Kisim Bek
15 Long dispela taim Moses wantaim ol Israel i mekim dispela singsing long Jehova:+
“Nau bai mi singim song long Jehova, long wanem, em i winim pait.+
Em i tromoi hos wantaim man i sindaun long hos i go insait long solwara.+
2 Ja* i givim strong long mi, long wanem, em i bin kisim bek mi.+
Em i God bilong mi, na bai mi preisim em.+ Em i God bilong papa bilong mi,+ na bai mi givim biknem long em.+
3 Jehova em i strongpela soldia.+ Jehova em i nem bilong em.+
4 Em i tromoi ami bilong Fero wantaim ol karis bilong em i go insait long solwara,+
Na ol strongpela soldia bilong Fero i go insait long wara na Solwara Retsi i karamapim ol.+
5 Bikpela wara i karamapim ol; ol i go daun insait tru long solwara olsem ston.+
6 O Jehova, rait han bilong yu i gat bikpela strong tru;+
O Jehova, rait han bilong yu inap krungutim tru birua.
7 Long bikpela strong bilong yu, yu inap daunim ol birua bilong yu;+
Belhat bilong yu i kamap olsem paia na kukim ol olsem paia i kukim bun bilong wit samting i stap yet long gaden.
8 Win i lusim nus bilong yu na i go mekim wara i solap i go antap;
Wara i sanap stret olsem banis;
Long namel bilong solwara, wara i kamap strong.
9 Na birua i tok, ‘Mi bai ronim ol na holimpas ol!
Mi bai tilim ol samting mi kisim long ol, i go inap mi inapim laik bilong mi!
Mi bai kisim bainat bilong mi! Han bilong mi bai daunim ol!’+
10 Yu winim win bilong yu, solwara i karamapim ol;+
Ol i go daun tru olsem ston insait long biksi.
11 O Jehova, husat ol arapela god i olsem yu?+
Yu wanpela tasol yu holi olgeta,+ i no gat wanpela i olsem yu.
Ol man i mas pret long yu na singim ol song bilong litimapim nem bilong yu. Yu save wokim olkain bikpela wok.+
12 Yu stretim rait han bilong yu, na graun i op na daunim ol birua.+
13 Yu mekim gutpela pasin laikim* long ol manmeri yu bin kisim bek*+ na yu bringim ol i go;
Long strong bilong yu, yu bai stiaim ol i go long ples holi bilong yu we yu stap long en.
14 Ol manmeri i mas harim;+ ol bai pret;
Ol manmeri bilong Filistia bai pilim bikpela pen nogut tru.
15 Long dispela taim ol hetman* bilong Idom bai pret nogut tru,
Na ol strongpela king bilong Moap bai guria.+
Na strong bilong ol manmeri bilong Kenan bai pinis.+
16 Bikpela pret tru bai kisim ol.+
O Jehova, bikos long strongpela han bilong yu, ol bai stap olsem ston na ol i no inap mekim wanpela samting,
Inap long ol manmeri bilong yu i go pinis,
Inap long ol manmeri yu bin kamapim+ i go pinis.+
17 O Jehova, yu bai bringim ol i kam na planim ol long maunten bilong yu yet,+
Em dispela ples yu redim bilong yu yet long stap long en,
O Jehova, em dispela ples holi, han bilong yu yet i bin wokim.
18 Jehova bai mekim wok king inap oltaim oltaim.+
19 Taim ol soldia bilong Fero wantaim ol hos na karis i go insait long solwara,+
Orait Jehova i mekim solwara i kam bek na karamapim ol,+
Tasol ol manmeri bilong Israel i wokabaut long graun i drai namel long solwara na ol i go.”+
20 Orait profet meri Miriam, susa bilong Aron, i kisim wanpela tambarin long han bilong em, na olgeta meri i bihainim em wantaim tambarin na danis. 21 Na Miriam i bekim singsing bilong ol man olsem:
“Singim song long Jehova, long wanem, em i winim pait.+
Em i tromoi hos wantaim man i sindaun long hos i go insait long solwara.”+
22 Bihain Moses i bringim ol Israel i go lusim Solwara Retsi, na ol i wokabaut i go long ples nating bilong Suer. Ol i wokabaut long ples nating inap 3-pela de, na ol i no lukim wanpela wara. 23 Bihain ol i go kamap long Mara,*+ tasol ol i no inap dring wara long Mara, long wanem, wara long dispela ples i pait. Olsem na em i kolim nem bilong dispela ples Mara. 24 Na ol manmeri i toktok planti long Moses,+ na ol i tok: “Bai mipela i dringim wanem samting?” 25 Orait Moses i beten long Jehova,+ na Jehova i soim em wanpela liklik diwai. Na Moses i kisim dispela diwai na tromoi long wara na wara i kamap gutpela inap long ol i ken dring.
God i laik skelim sapos ol bai bihainim tok bilong em o nogat.+ Ol samting i kamap long dispela hap i bilong skulim ol. Dispela skul ol i kisim bai stap olsem lo ol i mas bihainim. 26 Na God i tok: “Sapos yupela i bihainim tok bilong mi Jehova, God bilong yupela, na mekim ol samting i stret long ai bilong mi na putim yau long tok bilong mi na bihainim ol lo bilong mi,+ orait bai mi no inap mekim ol sik i bin painim ol Isip i kamap long yupela.+ Mi yet, mi Jehova, mi bai mekim yupela i kamap orait.”+
27 Bihain ol i go kamap long Elim. Elim i gat 12-pela hulwara na 70 diwai pam. Olsem na ol i wokim kem long dispela hap klostu long ol hulwara.