Namba

29 “‘Long de namba 1 bilong namba 7 mun, yupela i mas mekim wanpela bung holi, na yupela i no ken mekim wok bilong yupela.+ Long dispela de yupela i mas winim trampet.+ 2 Yupela i mas kisim wanpela yangpela bulmakau man, wanpela sipsip man, na 7-pela yangpela sipsip man em ol i gat wanpela krismas na olgeta i no ken i gat sik o bagarap long skin bilong ol. Na yupela i mas ofaim ol olsem ofa bilong paia i kukim olgeta i kamapim gutpela smel i go long Jehova. 3 Na yupela i mas ofaim ol dispela animal wantaim ofa bilong wit samting. Yupela i mas kisim 30 pesen bilong 1-pela ifa* bilong gutpela plaua em yupela i tanim wantaim oil na ofaim wantaim dispela bulmakau man, na kisim 20 pesen bilong 1-pela ifa* bilong gutpela plaua em yupela i tanim wantaim oil na ofaim wantaim dispela sipsip man. 4 Yupela i mas kisim 10 pesen bilong 1-pela ifa* bilong gutpela plaua em yupela i tanim wantaim oil na ofaim wantaim olgeta wan wan bilong ol 7-pela yangpela sipsip man, 5 na tu, yupela i mas ofaim wanpela yangpela meme man olsem ofa bilong tekewe sin bilong karamapim sin bilong yupela. 6 Yupela i mas mekim ol dispela ofa, na tu, yupela i mas mekim ofa bilong paia i kukim olgeta na ofa bilong wit samting+ na ofa bilong wain em yupela i save mekim long olgeta mun. Na yupela i mas mekim ol ofa bilong paia i kukim olgeta na ofa bilong wit samting+ na ofa bilong wain+ em yupela i save mekim long olgeta de. Yupela i mas bihainim lo bilong mekim ol dispela kain ofa olsem ofa bilong kamapim gutpela smel, em yupela i kukim long paia i go long Jehova.

7 “‘Long de namba 10 bilong namba 7 mun, yupela i mas mekim wanpela bung holi.+ Na yupela i mas soim olsem yupela i sori long ol sin yupela i bin mekim.* Na yupela i no ken mekim wok bilong yupela.+ 8 Na yupela i mas kisim wanpela yangpela bulmakau man, wanpela sipsip man, na 7-pela yangpela sipsip man em ol i gat wanpela krismas na olgeta i no ken i gat sik o bagarap long skin bilong ol.+ Na yupela i mas ofaim ol olsem ofa bilong paia i kukim olgeta i go long Jehova na i kamapim gutpela smel. 9 Na yupela i mas mekim ofa bilong wit samting wantaim dispela ofa. Yupela i mas kisim 30 pesen bilong 1-pela ifa* bilong gutpela plaua em yupela i tanim wantaim oil na ofaim wantaim dispela bulmakau man. Na yupela i mas kisim 20 pesen bilong 1-pela ifa* bilong gutpela plaua em yupela i tanim wantaim oil na ofaim wantaim dispela sipsip man. 10 Na yupela i mas kisim 10 pesen bilong 1-pela ifa bilong gutpela plaua em yupela i tanim wantaim oil na ofaim wantaim olgeta wan wan bilong dispela 7-pela yangpela sipsip man. 11 Na yupela i mas ofaim wanpela yangpela meme olsem ofa bilong tekewe sin. Na yupela i mas mekim tu ofa bilong tekewe sin+ bilong karamapim ol sin bilong yupela, na ofa bilong paia i kukim olgeta olsem yupela i save mekim long olgeta de na ofa bilong wit samting bilong en, na ofa bilong wain i go wantaim ol dispela ofa.

