Jeremaia
20 Taim Jeremaia i autim ol dispela tok profet, Pasur i harim i stap. Pasur, em i pikinini man bilong Imer, na em i wanpela pris na nambawan ofisa long haus bilong Jehova. 2 Orait Pasur i paitim profet Jeremaia na pasim hanlek na nek bilong em long hap plang na kalabusim em+ long Antap Geit Bilong Benjamin i stap klostu long haus bilong Jehova. 3 Long de bihain, Pasur i rausim Jeremaia long hap plang i pasim em na larim em i go fri, na Jeremaia i tokim em olsem:
“Jehova i senisim nem bilong yu Pasur, na nau em i kolim nem bilong yu, Pret i Kamap Long Olgeta Hap.+ 4 Jehova i tok olsem, ‘Bai mi mekim yu na ol pren bilong yu i pret nogut tru. Na bai yu lukluk i stap na ol birua bai kam na kilim i dai ol pren bilong yu long bainat;+ na bai mi putim olgeta Juda long han bilong king bilong Babilon. Na em bai kisim ol i go kalabus long Babilon, na sampela bilong ol em bai kilim ol i dai long bainat.+ 5 Na mi bai putim olgeta mani kago bilong dispela taun, na olgeta gutpela gutpela samting i dia tumas bilong en, na olgeta mani kago bilong ol king bilong Juda long han bilong ol birua bilong ol.+ Na ol bai stilim na pulim olgeta samting na karim i go long Babilon.+ 6 Na Pasur, harim, yu wantaim ol lain i stap long haus bilong yu, yupela bai i go kalabus. Yu bin autim ol giaman tok profet long ol pren bilong yu,+ olsem na yu bai i go long Babilon na i dai long hap, na ol bai planim yu na ol pren bilong yu tu long dispela hap.’”
7 Jehova, yu bin trikim mi na mi bilip.
Na yu strong moa long mi olsem na yu winim mi.+
Ol manmeri i save lap long mi long olgeta taim;
Na olgeta i save tok bilas long mi.+
8 Olgeta taim mi autim tok, mi save singaut olsem,
“Pait na bagarap bai painim yupela!”
Ol man i save harim dispela tok bilong Jehova mi autim na ol i save semim mi na tok bilas long mi long olgeta taim.+
Tasol long bel bilong mi, tok bilong em i olsem paia i lait. Em i olsem paia i lait insait long ol bun bilong mi.
Na mi trai hat long pasim tok bilong em;
Tasol mi no inap.+
10 Mi harim planti tok win nogut;
Ol samting bilong mekim mi i pret i stap long olgeta hap.+
“Kotim em; Yumi kotim em!”
Olgeta man i giaman long i stap gut wantaim mi, ol i putim was i stap bilong lukim mi i pundaun.+ Ol i tok olsem:
“Ating em bai popaia na mekim rong,
Na yumi ken daunim em na bekim pasin nogut em i bin mekim.”
11 Tasol Jehova i stap wantaim mi, em i olsem wanpela strongpela soldia.+
Olsem na ol man i mekim nogut long mi, ol bai i pundaun na ol i no inap win.+
Ol bai sem nogut tru, long wanem, ol i no inap winim mi.
Dispela sem ol i kisim bai i stap oltaim na ol man bai i no inap lusim tingting long en.+
12 Tasol Jehova, bosman bilong bikpela lain ami,* yu save skelim stretpela man;
Mi laik bai yu larim mi lukim yu i bekim rong bilong ol,+
Long wanem, mi putim hevi bilong mi long han bilong yu.+
13 Singim song long Jehova! Na preisim Jehova!
Long wanem, em i save kisim bek man i stap rabis long han bilong man nogut.
14 Mobeta dispela de mi bon i bin bagarap!
Mobeta dispela de mama i karim mi, em i de we gutpela samting i no bin kamap!+
15 Bagarap i ken painim man i bin bringim gutpela nius i go long papa bilong mi na tok olsem:
“Meri bilong yu i karim wanpela bebi boi!”
Na dispela i mekim em i amamas nogut tru.
16 Mi laik bai dispela man i ken kamap olsem ol taun em Jehova i bin bagarapim na em i no wari liklik long en.
Na em i ken harim krai i kamap long moning na singaut bilong pait i kamap long belo.
17 Wai na em i no laik kilim mi i dai taim mi stap yet long bel bilong mama,
Na bai mama bilong mi i kamap olsem matmat bilong mi,
Na em i no karim mi?+
18 Wai na mi lusim bel bilong mama?
Na mi lukim trabel na pen na hevi tasol,
Na oltaim mi wok long sem nogut tru?+