Buk Song
Tok i go long dairekta. Devit i raitim dispela song.
19 Skai i tokaut long biknem bilong God;+
Olgeta samting i stap long skai* i tokaut long ol samting em i bin wokim long han bilong em.+
2 Long olgeta de ol i save tokaut long dispela samting olsem wara i save ron oltaim,
Na long olgeta nait ol i kamapim save bilong God.
3 Ol i no gat maus na ol i no inap toktok;
Na yumi no save harim nek bilong ol.
4 Tasol long olgeta hap bilong graun ol man i harim nek* bilong ol,
Na tok bilong ol i go long olgeta hap bilong graun we ol manmeri i stap long en.+
Long skai em i sanapim haus sel bilong san;
5 San i kam ausait, olsem man i marit nupela na i belgut, na i lusim rum bilong em na i kam ausait;
Em i save amamas na bihainim rot bilong en olsem strongpela man i amamas long ran long resis.
6 Em i save kirap long wanpela sait bilong skai,
Na em i save wokabaut raunim skai i go kamap long hapsait;+
Na i no gat wanpela samting inap hait long hat bilong en.
7 Lo bilong Jehova em i stret olgeta+ na i save givim nupela strong long man.+
Tok bilong Jehova em i samting yumi inap trastim tru,+ em i save givim savetingting long man i no gat planti save.+
8 Tok bilong Jehova i stret tru na i save mekim man i belgut;+
Lo bilong Jehova i gutpela tru na i mekim ai bilong man i lait.+
9 Pasin bilong pret long Jehova+ i gutpela tru, dispela pasin i save stap oltaim oltaim.
Ol disisen bilong Jehova i tru na i stret olgeta.+
10 Man i mas laikim tru ol, winim gol,
Na moa yet winim gutpela gol,+
Ol i swit tumas winim hani,+ na i swit moa yet winim tru gutpela switpela hani.
11 Na long rot bilong ol, wokman bilong yu i kisim tok lukaut;+
Man i bihainim ol, em bai kisim gutpela pe tru.+
12 Husat inap luksave long ol popaia man yet i mekim?+
Tokaut olsem mi no gat asua long ol sin em mi no save olsem mi bin mekim.