Jop
28 “Ol man i save painim silva long ples bilong en,
Na ol i save painim gol na kukim bilong rausim pipia na mekim i kamap klin olgeta.+
2 Ol man i save kisim ain insait long graun,
Na ol i save kukim ol ston bilong kisim kopa i stap long en.+
3 Man i save bringim lait i go long ples we i tudak.
Em i go long ples we i tudak nogut tru,
Bilong painim gol na silva samting.
4 Em i putim tul bilong digim hul i go daun insait long graun long ples we ol man i no save stap long en.
Na long hap we ol man i no save go long en.
Na sampela man i save taitim baklain na hangamap i go daun insait long hul.
5 Antap long graun kaikai i save kamap.
Tasol aninit long graun ol samting i no i stap isi.*
6 Long dispela hap, ston sapaia i stap,
Na gol tu i stap insait long graun.
7 Ol tarangau i no save long rot i go long dispela hap.
Na pisin blakpela kait tu i no lukim dispela ples.
8 Ol strongpela wel animal i no bin wokabaut long dispela ples.
Na ol laion tu i no bin raun long dispela ples.
9 Man i save brukim ol ston.
Na em i save brukim ol maunten long as bilong en.
10 Na em i save wokim hul+ i go insait long ol ston bilong rausim wara.
Na em i save lukim olkain samting i dia tumas.
11 Na taim em i lukim liklik wara i ran insait long hul, em i save pasim.
Na em i save kisim ol samting i stap hait insait long graun na bringim i kam ausait long ples klia.
12 Tasol savetingting i stap long wanem hap?+
Na ples bilong gutpela save i stap we?+
13 I no gat man i luksave olsem savetingting i bikpela samting tru,+
Na ol man i no inap painim savetingting long wanpela hap bilong graun.
14 Ol wara i dip tru i tok, ‘Em i no stap long mi!’
Na solwara i tok, ‘Em i no stap long mi!’+
15 Maski man i gat gutpela gol, em i no inap long baim savetingting;
Na maski man i skelim silva bilong baim, sori tumas, em bai no inap tru long baim savetingting.+
16 Na maski man i gat gutpela gol bilong Ofir,+ em i no inap tru long baim savetingting.
Na maski man i gat ston oniks* na ston sapaia we i dia tumas, em i no inap long baim.
17 Savetingting i winim tru pe bilong gol na glas;
Na maski man i gat dis em ol i bin wokim long gutpela gol, em i no inap tru long baim savetingting.+
18 Savetingting i winim tru pe bilong naispela korol na ston kristal,+
Savetingting i winim tru pe bilong ol naispela pel.
19 Savetingting i winim tru pe bilong ston topas+ bilong Kus.*
Na man i no inap tru long baim long gutpela gol.
20 Tasol man bai painim savetingting long wanem hap?
Na ples bilong gutpela save i stap we?+
21 Savetingting i stap hait na olgeta manmeri na ol animal i no inap lukim,+
Na ol pisin long skai tu i no inap lukim.
22 Ples bilong bagarap na dai, tupela i tok,
‘Mipela i bin harim tok win tasol long en.’
23 God wanpela tasol i save long ples em i stap long en;
Na em wanpela tasol i save long rot i go long en.+
24 Long wanem, em i save lukim olgeta hap bilong graun,
Na em i lukim olgeta samting i stap aninit long skai.+
26 Na God i makim tu ol lo bilong ren+
Na em i makim rot ol blakpela klaut i mas bihainim na taim bilong tanda i mas pairap.+
27 Orait em i lukim savetingting long ol samting em i wokim na em i stori long en;
Em i mekim savetingting i stap strong na em i traim strong bilong en na lukim olsem savetingting i gutpela samting.
28 Na em i tokim man olsem:
‘Harim! Man i save pret long Jehova, em i gat savetingting,+
Na man i givim baksait long pasin nogut, dispela man i gat gutpela save.’”+