Jop
2 Bihain taim i kamap gen bilong ol pikinini bilong God tru*+ i kam bung long ai bilong Jehova,+ so ol i kam bung, na Satan tu i kam bung wantaim ol long ai bilong Jehova.+
2 Orait Jehova i askim Satan olsem: “Yu stap we na yu kam?” Na Satan i bekim tok long Jehova olsem: “Mi no stap long wanpela hap tasol bilong graun. Mi raun long olgeta hap na mi kam.”+ 3 Na Jehova i askim Satan olsem: “Yu lukim tu wokman bilong mi Jop o nogat? I no gat wanpela man long graun i olsem em. Em i stretpela man na em i save stap gut long mi.*+ Em i save pret long God, na em i no save mekim wanpela pasin nogut. Em i holimpas yet pasin bilong i stap gut long mi,+ maski yu tokim mi long bagarapim* em+ nating.” 4 Tasol Satan i bekim tok long Jehova olsem: “Tru, a? Tasol sapos wanpela man i laik i dai, em bai givim olgeta samting bilong em bilong seivim laip bilong em yet. 5 Tasol sapos yu putim han bilong yu i go na mekim save long bodi bilong em, orait bai yu lukim em i mekim tok nogut long yu long ai bilong yu stret.”+
6 Na Jehova i tokim Satan olsem: “Harim! Mi larim em i stap long han bilong yu! Yu ken mekim wanem samting yu laik mekim long em, tasol yu no ken kilim em i dai!” 7 Orait Satan i lusim Jehova na i go. Na em i mekim ol strongpela boil nogut*+ i kamap long lek bilong Jop i go inap long het bilong em. 8 Na Jop i go sindaun i stap long sit bilong paia+ na em i kisim wanpela hap sospen graun i bruk bilong sikirapim skin bilong em.
9 Orait bihain meri bilong em i tokim em olsem: “Yu holimpas yet pasin bilong yu long i stap gut long God, a? Mobeta yu tok nogut long God na yu dai!” 10 Tasol Jop i bekim tok long meri bilong em olsem: “Yu toktok olsem wanpela meri i no gat gutpela tingting. Sapos yumi save kisim ol gutpela samting God tru i save givim yumi, orait yumi mas kisim tu ol samting nogut.”+ Tru ol dispela samting i kamap long Jop, tasol em i no mekim wanpela sin long tok bilong em.+
11 Na 3-pela pren bilong Jop i harim tok long hevi i painim Jop, na ol i lusim ples bilong ol wan wan na ol i kam. Elifas,+ em man bilong ples Teman, Bildat,+ bilong lain Suha,+ na Sofar,+ bilong ples Nama.* Ol i bin pasim tok namel long ol yet long bung, olsem na ol i kam bung na ol i go lukim Jop bilong soim sori bilong ol long em na strongim bel bilong em. 12 Taim ol i wokabaut i kam longwe yet na lukim em, ol i no luksave olsem em Jop. Tasol taim ol i luksave long em, ol i krai bikpela na brukim klos bilong ol na tromoi das i go antap na das i pundaun long het bilong ol.+ 13 Na ol i sindaun long graun wantaim em inap 7-pela de na 7-pela nait. Na ol i no mekim wanpela tok long em, long wanem, ol i lukim olsem em i karim bikpela pen tumas.+