Namba
27 Selofehat em i pikinini man bilong Hefer, na Hefer em i pikinini man bilong Gileat, na Gileat em i pikinini man bilong Makir, na Makir em i pikinini man bilong Manase. Ol i bilong lain famili bilong Manase em pikinini man bilong Josep. Nem bilong ol pikinini meri bilong Selofehat em Mala, Noa, Hokla, Milka na Tirsa. 2 Ol i kam na sanap long dua bilong haus sel bilong bung long ai bilong Moses, na pris Eleasar, na ol hetman,+ na olgeta manmeri, na ol i tok olsem: 3 “Papa bilong mipela i bin dai long ples nating, tasol em i no wanpela bilong ol dispela lain i bihainim Kora+ na bikhet long Jehova. Nogat. Em yet i bin mekim sin na em i dai. Na em i no gat ol pikinini man. 4 I tru em i no gat pikinini man bilong kisim nem bilong em, tasol wai na nem bilong papa bilong mipela i mas lus namel long lain bilong em? Olsem na mipela i laik bai yu givim mipela sampela hap graun namel long ol brata bilong papa bilong mipela.” 5 Orait Moses i kisim tok bilong ol i go long Jehova.+
6 Na Jehova i tokim Moses olsem: 7 “Dispela tok bilong ol pikinini meri bilong Selofehat em i stret. Olsem na yu mas givim ol dispela meri sampela graun namel long ol brata bilong papa bilong ol. Larim ol i kisim hap graun bilong papa bilong ol.+ 8 Na yu mas tokim ol Israel olsem, ‘Sapos man i no gat pikinini man, tasol em i gat pikinini meri, na bihain em i dai, orait pikinini meri bilong em i ken kisim ol samting bilong em. 9 Na sapos em i no gat pikinini meri, orait ol brata bilong dispela man i ken kisim ol samting bilong em. 10 Na sapos em i no gat ol brata, orait ol brata bilong papa bilong em i ken kisim ol samting bilong em. 11 Na sapos papa bilong em i no gat ol brata, orait wanblut stret bilong em i ken kisim ol samting bilong em na ol dispela samting bai kamap ol samting bilong wanblut. Dispela tok nau mi givim em bai i stap olsem lo yupela Israel i mas bihainim, olsem Jehova i bin tokim Moses.’”
12 Orait Jehova i tokim Moses olsem: “Yu go antap long ples maunten long hap bilong Abarim+ na lukluk i go long hap graun mi laik givim long ol Israel.+ 13 Yu lukim pastaim, orait bihain bai yu dai,+ wankain olsem brata bilong yu, Aron, i bin dai.+ 14 Long wanem, taim ol manmeri i bin toktok planti long mi long ples nating bilong Sen, yutupela i bin sakim tok bilong mi na yutupela i no bin mekim holi nem bilong mi long ai bilong ol manmeri taim mi givim wara long yupela.+ Dispela wara bilong Meriba+ i stap long Kades+ long ples nating bilong Sen.”+
15 Na Moses i tokim Jehova olsem: 16 “Jehova, yu God bilong givim strong bilong laip long olgeta manmeri. Olsem na mi askim yu long makim wanpela man bilong lukautim ol dispela manmeri. 17 Em bai go pas long ol long olgeta samting na ol bai mekim olgeta samting em i tokim ol long mekim, olsem na bai lain bilong Jehova i no ken i stap olsem ol sipsip i no gat wasman.” 18 Orait Jehova i tokim Moses olsem: “Josua, pikinini man bilong Nun, em inap mekim wok bilong mi, olsem na mi laik bai yu go kisim em i kam na putim han bilong yu antap long em.+ 19 Na bringim em i kam sanap long ai bilong pris Eleasar na olgeta manmeri, na yu mas tokim ol olsem yu givim wok bilong yu long em.+ 20 Na yu mas givim hap namba* bilong yu long em,+ bai olgeta manmeri bilong Israel i ken bihainim tok bilong em.+ 21 Tasol Josua bai i go lukim pris Eleasar bilong painimaut laik bilong mi long olgeta samting. Na Eleasar i mas yusim Urim*+ bilong kisim save long laik bilong Jehova. Na em bai tokim Josua na olgeta manmeri bilong Israel.”
22 Orait Moses i mekim olsem Jehova i bin tokim em. Em i bringim Josua i kam sanap long ai bilong pris Eleasar na olgeta manmeri. 23 Na em i putim han bilong em antap long Josua na tokaut olsem em i givim wok bilong em long Josua.+ Moses i mekim olsem Jehova i bin tokim em.+