Namba

31 Jehova i tokim Moses olsem: 2 “Yupela i mas bekim pasin nogut+ ol Midian+ i mekim long yupela Israel. Taim yupela i mekim olsem pinis, orait bihain bai yu dai.”+

3 Orait Moses i tokim ol manmeri olsem: “Redim ol man namel long yupela, na bai ol i go pait long ol Midian na bai Jehova i ken bekim pasin nogut bilong ol Midian. 4 Yupela i mas kisim 1,000 man long olgeta wan wan traib bilong Israel na bai ol i go pait.” 5 Olsem na namel long planti tausen Israel,+ ol i makim 1,000 man long wan wan traib bilong Israel. Na inap 12,000 man i redi long go pait.

6 Moses i salim 1,000 man bilong wan wan traib bilong Israel i go long pait. Ol i go wantaim Finias,+ em pikinini man bilong Eleasar na em i pris bilong lain ami. Finias i bringim tu ol samting holi na ol trampet+ bilong singautim ol man i go long pait. 7 Orait ol i go pait long ol Midian olsem Jehova i bin tokim Moses, na ol i kilim i dai olgeta man. 8 Na ol i kilim tu 5-pela king bilong Midian, em Evi, Rekem, Sur, Hur, na Reba. Na ol i kilim tu Balam+ long bainat. Balam em i pikinini man bilong Beor. 9 Tasol ol Israel i kisim ol meri pikinini bilong ol Midian i go kalabus. Ol i kisim tu olgeta gutpela samting bilong ol, na ol animal bilong ples, na ol bulmakau na ol sipsip samting. 10 Na ol i kukim olgeta taun na olgeta kem* bilong ol Midian long paia. 11 Na ol i kisim olgeta gutpela samting bilong ol na stilim ol samting long pait, ol i kisim ol manmeri na ol animal wantaim. 12 Na ol i kisim ol kalabus lain, ol samting ol i bin stilim long pait, na ol gutpela samting, na bringim i kam long Moses na pris Eleasar na olgeta manmeri bilong Israel long kem bilong ol. Kem bilong ol i stap long ples nating bilong Moap+ klostu long Wara Jordan long Jeriko.

13 Orait Moses na pris Eleasar na olgeta hetman bilong ol Israel i go ausait long kem bilong bungim ol. 14 Tasol Moses i belhat long ol man ol i bin makim long go pas long lain ami, em ol hetman bilong 1,000 soldia na ol hetman bilong 100 soldia, em ol i kam bek long pait. 15 Na Moses i askim ol olsem: “Yupela i larim olgeta meri i stap laip, a? 16 Harim! Tok bilong Balam i mekim na ol dispela lain i kirapim ol manmeri bilong Israel long givim baksait+ long Jehova na lotuim giaman god bilong Peor.+ Olsem na bikpela sik i bin kamap long ol manmeri bilong Jehova.+ 17 Orait nau yupela i mas kilim i dai olgeta pikinini man na olgeta meri i bin slip wantaim man. 18 Tasol yupela i no ken kilim i dai ol yangpela meri em ol i no bin slip wantaim man.+ 19 Na yupela i mas stap ausait long kem inap 7-pela de. Yupela ol man husat i bin kilim i dai wanpela man o tatsim bodi bilong man i dai pinis,+ yupela i mas mekim yupela yet i kamap klin+ long de namba 3 na long de namba 7. Yupela na ol lain em yupela i bin kisim long pait i mas mekim olsem. 20 Yupela mas mekim i kamap klin olgeta klos, na olgeta samting ol i wokim long skin bilong animal, na olgeta samting ol i wokim long gras bilong meme, na olgeta samting ol i wokim long diwai.”

21 Bihain pris Eleasar i tokim ol man i go long pait olsem: “Jehova i givim dispela lo long Moses, 22 ‘Yupela i mas kisim ol gol, silva, kopa, ain, tin,* na led.* 23 Olgeta dispela samting em paia i no inap bagarapim, yupela i mas putim ol dispela samting i go insait long paia na kam aut na bai ol i kamap klin. Na yupela i mas wasim ol dispela samting tu long wara bilong mekim ol i kamap klin.+ Tasol olgeta samting em paia inap bagarapim, yupela i mas wasim ol long wara bilong mekim ol i kamap klin. 24 Na long namba 7 de, yupela i mas wasim ol klos bilong yupela na bai yupela i kamap klin, na bihain yupela i ken kam insait long kem.’”+

