Jeremaia
52 Sedekaia+ i gat 21 krismas taim em i kamap king, na em i stap king long Jerusalem inap 11-pela yia. Nem bilong mama bilong em, Hamutal,+ pikinini meri bilong Jeremaia bilong taun Lipna. 2 Em i wok long mekim ol pasin nogut long ai bilong Jehova, wankain olsem Jehoiakim i bin mekim.+ 3 Jehova i belhat, olsem na ol dispela samting i kamap long Jerusalem na Juda i go inap long em i rausim ol long ai bilong em.+ Na Sedekaia i bikhet na em i no laik stap aninit long king bilong Babilon.+ 4 Long namba 10 de bilong namba 10 mun long namba 9 yia bilong Sedekaia i stap king, King Nebukatnesar* bilong Babilon i kam wantaim olgeta ami bilong em long pait long Jerusalem. Ol i wokim kem na wokim banis i raunim taun Jerusalem olgeta.+ 5 Na ol i banisim taun i go inap long namba 11 yia bilong Sedekaia i stap king.
6 Na long namba 9 de bilong namba 4 mun,+ hangre i go nogut moa long taun, na ol manmeri bilong taun i no gat kaikai.+ 7 Ol i brukim banis bilong taun, na long nait ol soldia bilong Jerusalem i ranawe lusim taun long geit i stap namel long 2-pela banis klostu long gaden bilong king long taim ol Kaldia i banisim yet taun; na ol i bihainim rot i go olsem long Araba.+ 8 Tasol ol ami bilong Kaldia i ran i go bihainim King Sedekaia na ol i go kamap long em+ long ples nating bilong Jeriko, na ol ami bilong em i lusim em na ranawe i go nabaut. 9 Na ol i holimpas king na bringim em i go long king bilong Babilon long Ripla long graun bilong Hamat, na em i kotim em. 10 Na king bilong Babilon i kilim i dai ol pikinini man bilong Sedekaia long ai bilong em na em i kilim i dai tu ol hetman bilong Juda long Ripla. 11 Na king bilong Babilon i mekim Sedekaia i kamap aipas,+ na pasim hanlek bilong em long kopa sen na bringim em i go long Babilon, na em i putim em i stap kalabus i go inap long em i dai.
12 Long namba 10 de bilong namba 5 mun long namba 19 yia bilong King Nebukatnesar* i stap king bilong Babilon, Nebusaradan em kepten bilong ol gad na wokman bilong king bilong Babilon, i kam long Jerusalem.+ 13 Em i kukim haus bilong Jehova,+ na haus king, na olgeta haus long Jerusalem; na em i kukim tu haus bilong olgeta bikman. 14 Na olgeta ami bilong Kaldia em ol i kam wantaim kepten bilong ol gad, ol i brukim banis i raunim Jerusalem.+
15 Na Nebusaradan, kepten bilong ol gad, i kisim sampela bilong ol manmeri nating, na ol manmeri em ol i stap yet long taun i go kalabus. Na em i kisim tu ol manmeri i bin ranawe i go long king bilong Babilon, na ol saveman bilong wokim kain kain samting, na em i bringim ol i go kalabus.+ 16 Tasol Nebusaradan, em kepten bilong ol gad, i larim sampela bilong ol rabisman tru bilong Juda i stap bek na mekim wok long ol gaden wain na lukautim ol arapela gaden.+
17 Na ol Kaldia i go long haus bilong Jehova na brukbrukim 2-pela strongpela pos kopa,+ na ol wilkar+ na kopa tenk*+ i stap long haus bilong Jehova. Na ol i kisim olgeta kopa na karim i go long Babilon.+ 18 Ol i kisim tu ol baket, ol savol, ol tul bilong katim wik, ol boul,+ ol kap,+ na olgeta samting ol i wokim long kopa em ol i save yusim long mekim wok long tempel. 19 Kepten bilong ol gad i kisim ol dis,+ ol plet bilong karim paia, ol boul, ol baket, ol lamsten,+ ol kap, na ol boul em ol i bin wokim long gutpela gol na silva.+ 20 Tasol 2-pela strongpela pos, tenk, na 12-pela bulmakau+ em dispela tenk i stap antap long en, na ol wilkar bilong haus bilong Jehova em King Solomon i bin wokim long kopa, hevi bilong olgeta dispela kopa i moa yet na i no inap long man i skelim hevi bilong ol.
21 Ol dispela strongpela pos, wan wan bilong ol i go antap inap 18 kiubit,* na ol inap yusim rop bilong mesarim samting em longpela bilong en inap 12 kiubit bilong raunim pos;+ na bikpela bilong em inap olsem sais bilong 4-pela pinga,* na i gat hul insait long en. 22 Het bilong wanpela pos ol i wokim long kopa; na het bilong pos i go antap inap 5-pela kiubit;+ na net na ol pomigranet* i raunim het ol i wokim long kopa. Na namba 2 pos i luk wankain, na pomigranet i raunim em tu. 23 I gat 96 pomigranet i raunim het bilong pos; na inap 100 pomigranet i stap long dispela net.+
24 Kepten bilong ol gad i kisim tu bikpris Seraia,+ na Sefanaia+ em nambatu pris, na 3-pela man i save was long dua.+ 25 Na long taun em i kisim tu wanpela ofisa i save bosim ol soldia, na 7-pela gutpela pren bilong king em ol i stap long taun, na sekreteri bilong kepten bilong ami, em man i save kisim ol man long kamap soldia, na em i kisim 60 man namel long ol man nating i stap yet long taun. 26 Nebusaradan, kepten bilong ol gad, i kisim ol na bringim ol i go long king bilong Babilon long Ripla. 27 Na king bilong Babilon i kilim ol i dai long Ripla+ long graun bilong Hamat. Na ol i kisim ol manmeri Juda long ples bilong ol na bringim ol i go olsem ol kalabus.+
28 Namba bilong ol manmeri em Nebukatnesar* i kisim i go kalabus i olsem: long namba 7 yia bilong em i stap king, em i kisim 3,023 manmeri bilong Juda.+
29 Long namba 18 yia bilong Nebukatnesar* i stap king,+ em i kisim 832 manmeri bilong Jerusalem.
30 Long namba 23 yia bilong Nebukatnesar* i stap king, Nebusaradan, em kepten bilong ol gad, em i kisim 745 manmeri bilong Juda i go kalabus.+
Namba bilong olgeta manmeri i go kalabus em 4,600.
31 “Long yia Evil-merodak bilong Babilon i kamap king, em i larim* King Jehoiakin+ bilong Juda i lusim kalabus. Dispela samting i kamap long namba 25 de bilong namba 12 mun long namba 37 yia bilong King Jehoiakin bilong Juda i stap kalabus.+ 32 Em i mekim gutpela tok long Jehoiakin na givim em biknem na namba i winim biknem na namba bilong ol arapela king i stap wantaim em long Babilon. 33 So Jehoiakin i rausim ol klos bilong kalabus em i werim, na olgeta taim em i save kaikai wantaim king bilong Babilon i go inap long em i dai. 34 King bilong Babilon i save givim kaikai long em long olgeta de i go inap long em i dai.