Jut Pas Em i Raitim
1 Mi Jut, mi wanpela wokboi bilong Jisas Krais na brata bilong Jems.+ Mi raitim dispela pas i go long yupela ol manmeri God i bin singautim.+ God Papa i laikim yupela na em i lukautim yupela, long wanem, yupela i bilong Jisas Krais:+
2 Marimari na bel isi na pasin laikim i ken kamap bikpela moa yet long yupela.
3 Ol pren tru, pastaim mi gat bikpela laik long raitim dispela pas na stori long olsem wanem God bai kisim bek yumi.+ Tasol mi lukim olsem mi mas raitim pas na kirapim yupela long pait strong long holimpas dispela wanpela bilip+ tasol em ol manmeri bilong God i bin kisim. 4 Mi raitim pas, long wanem, sampela man i kam na i stap namel long yupela, em ol i man nogut. Ol i ting bikpela pasin helpim bilong God i givim rot long ol long mekim pasin bikhet na i no sem.*+ Ol i no stap gut long Jisas Krais, em i Bikpela bilong yumi na man i bin baim* yumi. Bipo Rait Holi i bin tokaut long ol dispela man na long kot bilong God bai painim ol.+
5 Yupela i save pinis long dispela, tasol mi laik kirapim yupela long tingim gen olsem, maski Jehova* i bin kisim bek wanpela lain na ol i lusim Isip,+ bihain em i bagarapim ol manmeri bilong dispela lain em ol i no bilip.+ 6 Na ol ensel husat i no stap gut long wok bilong ol na ol i lusim ples stret bilong ol,+ em i pasim ol inap oltaim oltaim na ol i stap long bikpela tudak na wetim bikpela de bilong kot.+ 7 Na tu, Sodom na Gomora na ol taun i stap klostu, ol i mekim wankain pasin. Ol i bin insait tru long pasin pamuk* na ol i pamuk wantaim ol arapela long pasin i narakain tru.+ Olsem na ol i kisim strafe long rot bilong paia i stap oltaim oltaim na long dispela rot ol i stap olsem tok lukaut long yumi.+
8 Maski i gat dispela tok lukaut, ol dispela man tu ol i bihainim ol giaman tingting bilong ol yet na mekim ol kain kain pasin doti. Ol i luk daun long ol man i gat namba, na ol i mekim ol tok nogut long ol man em God i givim biknem long ol.+ 9 Tasol taim nambawan ensel+ Maikel+ i toktok wantaim Devil* na tok pait long bodi bilong Moses,+ em i no gat tingting liklik long mekim ol tok nogut+ long Satan, nogat, em i tok: “Jehova* i ken krosim yu.”+ 10 Tasol ol dispela man i tok nogut long ol samting ol i no kliagut long en.+ Ol i olsem ol animal i no gat tingting+ na i bihainim nating laik bilong bodi, na ol i bagarapim ol yet.
11 Sori tumas long ol! Ol i bihainim pasin bilong Kein.+ Na ol i tingim pe tasol na ol i hariap long bihainim pasin kranki bilong Balam.+ Na ol i bihainim pasin bilong Kora long mekim ol tok olsem ol man bilong bikhet, na ol i bagarap.+ 12 Long taim ol i kaikai wantaim yupela long ol bikpela kaikai yupela i wokim bilong kamapim pasin laikim,+ ol i stap olsem ol traipela ston i hait insait long wara. Ol i olsem ol wasman bilong sipsip i no pret long pulapim bel bilong ol yet tasol.+ Ol i olsem ol klaut i no bringim ren i kam na win i sakim i go i kam.+ Ol i olsem ol diwai i no karim kaikai long taim bilong en, ol i dai tupela taim* na ol man i kamautim. 13 Olsem biksi i kamapim spet bilong en, ol i kamapim ol pasin we inap semim ol.+ Olsem ol sta i no bihainim stret rot, ol i bilong i stap oltaim oltaim long tudak i blak nogut tru.+
14 Enok,+ em namba 7 man i kamap long lain bilong Adam, em tu i mekim tok profet i stret long ol, em i tok: “Harim! Jehova* i kam wantaim bikpela lain* ensel holi bilong em+ 15 bilong skelim olgeta man. Na long kotim olgeta man+ i sakim tok bilong em, em bai kotim ol long olgeta pasin nogut ol i bin mekim. Na em bai kotim olgeta sinman i sakim tok bilong em, long wanem, ol i mekim ol tok nogut tru long em.”+
16 Ol dispela man ol i man bilong toktok planti,+ ol i komplein tumas long olgeta samting i kamap long ol. Ol i save bihainim laik nogut bilong ol yet tasol,+ na maus bilong ol i apim nem bilong ol yet. Ol i mekim ol switpela tok bilong grisim ol man long bihainim laik bilong ol.+
17 Tasol yupela ol pren tru, tingim gen ol tok em bipo ol aposel bilong Bikpela Jisas Krais i bin autim. 18 Ol i bin tokim yupela olsem: “Long taim bilong las de bai i gat ol man bilong tok bilas, bai ol i bihainim ol laik nogut bilong ol yet na mekim ol pasin i nogut tru.”+ 19 Ol i man bilong brukim lain,+ ol i bihainim pasin olsem ol animal na holi spirit bilong God i no stap wantaim ol. 20 Tasol yupela ol pren tru, oltaim larim bilip holi bilong yupela i mekim yupela i kamap strong moa yet, na beten long strong bilong holi spirit.+ 21 Taim yupela i mekim olsem, yupela bai stap insait yet long pasin laikim bilong God.+ Yupela i mas bilip na wet long marimari bilong Bikpela Jisas Krais long opim rot long yupela long kisim laip oltaim.+ 22 Na tu, wok yet long marimari+ long sampela man i gat tupela tingting;+ 23 I olsem ol i stap insait long paia, olsem na yupela i mas kisim bek ol.+ Tasol marimari yet long ol arapela na mekim wantaim pret. Ol i mekim klos bilong ol i kamap doti taim ol i mekim ol pasin nogut.+ Olsem na taim yupela i mekim pasin marimari long ol, yupela i mas stap longwe long ol dispela klos.
24 God em inap tru long lukautim yupela na bai yupela i no ken pundaun, na em inap long mekim yupela i stap klin+ na bai yupela i ken sanap long ai bilong God bilong yumi i gat biknem, na yupela bai kisim bikpela amamas tru. 25 God em i Seivia bilong yumi, na long rot bilong Jisas Krais, Bikpela bilong yumi, God i ken kisim glori, biknem, strong, na namba inap oltaim oltaim, long nau na long olgeta taim bihain. Amen.