Olsem Wanem Ol Man Inap i Stap Wanbel

EM MUN Septemba, 1944, na pasin birua i pulap long graun. Namba 2 Pait i stap yet na bikpela pen na hevi i painim planti milion manmeri. Long dispela taim mi wanpela soldia bilong Jemani na mi stap kalabus long Frans.

Wanpela taim mi mas i go sanap long ai bilong ol soldia i holim gan, na ol i redi long sutim mi. Tasol bihain ol i kirap wokabaut i go. Ol i bin giamanim mi. Bel bilong mi i bagarap olgeta, tasol mi amamas long i stap laip yet. Sampela wik bihain ol i mekim gen. Mi abrusim bagarap, tasol ol i bin kilim i dai planti ol narapela kalabus, na sampela ol i dai long sik na hangre. Tasol wanem samting i bin kamap na mi stap kalabus olsem?

Ol i Holim Mi

Sampela mun paslain long dispela, long Jun 1944, ol ami bilong Inglan i brukim solwara na kam wokim kem long nambis bilong Frans bilong putim ol soldia na ol samting bilong pait long en. Ol i go pait long hap bilong not long Frans na ol ami bilong Jemani i mas surik i go bek liklik. Mi wanpela saiden-meja long ami bilong pait long balus. Long mun Ogas, wanpela lain bilong Frans i wok hait long pait long ol Jemani, em ol i kolim Maki, ol i holim hap lain bilong mipela, em mi wantaim 16 moa. Mipela stap inap sampela mun long wanpela ples kalabus bilong ol soldia, na bihain ol i kisim mipela i go long narapela ples kalabus klostu long Monluson long hap bilong saut long Frans.

Ol kalabus i mas mekim strongpela wok, tasol mi wanpela ofisa na ol i no subim mi long mekim. Tasol mi laik mekim wanpela wok, olsem na ol i makim mi bilong bosim ol wok long haus kuk. Wanpela taim sampela nupela kalabus i kam, na wanpela em i yangpela man tru, nem bilong em Willy Huppertz, em i wanples bilong mi. Mi tokim ofisa mi laik bai Willy i ken wok wantaim mi long haus kuk, na ol i orait long dispela.

Bihain mitupela Willy i kamap pren tru, em dispela kain pasin pren inap mekim ol man i stap wanbel. Tasol pastaim mi laik stori long sampela samting mi bin tingting planti long en.

Bilong Wanem Pasin Birua i Stap?

Taim mi manki yet long Aken, Jemani, mi tingting planti long ol lotu i no stap wanbel, na dispela pasin i stap long haus bilong mipela tu. Papa em i wanpela Luteran, tasol Mama em i Katolik. Olsem na Mama i strong long mi wantaim susa bilong mi i skul long ol bilip bilong lotu Katolik. Kirap long taim mi liklik yet, mi save go oltaim long lotu Katolik, tasol mi no save, bilong wanem Papa i bihainim narapela bilip. Mi wok long i go bikpela na planti taim mi tingting, ‘Sapos i gat wanpela God tasol, bilong wanem i gat planti lotu?’

Orait Namba 2 Pait i kirap long 1939 na ol i singautim mi i go long ami bilong pait long balus. Pastaim mi lain long dispela wok long Jemani, tasol bihain ol i salim mi i go long Viena long Ostria bilong lain. Long Disemba 1941, ol i salim mi i go long noten Holan. Long dispela hap mi bungim Jantina, em wanpela yangpela meri bilong Den Helda. Maski kantri bilong mipela i stap birua birua na ol i pait, mi bel tru long em na em i bel tru long mi.

Bihain liklik, long Epril 1942, ol i salim mi i go long La Rosel long hap bilong saut long Frans. Long dispela taim mi stap saiden-meja, na lain bilong mipela i mas skulim ol nupela man bilong ami na lukautim ples balus. Olsem na insait long ol dispela yia bilong pait, mi yet mi no bin mekim wanpela pait. Mi amamas tru long dispela, long wanem, mi no laik kilim i dai wanpela man.

Tasol long dispela taim bilong pait mi tingting planti long wanpela samting. Mi lukim ol pris pasto bilong kain kain lotu​—Katolik, Luteran, Episkopal, na ol narapela​—ol i blesim ol balus bilong pait wantaim ol boskru bilong en taim ol i redi long i go antap na tromoi bom long ol birua. Planti taim mi save tingting, ‘God i helpim wanem lain?’ Tasol mi no bin askim ol pris pasto bilong ami, long wanem, mi pilim olsem ol tu i no save.

Ol soldia Jeman i pasim wanpela let i gat rait long en (lukim piksa long pes 12 long han kais antap) olsem Gott mit uns (God i stap wantaim yumi). Tasol mi tingting, ‘Olsem wanem na God i no ken i stap wantaim ol soldia long lain bilong ol birua em ol i gat wankain lotu olsem mipela na ol i beten long dispela God mipela tu i beten long em?’

