Ol Yangpela i Laik Save . . .

Bilong Wanem Mi Mas Lukautim Ol Liklik Bratasusa?

“YU PILIM olsem wanem, taim yu lukautim ol liklik bratasusa bilong yu?” Wanpela man bilong Kirap! i tromoi dispela askim long sampela ol yangpela man na meri. Ol i gat kain kain bekim bilong dispela askim.

Wanpela yangpela meri em i tok, “Mi laikim tru ol liklik pikinini, olsem na em i no hatwok tumas long mi.” Na wanpela yangpela man em i hambak na i tok, ‘Mi laikim dispela wok, long wanem mi bai i stap bos bilong ol!’ Ol narapela ol i kamapim klia olsem ol i no laik mekim o ol i les long mekim. Narapela yangpela meri em i tok, “Mi mekim long wanem mi mas helpim papamama bilong mi. Tasol mi no amamas long mekim.” Na narapela moa em i tok: “Sampela taim mi laik i go long ol piksa wokabaut samting, tasol mama i save tok, ‘Yu kisim liklik brata bilong yu i go wantaim yu.’ Tasol mi les long kisim em i go wantaim mi.”

“Mi Stap Tasol Bilong Lukautim Brata Bilong Mi?”

Namba wan pikinini man bilong Adam, em Kein, em i tromoi dispela askim taim papa i askim em long brata bilong em. (Stat 4:9) Na ating yu tu bai yu les taim papamama i tokim yu long lukautim ol bratasusa bilong yu. Ating bai yu tok, ‘Bilong wanem bai mi mas lusim hap taim bilong mi long senisim ol laplap bilong ol i doti o putim marasin long sua bilong ol?’ Wanpela yangpela meri i gat 15 krismas, em i belhat na i tok, ‘Mi mas lukautim ol samting bilong mi yet, tasol mi mas lukautim ol samting bilong ol bratasusa bilong mi tu.’

Yangpela meri Mana em i gat tok long narapela samting, em i tok: “Taim mipela i go long wanpela pak samting mi no save kisim amamas, long wanem oltaim mi mas lukautim ol liklik bilong mi. Man, bel bilong mi i save kros nogut tru. . . . Taim mi tokim [mama] long dispela samting, em i save tok, ‘Yu bikpela susa bilong ol, olsem na yu mas was long ol.’ Mi belhat nau na mi tok, ‘Sapos ol i bilong mi bai mi lukautim ol, tasol yu bin kamapim ol, olsem na yu yet yu mas lukautim ol.’ ”​—Nem bilong buk, The Private Life of the American Teenager, bilong Norman na Harris.

Ating ol bratasusa bilong yu tu bai ol i no amamas tumas long yu lukautim ol olsem bos bilong ol. Olsem na bai ol i mekim nabaut ol samting na bagarapim ol samting yu laik mekim bambai ol i ken i stap isi. Wanpela yangpela meri em i gat 14 krismas, em i tokim Kirap! olsem: “Sampela taim mi save les tru long lukautim ol bratasusa bilong mi. Long wanem mi tingim ol samting ol i save mekim na mi les tru. Sampela taim ol i pait na taim mi stretim tupela pinis bai ol i tok, ‘Yu ting yu husat? Yu no mama bilong mipela!’ Sapos ol i stap gutpela, ating bai mi amamas long lukautim ol.”

‘Bilong Wanem Mi Mas Lukautim Ol?’

Ol i askim wanpela bikpela lain yangpela manmeri long tingting bilong ol olsem: “Yu ting ol yangpela i mas mekim wanem ol kain wok insait long famili?” Orait, 32 pesen ol i tok, lukautim ol bratasusa! Tru planti yangpela long nau i save lukautim ol bratasusa bilong ol. Wok bilong lukautim haus em i hatwok tru na i putim bikpela hevi moa long mama. Na papa i save karim ol hevi bilong wok mani samting. Olsem na long nau planti mama ol i mas mekim ol wok long haus na ol i mas wok mani tu. Planti taim wok ol i mekim i winim tru skel bilong ol.

Man i lukautim ol pikinini em i bikpela helpim tru long papamama. Na sapos tupela wantaim i wok mani samting na ol i mas kisim wanpela bilong lukautim ol pikinini, orait em i mas lukautim gut ol inap long taim papamama i kam bek long haus. Tru ating papamama inap kisim wanpela meri bilong lukautim ol pikinini. Tasol taim ol i save yu wok long lukautim ol bratasusa bilong yu, ating ol i no ken tingting planti long ol pikinini i stap olsem wanem long haus samting.

