Aisaia
6 Long yia King Usia i dai,+ mi lukim Jehova i sindaun long sia king i antap tru,+ na longpela klos bilong em i karamapim olgeta hap bilong tempel. 2 Ol serafim* i sanap raunim em; olgeta wan wan i gat 6-pela wing. Wan wan i karamapim pes bilong ol long tupela wing na karamapim lek bilong ol long tupela wing, na ol i flai long narapela tupela wing.
3 Narapela i singaut long narapela olsem:
“Jehova, bosman bilong bikpela lain ami, em i holi, em i holi, em i holi.+
Glori bilong em i inapim olgeta hap bilong graun.”
4 Na nois bilong dispela bikpela singaut i mekim na pos bilong ol dua i seksek, na haus i pulap long smok.+
5 Na mi tok: “Sori tumas long mi!
Tru tumas, bai mi dai,
Bikos mi sinman na ol toktok bilong mi i no klin,
Na mi stap namel long ol man em toktok bilong ol i no klin;+
Maski i olsem, ai bilong mi i bin lukim King, Jehova, bosman bilong bikpela lain ami!”
6 Orait wanpela serafim i flai i kam long mi, na long han bilong em, em i holim wanpela sisis i gat ston i hat nogut tru+ we em i bin kisim long alta.+ 7 Em i tatsim maus bilong mi na tok:
“Lukim! Dispela i tatsim lips bilong yu.
Asua bilong yu i raus pinis,
Na God i fogivim pinis sin bilong yu.”
8 Bihain mi harim nek bilong Jehova i tok: “Bai mi salim husat, na husat bai bringim tok bilong yumi i go?”+ Na mi tok: “Mi stap! Salim mi!”+
9 Na em i tok, “Go, na tok olsem long ol dispela manmeri:
‘Yupela bai harim tok gen na gen,
Tasol yupela bai i no inap kliagut;
Yupela bai lukim gen na gen,
Tasol yupela bai i no inap kisim wanpela save.’+
10 Mekim bel bilong ol dispela manmeri i pas,+
Mekim yau bilong ol i harim tok, tasol ol i no inap mekim wanpela samting,+
Na pasim ai bilong ol,
Na bai ai bilong ol i no inap lukim samting
Na yau bilong ol i harim tok,
Tasol bel bilong ol i no inap kisimgut tok
Na bai ol i no tanim i kam bek na kamap orait.”+
11 Orait mi tok: “O Jehova, inap long wanem taim?” Na em i tok:
“I go inap long taim ol taun i bagarap olgeta na i no gat ol man i stap long ol,
Na ol haus i no gat ol man
Na graun i bagarap na i stap nating;+
12 I go inap long Jehova i rausim ol man i go longwe tru,+
Na bikpela hap bilong graun i stap nating.
13 “Tasol long olgeta 10-pela 10-pela manmeri, wanpela bai stap yet, na paia bai kukim tu dispela graun. Wankain olsem wanpela bikpela diwai na olsem wanpela diwai ok, em ol i bin katim i go daun na lusim as bilong en i stap; wanpela kru* holi bai kamap long as bilong diwai.”