Sampela Tok i Kam Long Olgeta Hap
OL NUPELA PIKININI
Wanpela nius bilong Holan (Demos) i tok, long olgeta hap bilong graun i gat 381,000 nupela pikinini i save kamap long olgeta de. Long sampela hap planti ol i save dai taim ol i no winim yet wanpela krismas, na long sampela kantri wan wan tasol i save dai. Long Japan, long olgeta 1,000 nupela pikinini i kamap, 5-pela tasol i save dai taim ol i no winim yet wanpela krismas—em i winim ol narapela kantri. Tasol long sampela hap, planti liklik pikinini ol i save dai; long Brasil, long olgeta 1,000 pikinini i no winim yet wanpela krismas, 71 i save dai, na long hap bilong Is na Wes Afrika, long olgeta 1,000 pikinini i no winim yet wanpela krismas, 110 i save dai. Tasol dispela hevi i bikpela moa long hap bilong Afganistan; long olgeta 1,000 pikinini i no winim yet wanpela krismas, inap 194 i save dai. Long olgeta hap bilong graun, 31,000 liklik pikinini ol i save dai long olgeta de.
‘GUTPELA TAIM BILONG OL STILMAN’
Wanpela nius (Elefterotypia) bilong provins Atikan long kantri Grik i tok, ‘Long Sande long apinun em i nambawan gutpela taim bilong ol stilman i raun na stil.’ Bilong wanem ol i laikim dispela taim? Long wanem, 3,800 plisman na 500 bikman bilong spot samting ol i mas i go was long ol spot long dispela taim, nogut pait i kamap. Na sapos i gat wanpela bikpela pilai spot i laik kamap, i mas i gat 700 plisman moa na 100 bikman moa bilong spot bilong was long ol.
OL I BAIM OL MONKI BILONG MEKIM WOK
Wanpela fama long Korea em i sot long ol wokman bilong kisim wanpela kain galip long ol diwai long plantesen bilong em klostu long biktaun Soul. Olsem na em i kisim sampela monki bilong mekim dispela wok. Wanpela nius bilong Japan (Mainichi Daily News) i stori long dispela samting na i tok, taim dispela fama i lainim pinis 20 monki long mekim dispela wok, ol i wok strong tru; insait long wanpela de, olgeta wan wan monki i mekim wok inap olsem 5-pela wokman. Olsem na sampela man bilong gavman i tok long dispela yia bai ol i kisim sampela monki moa long Tailan na bai ol narapela fama i ken kisim ol bilong mekim wok long ol plantesen samting bilong ol. Long hap bilong Ripablik bilong Korea, i tambu long kisim ol wokman long ol narapela kantri, tasol ating i no gat tambu long kisim ol monki long ol narapela kantri i kam bilong mekim wok.
PLANTI KATOLIK I NO BIHAINIM LOTU BILONG OL
Wanpela ripot i kamap long wanpela nius bilong Paris (Le Figaro) i tok, ‘Planti man bilong Frans i wok long lusim lotu.’ Na dispela ripot i tok, klostu olgeta manmeri bilong Frans (inap 82 pesen) ol i tok ol i Katolik, tasol wan wan tasol (inap olsem 12 pesen) olsem ol meri lapun, ol i save go oltaim long lotu. Na planti Katolik (inap olsem 44 pesen) ol i tok ol i no save go long lotu, na inap olsem 83 pesen ol i tok, ‘i no gat wanpela taim ol i bin i go insait long wanpela haus lotu.’ Dispela nius (Le Figaro) i tok, i olsem ol Frans i holim nem Katolik tasol ol i no save lotu. Ol i save mekim sampela samting bilong lotu Katolik, olsem baptaisim ol pikinini, o marit long haus lotu, o bilong planim man i dai pinis, tasol ol i mekim olsem long wanem em i pasin bilong ol tumbuna bilong ol; tasol i no olsem ol i gat bilip na ol i mekim, nogat.
LONG BRASIL PLANTI MERI I SAVE RAUSIM BEL
Wanpela profesa, nem bilong em Carlos Alberto Di Franco, em i raitim sampela tok long wanpela nius bilong Brasil (O Estado de S.Paulo) na em i kamapim wanpela ripot i tok, ‘Long Brasil, winim 3 milion meri i save rausim bel long olgeta yia; dispela namba i winim olgeta narapela kantri.’ Na em i tok, ‘Tasol taim ol man i harim dispela tok, ol i no kirap mekim sampela samting bilong helpim ol dispela pikinini na bai ol i ken i stap laip.’ Olsem dispela profesa i tok, ol Brasil i wok strong long lukautim ol bikbus bilong ol, na ol i wok strong long helpim ol liklik pikinini na bai ol i no ken i dai, tasol ol i wok yet long kirapim gavman long em i ken orait long pasin bilong rausim ol pikinini i stap yet long bel.
OL SAMTING I NO STRET
Wanpela man bilong nius (Worldwatch), nem bilong em Alan Durning, em i tok, ‘I gat planti planti maniman long graun ol i gat planti milion kina, tasol i gat 100 milion rabisman i no gat ples bilong slip.’ Em i tok, ‘Planti milion man i save kaikai planti tumas, tasol i gat planti milion man ol i no gat kaikai. Sampela man i save kisim bikpela pe, tasol sampela i save kisim liklik pe tru. Ol kantri i save tromoi bikpela mani moa yet long wokim o baim ol samting bilong pait, tasol ol i no save helpim dispela 14 milion pikinini em pekpek wara na ol narapela kain sik i save kilim ol i dai long olgeta yia.’ Wanpela lain i gat wok long skelim dispela samting (Worldwatch) i tok, winim 1 bilion manmeri ol i stap rabis tru.