1 Stori
11 Bihain olgeta manmeri bilong Israel i kam lukim Devit long Hebron+ na ol i tokim em olsem: “Harim! Mipela i wanblut tru bilong yu.*+ 2 Long bipo taim Sol i stap king, yu tasol i save lidim ol Israel i go long pait.*+ Na Jehova, God bilong yu, i bin tokim yu olsem: ‘Yu bai kamap wasman bilong Israel, em ol manmeri bilong mi, na yu bai kamap lida bilong ol manmeri bilong mi Israel.’”+ 3 Na olgeta hetman bilong Israel i kam bung wantaim king long Hebron, na Devit i wokim kontrak wantaim ol long ai bilong Jehova long Hebron. Na ol i anointim* Devit na em i kamap king bilong Israel+ olsem Jehova i bin tokaut long rot bilong Samuel.+
4 Bihain Devit wantaim olgeta man Israel i go long Jerusalem, em Jebus.+ Ol Jebus+ i save sindaun long dispela hap. 5 Na ol Jebus i tok bilas long Devit olsem: “Yu bai i no inap tru long kam insait long taun bilong mipela!”+ Tasol Devit i pait na kisim dispela taun Saion+ i gat strongpela banis. Bihain ol i kolim nem bilong dispela taun olsem, Taun Bilong Devit.+ 6 So Devit i tok: “Wanem man i fes man long kilim i dai wanpela Jebus, em bai kamap hetman* na nambawan ofisa.” Orait Joap,+ pikinini man bilong Seruia, em i fes man long i go pait, na em i kamap hetman. 7 Na Devit i go sindaun long dispela taun i gat strongpela banis. Em as na ol i kolim nem bilong dispela taun olsem, Taun Bilong Devit. 8 Na em i wokim ol banis bilong taun na ol haus i raunim dispela hap, kirap long Liklik Maunten* na i go raunim ol arapela hap i stap klostu long taun. Na Joap i wokim gen ol arapela hap bilong taun. 9 Na Devit i wok long kamap strong moa yet,+ na Jehova, bosman bilong bikpela lain ami,* i stap wantaim em.
10 Dispela em ol hetman bilong ol strongpela soldia bilong Devit. Ol dispela man wantaim olgeta Israel i bin helpim em long kamap king, olsem Jehova i bin promisim ol Israel.+ 11 Lista bilong ol strongpela soldia bilong Devit i olsem: Jasobeam,+ tumbuna pikinini bilong Hakmoni, em i lida bilong 3-pela strongpela soldia.+ Wanpela taim em i bin holim spia na pait long 300 man na kilim olgeta i dai.+ 12 Narapela em Eleaser,+ pikinini man bilong Dodo bilong lain Ahohi.+ Eleasar em i wanpela bilong dispela 3-pela strongpela soldia. 13 Eleaser i bin stap wantaim Devit long Pas-damim,+ em hap we ol Filistia i bin kam bung bilong pait. Long dispela hap i gat wanpela gaden bali, na ol manmeri i lukim ol Filistia na ol i ranawe. 14 Tasol Eleaser i no surik, em i sanap namel long gaden na pait long ol Filistia bai ol i no ken kisim dispela graun. Na em i kilim ol Filistia i dai. Na long dispela rot, Jehova i mekim na ol manmeri bilong em i win tru.+
15 Orait 3-pela bilong ol 30 lida i go daun long ston bilong lukim Devit long keiv bilong Adulam.+ Long dispela taim ami bilong Filistia i wokim kem bilong ol long Veli* Bilong Refaim+ na i stap long dispela hap. 16 Devit i stap long dispela strongpela ples hait, na lain soldia bilong ol Filistia i stap long Betlehem. 17 Na Devit i tingting i go bek long gutpela wara bilong Betlehem na i tok: “Sapos mi dringim sampela wara bilong hulwara i stap klostu long geit bilong Betlehem,+ mi bai amamas tru!” 18 Dispela 3-pela soldia i harim dispela tok na ol i kirap i go. Maski ol Filistia i stap long kem bilong ol, dispela 3-pela soldia i sakim ol na i go pulimapim wara long hulwara long geit bilong Betlehem. Na ol i bringim i kam long Devit; tasol Devit i no laik dring, nogat, em i kapsaitim long graun long ai bilong Jehova. 19 Em i tok olsem: “Mi no ken dring dispela wara, long wanem, i no stret long mi mekim olsem long ai bilong God bilong mi! Sapos mi dring, i olsem mi dringim blut bilong ol dispela man,+ long wanem, ol inap lusim laip bilong ol taim ol i go kisim wara.” Olsem na Devit i no dringim dispela wara. Dispela 3-pela strongpela soldia bilong em i bin mekim ol dispela samting.
