Kisim Bek
31 Na Jehova i tok moa long Moses olsem: 2 “Harim, mi bin makim* Besalel,+ pikinini man bilong Uri, em tumbuna pikinini bilong Hur long traib bilong Juda.+ 3 Bai mi givim spirit bilong mi* long em, na bai em i gat savetingting, gutpela save, na save bilong wokim olgeta kain samting, 4 na long wokim ol kain kain disain, na wokim ol samting long gol, silva, na kopa, 5 na long katim ol ston i dia tumas na wokim ol bilas bilong ol,+ na long katim na sapim kain kain samting long diwai.+ 6 Na bilong helpim Besalel, mi makim Oholiap,+ pikinini man bilong Ahisamak long traib bilong Dan. Na bai mi putim savetingting long bel bilong ol man i save gut long mekim wok, na bai ol i ken wokim olgeta samting mi tokim yu long en.+ 7 Ol bai wokim haus sel bilong bung,+ Bokis Kontrak+ na ai bilong en,+ na olgeta samting bilong haus sel, 8 na tebol+ na ol samting bilong en, na lamsten em ol bai wokim long gutpela gol na olgeta samting bilong en,+ na alta bilong smok i gat gutpela smel,+ 9 na alta bilong ofa bilong paia i kukim olgeta+ na olgeta samting bilong en, na dis wantaim tebol bilong en,+ 10 na ol gutpela klos em ol i samapim gut, ol klos holi bilong pris Aron, na klos bilong ol pikinini man bilong em bilong mekim wok pris,+ 11 na ol bai wokim oil holi, na paura i gat gutpela smel bilong ples holi.+ Ol bai wokim olgeta samting mi tokim yu long en.”
12 Na Jehova i tok moa long Moses: 13 “Yu mas tokim ol Israel olsem, ‘Yupela i mas bihainim lo bilong mi bilong ol sabat,+ long wanem, dispela em mak bilong kontrak namel long mi na yupela. Ol tumbuna pikinini bilong yupela i kamap bihain bai lukim dispela mak na luksave olsem mi, Jehova, mi mekim yupela i kamap holi. 14 Yupela i mas bihainim lo bilong Sabat, long wanem, em i samting holi long yupela.+ Sapos wanpela man i brukim lo bilong Sabat, orait yupela i mas kilim em i dai. Na sapos wanpela man i mekim wok long dispela de, orait yupela i mas kilim dispela man i dai.+ 15 Yupela i gat 6-pela de bilong mekim wok, tasol de namba 7 em sabat, em de bilong malolo+ na i holi long Jehova. Sapos wanpela man i mekim wok long de Sabat, orait yupela i mas kilim em i dai. 16 Ol Israel i mas tingim Sabat; ol lain tumbuna bilong yupela i kamap bihain i mas tingim Sabat. Dispela kontrak i bilong i stap oltaim oltaim. 17 Sabat em mak bilong kontrak namel long mi na ol manmeri bilong Israel inap oltaim oltaim,+ long wanem, insait long 6-pela de Jehova i wokim skai na graun. Na long de namba 7 em i stop long wok na em i malolo.’”+
18 Taim em i toktok pinis long Moses long Maunten Sainai, em i givim Moses 2-pela fletpela ston em i bin raitim ol tok bilong em.+ God yet i bin raitim ol tok long dispela 2-pela ston long pinga bilong em.+