Tok Bilong Jehova i Gat Laip

Sampela Bikpela Tok Bilong Buk Namba 1 Stori

INAP 77 yia i lus pinis bihain long taim ol Juda i lusim kalabus long Babilon na ol i go bek long ples. Tempel em Hetman Serubabel i bin wokim i stap inap 55 yia pinis. Nambawan as na ol lain Juda i go bek long ples em long stretim bek lotu i tru long Jerusalem. Tasol ol manmeri i no strong long lotuim Jehova. Olsem na ol i mas kisim sampela tok bilong strongim bel bilong ol. Namba 1 Stori i kamapim kain tok olsem.

Namba 1 Stori i kamapim lista bilong nem bilong ol tumbuna bilong ol Israel, na em i stori long ol samting i kamap insait long 40 yia, kirap long taim King Sol i dai na i go inap long taim King Devit i dai. Ol i ting pris Esra i raitim dispela buk long yia 460 B.C.E. Yumi laik save long ol samting Namba 1 Stori i toktok long en, long wanem, em i givim save long yumi long pasin bilong lotu ol i mekim long tempel na em i stori long lain tumbuna bilong Mesaia. Dispela buk em i hap bilong Baibel, na tok bilong en i strongim bilip bilong yumi na i helpim yumi long kliagut long tok bilong Baibel.​—⁠Hibru 4:⁠12.

LISTA BILONG OL NEM

(1 Stori 1:1–9:⁠44)

I gat 3-pela as na Esra i raitim lista bilong ol nem bilong ol lain tumbuna: bilong helpim ol Israel long save husat tasol inap mekim wok pris, na bilong helpim ol long save long ol hap graun bilong ol, na bilong lukautim lista bilong nem bilong ol lain tumbuna bilong Mesaia. Lista Esra i raitim i kolim nem bilong ol tumbuna bilong ol Juda i go bek olgeta long namba wan man Adam. I gat 10-pela lain tumbuna, kirap long Adam i go long Noa, na narapela 10-pela lain kirap long Noa i go long Abraham. Buk i kamapim nem bilong ol lain pikinini bilong Ismael, na ol pikinini bilong namba 2 meri bilong Abraham, em Ketura, na ol pikinini bilong Iso, na bihain em i stori long ol lain tumbuna pikinini bilong 12-pela pikinini man bilong Israel.​—⁠1 Stori 2:⁠1.

Esra i stori planti long ol lain tumbuna pikinini bilong Juda, long wanem, ol i kamapim lain bilong King Devit. I gat 14 lain tumbuna kirap long Abraham i go long Devit, na narapela 14 lain kirap long Devit na i go long taim lain Juda i go kalabus long Babilon. (1 Stori 1:​27, 34; 2:​1-15; 3:​1-17; Matyu 1:17) Orait nau Esra i raitim nem bilong ol lain tumbuna bilong Israel i stap long hap is bilong wara Jordan, na ol lain tumbuna pikinini bilong Livai. (1 Stori 5:​1-24; 6:⁠1) Bihain em i stori liklik long ol lain i stap long hap wes bilong wara Jordan na em i raitim nem bilong ol lain tumbuna pikinini bilong Benjamin. (1 Stori 8:⁠1) Em i raitim tu nem bilong ol namba wan lain i sindaun gen long Jerusalem bihain long ol i bin lusim Babilon.​—⁠1 Stori 9:​1-16.

Bekim Bilong Ol Askim Bilong Baibel:

1:​18​​—⁠Husat i papa bilong Sela​—⁠Kainan o Arpaksat? (Luk 3:​35, 36) Arpaksat em i papa bilong Sela. (Stat 10:24; 11:12) Ol i kolim kranki nem “Kainan” long Luk 3:​36, ating em i makim nem “Kaldia.” Sapos dispela i olsem, orait tok ol i bin raitim Baibel long en long pastaim bai i olsem, “pikinini man bilong Arpaksat bilong Kaldia.” O ating dispela nem Kainan na Arpaksat em nem bilong wanpela man tasol. Na tu, yumi ken save olsem dispela tok “pikinini bilong Kainan” i no stap long sampela rait bilong pastaim.​—⁠Luk 3:⁠36.

2:​15​​—⁠Olsem wanem? Devit i namba 7 pikinini bilong Jesi? Nogat. Jesi i gat 8-pela pikinini man, na Devit em i laspela pikinini man bilong em. (1 Samuel 16:​10, 11; 17:12) Wanpela pikinini bilong Jesi i dai na em i no bin gat pikinini. Nem bilong em i no inap helpim wok bilong dispela lista bilong nem bilong ol tumbuna, olsem na Esra i no raitim nem bilong em.

