Tok Bilong Jehova i Gat Laip

Sampela Bikpela Tok Bilong Buk Jop

JOP i sindaun long kantri Us, long nau em hap bilong Arebia. Planti lain Israel i stap long Isip long dispela taim. Jop i no man Israel, tasol em save lotuim Jehova. Baibel i tok long Jop olsem: “Em i gutpela man tru na i no gat asua long ai bilong mi. Em i save lotu na aninit long mi, na i save bihainim olgeta tok bilong mi. Em i no save mekim wanpela pasin nogut. Long olgeta hap bilong graun i no gat wanpela man i olsem em.” (Jop 1:8) I luk olsem Jop i bin stap bihain long taim bilong Josep, pikinini bilong Jekop, na paslain long taim bilong Moses.

Ol i ting Moses i bin raitim Buk Jop, na i luk olsem em i bin kisim save long stori bilong Jop taim em i stap 40 yia long Midian, em Midian i stap klostu long kantri Us. Stori bilong ol samting i painim Jop taim em i lapun pinis, ating Moses i bin harim dispela stori taim ol Israel i stap klostu long kantri Us long pinis bilong 40 yia raun bilong ol long ples drai nating.a Man i bin raitim stori bilong Jop i mekim gutpela wok tru, olsem na ol i tok stori bilong Jop em i gutpela tru, winim ol stori bilong bipo na bilong nau. Tasol ol samting i bin painim Jop i no wanpela gutpela stori tasol. Nogat. Buk Jop i bekim ol dispela askim: Bilong wanem ol gutpela man i save karim pen? Bilong wanem Jehova i larim pasin nogut i stap? Ol sinman inap bihainim tru God? Buk Jop em i hap bilong Baibel, olsem na tok bilong em i gat laip na em i wok strong long taim bilong yumi tu.​—Hibru 4:12.

‘BAGARAPIM DISPELA DE MAMA I BIN KARIM MI’

(Jop 1:1–3:26)

Long ai bilong God, Satan i sutim tok long pasin bilong Jop long bihainim tru God. Jehova i orait long dispela samting na em i larim Satan i mekim kain kain samting bilong bagarapim Jop. Tasol Jop i no “tok nogut long [God].”​—Jop 2:9.

Tripela pren bilong Jop i kam bilong “sori long em.” (Jop 2:11) Ol i sindaun na ol i no mekim wanpela tok i go inap Jop i kirap na tok: “God i no laik bagarapim dispela . . . de mama i bin karim mi long en.” (Jop 3:3) Em i laik stap olsem pikinini ‘i dai long bel bilong mama na i no bin lukim lait bilong san.’​—Jop 3:​11, 16.

Bekim Bilong Ol Askim Bilong Baibel:

1:4​​—Yu ting ol pikinini bilong Jop i save tingim betde bilong ol? Nogat, ol i no bin mekim olsem. Sampela i ting ol i bin mekim, long wanem, sampela Baibel i tanim tok bilong dispela ves olsem ol wan wan pikinini man “bai mekim bikpela kaikai long haus bilong ol yet long de bilong ol yet.” Tasol long tok Hibru, tok ol i yusim bilong makim “de” na “betde” i no wankain, ol i gat mining bilong ol yet. (Stat 40:20) Long Jop 1:​4, NW, ol i yusim dispela tok “de,” na em i makim wanpela haptaim i kirap long san i kamap na i pinis taim san i go daun. I luk olsem wanpela taim long olgeta yia ol 7-pela pikinini man bilong Jop i save mekim bung bilong famili inap 7-pela de. Insait long dispela 7-pela de, wan wan pikinini man bai lukautim dispela bung long haus bilong em ‘long de bilong em yet.’

