Nahum
1 Tokaut bilong bagarap bai painim Ninive.+ Dispela buk i stori long visen em Nahum,* wanpela man bilong Elkos i lukim.
2 God Jehova i laik bai ol man i mas lotu long em wanpela tasol,+ na em i save bekim rong bilong ol man i mekim rong;
Jehova i save bekim rong bilong ol man i mekim rong na em i redi long kamapim belhat bilong em.+
Jehova i save bekim pe nogut long ol birua bilong em.
Na em i belhat long ol birua bilong em.
3 Jehova i no save belhat kwik,+ maski em i gat bikpela strong,+
Na Jehova i save mekim save long ol man i gat asua.+
Taim em i wokabaut, bikpela win na ren i save kamap,
Na ol klaut i kamap olsem das aninit long lek bilong em.+
Na ol samting long Basan na Karmel tu i drai,+
Na ol plaua na diwai samting i stap long Lebanon tu i drai.
Graun i save guria taim em i lukim pes bilong em.
Na olgeta manmeri i stap long graun i save guria.+
6 Taim em i belhat, husat inap abrusim bagarap?+
Na taim em i kros, husat inap i stap gut?+
Belhat bilong em i olsem paia i kukim ol man,
Na belhat bilong em i mekim na ol ston i bruk bruk nabaut.
7 Jehova i gutpela.+ Em i stap olsem ples hait bilong ol manmeri long taim bilong hevi.+
Em i save tingim* ol manmeri em ol i save go long em bilong kisim helpim.+
8 Em bai i bagarapim em* olgeta olsem bikpela tait wara i kam na bagarapim olgeta samting,
Na ol birua bilong em bai i bungim tudak.
9 Yupela i ting yupela inap mekim wanpela samting long Jehova, a? Nogat tru.
Em bai pinisim yupela olgeta.
Yupela bai i bagarap olgeta!+
10 Yupela i olsem ol rop i gat nil i pas wantaim,
Na yupela i olsem ol man i dring bia* na i spak nogut tru;
Tasol yupela bai i pinis olgeta olsem pipia bilong gras i drai em paia i kukim na i pinis olgeta.
11 Wanpela man bilong yu i gat tingting long bagarapim ol manmeri bilong Jehova,
Na em i givim yu tingting nogut.
12 Tasol Jehova i tok olsem:
“Ol i gat bikpela strong na ol i gat bikpela lain i stap,
Tasol ol bai bagarap na pinis olgeta.*
Mi bin mekim save long yu,* tasol bai mi no ken mekim olsem moa.
13 Nau bai mi brukim hap plang* bilong em i stap long nek bilong yu,+
Na sen i pasim yu, mi bai brukim long tupela hap.
14 Jehova i tok olsem long yu,*
‘Bai i no gat lain tumbuna bilong yu i kamap moa na holim nem bilong yu.
Mi bai bagarapim ol imis em yu bin wokim na ol stetiu em yu bin wokim long ain i stap long haus* bilong ol giaman god bilong yu.
Mi bai wokim matmat bilong yu, long wanem, yu stingpela samting.’
15 Lukim! Wanpela man i wokabaut i kam long ol maunten, lek bilong em i bringim gutnius i kam,
Em i man bilong autim tok long bel isi.+
Yupela ol manmeri bilong Juda, yupela i mas mekim ol bikpela bung+ bilong yupela na truim ol tok promis bilong yupela.
Long wanem, ol man nogut bai i no inap bagarapim kantri bilong yupela gen.
Ol bai bagarap olgeta.”