Jeremaia
10 Yupela Israel, putim gut yau long tok Jehova i mekim long yupela. 2 Jehova i tok olsem:
“Yupela i no ken bihainim pasin bilong ol arapela lain,+
Na yupela i no ken pret nogut tru long ol mak i kamap long skai
Long wanem, ol arapela lain i pret nogut tru long ol dispela samting.+
3 Pasin bilong ol dispela lain i no gat as bilong en.
Saveman bilong wokim ol samting i save katim diwai long bikbus,
4 Na ol i save bilasim gut dispela imis long gol na silva+
Na ol i save yusim hama long nilim dispela imis long wanpela hap na bai em i no ken pundaun.+
5 Ol dispela imis i no inap toktok, ol i olsem giaman man i stap long gaden kukamba bilong pretim ol pisin;+
Ol man i mas karim ol, long wanem, ol i no inap wokabaut.+
Yu no ken pret long ol, long wanem, ol i no inap bagarapim yu,
Na tu, ol i no inap mekim wanpela gutpela samting.”+
6 Jehova, i no gat wanpela i olsem yu.+
Yu gat bikpela strong, na nem bilong yu i gat bikpela strong tru.
7 Yu King bilong olgeta lain manmeri, olsem na i stret olgeta i mas pret long yu;+
Namel long olgeta man i gat savetingting na namel long olgeta gavman bilong ol,
I no gat wanpela i olsem yu.+
8 Olgeta bilong ol i no save skelim gut ol samting na ol i longlong man.+
Em i longlong pasin long ting olsem diwai inap skulim man.+
9 Ol i save kisim ol silva plet long Tarsis+ na gol long Ufas,
Em ol saveman bilong wokim ol samting na ol man i save wokim ol samting long ain samting i save yusim ol dispela samting bilong karamapim diwai.
Ol manmeri i save bilasim ol long laplap ol i wokim long blupela tret na pepol wul.*
Ol man i gat save i wokim ol dispela imis.
10 Tasol Jehova em i God tru.
Em i God i stap laip+ na em i King bilong oltaim oltaim.+
Taim em i belhat, graun bai i guria,+
Na i no gat wanpela kantri bai i abrusim belhat bilong em.
11 * Yu mas tokim ol olsem:
“Ol god husat i no bin wokim graun na skai
Ol bai bagarap na i no stap moa long graun na aninit long skai.”+
12 Em Man Bilong Wokim graun long strong bilong em,
Na em i dispela Man i bin wokim graun na olgeta samting i stap long en long rot bilong savetingting bilong em.+
Na long save bilong em, em i pulim na opim skai i go bikpela olsem laplap.+
13 Taim em i toktok,
Ol wara long skai i no save stap isi,+
Na em i save mekim ol klaut* i kirap na kamap long olgeta hap bilong graun.+
Em i save mekim laitning i kam wantaim ren.
Na em i save mekim win i lusim ol bakstua bilong em na i go.+
14 Olgeta man i mekim pasin olsem ol i no gat gutpela tingting na save.
Olgeta man bilong wokim ol samting long ain samting bai kisim sem long ol imis ol i bin wokim;+
Long wanem, imis ol i bin wokim long ain, ol i no samting tru,
Na ol i no gat laip.+
15 Ol i giaman samting* tasol na ol man i ken tok bilas long ol.+
Taim de bilong ol long bagarap i kamap, ol bai pinis olgeta.
16 Tasol God bilong Jekop i no olsem ol dispela samting,
Long wanem, em i dispela Man i bin wokim olgeta samting,
Na samting i dia tumas long em, em lain Israel, ol i lain bilong em.+
Nem bilong em Jehova, bosman bilong bikpela lain ami.*+
17 Yu meri i karim hevi,
Kisim ol samting bilong yu em yu bungim i stap long graun.
18 Jehova i tok olsem:
“Long dispela taim mi bai rausim ol manmeri bilong dispela graun i go,+
Na mi bai mekim ol i karim pen na hevi.”
19 Sori long mi, long wanem, mi bagarap pinis!+
Mi kisim bikpela bagarap tru.
Na mi tok olsem: “Tru tumas, dispela em i sik bilong mi, na mi mas karim hevi bilong en.
20 Haus sel bilong mi i bagarap pinis, na ol rop bilong haus sel i bruk pinis.+
Ol pikinini man bilong mi i lusim mi na ol i no stap moa.+
I no gat wanpela man i stap bilong stretim o sanapim haus sel bilong mi.
Olsem na ol i no skelim gut ol samting,
Na olgeta sipsip bilong ol i lusim ol na i go nabaut.”+
22 Harim! Ol i bringim nius i kam!
Bikpela nois i kamap long hap not na i kam,+
Na em bai mekim ol taun bilong Juda i bagarap na i stap nating, na i kamap ples bilong ol jekol.*+
23 Jehova, mi save, man i no inap bosim wokabaut bilong em yet.
Man i no gat rait long stiaim wokabaut bilong em yet.+
24 Jehova, yu ken stretim mi sapos yu lukim olsem i stret long mekim olsem,
Tasol yu no ken mekim long taim yu belhat,+ nogut yu bagarapim mi olgeta.+
25 Mobeta yu kapsaitim belhat bilong yu long ol lain manmeri i no laik luksave long yu+
Na long ol lain i no save singaut long nem bilong yu.