12 “‘Long de namba 15 bilong namba 7 mun, yupela i mas mekim wanpela bung holi, na yupela i no ken mekim wok bilong yupela. Yupela i mas mekim bung bilong lotu long Jehova inap 7-pela de.+ 13 Yupela i mas kisim 13 yangpela bulmakau man, 2-pela sipsip man, na 14 yangpela sipsip man em ol i gat wanpela krismas. Olgeta dispela animal i no ken i gat sik o bagarap long skin bilong ol.+ Na yupela i mas mekim ofa bilong paia i kukim olgeta,+ em ofa yupela i kukim long paia i kamapim gutpela smel i go long Jehova. 14 Na yupela i mas mekim ofa bilong wit samting wantaim dispela ofa. Yupela i mas kisim 30 pesen bilong 1-pela ifa bilong gutpela plaua em yupela i tanim wantaim oil na ofaim wantaim wan wan bilong dispela 13 bulmakau man. Na yupela i mas kisim 20 pesen bilong 1-pela ifa bilong gutpela plaua em yupela i tanim wantaim oil na ofaim wantaim wan wan bilong dispela 2-pela sipsip man. 15 Na yupela i mas kisim 10 pesen bilong 1-pela ifa bilong gutpela plaua em yupela i tanim wantaim oil na ofaim wantaim wan wan bilong dispela 14 yangpela sipsip man. 16 Na yupela i mas ofaim wanpela yangpela meme olsem ofa bilong tekewe sin. Na yupela i mas mekim tu ofa bilong paia i kukim olgeta, na ofa bilong wit samting, na ofa bilong wain,+ olsem yupela i save mekim long olgeta de.

17 “‘Long de namba 2, yupela i mas ofaim 12-pela yangpela bulmakau man, 2-pela sipsip man, na 14 yangpela sipsip man em ol i gat 1-pela krismas. Olgeta dispela animal i no ken i gat sik o bagarap long skin bilong ol.+ 18 Na yupela i mas mekim ofa bilong wit samting, na ofa bilong wain wantaim ol dispela bulmakau man, ol sipsip man, na ol yangpela sipsip man. Skel bilong ofa bilong wit samting na ofa bilong wain i mas stret long olgeta animal. Na yupela i mas bihainim lo bilong mekim ol dispela kain ofa. 19 Na yupela i mas ofaim wanpela yangpela meme olsem ofa bilong tekewe sin. Na yupela i mas mekim tu ofa bilong paia i kukim olgeta wantaim ofa bilong wain, na ofa bilong wit samting wantaim ofa bilong wain,+ olsem yupela i save mekim long olgeta de.

20 “‘Long de namba 3, yupela i mas ofaim 11-pela bulmakau man, 2-pela sipsip man, na 14 yangpela sipsip man em ol i gat 1-pela krismas. Olgeta dispela animal i no ken i gat sik o bagarap long skin bilong ol.+ 21 Na yupela i mas mekim ofa bilong wit samting, na ofa bilong wain wantaim ol dispela bulmakau man, ol sipsip man, na ol yangpela sipsip man. Skel bilong ofa bilong wit samting na ofa bilong wain i mas stret long olgeta animal. Na yupela i mas bihainim lo bilong mekim ol dispela kain ofa. 22 Na yupela i mas ofaim wanpela meme olsem ofa bilong tekewe sin. Na yupela i mas mekim tu ofa bilong paia i kukim olgeta, na ofa bilong wit samting, na ofa bilong wain,+ olsem yupela i save mekim long olgeta de.

23 “‘Long de namba 4, yupela i mas ofaim 10-pela bulmakau man, 2-pela sipsip man, na 14 yangpela sipsip man em ol i gat 1-pela krismas. Olgeta dispela animal i no ken i gat sik o bagarap long skin bilong ol.+ 24 Na yupela i mas mekim ofa bilong wit samting, na ofa bilong wain wantaim ol dispela bulmakau man, ol sipsip man, na ol yangpela sipsip man. Skel bilong ofa bilong wit samting na ofa bilong wain i mas stret long olgeta animal. Na yupela i mas bihainim lo bilong mekim ol dispela kain ofa. 25 Na yupela i mas ofaim wanpela yangpela meme olsem ofa bilong tekewe sin. Na yupela i mas mekim tu ofa bilong paia i kukim olgeta, na ofa bilong wit samting, na ofa bilong wain,+ olsem yupela i save mekim long olgeta de.

