I Gat Wanem As na Misin i Bruk?

WANPELA buk bilong lotu i tok, i gat 3-pela as na ol lotu i save bruk: Em bilip bilong ol, na ol bikpela man bilong bosim misin ol i no wanbel, na wok politik. Orait, yumi tingim dispela na nau yumi ken skelim Misin Katolik​—i gat ol dispela samting i kamap insait long en o olsem wanem?

Bilip Bilong Misin o Tok Bilong Baibel?

Pris René Laurentin i stori long Misin Katolik i bruk na em i tok: ‘Mi save long as bilong dispela samting. As bilong en i olsem: Ol i gat narapela narapela tingting.’ Em i tok, sampela i kisim nupela tingting, tasol sampela i laik pas long tingting na pasin bilong misin long bipo, olsem Asbisop Lefebvre i mekim. Wanpela hetman bilong lain Dominik bilong misin, em Jean-Pierre Lintanf, em i tok: ‘Tru i gat wanpela bilip, tasol i gat narapela narapela tingting long bihainim dispela bilip.’

Olsem na sapos misin i bihainim ol bilip i stap long Baibel tasol, lain bilong en i no ken bruk olsem. Namba 2 Kibung Bilong Misin Katolik i tok: ‘Strongpela han bilong God i holim Baibel Holi, na dispela i gutpela samting bilong helpim ol man long i stap wanbel, na Jisas i laik bai olgeta man i stap olsem.’ Tasol dispela Kibung i mekim narapela tok gen, olsem: ‘Baibel i no as bilong olgeta tok bilong Misin, nogat. Misin i bilip na litimapim tok bilong Baibel na tok bilong ol tumbuna wantaim, olsem na yumi mas bilip na litimapim tok bilong tupela wantaim.’ Na dispela Kibung i tok, ‘As bilong bilip holi bilong yumi i olsem: Baibel wantaim ol stori holi bilong ol tumbuna.’

I gutpela sapos Misin Katolik i tingim wanpela tok em Jisas i bin givim long ol Farisi, em i tok: “Yupela i save daunim tok bilong God na litimapim pasin yupela i bin kisim long ol tumbuna.” (Matyu 15:6) Wanpela meri Katolik i raitim pas long wanpela nius bilong ol Katolik long Frans, na em i askim ol: ‘Sapos bel bilong ol pris i no kirapim ol moa long autim gutpela tok bilong Baibel, yumi no ken kirap nogut long lain bilong yumi i go liklik o ol i go long narapela lotu, a? (Bilip bilong ol Witnes Bilong Jehova na ol man i pas long ol bilip em misin i kisim long ol tumbuna i mekim ol i narapela narapela kain.)’

Misin i Bruk

Na ol wok na pasin bilong bosim misin tu i mekim na ol i bruk. Misin Katolik i bilip olsem ol pop i kisim wok bilong ol aposel, na pop i namba wan bilong ol Kristen. Tasol Asbisop Lefebvre i no bilip long dispela samting, olsem na em i bruk long misin. Em i tok: ‘Krais i givim namba long lain Aposel bilong Em long skulim ol man na bosim ol na mekim ol i kamap holi, na lain bisop i mas holim dispela wok.’ Tasol wanpela buk bilong ol Katolik (New Catholic Encyclopedia) i tok, bisop bilong Rom, em pop, ‘em i namba wan bilong ol bisop, na namba bilong em i winim namba bilong olgeta narapela bisop, na em i holim bikpela strong long bosim misin, winim ol narapela bisop.’

Tasol Baibel i no as bilong dispela bilip. Dispela buk bilong ol Katolik (New Catholic Encyclopedia) i tok, ‘Nupela Testamen i no gat sampela tok long Krais i bin makim husat i mas kisim wok bilong ol aposel taim ol i dai pinis.’ Na buk i tok, paslain long yia 400 Misin long hap bilong Wes i no bin save olsem wanem pop i bin kisim dispela bikpela namba long i stap namba wan.

Long nau ol man i gat planti askim long wok bilong ol man i gat namba long bosim Misin Katolik. Ol bisop na tisa bilong lotu na ol pris samting na ol lain bilong misin ol i no wanbel wantaim pop long sampela bilip na pasin bilong misin na long ol bikpela man i bosim misin. Long dispela bikpela tokaut (Tokaut Bilong Kibung Bilong Kolon) yumi bin stori long en, ol i tok, ‘Sapos pop i mekim ol samting i no wok bilong em long mekim, orait em i no ken strong long lain bilong em i mas bihainim tok bilong em long nem bilong Misin Katolik.’

Ol i Bruk long Ol Samting Bilong Politik

Wanpela nius bilong Inglan (Economist) i tok, ‘Lain bilong Lefebvre i ting sampela bikpela man insait long misin i bin paulim misin bilong ol na nau sampela lain politik olsem komyunis, na ol lain i bihainim ol nupela tingting, na ol Talatala, ol i kam insait long en. Na Asbisop Lefebvre i ting, bikpela pait i bin kamap bipo long Frans i bin opim rot na planti nupela pasin na tingting i kamap long graun, na Namba 2 Kibung Bilong Misin Katolik i pulim ol dispela samting i kam insait long Misin.’ Sampela Katolik i gat wankain tingting olsem Asbisop Lefebvre na ol i no amamas, tasol planti Katolik em ol i laikim lain politik olsem komyunis samting, ol i ting ol dispela senis i gutpela; na sampela i ting ol i mas wok long helpim ol lain i stap nogut na gavman i daunim ol, na sampela i ting i orait long ol i ken mekim pait bilong daunim ol kain gavman olsem. Olsem na wok politik tu i mekim na ol Katolik i bruk.

Dispela tok em pris Laurentin i bin mekim, nem bilong en “I Gat Wanem As na Ol Kristen i Bruk Olsem?” laspela tok bilong en i tok, ‘Sapos Misin Katolik i laik bai lain bilong en i ken bilip long tok bilong en, orait Misin yet i mas bihainim tok bilong Jisas, i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” ’​—Jon 13:35.

Planti Katolik long olgeta hap ol i tingim dispela tok na nau ol i no bilip long tok bilong Misin Katolik em i tok, em tasol i trupela lotu. Ol i lukim samting i kamap insait long Misin Katolik na ol i wanbel wantaim tok bilong Jisas, em i tok: “Sapos ol man bilong wanpela taun o wanpela haus ol i bruk tupela lain na ol i pait, dispela taun o haus bai i no inap i stap strong.” Olsem na nau planti ol i lusim Misin Katolik.​—Matyu 12:25.

Nau planti Katolik i wok long painim lain Kristen tru ol i stap wanbel na i pas gut wantaim olsem ol brata brata, na narapela i laikim tru narapela, na ol samting i no brukim lain bilong ol, olsem ol bilip giaman, o ol bikpela man bilong bosim misin i no stap wanbel, o ol i helpim ol narapela narapela lain politik. Planti tausen i painim pinis wanpela lain olsem, em ol i pas gut wantaim na i stap wanbel, em lain Witnes Bilong Jehova, na nau ol i bung wantaim dispela lain.

[Piksa long pes 9]

Jisas i kamapim rong bilong ol Farisi em ol i litimapim tok bilong ol tumbuna na ol i daunim tok bilong Baibel