20 Abisai,+ brata bilong Joap,+ i kamap lida bilong narapela 3-pela strongpela soldia; wanpela taim em i bin holim spia na pait long 300 man na kilim olgeta i dai. Em i gat biknem olsem dispela 3-pela arapela strongpela soldia.+ 21 Namel long dispela arapela 3-pela soldia, Abisai em i gat bikpela namba moa winim 2-pela bilong ol na em i lida bilong ol; tasol biknem bilong em i no olsem bilong dispela fes 3-pela strongpela soldia.
22 Benaia,+ pikinini man bilong Jehoiada, em i wanpela strongpela soldia.* Em i bin pait planti taim long Kapsel.+ Em i bin kilim i dai tupela pikinini man bilong Ariel bilong Moap. Na wanpela taim em i bin go daun long wanpela hulwara long taim sno i pundaun na kilim i dai wanpela laion.+ 23 Na tu, em i bin kilim i dai wanpela traipela man bilong Isip, longpela bilong en inap 5-pela kiubit.*+ Dispela man Isip i holim spia i kain olsem ba bilong masin bilong wivim laplap,+ tasol Benaia i holim wanpela stik na i go pait long em. Na em i pulim spia long han bilong dispela man Isip na kilim em i dai long dispela spia.+ 24 Benaia, pikinini man bilong Jehoiada, i bin mekim ol dispela samting. Em i gat wankain namba olsem bilong ol 3-pela strongpela soldia. 25 Em i gat bikpela namba moa winim ol arapela 30 strongpela soldia, tasol em i no gat biknem olsem bilong ol 3-pela strongpela soldia.+ Devit i makim em long bosim ol bodi-gad bilong em.
26 Ol strongpela soldia insait long ami em Asahel,+ brata bilong Joap, Elhanan, pikinini man bilong Dodo bilong taun Betlehem,+ 27 Samot bilong taun Haror, Heles bilong taun Pelon, 28 Ira,+ pikinini man bilong Ikes bilong taun Tekoa, Abi-eser+ bilong taun Anatot, 29 Sibekai+ bilong taun Husa, Ilai bilong lain Ahohi, 30 Maharai+ bilong ples Netofa, Helet,+ pikinini man bilong Beiana bilong ples Netofa, 31 Itai, pikinini man bilong Ribai bilong taun Gibea long graun bilong lain Benjamin,+ Benaia bilong taun Piraton, 32 Hurai bilong veli* bilong Gas,+ Abiel bilong ples Araba, 33 Asmavet bilong ples Bahurim, Eliaba bilong taun Salbim, 34 ol pikinini man bilong Hasem bilong taun Gison, Jonatan, pikinini man bilong Sage bilong ples Harar, 35 Ahiam, pikinini man bilong Sakar bilong ples Harar, Elifal, pikinini man bilong Ur, 36 Hefer bilong taun Mekera, Ahiya bilong taun Pelon, 37 Hesro bilong taun Karmel, Narai, pikinini man bilong Esbai, 38 Joel, brata bilong Natan, Miphar, pikinini man bilong Hakri, 39 na Selek bilong lain Amon, na Naharai bilong taun Berot, em man i save karim ol samting bilong Joap long pait. Joap em i pikinini man bilong Seruia; 40 na Ira bilong lain Itra, na Garep bilong lain Itra, 41 na Uria+ bilong lain Hit, na Sabat, pikinini man bilong Alai, 42 Adina, pikinini man bilong Saisa bilong lain Ruben, na em i hetman bilong lain Ruben na i gat 30 soldia i stap wantaim em; 43 na Hanan, pikinini man bilong Maka, na Josafat bilong lain Mitnait. 44 Yusaia bilong taun Astarot, na Sama na Jeiel em ol pikinini man bilong Hotam bilong taun Aroer; 45 na Jediael, pikinini man bilong Simrai, na brata bilong em, Joha bilong taun Tis; 46 na Eliel bilong taun Mahava, na Jeribai na Josavia em ol pikinini man bilong Elnam, na Itma bilong lain Moap; 47 na Eliel, Obet, na Jasiel bilong Mesoba.