1:6; 2:1​—Jehova i larim husat i kam bung long ai bilong em? Insait long lain i kam bung em dispela wanpela Pikinini tasol bilong God, em Tok; ol gutpela ensel; na ol bikhet ensel wantaim Satan. (Jon 1:​1, 18) Satan na ol ensel nogut i bin stap long heven i go inap Kingdom Bilong God i kamap long heven long 1914. (KTH 12:​1-12) Jehova i larim ol bikhet ensel nogut i kam bung na long dispela rot em i larim olgeta ensel i save long dispela tok Satan i bin sutim long em na long ol bikpela tok dispela samting i kamapim.

1:7; 2:2​—Yu ting Jehova yet i bin toktok wantaim Satan? Baibel i no stori tumas long olsem wanem Jehova i save toktok wantaim ol ensel. Tasol long wanpela driman profet Mikaia i lukim wanpela ensel i toktok wantaim Jehova. (1 King 22:​14, 19-23) Olsem na i luk olsem taim Jehova i toktok wantaim Satan em i no toktok wantaim em long rot bilong wanpela namelman.

2:9​—Ating tingting bilong meri bilong Jop i mas stap olsem wanem taim em i tokim Jop long tok nogut long God na dai? Ol hevi i bin painim Jop i bin painim meri bilong em tu. Pastaim man bilong em i bin stap strong na nau em i gat wanpela sik nogut tru. Olgeta pikinini bilong em i dai pinis. Ol dispela samting i mekim na bel na tingting bilong em i bagarap na em i no inap tingim wanem samting i bikpela samting tru​—em pasin bilong tupela long pas gut wantaim God.

Skul Yumi Kisim:

1:​8-11; 2:​3-5. Ol samting Jop i mekim i kamapim klia olsem bilong bihainim tru Jehova, stretpela laik na tingting i mas kirapim man long mekim ol pasin na toktok i stret.

1:​21, 22. Yumi kamapim long ples klia olsem Satan em i man bilong giaman taim yumi stap gut long Jehova long gutpela taim na long taim nogut.​—Sindaun 27:11.

2:​9, 10. Olsem Jop, yumi laik stap strong long bilip maski ol wanblut i ting ol samting bilong spirit yumi mekim i samting nating o ol i laik kirapim yumi long lusim bilip bilong yumi.

2:13. Tripela pren bilong Jop i no bin kamapim sampela tok bilong God na ol promis bilong em bilong mekim gut bel bilong Jop, long wanem, ol i no gat wankain tingting olsem God.

“MI NO BIN MEKIM RONG NA MI NO GAT ASUA”

(Jop 4:1–31:40)

Bikpela poin 3-pela pren bilong Jop i kamapim long ol tok ol i mekim i olsem ol i ting Jop i bin mekim bikpela rong, olsem na God i givim bikpela strafe long em. Elifas i go pas long mekim tok. Bihain Bildat i kirap mekim ol tok i sutim tru bel bilong Jop. Na bihain moa Sofar i sutim ol strongpela tok bilas long Jop.

Jop i no bilipim ol tingting giaman ol poroman bilong em i kamapim. Em i no kliagut long as na God i larim pen na hevi i painim em. Olsem na em i tingting tasol long mekim ol tok bilong mekim gut nem bilong em yet. Tasol Jop i laikim yet God na em i tok: “Mi no bin mekim rong na mi no gat asua long wanpela samting. Na bai mi mekim wankain tok tasol i go inap taim mi dai.”​—Jop 27:5.

Bekim Bilong Ol Askim Bilong Baibel:

7:1​—Wanem mining bilong dispela tok “pulim i go mekim wok soldia”? Jop i pilim nogut tru, olsem na em i ting sindaun bilong em i hatwok tru, olsem man ol i pulim i go bilong mekim wok soldia.​—Jop 10:17.

7:​9, 10; 10:21; 16:22​—Yu ting ol dispela tok i makim olsem Jop i no bilip long kirap bek? Ol dispela tok i stori long ol samting em klostu bai painim Jop. Olsem na wanem mining bilong dispela tok em i mekim? Ating wanpela mining i olsem sapos em i dai, ol man long taim bilong em i no inap lukim em. Long ai bilong ol, em i no inap go long haus bilong en na ol man i no inap luksave long em gen inap long taim God i makim. O ating Jop i laik tok olsem i no gat wanpela man inap kirap bek long strong bilong em yet. Yumi save Jop i bilip long kirap bek taim yumi ritim Jop 14:​13-15.

