Aisaia
42 Harim! Wokman bilong mi,+ em man mi sapotim!
Man mi bin makim,+ na mi orait long em!+
2 Bai em i no inap singaut o apim nek bilong em,
Na em bai no inap mekim na ol man i harim nek bilong em long bikrot.+
3 Em bai i no inap brukim pitpit i no gat strong na i laik bruk,
Na em i no inap kilim i dai lam em paia long wik bilong en i laik pinis.+
Em bai stap gut long wok bilong em taim em i bringim stretpela pasin i kam.+
4 Strong bilong em bai no inap slek o em i taiet, i go inap long em i kamapim pinis stretpela pasin long graun;+
Na ol ailan i wok long wet long lo* bilong em.
5 Dispela em tok bilong God tru, Jehova,
Em i Krieta bilong skai na Bikpela Man husat i bin pulim skai na opim i go bikpela,+
Em Man i bin wokim graun na olgeta samting i stap long en,+
Em Man i bin givim win bilong maus bilong em long ol manmeri i stap long en,+
Na em i givim strong bilong laip long ol manmeri i wokabaut long en:+
6 “Long stretpela pasin, mi, Jehova, mi bin singautim yu;
Mi bin holim han bilong yu.
Bai mi lukautim yu gut na givim yu olsem wanpela kontrak namel long mi na ol manmeri+
Na olsem lait long ol lain manmeri,+
7 Na bai yu ken opim ai bilong ol aipas,+
Na bringim ol kalabusman i kam aut long ples kalabus
Na bringim ol manmeri i sindaun long tudak long kalabus i kam aut.+
8 Mi Jehova. Dispela em nem bilong mi;
Mi no inap givim glori bilong mi long wanpela man,*
O givim biknem bilong mi long wanpela imis, nogat tru.+
9 Lukim, ol samting bilong pastaim, ol i go pinis;
Nau mi tokaut long ol nupela samting.
Paslain long ol i kamap, mi save tokim yupela long ol.”+
10 Singim nupela song long Jehova,+
Givim biknem long em i go inap long olgeta hap bilong graun,+
Yupela ol man husat i go daun long solwara na olgeta samting i pulap insait long en,
Yupela ol ailan na olgeta manmeri i stap long en.+
Ol manmeri i save stap long traipela ston i ken singaut na amamas;
Ol i ken singaut antap long ol het bilong ol maunten.
12 Ol i ken givim glori long Jehova
Na tokaut long biknem bilong em long ol ailan.+
13 Jehova bai go aut olsem wanpela strongpela man.+
Olsem wanpela soldia, em i gat strongpela laik long mekim samting.+
Em bai singaut, yes, em bai mekim singaut bilong pait;
Em bai soim klia olsem em i gat bikpela strong tru winim ol birua bilong em.+
14 “Mi pasim maus inap longpela taim.
Mi pasim maus i stap na bosim mi yet.
Olsem wanpela meri i laik karim pikinini,
Bai mi pilim pen na krai, na pulim win strong long wankain taim.
15 Bai mi bagarapim tru ol maunten na ol liklik maunten
Na mekim drai olgeta diwai samting i stap long ol.
16 Bai mi lidim ol aipas long wanpela rot em ol i no save long en+
Na mekim ol i wokabaut long ol rot ol i no bin wokabaut long en.+
Dispela em samting mi bai mekim long ol na bai mi no inap lusim ol.”
17 Ol bai tanim i go bek na ol bai sem nogut tru,
Ol man husat i trastim ol imis,
Na ol man husat i tok long ol ain stetiu: “Yupela i god bilong mipela.”+
18 Putim yau, yupela ol yaupas;
Tromoi ai na lukim, yupela ol aipas.+
19 Husat i aipas olsem wokman bilong mi,
Na i yaupas tru olsem man bilong bringim tok em mi bin salim?
Husat i aipas tru olsem man i kisim prais,
Na i aipas tru olsem wokman bilong Jehova?+
20 Yu lukim planti samting, tasol yu no wok long was i stap.
Yu opim yau bilong yu, tasol yu no harim tok.+
21 Bikos long stretpela pasin bilong em,
Jehova i bin amamas long litimapim lo* bilong em na givim glori long en.
22 Tasol dispela em wanpela lain ol man i bin kam pait na stilim ol samting bilong ol;+
Olgeta i trap insait long ol hul na hait insait long ol ples kalabus.+
Ol man i bin stilim ol samting bilong ol na i no gat man bilong helpim ol,+
Na ol man i bin stilim ol samting bilong ol na i no gat man i tok: “Bringim ol i kam bek!”
23 Husat namel long yupela bai harim dispela tok?
Husat bai putim gut yau na harim tok bilong helpim em long taim bihain?
24 Husat i givim Jekop long ol man i ken pait na stilim ol samting bilong em,
Na givim Israel bilong ol man i ken stilim ol samting bilong em?
Ating em Jehova tasol, em Man yumi bin mekim sin long em, a?
25 Olsem na Em i kapsaitim belhat bilong em,
Kros bilong em, na belhat bilong mekim pait antap long ol.+