisés, bʼa oj skʼul jun yajkʼachil winik ja bʼa xchabʼil tsomeʼi bʼa lajan aye soka yeʼn sok yajel kujlajuk ja lamanil, 16 sok bʼa jachuk xchabʼil chonabʼ oj yaʼe lek kulan soka Dyos bʼa jun ita kuerpoʼal yuja poste bʼa yijel wokol,* pes yuja xchamelali xchʼaya ja kontraʼali. 17 Ja yeʼn jaki sok xcholowabʼyex ja lekil rasonik bʼa lamanil, ja weʼnlex matik najat ayex ajyi, sok lamanil sbʼaja matik mojan ayi, 18 pes stsʼakatal yuja yeʼn xchabʼil chonabʼ wa xbʼobʼ mojxukotik lek soka Tatali yuja junxta ipal* wa xkʼulantik resibiri.

19 Ja yuj ja weʼnlexi wanxani xnaji abʼajex sok mixa abʼajukex bʼa pilan lugar, pes junxta lugar ayex soka matik tsaʼubʼalexa sbʼaja Dyosi sok spamilyaʼexa ja Dyosi, 20 sok ti akʼubʼal kʼeʼanik jastal jun naʼits ja bʼa skujlayubʼil ja jekabʼanumik sok ja alumanik, jaxa Kristo Jesús jani ja ton bʼa mero skujlayubʼili.* 21 Lajan soka yeʼn, yibʼanal ja naʼitsi, bʼa tsamalxta staʼunej sbʼaj, wanxta kʼeʼel masan xkʼot jun templo tsaʼubʼal bʼa Jyoba.* 22 Lajan soka yeʼn, ja weʼnlexi cha lajan wanex ajel kʼeʼanik bʼa oj kʼotanik jun lugar bʼa ti oj ajyuk ja Dyos, pes ja yipi* tini oj ajyuk tiw.