Skul Yumi Kisim:

4:​7, 8; 8:​5, 6; 11:​13-15. I no stret long kisim tingting olsem man i karim planti hevi ol i kisim strafe long pasin nogut ol i bin mekim na God i no orait long ol.

4:​18, 19; 22:​2, 3. Tok Bilong God i mas stap olsem as bilong ol tok yumi mekim bilong stretim narapela, na i no tingting bilong yumi yet.​—2 Timoti 3:16.

10:1. Jop i bel pen tru long hevi i painim em, olsem na em i no tingting olsem i gat narapela as na em i kisim pen na hevi. Yumi kliagut long ol as na ol hevi i painim yumi, olsem na yumi no ken bel hevi taim pen na hevi i painim yumi.

14:​7, 13-15; 19:25; 33:24. Maski Satan i mekim wanem bilong traim yumi, bilip bilong yumi long kirap bek bai lukautim yumi.

16:5; 19:2. Yumi laik bai ol tok yumi mekim long ol narapela i mas strongim ol, i no ken skrapim bel bilong ol.​—Sindaun 18:21.

22:​5-7. Sapos yu stretim man long rong em i bin mekim tasol i no gat wanpela samting i kamapim klia olsem em i bin mekim dispela rong, orait dispela tok bilong yu i no gat as bilong en na em inap bagarapim man.

27:2; 30:​20, 21. Man inap bihainim tru God maski em i no gutpela olgeta. Jop i mekim rong taim em i sutim tok long God.

27:5. Jop tasol inap mekim samting na em i no bihainim tru God, long wanem, pasin bilong laikim God em i as na man i bihainim tru God. Olsem na yumi mas wok strong long laikim tru Jehova.

28:​1-28. Ol man i save ol gutpela samting bilong graun olsem gol na silva i stap long wanem hap. Taim ol i wok long painim ol dispela samting, save bilong ol i kirapim ol long i go aninit long graun we ol tarangau i no inap lukim ol. Tasol bilong kisim savetingting bilong God, man i mas aninit long Jehova.

29:​12-15. Yumi laik mekim gutpela-pasin-sori long ol man i stap nogut.

31:​1, 9-28. Jop i stap olsem gutpela piksa yumi ken bihainim. Em i no bin tok gris long ol meri, pamuk, mekim nogut long ol narapela, laikim tumas mani samting, na lotuim ol imis.

‘MI SINDAUN LONG DAS NA SIT BILONG PAIA, BILONG SOIM MI TANIM BEL PINIS’

(Jop 32:1–42:17)

Wanpela yangpela man, nem bilong em Elihu i bin stap isi na harim ol i paitim toktok i go i kam. Nau em i kirap toktok. Em i stretim Jop wantaim 3-pela pren giaman.

Taim Elihu i pinis long toktok, Jehova i stap insait long bikpela win na ren na em i bekim tok bilong Jop. Em i no tokaut long as bilong ol hevi Jop i karim. Tasol long rot bilong ol askim, God i Gat Olgeta Strong i helpim Jop long save long bikpela strong na savetingting bilong Em. Jop i tokaut olsem em i bin mekim planti toktok long ol samting em i no kliagut long en na em i tok: “Mi sem tru long . . . olgeta tok mi bin mekim. Na mi sindaun long das na long sit bilong paia, bilong soim yu olsem mi tanim bel pinis.” (Jop 42:6) Taim traim bilong Jop i pinis em i kisim gutpela samting long pasin bilong em long bihainim tru God.

Bekim Bilong Ol Askim Bilong Baibel:

32:​1-3​—Elihu i kam kamap long wanem taim? Elihu i bin harim olgeta tok ol i mekim, olsem na i luk olsem em i kam sindaun paslain liklik long taim Jop i kirap mekim toktok bilong pinisim dispela 7-pela de we ol poroman bilong em i no mekim liklik toktok.​—Jop 3:​1, 2.