3:​17​​—⁠Bilong wanem Luk 3:27 i tok Sealtiel, pikinini man bilong Jehoiakin, em i pikinini bilong Neri? Jehoiakin em i papa bilong Sealtiel. Tasol Neri i givim pikinini meri bilong em long Sealtiel olsem meri bilong em. Luk i kolim Sealtiel, em man bilong pikinini meri bilong Neri, olsem pikinini bilong Neri, wankain olsem Luk i bin mekim long Josep. Em i kolim Josep olsem pikinini bilong Heli, em papa bilong Maria.​—⁠Luk 3:⁠23.

3:​17-​19​​—⁠Olsem wanem Serubabel, Pedaia, na Sealtiel ol i wanblut? Serubabel em i pikinini bilong Pedaia, na Sealtiel em i brata bilong Pedaia. Tasol sampela taim Baibel i tok Serubabel em i pikinini man bilong Sealtiel. (Matyu 1:12; Luk 3:27) Ating Baibel i tok olsem, long wanem, Pedaia i bin dai na Sealtiel i mekim bikpela long Serubabel. O ating Sealtiel i dai taim em i no kamapim yet pikinini, olsem na Pedaia i maritim meri bilong Sealtiel, na Serubabel em i namba wan pikinini bilong tupela.​—⁠Lo 25:​5-10.

5:​1, 2​​—⁠Josep i kisim namba olsem namba wan pikinini na dispela i makim wanem samting? Dispela i makim olsem Josep i kisim tupela hap bilong ol samting bilong papa bilong em. (Lo 21:17) Olsem na em i kamap papa bilong tupela lain​—⁠Efraim na Manase. Ol narapela pikinini man bilong Israel i kamap papa bilong wanpela lain tasol.

Skul Yumi Kisim:

1:1–9:​44. Lista bilong nem bilong ol tumbuna i kamapim klia olsem ol samting bilong lotu tru i no stori nating, nogat, em ol samting tru tru.

4:​9, 10. Jabes i beten askim Jehova long givim em planti graun na bai ol man i save lotuim God i ken i stap long en. Jehova i harim beten bilong em na mekim olsem Jabes i bin askim em. Yumi tu i mas beten askim Jehova long planti man moa i ken kam lotuim em, na yumi mas givim bel tru long insait long wok bilong autim tok na kamapim disaipel.

5:​10, 18-​22. Long taim bilong King Sol, ol lain i stap long hap is bilong wara Jordan i winim lain Hagar long pait maski lain Hagar i gat planti lain soldia moa. Dispela samting i kamap, long wanem, ol dispela man bilong lain Israel i bilip long Jehova na ol i askim em long helpim ol. Yumi mas bilip strong long Jehova taim yumi mekim pait bilong spirit long ol birua bilong yumi em ol i planti tru.​​—⁠Efesus 6:​10-17.

9:​26, 27. Ol lain Livai em ol i mekim wok olsem wasman bilong dua bilong tempel, ol i gat wanpela bikpela wok. Ol i holim ki bilong dua bilong ples holi bilong tempel. Ol i save opim dua bilong tempel long olgeta moning. Yumi kisim wok bilong autim tok long ol man long hap bilong yumi na helpim ol long kam lotuim Jehova. Yumi tu i mas mekim gut wok bilong yumi olsem ol lain Livai i save was long dua bilong tempel.

DEVIT I MEKIM WOK KING

(1 Stori 10:1–29:⁠30)

Dispela hap i kirap long stori bilong King Sol na 3-pela pikinini man bilong em ol i dai taim ol Israel i pait long ol Filistia long maunten Gilboa. Ol i makim Devit, pikinini bilong Jesi long kamap king bilong lain Juda. Ol man long olgeta lain bilong Israel i kam long Hebron na mekim Devit i kamap king bilong olgeta lain Israel. (1 Stori 11:​1-3) I no longtaim bihain, em i winim pait na kisim Jerusalem. Bihain ol lain Israel i kisim bokis kontrak i go long Jerusalem na ol i “amamas na singaut strong na ol i winim olkain biugel na paitim ol plet bras na olkain gita, na krai bilong musik i kamap bikpela moa.”​—⁠1 Stori 15:⁠28.