Tru, wok bilong lukautim ol bratasusa bilong yu em i namba wan wok bilong papamama. (Efesus 6:4) Tasol taim yu wok long helpim ol long lukautim ol pikinini, dispela bai helpim papamama tu long mekim gut wok bilong ol insait long famili. Em i wanpela rot bilong stap “aninit long papamama” bilong yu. (Efesus 6:2) Na wok bilong lukautim ol bratasusa, dispela inap helpim yu long kamap gutpela man o meri long bihain. Wanpela yangpela meri i stori long taim em i save lukautim ol liklik bratasusa bilong em, long wanem mama wanpela i wok mani; em i wok olsem weita long wanpela haus kaikai samting. Yangpela meri i tok: “Long olgeta de mi save lukautim ol inap long taim mama i kam bek. Em i givim wanpela lista long mi long ol samting mi mas mekim, olsem: ‘Hangamapim ol laplap, na klinim haus, na redim kaikai bilong apinun.’ ” Em planti wok tumas long wanpela yangpela i ken mekim! Tasol em i tok: “Mi pilim i gutpela sapos mi ken mekim ol dispela wok. Mi wok long kamap bikpela hariap na mi inap tru long mekim gut ol dispela wok.”

Na taim yangpela man i lukautim ol pikinini, i no olsem em i no man tru, nogat. Planti man long bipo tru i bin mekim olsem tu. (Namba 11:12) Na aposel Pol i tok em i stap olsem wanpela “meri i givim susu long ol pikinini bilong en,” tasol Pol i no ting dispela samting i daunim em na em i no stap olsem man tru, nogat.​—1 Tesalonaika 2:7.

Kisim Stretpela Tingting

Yu inap kisim amamas taim yu lukautim ol liklik bratasusa, tasol dispela samting i no inap kamap wantu tasol​—yu mas wok strong long kamapim dispela amamas long bel bilong yu. Pastaim i gat sampela hevi inap kamap namel long ol bratasusa. Na sapos oltaim yu wok long kros pait wantaim ol brata na susa bilong yu, o sapos yu ting ol i bikhet manki, ating bai i hatwok tru long yu kisim stretpela tingting long lukautim ol. Olsem na sampela ol stori bilong Baibel inap helpim yu long dispela.

Tingim stori bilong yangpela man Josep na ol brata bilong em. Papa i save laikim tru Josep, olsem na ol brata bilong em ol i “bel nogut tru long Josep, na ol i no save mekim gutpela toktok long em.” Yu ting Josep i pilim olsem wanem taim papa i tokim em: “Ol brata bilong yu i lukautim sipsip i stap long hap bilong taun Sekem. Mi laik yu go lukim ol. . . . Yu go lukim ol brata, ol i stap gut, o nogat? Na yu lukim ol sipsip tu, ol i orait, o nogat? Yu lukim pinis, orait yu kam bek na toksave long mi.” Ol man bilong as ples ating ol i tingim yet pasin nogut em ol brata bilong Josep i bin mekim long Sekem long sampela yia i go pinis. (Stat 34:​25-31) Olsem na ating em i no gutpela long Josep i go lukim ol brata bilong em long dispela hap! Na i no dispela tasol​—ol brata bilong em bai i no amamas long lukim em i kam. Tasol em i daun long papa na em laikim tru ol brata bilong em, olsem na em i tok: “Yes, papa. Mi ken i go.” Na em i mekim wok papa i givim long em.​—Stat 37:​4, 13, 14.

Narapela yangpela i mekim gutpela pasin em Miriam. Taim Fero bilong Isip i putim tok long kilim i dai olgeta nupela pikinini man bilong ol Hibru, Miriam i lukautim liklik brata bilong em Moses, na Moses i no dai. Ol i putim pikinini Moses long wanpela liklik basket samting na putim em long wara na em i drip i go daun long wara Nail. Tasol Miriam i no ting em wok bilong papamama bilong was long Moses, na wanem samting i painim Moses em samting bilong tupela. Nogat. Miriam i no ting olsem. Em “i sanap longwe liklik bilong lukim wanem samting bai i kamap long en.” Na Miriam em i stretim rot bilong mama bilong Moses yet i ken kisim wok bilong lukautim em!​—Kisim Bek 2:​4-10.