25 Jehova i tokim Moses olsem: 26 “Yu mas kaunim olgeta samting yu kisim long pait, kaunim namba bilong ol pipol na animal wantaim; yu na pris Eleasar na ol hetman bilong ol wan wan lain bilong ol tumbuna papa bilong ol manmeri i mas mekim olsem. 27 Na tilim olgeta dispela samting long tupela hap na givim wanpela hap long ol soldia i bin go pait na givim narapela hap long ol manmeri i stap long kem.+ 28 Yupela i mas kisim takis bilong Jehova long ol soldia i bin go pait. Long olgeta 500 pipol, bulmakau, donki, sipsip na meme, yupela i mas kisim wanpela bilong ol. 29 Yupela i mas kisim dispela takis long hap bilong ol dispela samting em yupela i bin givim long ol na yupela i mas givim long pris Eleasar olsem kontribiusen bilong Jehova.+ 30 Na hap bilong ol samting em yupela i bin givim long ol Israel, yupela i mas kisim wanpela bilong olgeta 50 pipol, bulmakau, donki, sipsip na meme, na olgeta kain animal bilong ples, na givim long ol Livai+ em ol i save mekim wok long haus lotu sel bilong Jehova.”+

31 Orait Moses na pris Eleasar i mekim olgeta samting olsem Jehova i bin tokim Moses. 32 Namba bilong ol samting em ol i bin kisim long pait em 675,000 sipsip na meme, 33 72,000 bulmakau, 34 na 61,000 donki. 35 Na namba bilong ol yangpela meri i no bin slip wantaim man,+ em inap 32,000 meri. 36 Na hap bilong ol samting ol i tilim long ol man i bin go long pait em 337,500 sipsip na meme. 37 Na ol i givim 675 sipsip na meme long Jehova olsem takis. 38 Na namba bilong ol bulmakau em inap 36,000, na ol i givim 72 bulmakau long Jehova olsem takis. 39 Na namba bilong ol donki em inap 30,500, na ol i givim 61 donki long Jehova olsem takis. 40 Na namba bilong ol pipol em inap 16,000, na ol i givim 32 bilong ol long Jehova olsem takis. 41 Orait Moses i givim ol dispela takis olsem kontribiusen bilong Jehova long pris Eleasar,+ olsem Jehova i bin tokim Moses.

42 Moses i bin tilim ol samting ol man i bin kisim long pait na givim hap long ol Israel. 43 Namba bilong ol dispela samting i olsem, 337,500 sipsip na meme, 44 na 36,000 bulmakau, 45 na 30,500 donki, 46 na 16,000 pipol. 47 Na long hap bilong ol samting em Moses i bin givim long ol Israel, em i kisim wanpela bilong olgeta 50 pipol na animal, na em i givim long ol Livai+ em ol i save mekim wok long haus lotu sel bilong Jehova.+ Moses i mekim olgeta samting olsem Jehova i bin tokim em.

48 Bihain ol man ol i bin makim bilong bosim planti tausen soldia,+ em ol hetman i bosim 1,000 man na ol hetman i bosim 100 man, ol i go long Moses, 49 na ol i tokim Moses olsem: “Mipela ol wokman bilong yu i kaunim pinis namba bilong olgeta man i bin go long pait, em ol i stap aninit long mipela, na i no gat wanpela bilong ol i bin dai long pait.+ 50 Na mipela wan wan i bringim ol samting em mipela i bin kisim bilong givim long Jehova olsem ofa, em ol bilas gol, ol bilas bilong lek, ol bengol, ol ring bilong putim mak, ol iaring, na ol arapela bilas. Mipela i mekim olsem bilong karamapim sin bilong mipela long ai bilong Jehova.”

51 Orait Moses na pris Eleasar i kisim ol gol, em olgeta bilas ol i givim. 52 Na hevi bilong olgeta gol, em ol hetman i bosim 1,000 man na ol hetman i bosim 100 man i givim olsem kontribiusen bilong Jehova, em inap olsem 16,750 sekel.* 53 Olgeta wan wan soldia i kisim wan wan sea bilong ol gutpela samting ol i bin kisim long taim bilong pait. 54 Moses na pris Eleasar i kisim ol gol long ol hetman i bosim 1,000 man na long ol hetman i bosim 100 man, na bringim i go insait long haus sel bilong bung na bai Jehova i ken tingim ol manmeri bilong Israel.