34:​7, NW​—Olsem wanem Jop i kain olsem wanpela man “i daunim tok bilas ol man i mekim long em olsem man i dringim wara”? Long dispela taim tingting bilong Jop i paul, na em i bilip olsem ol tok bilas ol 3-pela pren i mekim i go stret long em, tasol tru tru ol i tok nogut long God. (Jop 42:7) Olsem na em i kisim ol dispela tok bilas olsem man i save amamas long dring wara.

Skul Yumi Kisim:

32:​8, 9. Maski man i gat planti krismas dispela i no makim olsem em i gat savetingting. Bilong kisim savetingting man i mas kliagut long Tok Bilong God na holi spirit i mas stiaim em.

34:36. I mas i gat samting i ‘traim [yumi] moa yet’ bilong kamapim klia olsem yumi bihainim tru God.

35:2. Elihu i bin putim gut yau na em i kliagut long bikpela tok ol i mekim paslain long em i kirap na toktok. (Jop 10:7; 16:7; 34:5) Paslain long stretim man, ol elda Kristen i mas putim gut yau, kisim save long olgeta samting i bin kamap, na kliagut long ol bikpela tok bilong samting ol i skelim.​—Sindaun 18:13.

37:14; 38:1–39:30. Taim yumi skelim ol strongpela wok bilong Jehova​—ol samting i kamapim strong na savetingting bilong em​—dispela i helpim yumi long kisim pasin daun na luksave olsem ol samting Jehova i mekim bilong soim olsem i stret em i stap nambawan bos em i bikpela samting moa, winim ol samting bilong yumi yet.​—Matyu 6:​9, 10.

40:​1-4. Sapos yumi laik toktok planti long samting God i mekim, yumi mas “pasim maus tasol.”

40:15–41:34. Ol hipopotamus na ol pukpuk i gat bikpela strong tru! Sapos yumi laik stap strong na mekim yet wok bilong God, yumi mas kisim strong long Man i bin wokim ol dispela strongpela animal.​—2 Korin 4:7.

42:​1-6. Taim Jop i harim tok bilong Jehova na Jehova i kirapim em long tingim ol strongpela wok bilong em, dispela i bin helpim Jop long “lukim God,” olsem save long ol tok i tru bilong em. (Jop 19:26) Dispela i bin stretim tingting bilong em. Taim tok bilong Baibel i stretim tingting bilong yumi, kwiktaim yumi mas redi long tokaut olsem yumi mekim rong na wok long stretim rong yumi mekim.

Kisim Pasin Bilong Jop Long Sanap Strong na Karim Hevi

Buk bilong Jop i kamapim klia olsem God i no gat asua long ol pen na hevi ol man i karim. Satan em i as bilong ol pen na hevi. God i larim pasin nogut i stap, na dispela i givim rot long yumi long kamapim klia tingting bilong yumi long i stret Jehova i stap nambawan bos o nogat, na bai yumi bihainim tru God o nogat.

Traim bai painim olgeta man i laikim tumas Jehova, olsem i bin painim Jop. Stori bilong Jop i strongim yumi long save olsem yumi inap sanap strong na karim ol hevi. Em i helpim yumi long tingim olsem ol hevi bilong yumi ol i no inap i stap oltaim. Jems 5:11 i tok: “Yupela i harim pinis stori bilong Jop, em i bin strongim bel na karim olgeta hevi i kamap long em. Na yupela i save, bihain Bikpela i bin mekim gutpela pasin long em.” Jop i bihainim tru Jehova, olsem na Jehova i mekim gut long em. (Jop 42:​10-17) Gutpela samting tru i wetim yumi long bihain​—laip oltaim long Paradais long graun! Olsem Jop i bin mekim, yumi laik bihainim tru God.​—Hibru 11:6.

[Futnot]

[Ol Piksa long pes 16]

Yumi kisim wanem skul long pasin bilong Jop long ‘strongim bel na karim hevi’?