Devit i tokaut olsem em i laik wokim haus bilong God tru. Tasol Jehova i makim Solomon long wokim haus bilong em, na em i mekim kontrak bilong Kingdom wantaim Devit. Taim Devit i wok long pait long ol birua bilong lain Israel, Jehova i helpim em long winim olgeta pait. Inap 70,000 manmeri i dai, long wanem, Devit i tok long ol i mas kaunim namba bilong ol manmeri. Bihain long Devit i kisim toksave long ensel long em i mas wokim wanpela alta bilong Jehova, Devit i baim hap graun bilong Ornan, em man bilong lain Jebus. Devit i kirap “redim planti kain kain samting” bilong wokim wanpela “gutpela haus tru” bilong Jehova long dispela hap graun. (1 Stori 22:⁠5) Devit i stretim wok bilong ol lain Livai. Namba 1 Stori i kamapim gut dispela samting winim ol narapela hap bilong Baibel. King na ol manmeri i givim planti kontribiusen bilong wokim tempel. Devit i mekim wok king inap 40 yia na bihain em i dai. “Em i gat biknem long ai bilong ol manmeri, na tu em i gat planti mani samting. . . . Pikinini bilong en, Solomon i kisim ples bilong en na i kamap king.”​—⁠1 Stori 29:⁠28.

Bekim Bilong Ol Askim Bilong Baibel:

11:11​​—⁠Bilong wanem dispela ves i tok namba bilong ol man i dai em 300, tasol long wankain stori i stap long Namba 2 Samuel 23:8 em i tok 800 man i dai? Namba wan ofisa bilong 3-pela strongpela soldia bilong Devit em Jasobeam o Josep Basebet. Tupela narapela strongpela soldia em Eleasar na Sama. (2 Samuel 23:​8-11) Ating namba bilong ol man i dai i no wankain, long wanem, dispela tupela skripsa i stori long narapela narapela samting em wankain man tasol i mekim.

11:​20, 21​—⁠Abisai i gat wanem namba sapos yumi skelim namba bilong em wantaim 3-pela strongpela soldia bilong Devit? Abisai i no wanpela bilong dispela 3-pela strongpela soldia bilong Devit. Tasol olsem 2 Samuel 23:​18, 19 i tok, Abisai em i lida bilong ol 30 strongpela soldia na em i gat bikpela namba moa long ol. Abisai i kisim wankain biknem olsem dispela 3-pela strongpela soldia, long wanem, em i bin mekim wankain bikpela samting olsem Jasobeam.

12:8​​—⁠Olsem wanem pes bilong ol strongpela soldia bilong lain Gat i luk olsem “pes bilong ol laion”? Ol dispela strongpela man i stap wantaim Devit long ples drai nating. Gras bilong ol i kamap longpela, na dispela i mekim na lukluk bilong ol i olsem bilong laion.

13:5​​—⁠Wanem dispela “wara Sihor long mak bilong Isip”? Sampela i ting dispela tok i makim wanpela han wara bilong wara Nail. Tasol planti man i tok dispela wara i makim “wara long mak bilong Isip”​—⁠em wanpela longpela baret i stap olsem boda long hap saut-wes bilong Graun Bilong Promis.​—⁠Namba 34:​2, 5; Stat 15:⁠18.

16:​1, 37-​40; 21:​29, 30; 22:19​—⁠Kirap long taim ol i kisim Bokis Kontrak i go bek long Jerusalem na i go inap long taim ol i wokim tempel, ol Israel i bihainim wanem pasin bilong lotu? Paslain long taim Devit i kisim Bokis Kontrak i go long Jerusalem na putim insait long haus sel em i bin wokim, Bokis Kontrak i no bin stap long haus lotu sel inap planti yia. Orait nau em i stap long dispela haus sel long Jerusalem. Haus lotu sel i stap long Gibeon, na long dispela hap Hetpris Sadok na ol brata bilong em i save mekim ol ofa olsem Lo i makim. Ol i bihainim dispela pasin bilong lotu i go inap long taim ol i pinis long wokim tempel long Jerusalem. Taim tempel i pinis, ol i kisim haus lotu sel long Gibeon i go long Jerusalem, na ol i putim Bokis Kontrak long Rum Tambu Tru insait long tempel.​—⁠1 King 8:​4, 6.

Skul Yumi Kisim:

13:11. Taim ol samting yumi mekim i no kamap gutpela, yumi no ken kros na sutim tok long Jehova. Yumi mas skelim ol samting na luksave long wanem samting i mekim na hevi i kamap. Devit i bin mekim olsem. Em i lain long ol rong em i bin mekim na bihain em i bihainim pasin i stret bilong kisim Bokis Kontrak i go long Jerusalem.a

14:​10, 13-16; 22:​17-19. Long olgeta taim yumi mas beten askim Jehova long soim rot long yumi, nogut yumi mekim wanpela samting na dispela inap bagarapim yumi long ol samting bilong spirit.