Pait i go yet inap sampela yia moa, na wan wan taim mi inap i go long Holan na lukim Jantina. Laspela taim mi bin i go lukim em, em long Disemba 1943. Long dispela taim mitupela i pasim tok long marit. Long 1944 i olsem ol birua i laik winim mipela, na taim ami bilong ol i kamap long Frans, nau mipela i kirap long ting Jemani bai lus long pait. Man! Mipela i ting dispela samting i no inap kamap! Orait long Ogas ol i holim mipela 17 man na mipela i kalabus.

I Stap Bilong Mi Long Kalabus

Bihain ol i larim mipela ol kalabus long hap bilong Monluson i raitim pas long ol famili bilong mipela. Olsem na mi inap raitim pas i go long Jantina. Bihain mi wantaim sampela kalabus moa i tok long mipela i laik wok long wanpela fam sampela lain i wok bung long en, tasol mipela i stap yet olsem lain kalabus. Mi amamas long i stap long fam na mekim wok. Em i narapela kain long i stap bilong mi bipo long biktaun.

Pait long Yurop i pinis long Me 1945, tasol mipela i stap olsem lain kalabus inap long Disemba 1947, na nau gavman bilong Frans i pinisim mipela long kalabus. Em i tok mipela ken go insait long wanpela lain ami bilong Frans i save go long ol narapela kantri na pait, o mipela ken i stap long Frans olsem ol wokman, i go inap long pinis bilong 1948. Mi laik wok long fam, olsem na mi wantaim sampela kalabus moa i go wok long wanpela fam. Nau mipela i no stap olsem ol kalabus tru, tasol mipela i no inap raun tumas, na i gat sampela tambu i stap yet. Olsem na taim mipela i kisim ol pas long famili, mipela i save amamas tru.

Mi Bungim Gen Jantina

Wanpela taim long 1947 mi kisim pas long Jantina na ating em i popaia na putim wanpela pepa insait long skin pas i gat namba bilong ol haus na hamas buk na nius samting em i bin tilim. Mi tingting, ‘Jantina i mekim liklik wok mani long ol buk samting.’ Tasol nogat. Jantina i bin bungim ol Witnes Bilong Jehova na nau em i save go long ol haus na autim tok na tilim ol buk samting bilong Baibel, na em i no wok mani long ol dispela buk. Tasol mi no save long dispela samting.

Bihain liklik, long Disemba 1947, ol i larim mipela ol kalabus i go malolo long ples inap 4-pela wik. Tasol mipela i mas kam bek long Frans na pinisim wok bilong mipela. Jantina i lusim Holan na go long Jemani bilong i stap 4-pela wik na lukim mi wantaim papamama bilong mi. Mi no bin bungim em inap 4-pela yia pinis, olsem na nau bel bilong mitupela i amamas nogut tru. Long dispela taim mi kisim save long dispela pepa i bin stap wantaim pas bilong em. Em i tokim mi em i wanpela Witnes Bilong Jehova, na em i amamas long tokim mi long ol gutpela tok em i bin lain long en.

Mi pilim olsem dispela tok em tok i tru, tasol mi tokim em, mi laik i stap yet olsem wanpela Katolik. Mi ting save bilong em i no inap winim save bilong ol pris em ol i bin lain long ol tok bilong lotu inap planti yia. Na famili bilong mi i nolaik tru long nupela bilip bilong Jantina, na pasin bilong ol i mekim na mi tu mi no laikim.

Tingting Bilong Mi i Senis

Orait 4-pela wik bilong mi i pinis na mi go bek long Frans. Mi wok long rausim ol klos long switkes na mi painim wanpela buk ol i kolim Deliverance. Jantina i bin putim taim em i pulimapim ol klos bilong mi long switkes. Bilong amamasim em mi kirap kaunim long dispela nait yet. I no longtaim na mi lukim olsem dispela buk i bekim ol askim mi bin tingim taim mi stap kalabus. Nau bel bilong mi i kirap na mi laik kaunim i go olgeta.

Nau mi tingim wanpela tok bilong Baibel Jantina i bin kolim: “Yupela bai i save long tok tru, na tok tru bai i mekim yupela i kamap fri.” (Jon 8:32) Tru tumas, mi pilim olsem mi kisim stretpela save long planti samting. Olgeta lain man i olsem wanpela famili tasol. (Aposel 17:​26-28) Pasin bilong ol Kristen tru, em narapela i laikim tru narapela; na ol i no save pait na kilim i dai ol man olsem mi bin lukim planti man i mekim, em ol i tok ol i Kristen. (Jon 13:​34, 35; 1 Jon 3:​10-12) Nau mi save, pasin bilong litimapim kantri em i rot bilong Satan long brukim ol man na ol i no inap pas gut wantaim olsem brata brata.