26 “‘Long de namba 5, yupela i mas ofaim 9-pela bulmakau man, 2-pela sipsip man, na 14 yangpela sipsip man em ol i gat 1-pela krismas. Olgeta dispela animal i no ken i gat sik o bagarap long skin bilong ol.+ 27 Na yupela i mas mekim ofa bilong wit samting, na ofa bilong wain wantaim ol dispela bulmakau man, ol sipsip man, na ol yangpela sipsip man. Skel bilong ofa bilong wit samting na ofa bilong wain i mas stret long olgeta animal. Na yupela i mas bihainim lo bilong mekim ol dispela kain ofa. 28 Na yupela i mas ofaim wanpela meme olsem ofa bilong tekewe sin. Na yupela i mas mekim tu ofa bilong paia i kukim olgeta, na ofa bilong wit samting, na ofa bilong wain,+ olsem yupela i save mekim long olgeta de.

29 “‘Long de namba 6, yupela i mas ofaim 8-pela bulmakau man, 2-pela sipsip man, na 14 yangpela sipsip man em ol i gat 1-pela krismas. Olgeta dispela animal i no ken i gat sik o bagarap long skin bilong ol.+ 30 Na yupela i mas mekim ofa bilong wit samting, na ofa bilong wain wantaim ol dispela bulmakau man, ol sipsip man, na ol yangpela sipsip man. Skel bilong ofa bilong wit samting na ofa bilong wain i mas stret long olgeta animal. Na yupela i mas bihainim lo bilong mekim ol dispela kain ofa. 31 Na yupela i mas ofaim wanpela meme olsem ofa bilong tekewe sin. Na yupela i mas mekim tu ofa bilong paia i kukim olgeta, na ofa bilong wit samting, na ofa bilong wain,+ olsem yupela i save mekim long olgeta de.

32 “‘Long de namba 7, yupela i mas ofaim 7-pela bulmakau man, 2-pela sipsip man, na 14 yangpela sipsip man em ol i gat 1-pela krismas. Olgeta dispela animal i no ken i gat sik o bagarap long skin bilong ol.+ 33 Na yupela i mas mekim ofa bilong wit samting, na ofa bilong wain wantaim ol dispela bulmakau man, ol sipsip man, na ol yangpela sipsip man. Skel bilong ofa bilong wit samting na ofa bilong wain i mas stret long olgeta animal. Na yupela i mas bihainim lo bilong mekim ol dispela kain ofa. 34 Na yupela i mas ofaim wanpela meme olsem ofa bilong tekewe sin. Na yupela i mas mekim tu ofa bilong paia i kukim olgeta, na ofa bilong wit samting, na ofa bilong wain,+ olsem yupela i save mekim long olgeta de.

35 “‘Long de namba 8, yupela i mas mekim wanpela spesel bung, na yupela i no ken mekim wok bilong yupela.+ 36 Yupela i mas kisim 1-pela bulmakau man, 1-pela sipsip man, na 7-pela yangpela sipsip man em ol i gat wanpela krismas. Olgeta dispela animal i no ken i gat sik o bagarap long skin bilong ol.+ Na yupela i mas mekim ofa bilong paia i kukim olgeta em ofa yupela i kukim long paia i kamapim gutpela smel i go long Jehova. 37 Na yupela i mas mekim ofa bilong wit samting, na ofa bilong wain wantaim dispela bulmakau man, sipsip man, na ol yangpela sipsip man. Skel bilong ofa bilong wit samting na ofa bilong wain i mas stret long olgeta animal. Na yupela i mas bihainim lo bilong mekim ol dispela kain ofa. 38 Na yupela i mas ofaim wanpela meme olsem ofa bilong tekewe sin. Na yupela i mas mekim tu ofa bilong paia i kukim olgeta, na ofa bilong wit samting, na ofa bilong wain,+ olsem yupela i save mekim long olgeta de.

39 “‘Yupela i mas mekim ol dispela ofa long Jehova long taim yupela i mekim ol bikpela bung bilong lotu,+ na tu, yupela i mas mekim ofa bilong inapim tok promis bilong yupela,+ na ol samting yupela i givim long laik bilong yupela yet olsem ofa,+ em ol ofa bilong paia i kukim olgeta,+ na ol ofa bilong wit samting,+ na ofa bilong wain,+ na ol sakrifais bilong kamap wanbel wantaim God.’”+ 40 Orait Moses i tokim ol Israel long olgeta samting em Jehova i bin tokim em.