Buk Song
Tok i go long dairekta; ol i tiunim long Seminit.* Devit i raitim dispela song.
12 Jehova, yu mas kisim bek mi, long wanem, man bilong i stap gut long narapela, i no stap moa;
Ol man em ol arapela i ken trastim, ol i no stap moa.
2 Ol i save mekim tok giaman long ol arapela;
Maus bilong ol i save mekim tok gris long ol manmeri na giamanim ol.+
3 Jehova bai pasim maus bilong ol man i save mekim tok gris
Na em bai pasim maus bilong ol man i save litimapim nem bilong ol yet,+
4 Ol man i save tok olsem: “Olgeta tok mipela i mekim bai kamap tru.
Wanem tok mipela i laik mekim, mipela bai mekim tasol;
I no gat wanpela bai tokim mipela long samting mipela i mas mekim.”+
5 Jehova i tok olsem, “Ol manmeri em ol i mekim nogut long ol na ol i karim pen na hevi,
Na ol rabisman i krai i stap,+
Mi bai helpim ol.
Mi bai kisim bek ol long han bilong ol man i mekim nogut long ol.”
6 Tok bilong Jehova i klin olgeta;+
Em i olsem silva em ol i bin kukim long paia* inap 7-pela taim na i klin olgeta.
7 Jehova, yu bai was gut long ol;+
Na yu bai lukautim olgeta wan wan bilong ol na ol man nogut bilong dispela taim i no ken bagarapim ol.
8 Ol man nogut i wokabaut raun na i no gat wanpela i pasim ol,
Long wanem, olgeta man i orait long pasin nogut.+