Xiwel yuja Jyoba wa stojolan ke wa xkisatik lek sok mi xkʼanatik ay jas oj jkʼultik bʼa mi lekuk oj yile (Prov. 16:6). Ja yuj la jkʼujoluktik bʼa snochjel ja jastik yaʼunej kujlajuk ja bʼa jas lek soka bʼa miyuki, sok tini wa xtaʼatik bʼa Biblia (2 Cor. 7:1). Ta wa xkʼulantik ja jas wa syajtay ja Jyoba sok wa xkijnaytik ja jasa mi lek xyila, gustoni oj ajyukotik (Sal. 37:27; 97:10; Rom. 12:9). Bʼobʼta ayni maʼ wa snaʼa ke ja Jyoba ayni yiʼoj ja cholal bʼa oj yal ja jasa leki sok jasa mi lekuki, pe cha tʼilani oj skʼuʼuk ja jastik yaʼunej kujlajuk ja Dyosi (Rom. 12:2). Ja keʼntiki, jani soka jmodotik oj jetik ta wa xkʼuʼantik ke jani mas lek skisjel ja jastik yaʼunej kujlajuk ja Jyoba (Prov. 12:28). Ja David skʼuʼan ke jachukniʼa, pes yala yabʼ ja Jyoba: «Weʼn waxa wa jnaʼ ja sbʼejlalil ja sakʼanil. Ja bʼa stiʼ asati ay jitsan gustoʼil; ja bʼa stojol jawa kʼabʼi ayni gustoʼil bʼa tolabida» (Sal. 16:11). w22.10 8 par. 9, 10

Ja Jesús mi jelxi ja jastal yila sbʼaji sok chʼin yaʼa sbʼaj. Bʼajtanto oj jakuk ja bʼa Luʼumi, skʼulan jitsan jastik jel chaʼanyabʼalil ja bʼa yaʼtel ja Jyoba. Ja bʼa Colosenses 1:16 wa xyala ke «yuj yeʼna yibʼanal ja jastiki kʼot kʼulaxuk ja bʼa satkʼinali sok ja bʼa luʼumi». Yajni ja Jesús yiʼaj jaʼ, lajansok julskʼujol bʼa jastik skʼulan ja yajni ti ajyi bʼa satkʼinal soka sTati (Mat. 3:16; Juan 17:5). Pe mini niwan kʼe yaʼ sbʼaj ja yajni julskʼujol ja bʼa jastik jaw. Jaʼuktoma, nunka yaʼa sbʼaj june maʼ jel niwan yuja tuki. Yala yabʼ ja snebʼumaniki ke mi jak ja bʼa Luʼumi «bʼa oj aʼteltajuk, jakni bʼa oj yaʼteltay ja tuki sok bʼa yajel ja sakʼanil jastal slokʼol bʼa yajel el libre jitsan kristyano» (Mat. 20:28). Cha yala ke mi oj bʼobʼ skʼuluk mini jun jasunuk bʼa yeʼnta spensar. ¡Jelni chʼin yaʼa sbʼaj ja Jesús! ¿Anke wani xkʼana oj jnochtik ja lekil sjejeli? w22.05 24 par. 13

Bʼa stsajel ta oj akʼwanuk perdon, ja Jyoba wa xyila ta ja mulanum wa snaʼa ajyi ke mi lekuk ja jas wan skʼulajeli. Ja Jesús yala jaman lek, jastalni wa xtaʼatik ja bʼa Lucas 12:​47, 48. Yajni jun kristyano gana wa skʼulan jun jasunuk bʼa mi lekuk xyila ja Dyosi sok bʼa jel malo, wani xkoʼ bʼa jun chaʼan mulal. Ja kristyano it xiwelani sbʼaj bʼa mi oj ajuk perdon yuja Jyoba (Mar. 3:29; Juan 9:41). Ta jachkʼa, ¿oj maʼ bʼobʼ yaʼotik perdon ja Jyoba? Ojniʼa. Ja Jyoba wa xcha xyaʼa tʼabʼan skʼujol pilan jasunuk. Jani ta ja mulanum meran sutxel skʼujol. Ja it wa stojolan oj tukbʼestik ja jastal wa xkilatik jun jasunuk, ja jmodotik ma ja jas wa xkʼana oj kʼuluktik. Chomajkil ja kristyano bʼa sutxel skʼujol yaj wa xyabʼi sok jel triste x-ajyi yuja jastik mi lekuk skʼulani ma yuja mi skʼulan ja jastik lek oj skʼuluk ajyi. Mi kechan tuk ay xyabʼ yuja jas mi lek skʼulani, pes yuja mi lek wa xtax soka Dyosi ijiyuj bʼa skʼulajel jasunuk bʼa mi lekuk. w22.06 5, 6 par. 15-17