Aisaia
53 Husat i bilip long dispela samting mipela i bin autim?*+
Na Jehova i bin kamapim long ples klia han bilong em long husat?+
2 Em bai kamap olsem wanpela liklik han bilong diwai+ long ai bilong em,* olsem rop bilong diwai i kamap long wanpela ples i no gat wara.
Em i no gat smatpela lukluk na em i no gat biknem;+
Na taim yumi lukim em, em i no luk nais na yumi no laik go klostu long em.*
3 Ol man i bin luk daun long em na ol i abrusim em,+
Em man husat i kliagut long pen na i save gut long hevi bilong sik.
I olsem pes bilong em i hait long yumi.*
Ol man i bin luk daun long em, na yumi mekim olsem em i samting nating.+
Tasol yumi tingim em olsem man em God i bin panisim* na mekim samting nogut i kamap long em na em i karim pen.
5 Tasol long ol sin bilong yumi,+ na ol i bin sutim em;+
Long ol rong bilong yumi, na ol i bin krungutim em.+
Em i bin kisim panismen bambai yumi ken i stap wanbel,+
Na bikos long ol bagarap long skin em i bin kisim, yumi kamap orait gen.+
6 Olsem ol sipsip, yumi olgeta i bin raun nabaut,+
Olgeta wan wan i bihainim rot bilong ol yet,
Na Jehova i mekim na rong bilong yumi olgeta i pundaun antap long em.+
7 Ol i bin mekim nogut long em+ na em i larim ol i givim pen long em,+
Tasol em i no opim maus bilong em.
Ol i bringim em i go olsem wanpela sipsip bilong kilim i dai,+
Olsem wanpela sipsip meri i no save krai taim ol i katim gras bilong en,
Na em i no opim maus bilong em.+
8 Bikos ol i no bin mekim stretpela kot* long em, ol i kisim em i go;
Na husat bai tingting long painimaut ol infomesen bilong lain tumbuna bilong em?*
Ol i pinisim em long graun bilong ol man i stap laip;+
Bikos long sin bilong ol manmeri bilong mi, ol i bin wipim em.*+
9 Na ol i bin givim em wanpela ples matmat* wantaim ol man nogut,+
Na wantaim ol maniman* long taim em i dai,+
Maski em i no bin mekim wanpela rong*
Na i no gat wanpela tok giaman i kam aut long maus bilong em.+
10 Tasol em laik bilong Jehova* long em i karim bikpela pen na hevi, na long larim em i kisim sik.
Sapos yu givim laip bilong em olsem ofa bilong mekim i dai asua,+
Orait em bai lukim ol pikinini bilong em, em bai stap inap longpela taim,+
Na long rot bilong em, ol samting Jehova i amamas long en bai kamap gut.+
11 Bikos long hevi em i karim, em bai lukim gutpela samting i kamap na em bai amamas.
Long rot bilong save bilong em, dispela stretpela man em wokman bilong mi+
Bai bringim planti manmeri i go long stretpela pasin,+
Na em bai karim ol rong bilong ol.+
12 Long dispela risen, mi bai tilim wanpela hap bilong ol samting i go long em namel long planti man,
Na em bai skelim ol gutpela samting ol i kisim long pait wantaim ol strongpela soldia,
Bikos em i bin givim laip bilong em na dai*+
Na ol man i tingim em olsem wanpela man bilong mekim sin;+
Em i bin karim sin bilong planti manmeri,+
Na em i bin mekim samting bilong helpim ol sinman.+