Nau mi kisim save olsem: Taim olgeta man i bihainim tok bilong Krais Jisas, long dispela taim tasol pasin wanbel inap kamap. Ol lain bilong graun i no inap mekim olsem, olsem na yumi mas wetim gavman bilong God tasol i kamapim, em dispela gavman Jisas i bin kolim insait long beten bilong em. (Matyu 6:​9, 10) Mi lainim ol dispela samting na mi pilim olsem mi stap fri tru na mi stap belgut. Mi tenkyu tru long Jantina i bin pulimapim dispela buk long switkes! Tasol nau bai mi mekim wanem?

Mi Wok Long Kamap Strong

Orait, sampela de bihain wanpela man nem bilong em Lucien i kam long fam mi wok long en na em i tok em i wanpela Witnes Bilong Jehova. Em i tok, dispela meri bai mi marit long en i bin tokim brens-ofis bilong ol Witnes long Frans long salim wanpela man i kam lukim mi. Lucien em i gutpela man na mi laikim pasin bilong em. Mi bin lainim gut tok ples Frans na mitupela inap toktok gut wantaim.

Mi orait long em i stadi wantaim mi long Baibel. Olsem na long olgeta Sande Lucien wantaim meri bilong em Simone i kam kisim mi long fam na mipela i go long haus bilong tupela bilong mekim stadi. Bihain long en mipela save raun liklik na toktok long ol gutpela samting Jehova i bin wokim. Tupela i gutpela tisa, na tu, ol i mekim pasin olsem pren tru bilong mi​—inap planti yia mi no gat pren tru. Na tupela i bilong Frans​—em dispela lain mi bin skulim ol man long tromoi bom long ol!

Mi stadi na mi wok long kamap strong, na Lucien i singautim mi i go long bung bilong tingim i dai bilong Krais, em Memorial, long Mas 25, 1948. Mi amamas tru long dispela gutpela miting, na inap long nau mi no bin lusim wanpela miting bilong Memorial.

Mi wok long kamap strong long spirit na Jantina i amamas, olsem na em i kam long Frans. Mitupela i marit long Novemba 1948. Lucien na Simone i wokim gutpela kaikai bilong marit, na tupela painia (em ol Witnes i save autim tok long olgeta de) ol tu i kam long dispela kaikai. Dispela gutpela bung i mekim na mi bilip moa yet olsem ol Witnes i bihainim tru dispela pasin bilong laikim tru ol narapela, em Jisas i tok bai makim lain tru bilong em.​—Jon 13:35.

Go Long Jemani na Nupela Kantri

Long Disemba 1948, mitupela i go bek long Jemani na mipela i mekim wok Kristen bilong autim tok. Famili bilong mi i laik pasim mipela, tasol mipela i wok yet long helpim ol man i gat pasin daun na bai ol i ken kisim save long rot bilong i stap wanbel tru na kisim gutpela sindaun.

Long 1955 mitupela Jantina i go long Ostrelia. Pastaim mipela i sindaun long gutpela ailan Tasmenia, i stap daunbilo long Ostrelia, na bilong kamap long en mipela mas brukim solwara Bas Stret. Ol brata sista i mekim gutpela pasin sori na helpim mipela long lainim tok Inglis, em narapela tok ples nau mipela i save long en.

Mipela i stap 13 yia long Tasmenia, na long 1969 mipela i go long hap bilong not, long Kwinslan, na mipela i stap yet long dispela hap. Mi wanpela elda Kristen long kongrigesen na mi amamas tru long wok wantaim Jantina long mekim wok bilong Jehova. Sampela taim mipela i bin go bek long Jemani bilong kisim malolo na mipela i stadi wantaim Willy Huppertz long Baibel. Bihain em tu i givim skin bilong em long mekim wok bilong Jehova, na nau mipela i stap pren tru, em dispela kain pasin pren i save mekim olgeta man i stap wanbel.

Sampela taim mi tingim bek i stap bilong mi taim mi stap kalabus long Frans, na mi tenkyu tru long mi inap kisim save long gutpela Man bilong wokim yumi, em God Jehova. Nau mi amamas tru long Jantina i bin pulimapim buk Deliverance long switkes bilong mi na raitim pas long ol Witnes long Frans na tokim ol long kam lukim mi! Dispela i mekim na planti gutpela samting i painim mi, na i stap bilong mi wantaim meri bilong mi i gutpela tru na mipela i kisim planti gutpela blesing.​—Em stori bilong Hans Lang.

[Piksa long pes 15]

Mi wantaim Jantina long nau