Yumi tingim Kein, em i no bin tingim brata bilong em, nogat tru! Tasol ol yangpela bilong nau em ol i save lotu long God, ol i pilim olsem wok bilong lukautim ol liklik bratasusa bilong ol em i gutpela wok, maski i gat hatwok bilong en. Long 1 Jon 4:​21, Baibel i tok: “Man i save laikim tru God, em i mas laikim tru ol arapela manmeri bilong God.” Tru yumi mas laikim tru ol brata Kristen, tasol olsem wanem long ol narapela em ol i brata Kristen na brata bilong skin tu wantaim? Yumi mas laikim ol tu, a?

Taim yu tingim gut na yu gat bikpela laik long lukautim ol liklik bratasusa bilong yu, dispela bai helpim ol long kamap gutpela na strongpela long tingting, na long skin, na long ol samting bilong spirit tu. Olsem na wok bilong lukautim ol liklik pikinini em i wanpela bikpela wok, na stori i kamap bihain bai stori long olsem wanem yu inap lukautim gut liklik brata o susa bilong yu.

[Blok long pes 18]

‘Mi Bikpela Pinis​—I No Gat Wok long Wanpela i Lukautim Mi!’

Kirap! i askim sampela ol yangpela manmeri long tingting bilong ol, olsem pikinini i winim hamas krismas na narapela i no gat wok moa long lukautim em? Sampela i tok, taim pikinini i gat 11-pela o 13 krismas samting, na narapela i tok, 7-pela krismas! Wanpela yangpela meri em i tok: “Mi ting yumi no inap makim krismas bilong pikinini. Sapos yu gat 15 krismas pinis, tasol pasin na tingting i olsem bilong ol liklik pikinini, ating wanpela i mas lukautim yu.”

Ating tingting bilong papamama long dispela samting bai narapela kain long tingting bilong yu. Na ol narapela famili bai i gat narapela rot bilong skelim dispela samting. Ol pren bilong yu, taim papamama bilong ol i go raun bilong lukim piksa wokabaut samting, ol dispela yangpela i bosim haus, tasol tarangu yu mas stap aninit long wanpela em i was long yu. Na i hatwok moa sapos em i brata o susa bilong yu. Yangpela meri Alisa i stori long dispela na i tok, “Mi no bin amamas taim brata bilong mi i lukautim mi na tokim mi long ol samting mi mas mekim!”

Papamama i save tingim tru wanem ol samting em i gutpela long yu. Ol i kaunim long ol nius olsem planti kain pasin nogut i kamap na pasin bilong bagarapim ol pikinini tu, olsem na ol papamama i tingting planti na ol i pret long lusim yu wanpela i stap long haus. Taim yu stap wanpis long haus ating yu pret moa yet. Wanpela yangpela meri em i tok, ‘Mi pret nogut tru taim mi wanpela i stap long haus. Olsem na maski mi sem long narapela i mas lukautim mi, dispela i gutpela, nogut mi wanpela i stap na mi pret.’

Sampela taim papamama i no save bilipim tumas ol pikinini. Sapos kain samting olsem i kamap namel long yu wantaim papa na mama, orait yu ken toktok wantaim tupela na kamapim klia long ol olsem yu inap i stap wanpela na lukautim haus. Tasol sapos yu kros na bikmaus, em yu wok long soim papamama olsem yu no redi yet long i stap wanpis long haus. O yu ken tokim tupela olsem yu ken i stap long haus bilong wanpela poroman bilong yu.

Tasol ating papamama bai i strong yet long kisim wanpela bilong kam na lukautim yu. Tasol yu no ken bel nogut long em; tingim papamama​—tupela i laik bai em i kam na was long yu na bai em i stap inap liklik hap taim tasol. Olsem na yu mas wok gut wantaim em. Tasol olsem wanem sapos em i strong tumas long bosim olgeta samting? (Wanpela yangpela meri i stori long taim em i liklik na em i tok, ‘Sista bilong mi i ting em gutpela taim bilong bosim ol samting. Na em i strong long mi mas mekim ol wok bilong em wantaim.’) Nogut yupela i hatim kros i stap​—gutpela sapos yutupela i wet inap papa na mama i kam bek na yupela stretim dispela samting.