Josua

20 Jehova i tokim Josua: 2 “Yu mas tokim ol Israel olsem, ‘Yupela i mas makim ol taun bilong hait+ olsem mi bin tokim yupela long rot bilong Moses, 3 na sapos man i no min o em i popaia na kilim i dai narapela man, orait em i ken ranawe i go long wanpela bilong ol dispela taun. Na ol dispela taun bai stap olsem ples hait bilong yupela na bai wanblut bilong man i dai* i no ken bekim dai bilong dispela man.+ 4 Em i mas ranawe i go long wanpela bilong ol dispela taun+ na sanap long geit bilong banis bilong taun+ na tokaut long keis bilong em long ol hetman bilong dispela taun. Na ol dispela hetman i mas larim em i go insait long taun na givim em wanpela ples long stap na em bai stap wantaim ol. 5 Na sapos wanblut bilong man i dai i ron bihainim em i kam, orait ol i no ken putim dispela man long han bilong wanblut, long wanem, em i no bin heitim wantok na kilim em i dai, nogat, em i popaia na kilim em.+ 6 Dispela man i mas stap long dispela taun i go inap em i sanap long kot long ai bilong olgeta man.+ Na em i mas stap long dispela taun i go inap long hetpris husat i mekim wok long dispela taim, em i dai.+ Orait bihain em i ken go bek long taun bilong em, em taun em i bin ranawe long en, na em i ken go insait long taun bilong em na long haus bilong em.’”+

7 Orait ol i givim ol dispela taun bilong mekim spesel wok, Kedes+ long Galili long ples maunten bilong Naptali, Sekem+ long ples maunten bilong Efraim, na Kiriat-arba,+ em Hebron, long ples maunten bilong Juda. 8 Na long graun bilong traib bilong Ruben long Jordan long hap is bilong Jeriko, ol i makim Beser+ long ples nating antap long fletpela hap bilong maunten. Na long graun bilong traib bilong Gat, ol i makim Ramot+ long Gileat. Na long graun bilong traib bilong Manase,+ ol i makim Golan+ long Basan.

9 Ol i makim ol dispela taun bilong ol Israel na bilong ol man bilong narapela ples i kam sindaun sotpela taim wantaim ol. Sapos man i no min na em i kilim i dai narapela man, orait em i ken ranawe i go long wanpela bilong ol dispela taun.+ Em i mas mekim olsem na bai em i no ken i dai long han bilong wanblut bilong man i dai, paslain long em i sanap long kot long ai bilong ol hetman.+