16:​23-​29. Lotu bilong Jehova i mas i stap namba wan samting long laip bilong yumi.

18:⁠3. Jehova em Man Bilong Truim olgeta tok promis bilong em. Long rot bilong Devit, em i truim tok promis em i bin mekim long Abraham olsem em bai givim olgeta graun bilong Kenan long tumbuna pikinini bilong em. Mak bilong graun i kirap long “dispela liklik wara i stap long arere bilong kantri Isip na i go inap long bikpela wara Yufretis.”​—⁠Stat 15:18; 1 Stori 13:⁠5.

21:​13-​15. Jehova i tokim ensel long pasim sik nogut, long wanem, Em i sori long lain bilong em i mas karim hevi. Tru tumas, em i “God bilong marimari oltaim.”b

22:​5, 9; 29:​3-5, 14-16. Tru, Jehova i no makim Devit long wokim tempel, tasol Devit i soim pasin bilong amamas long givim ol samting. Bilong wanem? Long wanem, em i luksave olsem olgeta samting em i kisim i kam long Jehova na em i tenkyu tru long dispela. Yumi tu i mas tenkyu long Jehova, na dispela i mas kirapim yumi long givim ol samting.

24:​7-​18. Devit i tilim ol pris i go long 24 lain bilong mekim wok pris. Dispela pasin bilong mekim wok pris i stap yet taim ensel bilong Jehova i kam long Sekaraia, papa bilong Jon Bilong Baptais, na toksave long em olsem Jon bai kamap. Sekaraia em i bilong “lain bilong Abiya,” na long dispela taim em i mekim wok bilong em long tempel. (Luk 1:​5, 8, 9) Em nau, ol man i bin stap tru tru ol i mekim lotu i tru na i no ol man bilong ol stori nating bilong ol tumbuna. “Wokboi i gat gutpela tingting” i save stretim gut pasin bilong lotu long Jehova long nau, na yumi bai kisim planti blesing taim yumi wok gut wantaim dispela lain.​—⁠Matyu 24:⁠45.

Lotuim Jehova Wantaim “Wanpela Tingting Tasol”

Buk Namba 1 Stori i no stori tasol long lista bilong ol nem bilong ol tumbuna. Em i stori tu long Devit i kisim bokis kontrak i go long Jerusalem, ol pait Devit i winim, ol samting em i redim bilong wokim tempel, na long pasin bilong makim ol lain pris long mekim wok pris. Olgeta dispela samting Esra i stori long en long Namba 1 Stori i bin strongim lain Israel, na i helpim ol long givim bel long lotuim Jehova long tempel.

Devit i stap olsem gutpela piksa long putim lotu bilong Jehova i stap nambawan samting long laip bilong em! Em i no tingting long helpim em yet, nogat, Devit i wok long bihainim laik bilong God. Dispela i strongim yumi tu long bihainim tok bilong em long lotuim Jehova long ‘wanpela tingting tasol, na wok strong tru long bihainim laik bilong em.’​—⁠1 Stori 28:⁠9.

[Ol Futnot]

[Sat/Ol Piksa long pes 8-11]

(Bilong save ol dispela rait i stap we long pes, lukim buk o magasin)

4026 B.C.E. Adam Kirap long Adam i go long

Noa (1,056 yia)

130 yia ⇩

Set

105 ⇩

Enos

90 ⇩

Kenan

70 ⇩

Mahalalel

65 ⇩

Jaret

162 ⇩

Enok

65 ⇩

Metusela

187 ⇩

Lamek

182 ⇩

2970 B.C.E. Noa 2970 B.C.E. NOA i kamap

Kirap long Noa i go long

502 yia ⇩ Abraham (952 yia)

Siem

BIKPELA TAIT 2370 B.C.E.

100 ⇩

Arpaksat

35 ⇩

Sela

30 ⇩

Eber

34 ⇩

Pelek

30 ⇩

Reu

32 ⇩

Seruk

30 ⇩

Nahor

29 ⇩

Tera

130 ⇩

2018 B.C.E. Abraham 2018 B.C.E. ABRAHAM i kamap

Kirap long Abraham i go long

100 yia Devit: 14 lain (911 yia)

Aisak

60 ⇩

Jekop

c.88 ⇩

Juda

⇩

Peres

⇩

Hesron

⇩

Ram

⇩

Aminadap

⇩

Nason

⇩

Salmon

⇩

Boas

⇩

Obet

⇩

Jesi

⇩

1107 B.C.E. DEVIT i kamap